Song of Solomon 5

nyankole

← Chapter 4 Jump to: Chapter 6 →

1Munyaanyazi kandi omugore wangye! Naija omu musiri gwangye, ndundaane entsinda yangye n'eby'emigaju, ndye obwoki bwangye n'engabo yaabwo, nnywe viino yangye n'amate gangye. Imwe banywani bangye, nimurye kandi munywe! Imwe nkunzi zangye, nimunywere kimwe!

2Nkagwejegyera, kwonka omutima gwangye gwaguma nigureeba. Naahurira nkunzi yangye naiguza ati: Iwe munyaanyazi nkunzi yangye, nkombe yangye, omurungi munonga, nyigurira. Manya omutwe gwangye gwajubibwa omurombe, n'eishokye ryangye ryaitwa amatondo ga nyekiro.

3Naaba naajwire ebijwaro, mbwenu mbijware nta? Naaba naanaabire ebigyere, mbwenu mbishiishe nta?

4Nkunzi yangye yaayozya engaro omu kihengyere ky'orwigi, omutima gwangye gwaijura okushemererwa.

5Naimuka kumwigurira, engaro zangye nizitoonya entsinda, entsinda neeyagayaga aha nkumu zangye, yaatoonya aha minyoro y'orwigi.

6Ntyo nyigurira nkunzi yangye; kwonka nshanga yaakubire, yaagyenzire. Ku yaagambire, omutima gwampwa omunda. Naamusherura, kwonka tinaamubona, naamweta, kwonka tiyaayetaba.

7Abarinzi barikugyendagyenda omu rurembo bambugana, banteera, bamputaaza, abarinzi b'aha kigo baanyaka omunagiro gwangye.

8Imwe bahara ba Yerusalemu 'mwe, nimbarahiza; ku muraareebe ahari nkunzi yangye, mumugambire ku rukundo erikwenda kuunyita.

9Iwe mukazi ohita abandi 'we, beitu nkunzi yaawe naakiza ki abandi? Nkunzi yaawe naakiza ki abandi, waaza kuturahiza otyo?

10Nkunzi yangye naayera, naamwamwatikana, taribura mu bantu kakumi.

11Omutwe gwe ni nk'ezaabu nungi munonga, n'eishokye rye n'omushasha, niriiragura nk'ekikoona.

12Amaisho ge nigashusha enkombe aha rubaju rw'emigyera, googiibwe amate, geemi gye.

13Enshaya ze ni nk'otusiri tw'emigaju erikutaamirana. Eminwa ye ni nk'emyangangye erikutoonya entsinda.

14Emikono ye ni nk'engoro y'ezaabu ehunzirwe amabaare g'obuguzi bwingi. Omubiri gwe ni nk'omwino gusoomoire, oguhunzirwe amabaare g'erangi ya bururu.

15Amaguru ge ni nk'enyomyo z'amabaare g'ebisooni birikwera, ebibyairwe omu biina by'ezaabu, emishusire ye ni nka Lebanooni eriho emiti mirungi ya kaarwenda.

16Emigambire ye ni mirungi munonga; weena naakundirwa kimwe. Imwe bahara ba Yerusalemu 'mwe, ogwo niwe nkunzi yangye, kandi niwe munywani wangye.

← Chapter 4 Jump to: Chapter 6 →