Song of Solomon 3

nyankole

← Chapter 2 Jump to: Chapter 4 →

1Ku naabaire mbyami aha kitanda kyangye nyekiro, naasherura ou omutima gwangye gukunda; ku naamusherwire, tinaamubona, ku naamwetsire, tiyaanyetaba.

2Mbwenu niinyija kwimuka, ngyendagyende omu rurembo, omu nguuto, n'omu nteeraniro z'emihanda; nsherure ou nkunda n'omutima gwangye gwona; ahabw'okuba nkamusherura, tinaamubona.

3Abarinzi ku baabaire nibagyendagyenda omu rurembo, bandeeba, naababuuza nti: Mwareeba ou omutima gwangye gukunda?

4Ku naabaire naabarabaho nti; naareeba ou omutima gwangye gukunda. Naamuhamya, tinaamureka akagyenda, okuhitsya obu naamureetsire omu nju ya maawe, omu kishengye ky'owanzaire.

5Imwe bahara ba Yerusalemu 'mwe, nimurahire esirabo n'ebuguma z'empara, ku mutarikwija kusisiimura nkunzi yangye; n'obu kwakuba okumwimutsya, atakeeyendeire.

6Mbwenu kiriya ekirikuruga omu ihamba ni ki? Ekiri nk'enyomyo y'omwika, ekyoteziibwe entsinda y'omugaju, n'obubaani, n'emigaju yoona eseire ey'abashuubuzi?

7Reeba, n'engozi ya Solomooni! Eyehinguririziibwe abashaija b'amaani makumi mukaaga, ab'omu mamanzi ga Isiraeli.

8Boona bahagatiire za rurara, kandi n'abarwani rugambwa. Buri omwe ayebeebire rurara aha kibero, ahabw'okwerinda akabi kaakubaho nyekiro.

9Omugabe Solomooni akeekorera engozi y'embaaho y'emiti ya Lebanooni.

10Yaagikorera emigamba y'efeeza, enyima yaaba ey'ezaabu, aharikushitamwa haayo baahashwekyesa ebya bujwa; omunda yaayo bahara ba Yerusalemu baahakoresa rukundo.

11Imwe bahara ba Siyooni 'mwe, nimushohore, mureebe Omugabe Solomooni, ajwaire ekirunga eki nyina yaamujwekire aha izooba ri yaashwereireho; eizooba eri omutima gwe gwashemerereirweho.

← Chapter 2 Jump to: Chapter 4 →