Ezra 8

Kirundi (Bibliya Yera 1951, 1967 (Burundi))

← Chapter 7 Jump to: Chapter 9 →

1Aba ni bo bakuru b’amazu ya ba sekuruza twādūganye tuva i Babuloni, ku ngoma y’umwami Aritazeruzi, kand’ uku ni kwo ba sekuruza badōndōrwa.

2Mu ba Finehasi ni Gerushomu; mu ba Itamari ni Daniyeli; mu ba Dawidi ni Hatushi,

3wo muri bene Shekaniya; mu ba Paroshi ni Zekariya, kandi yandikanywe n’ abagabo ijana na mirongwitanu banditswe mu gitabo kidōndōra ba sekuruza.

4Mu ba Pahati‐mowabu ni Elihowenayi mwene Zerahiya, kand’ uwo yandikanywe n’abagabo amajana abiri.

5Mu ba Shekaniya ni mwene Yahaziyeli, kand’ uwo yandikanywe n’ abagabo amajana atatu.

6Mu ba Adini ni Ebedi mwene Yonatani; uwo yandikanywe n’abagabo mirongwitanu.

7Mu ba Elamu ni Yeshaya mwene Ataliya, na we yandikanywe n’abagabo mirongwirindwi.

8Mu ba Shefatiya ni Zebadiya mwene Mikayeli, na we yandikanywe n’abagabo mirongumunani.

9Mu ba Yowabu ni Obadiya mwene Yehiyeli, na we yandikanywe n’abagabo amajana abiri n’icumi n’umunani.

10Mu ba Shelomiti ni mwene Yosifiya, na we yandikanywe n’abagabo ijana na mirongwitandatu.

11Mu ba Bebayi ni Zekariya mwene Bebayi nyene, na we yandikanywe n’abagabo mirongwibiri n’ umunani.

12Mu ba Azigadi ni Yohanani mwene Hakatani, na we yandikanywe n’abagabo ijana n’ icumi.

13Mu ba Adonikamu, ari bo baje hanyuma, aya ni yo mazina yabo: Elifeleti na Yeweli na Shemaya, na bo bandikanywe n’ abagabo mirongwitandatu.

14Kandi mu ba Bigivayi ni Utayi na Zabudi, na bo bandikanywe n’ abagabo mirongwirindwi.

15Nuko mbakoraniriza ku ruzi rusēsera muri Ahava, tuhaca insago, tuhamara imisi itatu. Nitegereje abo bantu n’abaherezi, nsanga nta n’umwe wo mu Balewi ari muri bo.

16Maze ntuma kuri Eliyezeri na Ariyeli na Shemaya na Elinatani na Yaribu na Elinatani wundi na Natani na Zekariya na Meshulamu, ari bo bantu b’abashingantahe, bo na Yoyaribu na Elinatani b’abigisha.

17Ndaheza ndabatuma kuri Ido w’umushingantahe w’ahītwa i Kasifiya, mbabgira ubutumwa bazomubgira bo na bagenzi biwe babawe ibango ry’ibikorwa vy’ urusengero, aho bāba i Kasifiya nyene, ngo baturungikire abo guhēreza mu ngoro y’Imana yacu.

18Maze kubg’ ikiganza ciza c’ Imana yacu cari kuri twebge batuzanira umuntu w’umunyabgenge wo mu bandurutse kuri Mahili, Mahili wa Lewi, Lewi wa Isirayeli; batuzanira na Sherebiya n’abahungu biwe na bagenzi biwe ukw ar’ icumi n’umunani,

19na Hashabiya hamwe na Yeshaya wo mu bandurutse kuri Merari, na bagenzi biwe n’abahungu babo ukw ari mirongwibiri,

20bo n’abo mu bahawe ibango ry’ibikorwa vy’urusengero, abandurutse ku bo Dawidi n’abāmutwarira bāri bāratanze ngo bakorere Abalewi, abanyebango amajana abiri na mirongwibiri, bose badōndwa amazina yabo.

21Maze ntāngāriza aho nyene kur’ urwo ruzi Ahava ivyo kwisonzesha, kugira ngo twicishe bugufi imbere y’Imana yacu, ngo tuyisabe iduhe kugira urugendo rwiza, twebge n’abana bacu n’ ibintu vyacu vyose.

