Jeremiah 33

Romani Ursari 2018 (Biblia Ande Chib Romani)

← Chapter 32 Jump to: Chapter 34 →

1Pale o duito avilo o alav e Devleko kai o Jeremias kana saia phanglo ande bar katar e rubie ta phenda leke:

2Gia phenda o Del, kai cherda e phuv, o Del kai cherda la te achel pe po than, leko anav si o Del:

3Man mandar ta me ka dav chuke anglal ta ka sikavav chuke ezgode kai si gurudine kai tu ni pinllare.

4Soke o Gazda o Del katar o Israel phenda gia katar e chera katar gava foro ta katar e chera katar e charura e Judaeke, kai si peradine e kastenchar ta e toverenchar.

5Soke avile te marenpe e Kaldeonenchar, te pherdol esnage katar e manusa mule, gola kai me dukhadem len me silnomaia ta me jolinaia, soke gurudem mo mui katar gava foro pala lengo bilachipe.

6Me ka anav lenge sastipe ta drab, ta ka sastarav len, ta ka sikavav lenge but pas ta chachipe.

7Ta ka cherav te irinpe e phangle katar o Juda ta e phangle katar o Israel, ta ka cherav te aven pale gia sar sea omanglal.

8Ta ka chistou len katar sa o bilachipe kai cherde mange, ta kai ni kandie man.

9Ta o anav katar o Jerusalem ka avel mange blagosipe ta baripe maskar sa e forura kai si pe phuv, kai asunde sa o lachipe kai me cherav lenge, ta ka daran ta ka izdran pala sa o lachipe ta sa e pas kai me ka dav len.

10Gia phenda o Del: Pe gava than, kai tumen phenen kai si pusto ta kai inai manusa ni zivirinie, ande forura katar o Juda ta pe droma katar o Jerusalem, kai si zatrime ta inai manusa te zivin kote ni zivirinie,

11ka asundon avazura vesele, avazi katar e bori ta katar o llamutro, avazi katar e llene kai phenen: Blagosin e Devle kai si le sa e zor, soke o Del si lacho, soke leko volipe si ostade, ka asundol o avazi katar gola kai ka den fala ezgodenchar kai si dine kai o cher e Devleko. Soke pale ka anav e llenen kai sea phangle ando foro gia sar cherdem le omanglal, gia phenda le o Del:

12Gia phenel o Del kai si le sa e zor: Pe gava than pusto, kai inai manusa ni zivirinie, ta ande sa leke forura, ka aven cherorra katar e chobanura kai ka inllaren e stoka bakrengi te jan e char.

13Ande forura kai si pe burdura, ande forura kai si ando Sefala, ande forura katar o Negev, ande phuv katar o Benjamin, ta truial katar o Jerusalem ta ande forura katar o Juda ka nakhen e bakre katar e va golenge kai ka llinen len, gia phenda le o Del.

14Ka aven llivesa, phenel o Del, kai me ka cherav e alava kai phendem e llenenge katar o Israel ta e llenenge katar o Juda.

15Ande gola llivesa ta ande gua vreme ka cherav te likel katar e vicha e Davideki iek lleno chacho kai ka cherel so si orta ta ka anel o chachipe pe phuv.

16Ande gola llivesa o Juda ka avel braduime, ta o Jerusalem ka zivil bidarako, ka ikharen la: O Del si amaro chachipe.

17Soke o Del o Gazda phenda: Nikada ni ka achel chucho o trono e Davideko bi te besel pe lete iek murus katar o Israel.

18Ni ka nakhel ni iek lleno katar e popura ta katar e levita te bi te del angla mande kurbano phabardo ta te phabarel so si dino, ta te cherel kurbano suako llive.

19Avilo o alav e Devleko kai o Jeremias ta phenda:

20Gia phenda Del: Te phagea mo alav kai si man e llivesea ta mo alav kai si man e riatea, ta te na avel ni llive ni riat ande po vreme,

21sai phagava i mo alav kai si man e Davidea, te na avel le porodo te charoil pe leko trono, ta mo alav e levitonenchar ta e poponenchar, kai radin mange.

22Gia sar nasti llindon e cheraia e milosoke ta sar nasti llindol e chisai e moraki, gia ka cherav te bariol o porodo katar mo sluga o David ta e levitura kai ka radin mange.

23Avilo o alav e Devleko kai o Jeremias ta phenda:

24¿Ni dikhlan so del orba gava foro, kai phenel: Dui viche kai o Del esvirisarda chudia len? ta von ni thoven sama me foroke, ta ni dikhen le ios sargo iek foro.

25Gia phenda o Del: Te na avel ios mo alav e llivesea ta e riatea, ta na thodem e zakonura katar o miloso ta e phuv,

26ni ka avel ni o porodo katar o Jakob ni katar o David mo sluga, te lav katar leko porodo ko te avel gazda pe po porodo kai ka avel mai angle e Abraame, e Isake ta e Jakobo. Soke ka cherav te irinpe lenge phanglen, ta ka avel mange zalba lendar.

← Chapter 32 Jump to: Chapter 34 →