Song of Solomon 5

Quechuan QXO (Biblia en Quechua del sur de Conchucos)

← Chapter 4 Jump to: Chapter 6 →

1Kuyay warmillä, jardinnïchönam kaykä. Mïrra perfümitawan kuyayllapä mushkuq waytakunatapis qoriykämi. Panalninchö kaykaq mishkitapis yawaykänam. Lëchitapis vïnutapis upuykänam. Amïgukuna, jimayanqaykiyaq mikuyay, upuyay.

2Punurpis maya mayallam punurqä. Tsaynö punuykanqächömi kuyaynï qayakamuqta wiyarqä. ¡Kuyayllapä palumita, punkuykita kichapaykallämay! ¡Umäpis shullyashqam kaykan! ¡Paqas shullya yakum umäpitapis jutuykan!

3Röpätapis jipikurqünam. ¿Yapaytsurä jatiküman? Chakïtapis mayllakurqünam. ¿Yapaytsurä qanratäman?

4Kuyanqä jövinqa punku uchkunpam makinta jatimurqan. Makinta jatimuptinmi shonqüpis tiktikyarqanrä.

5Pasaypa kuyarmi jinan höra shärirqä punkuta kichapänäpä. Makïpita dëdükunapitam mïrra perfümi punkupa trancanmanpis juturqan.

6Punkuta kichanäpäqa kuyanqä jövin manam kanänatsu. Aywakushqa kaptinmi pasaypa llakikurqä. Ashirpis manam tarirqätsu. Qayakuptïpis manam contestamarqantsu.

7Tsaynö ashir puriykaptïmi tariyämarqan marka cuidaq runakuna. Paykunam maqayämar yawarllatana dëjayämashqa. Aqshuranqä jakütapis qechuyämashqam.

8Jerusalén jipashkuna, qamkunatam rugakü. Kuyanqä jövinta rikarqa paypä llakikur qeshyaykanqäta willaykuyällay.

9Pïmaypitapis mas kuyayllapä jipash, ¿imanirtä tsay jövinta pasaypa kuyanki? Tsaynö encargakayämänaykipäqa ¿imanö kaptintä pasaypa kuyanki?

10Kuyanqä jövinqa buen mözum. Chunka waranqa (10,000) runakunapa chawpinchö karpis payqa reqillapämi.

11Umanpis qorinö kuyayllapämi. Qoshpu aqtsanpis cuervunö yanam.

12Ñawinkunapis shumaq kuyayllapämi. Lëchiwan bäñakushqa pözu kuchunchö ishkay palumakuna jamaraykaqnömi ñawinkuna kaykan.

13Cäranpis mushkuq waytakuna jardinchö waytaykaqnömi. Shiminpis liriu waytapita mïrra perfümi jutuykaqnömi.

14Makinkunapis jacinto rumikunawan adornashqa qori sortïjanömi. Cuerpunpis zafiro rumikunawan adornashqa kuyayllapä marfilnömi.

15Chankankunapis qori jawiräkunan jananchö marmolpita rurashqa jorcun ichiraykaqnömi. Líbanuchö kaykaq mas jatun cedru muntinörämi kuyayllapä.

16Parlanpis maypis wiyakuy munaymi. Paynöqa manam pipis kantsu. Jerusalén jipashkuna, tsaynömi kuyanqä jövinqa. Tsaynömi kuyaynïqa.

← Chapter 4 Jump to: Chapter 6 →