22Kuko vyanteye isoni gusaba umwami umuce w’ingabo n’abagendera ku mafarasi, ngo baze badutabare kwivuna abansi bodutegera mu nzira; kuko twari twabgiye umwami, tut’ Ikiganza c’Imana yacu kiri ku bayitwaririka bose, ngw ibagirire neza; arik’ ububasha bgayo n’uburake birwanya abayireka bose.

23Nuko turisonzesha, dusaba Imana tuyinginga, iraheza yemera kutwumvira.

24Maze ntora icumi na babiri mu bakuru b’abaherezi, ari bo Sherebiya na Hashabiya, n’abandi cumi muri bagenzi babo.

25Maz’ amafeza n’amazahabu n’ ibintu vy’imbombovu mbigera ku munzane babona, ari vyo vyatanzwekw amashikanwa y’ingoro y’ Imana yacu, ivy’ umwami n’ abajanama biwe n’abaganwa biwe n’Abisirayeli bāriho bose bāshikanye.

26Nuko ndabigera, ndaheza ndabibazēza, ar’ italanto z’ ifeza amajana atandatu na mirongwitanu, n’ibintu vy’imbombovu bicuzwe mu mafeza italanto ijana, n’italanto z’izahabu ijana nyene;

27n’ibikombe vy’izahabu mirongwibiri biciye amahera yitwa dariki igihumbi, n’ibikoreshwa bibiri vy’imiringa myiza isenwe y’ igiciro kinini nk’ic’ izahabu.

28Ndababgira, nti Mwebge mur’ aberejwe Uhoraho, n’ibintu vy’ imbombovu na vyo nyene n’ ivyera, kand’ ayo mafeza n’amazahabu ni yo mashikanwa bashikaniye Uhoraho Imana ya ba sogokuruza bivuye ku mitima.

29Muvyitwaririke mubizigame, kugeza aho muzobigerera ku munzane imbere y’abakuru b’abaherezi n’Abalewi n’abakuru b’ amazu ya ba sogokuruza b’Abisirayeli, mu vyumba vyo mu ngoro y’Uhoraho i Yerusalemu.

30Nukw abaherezi n’Abalewi bākīra ayo mafeza n’amazahabu n’ibindi bintu uk’ urugero rwavyo rwangana, ngo babijane i Yerusalemu mu ngoro y’Imana yacu.

31Maze ku musi ugira icumi na kabiri w’ukwezi kwa mbere turahaguruka tuva kur’ urwo ruzi Ahava, ngo tuje i Yerusalemu; ikiganza c’Imana yacu kiba kuri twebge, iradukiza ngo ntitugwe mu maboko y’abansi n’abaturyamiye mu mayira.

32Dushitse i Yerusalemu turuhuka imisi itatu.

33Maze ku musi ugira kane bagera ku munzane ayo mafeza n’ amazahabu n’ibindi bintu, babigerera mu ngoro y’Imana yacu, babishikiriza Meremoti mwene Uriya umuherezi, ari kumwe na Eleyazari mwene Finehasi, kandi bari bafatanije na Yozabadi mwene Yosuwa na Nowadiya mwene Binuwi, b’Abalewi.

34Vyose barabiharūra ukw igitigiri cavyo n’ukuriba kwavyo vyangana. Ico gihe nyene ukuriba kwavyo kwose kurandikwa.

35Maz’ abāgarutse bavuye mu kinyago bosereza Imana y’Abisirayeli ibimazi; batanga amamasa cumi n’abiri kw ikimazi c’Abisirayeli bose, n’amapfizi y’ intama mirongwicenda n’atandatu, n’imyagazi y’intama mirongwirindwi n’indwi; batanga n’amasuguru y’impene cumi n’abiri kw ikimazi gitangirwa ivyaha; ivyo vyose vyabaye ikimazi coserezwa Uhoraho.

36Maz’ amajambo y’ umwami bayashikiriza ivyēgēra vyiwe n’abaganza hakuno y’uruzi, na bo batanga ivyo gufasha abantu bo n’ingoro y’Imana.

← Chapter 7 Jump to: Chapter 9 →