Revelation 14

nyankole

← Chapter 13 Jump to: Chapter 15 →

1Ku naimukize amaisho, naareeba Omwana gw'Entaama ayemerereire aha Rushozi Siyooni, hamwe n'abantu akasiriira kamwe n'obukumi buna n'enkumi ina, abu aha buso bwabo haabaire hahandiikirweho eiziina rye n'eiziina rya Ishe.

2Reero naahurira eiraka niryema omu iguru, riri nk'amaizi maingi garikuhoorera, kandi riri nk'okugamba kuhango kw'enkuba. Eryo iraka ri naahuriire rikaba riri nk'ery'abateezi b'enanga abarikuteera enanga zaabo.

3Batyo baayeshongora ekyeshongoro kisya omu maisho g'ekitebe ky'obukama n'omu g'ebihangwa bina ebiine amagara, n'omu g'abakuru bari. Haza tiharabaireho n'omwe owaabaasize kwega ekyo kyeshongoro, kureka abo akasiriira kamwe n'obukumi buna n'enkumi ina, abacungwirwe.

4Nibo bantu abarikwera abatareeteeraine na bakazi, bakaguma bari abashugaine. Nibo abo abakuratira Omwana gw'Entaama ahu aza hoona. Abo bakacungurwa, baihwa omu bandi bantu, baaba ab'okubanza omu bahongyerwa Ruhanga n'Omwana gw'Entaama.

5Manya omu kanwa kaabo hakaba hatabamu bishuba, ahabw'okuba bakaba bataine kamogo.

6Bwanyima nkareeba maraika ondi naazeereerera hare omu kaabunga aine Amakuru Marungi agatahwaho g'okurangirira abatwire omu nsi, ab'amahanga goona n'enganda zoona n'endimi zoona.

7Atyo agamba n'eiraka rihango, ati: Mutiine Ruhanga mumuhe n'ekitiinwa, ahabw'okuba eshaaha ye y'okucweramu orubanja yaahika; kandi muramye Omuhangi w'eiguru n'ensi n'enyanja n'enshuro z'amaizi.

8Haakurataho maraika ondi owa kabiri, yaagira ati: Rugwire! Rugwire Babulooni orukuru! Orwo orwanywaisize amahanga goona viino y'ebikwatiraine n'obushambani bwarwo!

9Reero maraika ondiijo owa kashatu yaakurataho naagamba n'eiraka rihango, ati: Omuntu weena oraaramye ekyo kinyamaishwa n'ekishushani kyakyo, akateebwa akamanyiso aha buso bwe, nari aha mukono gwe,

10nawe aryanywa viino y'ekiniga kya Ruhanga, erishukwa omu kikopo ky'ekiniga kye etafungwirwe, kandi aryabonabonesibwa na sulufuru erikubuguma, omu maisho ga baamaraika abarikwera, n'omu maisho g'Omwana gw'Entaama.

11Omwika gw'okubonabonesibwa kwabo guryaguma nigucumbuuka ebiro n'ebiro; kandi abaramya ekyo kinyamaishwa n'ekishushani kyakyo, n'omuntu weena oteebwaho akamanyiso k'eiziina ryakyo, tibarigira bu bahuumwire nyomushana na nyekiro.

12Aho niho okugumisiriza kw'abarikwera, aboorobera ebiragiro bya Ruhanga, bakaikiriza Yesu, kurikwetengyerwa.

13Kandi ntyo mpurira eiraka niryema omu iguru, nirigira riti: Handiika oti: Okwiha hati, abafeera omuri Mukama baine omugisha! Eego, nikwo Mutima arikugira, ngu babone kuhuumura emirabanamu yaabo, ahabw'okuba ebi bakora bigyenda bibakuratiire.

14Bwanyima nkaimutsya amaisho, naareeba ekicu kirikwera, n'okishutamiho naashusha omuntu, aine ekirunga ky'ezaabu aha mutwe, n'omusyo gw'obwogi omu ngaro.

15Na maraika ondi yaaruga omuri Nyaruju, yaayeta n'eiraka rihango Ogwo oshutami aha kicu, ati: Gira omusyo gwawe, ogyeshe, ahabw'okuba obunaku bw'okugyesha bwahika, manya emyaka y'omu nsi eyezire.

16Mpaho owaabaire ashutami aha kicu, yaatayo omusyo gwe aha nsi, egyo myaka y'omu nsi yaashaaruurwa.

17Kandi maraika ondi yaaruga omuri Nyaruju y'omu iguru, nawe aine omusyo gw'obwogi.

18Bwanyima maraika ondiijo yaarugayo naaruga aha itambiro, niwe maraika oine obushoboorozi aha muriro. Atyo ayeta n'eiraka rihango ogwo oine omusyo gw'obwogi, ati: Tayo omusyo gwawe, orundaane ebijuma by'emizaabibu y'omu nsi, ahabw'okuba bihiisize.

19Mpaho maraika atayo omusyo gwe aha nsi, arundaana ebijuma byayo eby'emizaabibu, abitambika omu inyuukiro rihango rya viino y'ekiniga kya Ruhanga.

20Haza binyuukirwa omuri eryo inyuukiro aheeru y'orurembo, birugwamu omutunga gw'eshagama, eijura, ehitsya obwemi oburikuhika aha kifunga ky'enkoba z'embaraasi, n'oburaingwa bwa kilomita nka magana ashatu.

← Chapter 13 Jump to: Chapter 15 →