Jeremiah 17

Romani Ursari 2018 (Biblia Ande Chib Romani)

← Chapter 16 Jump to: Chapter 18 →

1O bilachipe katar o Juda si pisime sastrune cheskaia kai pe iek rig si la o bar mai zuralo, pisime si po kotor barr katar leko lio ta pe singa katar leke altare,

2a lenge chaurre denpe golli katar lenge altare ta katar lenge slike katar e Asera, kai si pasa e bare kasta ta pe umalia vazdine,

3pe burdura ta pe umalia. Sa cho barvalipe ka dav le te choren le pala o bilachipe katar che thana vazdine ande sa chi phuv.

4Ta ka jasare sa e phuv kai diem tut, ta ka cherav te radi che dusmanonenge ande phuv kai ni pinllarea, soke pe mi joli phabardan iag kai ni ka merel nikada.

5Gia phenda o Del: Proketo o manus kai uzdilpe ando manus ta thovel pi zor ande aver manus, ta duriol leko lio katar o Del.

6Gua lleno ka avel sargo e char suki po pusto, ta ni ka dikhel kana ka avel o lachipe, ta ka zivil ando sukipe katar o pusto, ande phuv kai si pusti ta kai ni zivil niko.

7Blagosime o manus kai uzdilpe ando Del, ta kai leki vera si o Del.

8Soke ka avel sargo o kas kai si thodo te bariol pasa o pai, ta pasa e len ka barion leke zile, ni ka daral kana ka avel o tatipe ta leke patra ka aven zelene, ta ando burs kai ni ka delpeke ni ka sukol, ta ni ka mukel te del septelie.

9O lio so mai kojamno neko sa e ezgode, ta bilacho, ¿Ko ka pinllarel le?

10Me o Del, kai dikhav andre ande mislura, kai zumavav e lie te dav suakone prema e cherel, prema e ezgode kai cherel.

11Sargo e perdis kai arakhel averenge arnorre, isto gia si e llene kai barvaon kojaimaia, ta po dopas katar po zivoto mukel sa ta mai angle dikhol kai si diliaol.

12Trono katar e zor, glamno sar kana saia mai anglal, si o than katar amaro santuario.

13¡Ioi Devla! ¡Tu san so aduricharel o Israel! kogo ka mukel tut ka achel ando lallao, gola kai ka durion tutar ka aven sargo anava pisime pe chisai, soke mukle e Devle, kai si o pai kai likel katar e phuv.

14¡Ioi Devla! sastar man ta ka avav sasto, braduisar man ta ka avav braduime, soke tu san so me blagosiv.

15Von phenen mange: ¿Kaitalo o alav e Devleko? ¡Te cherdol isto akana!

16A me ni llelem pala tute te cherav te aven dukhade, ta ni manglem te nakhen iek belava, tu llane le, sogo phendem, phendem le angla tute.

17Te na ave mange iek dar, soke tu arakhe man ando llive bilacho.

18Te achen ando lallao gola kai roden te maren man, a na te achav me ando lallao, te chudinpe von, a me te na chudiu man, an pe lende o llive bilacho, ta dukhav len dui droma mai but.

19Gia phenda mange o Del: Lla ta thov tut po udar katar e chave katar o foro, kotar katar den ta liken e charura katar o Juda, ta thov tut pe sa e udara katar o Jerusalem,

20ta phen lenge gia: Asunen o alav e Devleko, charura katar o Juda ta sa o Juda ta sa e llene kai zivin ando Jerusalem kai den katar gala udara.

21Gia phenda o Del: Arakhen tumaro zivoto ta na inllaren pharipe ando llive sabado, ta te nakhaven gua pharipe katar e udara katar o Jerusalem.

22Ta na ikanen katar tumare chera pharipe ando llive sabado, ta na cheren ni iek rado. Blagosin o llive sabado, gia sar phendem tumare paponenge.

23A von ni asunde, ta ni thode sama, zuriarde po soro te na asunen, ta te na sikon.

24A o Del phenel: Te kandien man, ta ni nakhaven pharipe katar e udara katar gaia phuv ando llive sabado, ta te blagosina o llive sabado, ta te na cherden ni iek rado ande gua llive,

25ka den ande gava foro upral pe bordona ta pe gra e charura ta sudura kai besen po trono katar o David, von, lenge sudura, e murusa katar o Juda ta e llene kai zivin ando Jerusalem, ta ostade ande gava foro ka zivin llene.

26Ta ka aven katar e forura e Judaeke, truial katar o Jerusalem, katar e phuv e Benjamineki, katar e Sefala, katar e burdura katar o Negev, te den kurbano kai phabardol ta kurbano, ezgode dine ta taimano, ta ka anen kurbano blagosimako kai o cher e Devleko.

27A te na asunden man te blagosin o llive sabado, ta te nakhaden pharipe katar e udara katar o Jerusalem ando llive sabado, me ka cherav te fuliel iag pe tumare udara, ta ka zatriv e chera katar o Jerusalem ta ni ka merel e iag.

← Chapter 16 Jump to: Chapter 18 →