Revelation 19

nyankole

← Chapter 18 Jump to: Chapter 20 →

1Ebyo ku byahwaire, naahurira eiraka rihango eriri nk'ery'ekimbuuro kihango eky'ab'omu iguru niriteera akaari riti: Haleluya! Okujuna n'ekitiinwa n'obushoboorozi n'ebya Ruhanga waitu!

2Emicwere ye y'emanja n'ey'amazima kandi n'ey'oburyo! Manya afubiire orurembo maraaya orukuru, orwasiisize ensi ebikwatiraine n'obushambani bwarwo. Mbwenu Ruhanga aruhoire, naarutura okwita abaheereza be.

3Bongyera kandi bateera akaari bati: Haleluya! Omwika gurikururugamu guryaguma nigucumbuuka ebiro n'ebiro!

4Mpaho abakuru bari amakumi abiri na bana, hamwe n'ebihangwa biri ebina ebihuriire, baajuumara ahansi, baaramya Ruhanga osingami aha kitebe ky'obukama, nibagira bati: Amiina. Haleluya!

5Reero eiraka ryayema aha kitebe ky'obukama, niryamuza riti: Musingize Ruhanga waitu, imwe mwena abagaragwa be, imwe abamutiina, abato n'abakuru!

6Bwanyima nkahurira eiraka riri nk'ery'ekimbuuro kihango, eririkuhoorera nk'amaizi maingi, kandi eririkuhinda nk'enkuba z'amaani, nirigira riti: Haleluya! Mukama Ruhanga waitu Ow'obushoboorozi bwona ari aha ngoma naategyeka!

7Ka tushemererwe, tunanukye, tumuhe ekitiinwa; ahabw'okuba obugyenyi bw'obushwere bw'Omwana gw'Entaama bwataaha. Omugore we ayeteekateekire.

8Ayejwekire emyenda mirungi ya kitaani, erikwera kandi erikwengyengyeta manya kitaani egyo enungi nibyo by'okuhikiirira ebi abarikwera baakozire.

9Maraika ogwo angira ati: Handiika oti: Baine omugisha abeetwa aha bugyenyi bw'obushwere bw'Omwana gw'Entaama. Kandi angira ati: Ebyo n'ebigambo bya Ruhanga eby'amazima.

10Ntyo njuumara aha bigyere bye kumuramya, kwonka angira ati: Reka, ekyo otakikora! Ndi omuheereza mugyenzi waawe, kandi owa beene waanyu abahamira aha bujurizi bwa Yesu. Ramya Ruhanga. Manya obujurizi bwa Yesu niyo ntima y'oburangi.

11Bwanyima nkareeba eiguru rishuurwirwe, ntyo ndeeba embaraasi rujeru. Owaabaire agishutamiho akaba naayeetwa Mwesigwa kandi Mazima; niwe acwa emanja, akarwana engamba omu kuhikiirira.

12Amaisho ge nigashusha endimi z'omuriro, n'aha mutwe gwe hariho amahunde maingi, kandi hahandiikirweho eiziina eritaine muntu weena orikurimanya, kureka we wenka.

13Ajwaire ekanzu ejabikirwe omu shagama, kandi eiziina eri arikwetwa ni Kigambo wa Ruhanga.

14Reero amahe g'omu iguru, agajwaire emyenda ya kitaani erikwera kandi ecumire, gaamukuratira gatembire embaraasi zaarujeru.

15Omu kanwa ke haarugamu rurara y'obwogi y'okutemesa amahanga; kandi aryabategyekyesa enkoni y'ekyoma, aribatiirire einyuukiro rya viino y'ekiniga kingi kya Ruhanga Ow'obushoboorozi bwona.

16Aha kanzu ye n'aha kibero kye hahandiikirweho eiziina: Omugabe w'abagabe, Mukama w'abakama.

17Bwanyima nkareeba maraika ayemereire omu izooba. Yaayeta n'eiraka rihango amahungu goona agazeereera ahaiguru omu kaabunga, ati: Nimwije, muteeranire aha bugyenyi bukuru bwa Ruhanga!

18Mwije murye enyama z'abagabe n'ez'abakuru b'engabo, n'ez'amamanzi n'ez'embaraasi n'ez'abazitembire n'ez'abantu boona, ab'obusingye n'abahuuku, abakuru n'abato!

19Ntyo ndeeba ekinyamaishwa kiri n'abagabe b'omu nsi, hamwe n'amahe gaabo, bateeraine kurwanisa ogwo oshutami aha mbaraasi n'eihe rye.

20Haza ekyo kinyamaishwa kyakwatwa hamwe n'omurangi w'ebishuba, owaakoreire omu maisho gaakyo obumanyiso. Obwo bumanyiso nibwo yaabaire abeihabeihesa abaatairweho akamanyiso k'ekyo kinyamaishwa, bakaramya ekishushani kyakyo. Ekyo kinyamaishwa hamwe n'omurangi w'ebishuba byombi bihuriire, byanagwa omu nyanja y'omuriro erikwakisibwa sulufuru.

21Abaatsigaireho baitwa rurara y'Ogwo oshutami aha mbaraasi, eyaarugire omu kanwa ke; haza amahungu goona gaigutira kimwe enyama z'emitumbi yaabo.

← Chapter 18 Jump to: Chapter 20 →