Jeremiah 25

Romani Ursari 2018 (Biblia Ande Chib Romani)

← Chapter 24 Jump to: Chapter 26 →

1O alav kai avilo kai o Jeremias pala sa o foro katar o Juda ando burs starto katar o Joasim chavo katar o Josias, charo katar o Juda, gua saia o purvo burs katar o Nabukodonosor charo katar e Babilonia,

2gaia orba phenda la o profeta Jeremias sa e foroke katar o Juda ta sa e llenenge kai zivin ando Jerusalem, ta phenda:

3Katar o trito burs katar o Josias chavo katar o Amon charo katar o Juda, llik kai gava llive, kai si bis ta trin burs, avilo mande o alav e Devleko, ta cherel but vreme kai dav orba ta ni achav, a tumen ni asunden.

4Ta o Del bichalda tumenge sa e profetanen, bichalda len tumende but vreme bi te achen, a tumen ni asunden len ta ni thoden lenge sama

5kana phenena: Irintumen akana katar tumaro bilachipe ta katar e ezgode bilache kai cheren, ta ka zivin ande phuv kai o Del dia tumen ta tumare paponen ostade,

6ta na llan pala averenge dela te radin lenge ta te blagosin len, ta na den man joli e ezgodenchar kai si cherde tumare vastenchar, ta ni ka dukhavav tumen.

7A ni asunden man ta dien man joli e ezgodenchar kai si cherde tumare vastenchar te llal tumenge bilache, gia phenele o Del.

8Goleke gia phenda o Del kai si le sa e zor: Soke ni asunden mo avazi,

9ka bichalav ta ka lav sa e vichen katar o norte, gia phenel le o Del, ta me sluga o Nabukodonosor charo katar e Babilonia, ta ka anav len te marenpe e llenenchar katar gaia phuv ta golenchar kai zivin kote ta sa e phuvienchar kai si truial ta ka zatriv len, ta ka thovav len ando lallao ta ka maren lendar espurnia ta ka achen puste ostade.

10Ta ka cherav te na avel ios maskar lende o avazi veselo, avazi katar e bori ta avazi katar o llamutro, ni ka basel o barr kai morel o lliu ta ni ka phabol o villelo katar ni iek memeli.

11Sa gaia phuv ka avel thodi ande zatrania, ta ande dar, ta gala phuvia ka radin e charoke o Nabukodonosor eftavardes burs.

12Ta kana ka nakhen e eftavardes burs, ka dukhavav e charo katar e Babilonia ta gole foro pala lengo bilachipe, ta e phuvia katar e kaldeura, ta ka cherav la pusto ostade, gia phenda le o Del.

13Ta ka anav pe goia phuv sa me alava kai phendem pe late, sa e alavenchar kai si pisime pe gava lil, kai porokisarda o Jeremias pe sa e phuvia.

14Soke i von ka aven sluge katar but phuvia ta but charura, ta ni ka pochinav lenge prema so cheren, ta prema e ezgode kai cheren pe vastenchar.

15Soke gia phenda mange o Del katar o Israel: Le katar mo va o taso kai e mol katar gaia joli, ta de te pien sa e phuvia kai me ka bichalav tut.

16Ta ka pien, ka izdran ta ka diliaon, pala o jarni kai me bichalav maskar lende.

17Ta liem o taso katar e Devleko va, ta diem te pien sa e phuvia, kai o Del bichalda man:

18Kai o Jerusalem, kai e phuvia katar o Juda ta kai lake charura ta kai lake sudura, te achen zatrime, ande espurnia ta ando lallao ta proketime sar si llik allive,

19kai o Faraon charo katar o Ejipto, leke slugen, leke sudonen ta sa leke foro,

20ta sa e phuvia kai si amime, kai sa e phuvia katar e phuv katar o Uz ta kai sa e charura katar e phuv katar e Filistea, kai o Askalon, kai e Gaza, kai o Ekron ta kai gola kai achile katar Asdod,

21kai o Edom, kai o Moab ta kai e chave katar o Amon,

22Kai sa e phuvia katar o Tiro, kai sa e charura katar o Sidon, kai e charura kai si pe goia rig pasa e mora,

23kai o Dedan, kai o Tema, kai o Buz, kai sa gola kai randen po soro,

24kai sa e charura katar e Arabia, kai sa e charura katar e phuvia amime kai zivin po pusto,

25kai sa e charura katar o Zimri, kai sa e charura katar o Elam, kai sa e charura katar e Media,

26kai sa e charura katar o norte, kai si pase ta kai si dur iek averetar, ta kai sa e phuvia kai si pe phuv. Ta mapalal ka piel o charo katar e Babilonia.

27Ta ka phene lenge gia: Gia phenda o Del kai si le sa e zor, Del katar o Israel: Pien ta maton, ta chaden ta peren, ta na usten ios, pala o jarni kai me bichalav tumenge.

28A te na mangle te pien katar o taso kai de len, tu ka phene lenge gia: O Del phenda gia: Trubul te pien.

29Soke ande phuv kote kai ikharen man, kote ka dukhavav, ¿A tumen mislin kai ni ka aven dukhade? Tumen ka aven dukhade, soke anav o jarni pe sa e llene kai zivin pe phuv, gia phenel le o Del kai si le sa e zor.

30Goleke tu ka poroki pe lende sa gala alava ta ka phene lenge gia: O Del ka basel katar o miloso ta katar o than santo kai zivil ka asundol leko avazi, ka basel zurale pe po foro, pe sa e llene kai zivin pe phuv ka asundol sargo e llili kai llilaben gola kai ustaven e drak.

31Ka asundol pe suako than e phuviako, soke o Del chinel kris pe phuvia, o Krisari suakone manuseko, ka thovel po jarni e bilachen, gia phenel le o Del.

32Gia phenda o Del kai si le sa e zor: O bilachipe ka llal phuv phuviate, ta baro bursin ka vazdiniaol but duratar.

33Ande gua llive e llene e Devleke kai mule ka aven rispime katar iek rig e phuviaki llik kai ogoia rig, ta niko ni ka roven lenge, ni ka chiden lenge esnage te prajon len, sargo llubri ka achen upral pe phuv.

34Kukin chobanura, ta urkin, taulintumen ando prajo, gola kai arakhen e stoka, soke avilo tumaro o vreme te chinen tumari korr ta te aven rispime, ta ka peren sargo iek taso kuch.

35Ni ka avel kai te nasen e chobanura, ta nasti ka kurtulinpe gola kai arakhen e stoka.

36¡E chobanura urkin, ta kukin e llene kai arakhen e stoka! soke o Del zatrisarda len.

37Ta e char zeleni ka avel zatrime pala e iag katar e joli e Devleki.

38Mukla pe foro sargo iek liono kai mukel o than kai gurudola, soke lengi phuv achili zatrime pala e joli katar lengo dusmano ta soke saia divome jolinatar.

← Chapter 24 Jump to: Chapter 26 →