Song of Solomon 2

Quechuan QXO (Biblia en Quechua del sur de Conchucos)

← Chapter 1 Jump to: Chapter 3 →

1Sarónchö rösa waytam noqaqa kä. Pampachö wiñaq liriu waytam kä.

2Kuyayllä, kashakuna chawpinchö kaykaq liriu waytam kanki. Qamqa llapan jipashkunapitapis mas kuyayllapämi kanki.

3Kuyaynï, munti rurinchö manzäna wayuqnömi llapan jövinkunapitapis mas kuyayllapä kanki. Läduykiman jamaykurqa manam yarquytapis munätsu. Kuyakuynikipis mishkinömi.

4Banquëti wayikimanmi pushamarquyki. Tsaychömi kuyamar makallarämarquyki.

5Qamta kuyaptï shonqüpis manam shonqunatsu. Päsasnikita y manzänaykita qaraykallämay.

6Ima allirä kanman itsuq kaq rikraykita jawnatsimaptiki. Ima allirä kanman derëcha kaq rikraykiwan makallamaptiki.

7Jerusalén jipashkuna, lluytsukunapa y tarushkunapa jutinchö awniykayällämay kuyanqä jipash punuykaqta mana rikchatsiyänaykipä. Punuyta jimanqanyaq punukutsun.

8¡Kuyanqä jövinpa voznintam wiyaykä! ¡Payqa shamuykannam! ¡Jirkakunapa y jirkankunapam saltakacharrä shamuykan!

9Kuyanqä jövinqa lluytsunörämi. Payqa kuyayllapä llullu lluytsunörämi. ¡Wayï waqtanchönam kaykan! ¡Ventänapanam qawaraykämun! ¡Rejïllanpanam rikaykäman!

10Kuyaynï, juklla shäriy. Kuyanqä jipash, ras aywakushun.

11Tamya tiempupis päsashqanam. Usya tiempuchönam kaykantsik.

12Entëru jirkachömi waytakunapis tuktuykäyan. Cantanapä tiempupis chämushqanam. Kullkushkuna cantayanqanpis maytsaychönam wiyakaykan.

13Hïgus plantakunapis wayuykäyannam. Üva plantakunapapis mushkuynin musyakaykämunnam. Kuyayllapä jipash, ras shärirkur aywakushun.

14Kuyanqä paluma, qaqakunachö y tsunyaqkunachö amana pakaraynatsu. Parlanqaykitam wiyayta munä; cäraykitam rikayta munä. Qam parlanqaykiqa maypis wiyay munaymi. Cäraykipis pasaypa kuyayllapämi.

15Üvantsikkunapis tuktuykäyannam. Tsaykunata cuidädutä taksha atuqkuna ushayanman. ¡Tsay atuqkunata wanutsishun!

16Kuyamaqnïqa noqallatam kuyaman. Noqapis payllatam kuyä. Payqa liriu waytakuna kaqchömi mitsikun.

17Kuyaynï, manarä patsa waraptin y llantuypis manarä päsaptin lluytsunörä y tarushnörä Beter jirkakunaman kutikamuy.

← Chapter 1 Jump to: Chapter 3 →