Song of Solomon 6

nyankole

← Chapter 5 Jump to: Chapter 7 →

1Iwe mukazi murungi 'we, ohita abandi, nkunzi yaawe yaaza hi, tubone kumukurondesa?

2Nkunzi yangye yaashuuma eifo omu musiri gwe, omu tusiri tw'emizaabibu, kuriisizayo obusyo bwe bw'entaama, n'okucwa emyangangye.

3Ndi owa nkunzi yangye, na nkunzi yangye n'owangye; naariisiza obwo busyo omu myangangye.

4Nkunzi yangye, ori murungi nka Tiriza, oshemeire nka Yerusalemu, nootiinisa nk'eihe riine endango.

5Nyihaho amaisho, ahabw'okuba nigambuza obusingye; eishokye ryawe ni nk'obusyo bw'embuzi zirikurundukira omu nkiizi za Gileadi.

6Amaino gaawe ni nk'obusyo bw'ebuguma z'entaama ezaaruga kwoga. Zoona zizaara empasha, kandi tihariho n'emwe omurizo efiisa.

7Enshaya zaawe oyetwekyereire ni nk'embari z'amakomamahanga.

8Hariho abaigarire makumi mukaaga, n'ebinyanshunju makumi munaana, n'empangare nyingi ezitarikubarwa.

9Kwonka nkombe yangye, omurungi munonga n'omwe wenka, ou nyina akundira kimwe, orikutetsibwa owaamuzaire, empangare zikamureeba, zaamweta ohiiriirwe, abaigarire n'ebinyanshanju nabo baamusingiza.

10N'oha ogwo orikushusha nk'omushekye gurikujuguta, omurungi nk'okwezi, orikumurinkana nk'eizooba, orikutiinisa nk'eihe riine endango?

11Nkashuuma, naaza omu musiri gw'emiti y'ebijuma kureeba ebirikutookyera omu ruhanga, kureeba yaaba emizaabibu eshebukire, nari amakomamahanga garabize.

12Haza ku naabaire ntakeetegyereize, omutima gwangye gwanta omu kigaari aha rubaju rw'omwinginya wangye.

13Garuka, garuka, iwe Mushulamukazi 'we; garuka, garuka, tukwetegyereze. Mbwenu nimumpangira ki amaisho, nk'omugore orikuraba ahagati y'abaroreezi?

← Chapter 5 Jump to: Chapter 7 →