Song of Solomon 3

Quechuan QXO (Biblia en Quechua del sur de Conchucos)

← Chapter 2 Jump to: Chapter 4 →

1Paqaspapis shonqü kuyanqan jövintam cämächö ashirqü. Yataykacharpis manam tarirqütsu.

2Pasaypa yarpachakurmi shärikurqä. Entëru markapa aywarmi cällikunapa y pläzakunapapis kuyanqä jövinta ashirqü. Mayjina ashirpis manam tarirqütsu.

3Tsaynö puriykaqtam marka cuidaq wardiakuna tariyämashqa. Paykunawan tinkurmi tapukur nirqä: «¿Manaku rikayällarquyki kuyanqä jövinta?»

4Paykunapita päsaskirmi kuyanakunqäwan tinkurqü. Makallakurkur mana dëjaypam mamäpa wayinman chätsirqü. Yurinqä cuartumanmi yaykatsirqü.

5Jerusalén jipashkuna, lluytsukunapa y tarushkunapa jutinchö awniykayällämay kuyanqä jipash punuykaqta mana rikchatsiyänaykipä. Punuyta jimanqanyaq punukutsun.

6Tsunyaq jirkapita ¿imatä shamuykan? ¿Imatä qoshtatarrä aywaykämun? Mïrra perfüminö, inciensiunö y tukuyläya kuyayllapä perfümikunanö ¿imatä mushkuykämun?

7¡Tsayqa Salomónpa andasninmi! Joqta chunka (60) soldädukunapa chawpillantam shamuykan. Tsay soldädukunaqa Israelchö valienti kaq soldädukunam kayan.

8Llapanpis espäda manijaq y pelyay yachaq soldädukunallam kayan. Paqaspa imapis kaptin jinan höra pelyayänanpämi tseqllanchö espädata puritsiyan.

9Andasnintaqa Líbanupita apatsimunqan allin kaq qerukunapitam rey Salomón ruratsishqa.

10Andasninpa jorcunninkunaqa qellaypitam. Tsay jorcunkunapa jawiräkunanpis qoripitam. Reypa jamakunanpis granäti tëlapitam. Rurinpaqa Jerusalén warmikuna kushishqa bordayanqanmi kaykan.

11Sión warmikuna, ¡shayämuy rey Salomón corönan jatishqa shamuykaqta rikayänaykipä! Tsay corönataqa casarakunan junaqmi maman jatitsishqa. Tsay junaqmi Salomónpa shonqun pasaypa kushikushqa.

← Chapter 2 Jump to: Chapter 4 →