Song of Solomon 1

nyankole

Jump to: Chapter 2 →

1Eki n'ekyeshongoro rukira-byona ekya Solomooni.

2Nkaabaasibwa ki onnywegyeza eminwa yaawe, ahabw'okuba rukundo yaawe neehita viino;

3amajuta gaawe agu oyesiiga nigataamirana omugaju, eiziina ryawe ni nk'amajuta gu baashuka; nikyo empangare zikukundira.

4Onyehitsye omu ntegye, twehuute, omugabe antaahize omu kishengye kye, nitwija kushemererwa, twesiimire omuriiwe; tuhaise rukundo yaawe okukira viino.

5Imwe bahara ba Yerusalemu 'mwe, niinyiragura, kwonka ndi murungi, ndi nk'amahema ga Kedari; nari nk'emikingo y'omu kikaari kya Solomooni.

6Murekye kunshamaarira, ngu niho ndikwiragura; manya eizooba niryo ryambabwire. Beene maawe bakangirira ekiniga, bampindura omurinzi w'emisiri y'emizaabibu, haza ogwangye tinaagurinda!

7Iwe, ou nkunda n'omutima gwangye gwona, ngambira ei oriisiza obusyo bwawe bw'entaama, n'ei obuzaagiriza omu ihangwe; ndekye kuba nk'ekizengyerezi omu masyo ga bagyenzi baawe.

8Iwe mukazi orikuhita abandi 'we, ku oraabe otarikuhamanya, kuratira ekirari ky'obwo busyo; oriisize abaana b'entaama zaawe aha rubaju rw'amahema g'abariisa.

9Iwe nkunzi yangye, ninkushushanisa ebuguma y'embaraasi z'ebigaari bya Faraaho.

10Enshaya zaawe zihunzirwe emishagiko. N'amaraka gaawe gahunzirwe enkwanzi z'amabaare g'obuguzi bwingi.

11Nitwija kukukorera amahunde g'ezaabu, n'amapeesha g'efeeza.

12Omugabe ku yaabaire ahuumuriire aha kitanda kye, amajuta gangye gaataamirana omugaju.

13Nkunzi yangye ahariinye ni nk'akashaho k'entsinda y'omugaju, akari ahagati y'amabeere gangye.

14Nkunzi yangye ni nk'enganda y'ebirabyo eby'omu misiri y'emizaabibu ya Engedi.

15Nkunzi yangye, ebishi, ori murungi! Ebishi, ori murungi; amaisho gaawe ni nk'ag'amaiba.

16Iwe nkunzi yangye, ebishi ori murungi! Buzimazima ori murungi, ekitanda kyaitu kyariirwe obunyaatsi bw'omuroba.

17Emitambiko y'enju yaitu n'eya kaarwenda, n'emiraba yaayo n'emiryohe.

Jump to: Chapter 2 →