Song of Solomon 7

nyankole

← Chapter 6 Jump to: Chapter 8 →

1Iwe mwishiki 'we, ori nka muhara w'omugabe, ebishi ebigyere byawe ni birungi biri omu nkaito; ebibero byawe by'embumbe ni nk'amabaare g'obuguzi bwingi, agakozirwe omunyamwoga!

2Ekishoroshoro kyawe ni nk'orushare rukuringiriire orutaburamu viino etimbwirwe. Enda yaawe ni nk'ekirundo ky'engano ekyehinguririziibwe emyangangye.

3Amabeere gaawe ni nk'eminyahara y'esirabo ebiri ezairwe eri empasha.

4Ebitsya byawe ni nk'omunaara gw'emiino, amaisho gaawe ni nk'ebiyanja by'omuri Heshibooni aha irembo rya Batirabimu. Enyindo yaawe ni nk'omunaara gwa Lebanooni ogurikureeba Damasiko.

5Omutwe gwawe gutunguukire nka Karumeelo, n'eishokye ryawe ry'omushasha ni nk'omwenda gwa bujwa; obutsibo bwaryo nibutwara omugabe omutima.

6Iwe nkunzi 'we, empangare erikurigirwa, ebishi ori murungi, kandi nooshemereza!

7Ekyemerero kyawe ni nk'omukindo; amabeere gaawe ni nk'emigimba yaagwo.

8Nimpamiza kimwe ku ndikwija kutemba ogwo mukindo nshorome ebijuma by'emigimba yaagwo. Nkaabaasibwa ki, amabeere gaawe gaba nk'emigimba y'emizaabibu, omugaju gw'omwitsyo gwawe guba nk'ogw'omucumgwa;

9akanwa kaawe kaba nka Viino nungi munonga, eshuuma mpora, neeraba omu minwa n'omu maino, ekasheneneka!

10Nyowe ndi owa nkunzi yangye, kandi niinye arikwenda.

11Rugayo nkunzi yangye, tugyendane omu ishwa, tucumbikye omu byaro.

12Tugurukye kare, tuze omu misiri y'emizaabibu; tureebe yaaba emizaabibu eshebukire, n'amakomamahanga garabize. Okwo niyo ndaakworekyere rukundo yangye.

13Amashongonzya nigataamirana omugaju, n'aha miryango yaitu hariho ebijuma binuzire eby'emiringo yoona, ebisya n'ebikuru ebi nkubiikiire, iwe nkunzi yangye.

← Chapter 6 Jump to: Chapter 8 →