Song of Solomon 6

Quechuan QXO (Biblia en Quechua del sur de Conchucos)

← Chapter 5 Jump to: Chapter 7 →

1Pïmaypitapis mas kuyayllapä jipash, ¿maypatä kuyanqayki jövin aywashqa? ¿Maypatä aywanan kashqa? Willayämay ashiq aywanapä.

2Kuyaynïqa jardinninmanmi urashqa. Mushkuykaq wayta jardinninmanmi yaykushqa. Huertakuna kaqchö mikunanpämi aywashqa. Tsaychömi liriu waytakunata pallanqa.

3Kuyamaqnïqa noqallatam kuyaman. Noqapis payllatam kuyä. Payqa liriu waytakuna kaqchömi mitsikun.

4Kuyaynï, qamqa Tirsa y Jerusalén markanöpis kuyayllapämi kanki. Atskaq soldädukuna pelyaman aywayanqan espantaypä kanqannömi kuyayllapä kanqaykipis espantaypä kaykan.

5Ama rikapämaynatsu. Rikapämarninqa löcuyätsimankim. Aqtsaykipis atska kapishkuna Galaad jirkakunapa pañar puriqnörämi.

6Kiruykikunapis majädachö tsayrä bäñatsishqa yuraq üshakunanömi. Parninpa parninpam kuyayllapä. Manam ni jukllayllapis faltantsu.

7Shukutaranqayki rurinchö cäraykipis granadïllanörämi ishkan lädu kuyayllapä pukanrä.

8Reypa joqta chunka (60) warminkuna kayaptinpis puwaq chunka (80) concubïnankuna kayaptinpis y yupaytapis mana atipaypä jipashninkuna kayaptinpis

9kuyanqä palumallämi llapanpitapis mas kuyayllapä kaykan. Paytam mamanpis pasaypa kuyan. Jipashkunapis kuyayllapä kanqanta rikarmi alabayan. Reypa warminkuna y concubïnankunapis alli warmi kanqantam parlayan.

10Manam pipis kantsu kuyanqayki jipashnöqa. Waraq lucëru atsikyaqnö y killa kuyayllapä kanqannömi kaykan. Rupay chipikyaqnömi kuyayllapä kaykan. Atskaq soldädukuna pelyaman aywayanqan espantaypä kanqannömi kuyayllapä kanqanpis espantaypä kaykan.

11Nuwal muntikuna kaykäyanqan jardinmanmi yaykurqü. Tsayman yaykurqü mayu kuchun pampa verdiraykaqta rikanäpä, üva tseqlliraykaqta rikanäpä y granadïlla tuktuykaqta rikanäpämi.

12Tsaychömi illaqpita tantiyaskirqä reypa carrëtanchö kaykaqnörä.

13¡Kutikamuy, Sulamita, kutikamuy! ¡Qamtam rikayta munayä! ¡Kutikamuy! ¡Kutikamuy! ¿Imanö kaykaqtatä rikayämayta munayanki? ¡Campamentuchö tushuykaqtanömi rikayta munayä!

← Chapter 5 Jump to: Chapter 7 →