Revelation 21

nyankole

← Chapter 20 Jump to: Chapter 22 →

1Bwanyima nkareeba eiguru erisya n'ensi ensya. Manya eiguru ery'okubanza n'ensi ey'okubanza bikaba byahwaireho, kandi amayanja gatakiriho.

2Naareeba n'orurembo orurikwera, niyo Yerusalemu ensya, neeshuuma neeruga omu iguru ahari Ruhanga, eteekateekirwe nk'omugore ocumiirwe iba.

3Ntyo mpurira eiraka rihango niryema aha kitebe ky'obukama, nirigira riti: Reeba, mbwenu obutaaho bwa Ruhanga buri omu bantu! Aryatuura nabo, babe abantu be, nawe wenka aryaguma nabo ari Ruhanga waabo.

4Aryabaragaza amarira goona aha maisho, Rufu eryaba etakiriho, nobu kwakuba okucura nari okurira nainga obusaasi. Manya ebya ira biryaba byahwaireho.

5Mbwenu Ogwo owaabaire ashutami aha kitebe ky'obugabe, yaagira ati: Reeba, ebintu byona nimbihindura bisya! Atyo agira ati: Handiika ebi: Ebi bigambo n'eby'okwesigwa kandi n'eby'amazima.

6Reero angira ati: Kyahikiirizibwa! Niinye Alufa kandi Omega, obutandikiro n'obugarukiro. Weena oine eiriho, ndyamuheera busha amaizi agarikuruga aha nshuro y'amaizi g'amagara.

7Weena orikusingura, aryahungura ebyo, kandi ndyaba Ruhanga we, nawe abe omwana wangye.

8Kwonka abatiini n'abatarikwikiriza n'abakora ebihagaro n'abaitsi n'abakora ebikwatiraine n'obushambani n'abarogi n'abaramya ebishushani, n'ababeihi boona, omugabo gwabo guryaba enyanja erikwaka omuriro n'obuganga bw'ekibiriiti. Okwo nikwo kufa kwa kabiri.

9Bwanyima hakaija omwe ahari baamaraika omushanju, abaabaire baine enyabya omushanju ziijwire ebibonaboneso omushanju ebirikuhereeruka. Maraika ogwo yangambira naagira ati: Ija, nkworekye Omugore, muk'Omwana gw'Entaama.

10Atyo antwara aha rushozi ruhango kandi ruraingwa, ndi omuri Mutima. Anyoreka orurembo orurikwera, Yerusalemu, nirushuuma niruruga omu iguru ahari Ruhanga.

11Rukaba nirumurinkanisibwa ekitiinwa kya Ruhanga. Okumurinkana kwarwo kukaba kuri nk'okw'eibaare ry'obuguzi bwingi erya yasipi, eririkwogibwamu amaisho nka kirisitaalo.

12Rukaba rwine orugo ruhango ruraingwa, oruriho amarembo ikumi n'abiri, kandi ahari ago marembo hariho baamaraika ikumi na babiri, ago marembo gahandiikirweho amaziina g'enganda ikumi na ibiri z'Abaisiraeli;

13buri rubaju ruriho amarembo ashatu: oburugwa-izooba amarembo ashatu, obukiizi-bwa-bumosho amarembo ashatu, obukiizi-bwa-buryo amarembo ashatu n'oburengyerwa-izooba amarembo ashatu.

14Kandi orugo rw'orwo rurembo rukaba rwine amabaare g'obuhamizo ikumi n'abiri, gariho amaziina ikumi n'abiri g'entumwa ikumi na ibiri ez'Omwana gw'entaama.

15Maraika ogwo owaagambire naanye, akaba aine orubingo rw'ezaabu kugyeresa orwo rurembo n'amarembo gaarwo n'engo zaarwo.

16Orwo rurembo embaju zaarwo ina zikaba nizingana, oburaingwa bwarwo nibingana n'obukiizi bwarwo. Atyo orwo rurembo arugyeresa orubingo rwe, ruhitsya kilomita enkumi ibiri na magana ana; haza obwo, oburaingwa bwarwo n'obukiizi n'obwemi nibingana.

17Agaruka agyera orugo rwarwo, ruhitsya mikono igana na makumi ana n'ena. Haza emigyerere y'abantu niyo maraika yaarugyeziremu.

18Orugo orwo rukaba rwombekyesiibwe amabaare g'obuguzi bwingi aga yasipi, kandi orurembo rwo ruri ezaabu empuuhe, nirwogibwamu amaisho nk'ebirahuri.

19Emisingi y'orugo rw'orwo rurembo ekaba ehunzirwe amabaare g'obuguzi bwingi aga ibara muringo. Ogw'okubanza guhunzirwe amabaare aga yasipi, ogwa kabiri aga saafiro, ogwa kashatu aga kalukeedoni, ogwa kana aga simaragido,

20ogwa kataano aga sarudoni, ogwa mukaaga aga saarudio, ogwa mushanju aga kirisoolito, ogwa munaana aga beerilo, ogwa mwenda aga topaazi, ogwa ikumi aga kirisoopuraso, ogwa ikumi na gumwe aga huwakinto, n'ogwa ikumi n'ebiri ag'ametisito.

21Reero amarembo ikumi n'abiri gakaba gari eruuru ikumi na ibiri, buri irembo rikozirwe n'eruuru emwe. Haza enguuto y'orwo rurembo eri ezaabu empuuhe, neeyogibwamu amaisho nk'ekirahuri.

22Omuri orwo rurembo tindareebiremu nyaruju, ahabw'okuba Mukama Ruhanga Ow'obushoboorozi bwona n'Omwana gw'Entaama nibo nyaruju yaarwo.

23Orwo rurembo tirwetenga izooba nari okwezi kurwakira, ahabw'okuba ekitiinisa kya Ruhanga nikyo kirumurukisa, kandi Omwana gw'Entaama niwe aba orumuri rwarwo.

24Amahanga g'omu nsi garyagyenda nigamurikirwa okwaka kwakyo, n'abagabe b'omu nsi baryarureetamu eby'obutungi bwabo.

25Reero amarembo gaarwo tigarigira bu gakingirwe nyomushana; kandi tiharibayo ekyeetwa ekiro.

26Baryarureetamu ekitiinwa ky'amahanga n'eby'obutungi bwago.

27Kwonka ekintu kyona ekitashemeire tikirirutaahamu, nobu yaakuba omuntu weena okora ebihagaro nari obeiha, kureka abo bonka abahandiikirwe omu kitabo ky'amagara, eky'Omwana gw'Entaama.

← Chapter 20 Jump to: Chapter 22 →