Ezra 7

Kirundi (Bibliya Yera 1951, 1967 (Burundi))

← Chapter 6 Jump to: Chapter 8 →

1Hanyuma y’ivyo, ku ngoma ya Aritazeruzi umwami w’i Buperesi, haza Ezira mwene Seraya, Seraya wa Azariya, Azariya wa Hilukiya,

2Hilukiya wa Shalumu, Shalumu wa Sadoki, Sadoki wa Ahitubu,

3Ahitubu wa Amariya, Amariya wa Azariya, Azariya wa Merayoti,

4Merayoti wa Zerahiya, Zerahiya wa Uzi, Uzi wa Buki,

5Buki wa Abishuwa, Abishuwa wa Finehasi, Finehasi wa Eleyazari, Eleyazari wa Aroni umuherezi mukuru;

6uwo Ezira aradūga ava i Babuloni; kandi yar’ umunyabgenge w’ivyanditswe kandi w’umuhanga mu vy’ivyagezwe vya Mose vyatanzwe n’ Uhoraho Imana y’Abisirayeli. Umwami amuha ivyo yamusavye vyose, abiheshwa n’ikiganza c’ Uhoraho Imana yiwe cari kuri we.

7Nuko bamwe mu Bisirayeli badūgana n’abaherezi bamwe n’ Abalewi n’abaririmvyi b’abashibamyi n’abahawe ibango ry’ibikorwa vy’urusengero; abo baja i Yerusalemu mu mwaka ugira indwi Aritazeruzi ari ku ngoma.

8Nuko Ezira ashika i Yerusalemu mu kwezi kwa gatanu kwo mu mwaka ugira indwi nyene uwo mwami ari ku ngoma.

9Yari yahagurutse ava i Babuloni ku musi wa mbere w’ukwezi kwa mbere, maz’ ashika i Yerusalemu ku musi wa mbere w’ukwezi kwa gatanu, abihawe n’ikiganza ciza c’Imana cari kuri we;

10kuko Ezira yari yarīnāmūye mu mutima kwitwaririka ivyagezwe vy’Uhoraho ngw abishitse, kandi ngo yigishe mu Bisirayeli amabgirizwa n’amatēka.

11Aya majambo n’amwe n’ayo mu cete umwami Aritazeruzi yahaye Ezira umuherezi ari we mwanditsi, mbere yar’ umwanditsi azi amajambo y’ivyagezwe vy’ Uhoraho n’ivyo yashingiye Abisirayeli:

12ngo Jewe Aritazeruzi umwami aganza abami, ndakwandikiye Ezira umuherezi, umunyabgenge azi ivyagezwe vy’Imana Nyen’ ijuru: n’amahoro neza?

13None nshinze ibgirizwa ryo kurekura abo mu bantu b’ Abisirayeli bose baba mu bihugu vyanje bīgombera ubgabo kujana nawe i Yerusalemu, bo n’abaherezi babo n’Abalewi.

14Kuko jewe umwami n’abajanama banje ukw ar’ indwi, tugutumye ng’ uje kubaza ivy’ i Buyuda n’i Yerusalemu, nk’ukw ivyagezwe vy’Imana yawe bimeze, ivy’ ufise mu maboko yawe;

15kandi ng’ ugende ujanye amafeza n’amazahabu, ayo jewe umwami n’abajanama banje twashikaniye Imana y’Abisirayeli iba i Yerusalemu,

16bo n’amafeza yose n’amazahabu uzosanga mu gihugu c’i Babuloni cose, hamwe n’amashikanwa y’abantu n’ay’ abaherezi, ayo bāshikaniye ingoro y’Imana yabo ir’ i Yerusalemu bivuye ku mitima;

17ni co gituma ayo mahera ukwiye kugira umwete cane wo kuzoyagura amamasa n’ amapfizi y’intama bo n’imyagazi, hamwe n’amashikanwa y’amafu n’ay’ ibiturire agendana na vyo, ukazobitangira ku gicaniro c’ingoro y’Imana yanyu i Yerusalemu.

18Kand’ ibizosāguka kur’ ayo mafeza n’amazahabu, mwe na bagenzi banyu muze mubikoreshe uko mubona bikwiye, mukurikiye ivyo Imana yanyu igomba;

19kand’ ibintu vy’imbombovu uhawe vyo gukoresha mu ngoro y’Imana yawe, uz’ ubishikirize iyo Mana y’i Yerusalemu.

20Kand’ ibintu vyose ingoro y’ Imana yawe izokenera, ivyo uzoba ukwiye gutanga, uz’ uhore ubikūra mu nzu ibīkwamw’ ibintu vyanje.

21Kandi jewe umwami Aritazeruzi, mbariye abazezwabintu banje bose bo hakurya y’ uruzi, ku vya Ezira umuherezi, umwanditsi w’ivyagezwe vy’Imana Nyen’ ijuru, yukw ivy’ azobāka vyose bizohora bitanganwa umwete,

22bikagarukira kw italanto z’ ifeza ijana, n’ingero zitwa koro z’ingano ijana, n’imibindi ya vino ijana, n’imibindi y’amavuta ijana nyene, n’umunyu utarinze kugerwa.

23Ic’ Imana Nyen’ ijuru izokwaka cose kize gihore kigirirwa ingoro yayo bidatevye, kugira ng’ uburake bgayo ntibube ku gihugu canje n’abahungu banje.

24Kandi turabamenyesha ivy’ abaherezi n’Abalewi, n’abaririmvyi n’abashibamyi, n’abahawe ibango ry’ibikorwa vy’urusengero, n’abakozi bo mur’ iyo ngoro y’ Imana bose uko bangana, ko bitemewe ko bākwa ikori cank’ ikibuguro cank’ ingorore.

25Kandi nawe Ezira, nk’uk’ ubgenge bg’ Imana buri muri wewe, uz’ utore abashingantahe n’abacamanza bo gucīra imanza abantu bose bo hakurya y’uruzi, abazi ivyagezwe vy’Imana yawe bose; n’ūtabizi muze muhore mubimwigisha.

26Maz’ ūtazokwumvira ivyagezwe vy’Imana yawe n’ivyagezwe vyanje umwami, baze bagire umwete wo kumucīra urubanza, ar’ urwo kwicwa, cank’ urwo gucibga, cank’ urwo kunyagwa ivyiwe, cank’ urwo kubohwa.

27Uhoraho Imana ya ba sogokuruza aragahezagirwa, yashize mu mutima w’umwami imigabo imeze irtyo, yo gushariza ingoro y’Uhoraho ir’ i Yerusalemu.

28Kandi ni we yerekanye imbabazi ziwe kuri jewe imbere y’ umwami n’abajanama biwe, n’ imbere y’abaganwa biwe bose bahambaye. Nuko ndemeshwa n’ikiganza c’Uhoraho Imana yanje cari kuri jewe; nca nkoranya abakuru bo mu Bisirayeli ngo tudūgane.

← Chapter 6 Jump to: Chapter 8 →