Revelation 4

nyankole

← Chapter 3 Jump to: Chapter 5 →

1Ebyo ku byahwaire, naimutsya amaisho, naareeba omu iguru orwigi rumwe rwigwire! Naahurira eiraka eri naabandize kuhurira niringambira nk'ery'enzamba, nirigira riti: Inamuka oije aha, nkworekye ebiraabeho, ebi byarugaho.

2Ahonaaho naayeshanga ndi omuri Mutima, kandi reeba, ekitebe ky'obukama kikaba kitairwe omu iguru, kiriho okisingamiho.

3Ogwo owaabaire akisingamiho akaba naayengyengyeta nk'eibaare ry'obuguzi bwingi erya yasipi n'erya saarudio. N'ekyo kitebe kye kikaba kyehinguririziibwe omuhanganzima gw'erangi erikushusha ey'eibaare rya simaragido.

4Kandi ekyo kitebe ky'obukama kikaba kyehinguririziibwe ebindi bitebe by'obukama makumi abiri na bina, bishutamirweho abakuru makumi abiri na bana bajwaire ebirikwera, baine n'ebirunga by'ezaabu omu mitwe yaabo.

5Omuri ekyo kitebe ky'obukama haarugamu emiryabo n'okugamba kw'enkuba n'okuhinda. Omu maisho gaakyo haayakiramu emuri mushanju z'omuriro; niyo mitima mushanju eya Ruhanga.

6Omu maisho g'ekyo kitebe ky'obukama hariho ekiri nk'enyanja y'ekirahuri, erikwogibwamu amaisho nk'eibaare rya kirisitaalo. Okwehinguririza ekyo kitebe, ahari buri rubaju rwakyo, hakaba hariho ebihangwa bina ebiine amagara, ebiijwire amaisho omu maisho n'enyima.

7Ekihangwa ky'okubanza ekihuriire kikaba nikishusha entare. Ekihangwa kya kabiri ekihuriire kikaba nikishusha enimi. Ekihangwa kya kashatu ekihuriire kikaba kiine ahamaisho nk'ah'omuntu. Reero ekihangwa kya kana ekihuriire kikaba nikishusha empungu erikuguruka.

8Ebyo bihangwa bina ebihuriire bikaba biine amapapa mukaaga buri kimwe, biijwire amaisho embaju zoona, omunda n'aheeru. Nyomushana na nyekiro bikaba nibyeshongora bitarikuremuura, biti: Orikwera, Orikwera, Orikwera, ni Mukama Ruhanga ow'obushoboorozi bwona, owaabaire ariho, oriho, kandi oribaho.

9Ebyo bihangwa bihuriire, ku byabaire biha ekitiinwa Ogwo osingami aha kitebe, kandi obaho ebiro n'ebiro, byamuhimbisa kandi byamusiima,

10abo bakuru makumi abiri na bana bajuumara ahansi omu maisho g'Ogwo osingami aha kitebe ky'obukama, baramya Ogwo obaho ebiro n'ebiro. Banaga ahansi ebirunga byabo omu maisho g'ekitebe ky'obukama, nibeeshongora bati:

11Mukama Ruhanga waitu, niiwe oshemereire kuheebwa ekitiinwa n'okuhimbisibwa n'obushoboorozi; ahabw'okuba niiwe waahangire ebintu byona, haza ahabw'okusiima kwawe byabaho kandi byahangwa.

← Chapter 3 Jump to: Chapter 5 →

Recommended Reading

Commentary Revelation Commentaries → Devotional Revelation Devotional Guide → Get This Bible nyankole Study Bible →