Song of Solomon 2

nyankole

← Chapter 1 Jump to: Chapter 3 →

1Ndi nk'endungu ya Saharooni, nk'emyangangye y'omu mpanga.

2Nk'oku omwangangye guba omu mahwa, na nkunzi yangye nikwo aba omu baishiki.

3Nk'oku omuti gw'omucungwa guba omu kibira, na nkunzi yangye nikwo ari omu batsigazi, nkashutama omu kicuucu kye nshemereirwe munonga, ebijuma bye byannurira.

4Yantaasya omu nju y'obugyenyi, yandeebesa amaisho ga rukundo.

5Mpimbuuza otuzaabibu, onduhuuzise otucungwa; ahabw'okuba rukundo n'ey'okuunyita.

6Nkaabaasibwa ki omukono gwe gwa bumosho gunshegura, n'ogwa buryo gunfumbata!

7Imwe bahara ba Yerusalemu 'mwe, nimurahire esirabo n'ebuguma z'empara, ku mutarikwija kusisiimura nkunzi yangye; n'obu kwakuba okumwimutsya atakeeyendeire.

8Nimpurira eiraka rya nkunzi yangye, ngugwo naija naagurukyeerera aha nshozi, naarengyera aha bibungo.

9Nkunzi yangye ni nk'esirabo nari omunyahara gw'empara, reeba, ayemereire enyima y'orugo rwaitu, naaringuriza omu madirisa, naayozya amaisho omu katimba.

10Nkunzi yangye nangambira naagira ati: Nkunzi yangye imuka, iwe murungi wangye rugayo tugyendane.

11Manya reeba, katumba ehwaire, obunaku bw'enjura buhingwire.

12Ebirabyo omu nsi nibitandika kurabya, obunaku bw'okweshongora bwahika, n'eiraka ry'amaiba nirihurirwa omu nsi yaitu.

13Omutiini nigwana ebijuma byagwo, n'emizaabibu neerabya, neetaamirana emigaju, nkunzi yangye imuka, iwe murungi wangye, ija tugyendane.

14Iwe nkombe yangye, otuura oyesherekire omu bikondokondo by'enkiri, n'omu nyanga z'amabaare, ka nkureebe aha maisho, mpurire eiraka ryawe, manya eiraka ryawe nirishemeza, n'ahamaisho gaawe ni harungi.

15Nimutukwatire zaamuha, bwamuha obwo oburikushiisha emisiri y'emizaabibu, ahabw'okuba emisiri yaitu y'emizaabibu neerabya.

16Nkunzi yangye n'owangye, naanye ndi owe; ariisiza obusyo bwe bw'entaama omu myangangye.

17Iwe nkunzi yangye 'we, garuka, obe nk'esirabo nainga nk'omunyahara gw'empara aha nshozi za Beteeri, okuhitsya obu buraasheeshe, omwirima gukakinguuka.

← Chapter 1 Jump to: Chapter 3 →