Song of Solomon 8

Quechuan QXO (Biblia en Quechua del sur de Conchucos)

← Chapter 7 Jump to:

1¡Ima allirä kanman mamäpa chuchunta chuchur qeshpiq turï kaptiki! Tsaynö kaptikim cällichö tinkur mutsaptïpis pipis jamumanmantsu.

2Makipita jancharkurmi mamäpa wayinman pushäman. Tsaychömi kuyakuq kayta yachatsimankiman. Granadïllapita qaptsishqa yakunwan tallurkurmi noqapis allinnin kaq vïnuta qaräman.

3Ima allirä kanman itsuq kaq rikraykita jawnatsimaptiki. Ima allirä kanman derëcha kaq rikraykiwan makallamaptiki.

4Jerusalén jipashkuna, awniykayällämay kuyanqä jipash punuykaqta mana rikchatsiyänaykipä. Punuyta jimanqanyaq punukutsun.

5¡Rikayay! ¡Desiertupita jipash shamuykan kuyayninta makallashqa! Manzäna munti chakinchö punukuykaqtam qamta rikchatsirqü. Tsaychömi mamayki qeshyaq tikrashqa. Tsaychömi mamaykita qeshyakuy nanay tsarishqa.

6Imaypis yarparämänaykipä shonquykiman churaykallämay. Mana qonqamänaykipä rikraykimanpis jutïta qellqaykullay. Kuyanakuytaqa wanuytanömi ni pipis tsapantsu. Wayllunakuypitapis sepultürapitanö manam qeshpintsiktsu. Kuyanakuyqa Tayta Diospita shamuq nina karmi imaypis upintsu.

7Kuyanakuytaqa manam ni lamarpis ni mayupis upitsiyta puëdintsu. Dëjanakunanpä rïcu runa llapan riquëzankunata munatsiptinpis manam dëjanqatsu.

8Panintsikpaqa chuchunpis manarämi pukshanrätsu. Pipis payta ashiq shamuptinqa ¿imatatä nishun?

9Panintsik murällanö kaptinqa qellaypita palaciuta ruratsiqnömi adornashwan. Adornanni punkunö kaptinqa cedru tablakunawan adornaqnömi adornashwan.

10Noqaqa murällanömi kä. Chuchükunapis rikachakuna törrikunanömi. Kuyaynïpa lädunchöqa pasaypa kushishqam kä.

11Baal-hamónchömi Salomónpa üva chakran karqan. Tsay chakrantam arrendakurqan. Cada wata cosëchata ushaskirmi cada ünunkuna waranqa (1,000) qellayta arriendunpita pägayaq.

12Salomón, tsay runakunapita waranqa qellayta chaskiptikipis y chakra cuidaqkunata ishkay pachak (200) qellayta pägaptikipis noqaqa üva chakräta kikïmi cuidakü.

13Jardinkunachö jamaraq reina, amïgükuna maya mayallam kaykäyan parlanqaykita wiyayänanpä. Noqapis wiyanäpä imallatapis parlarkallämuy.

14Kuyaynï, lluytsunö o tarushnö karpis mushkuykaq jirkakuna jananpa cörrimuy.

← Chapter 7 Jump to: