Jeremiah 51 — Romani Ursari 2018 (Biblia Ande Chib Romani)

1Gia phenda o Del: Me vazdav iek balav kai zatril Babilonia ta pe llene kai zivin kote ta kai vazdiniaon pe mande.

2Ta ka bichalav pe Babilonia llenen te chuden la upre ta ka chucharen laki phuv, soke katar suako rig ka marenpe laia ando llive katar e zatrania.

3E lleneke kai chapenil po arko ta goleke kai uzdilpe ande pe patave sastrune o Del ka phenel lenge gia: Te na prostin lenge ternen, zatrisaren sa lenge boñikonen.

4Ta ka peren mule pe phuv e kaldeura ta jirade pe lanse ka peren po drom.

5Soke o Israel ta o Juda si dosale, a ni achile phivle katar po Gazda, o Del kai si le sa e zor, makar ande lengi phuv cherde o bilachipe e Santoke katar o Israel.

6Nasen katar e Babilonia ta suako lleno te kurtulil po zivoto, te na merel pala lako bilachipe, soke si o vreme kai o Del ka ikanel pi joli ta ka pochinel lake prema laki dos.

7Taso sunakuno saia e Babilonia ande Devleke va ta matarda sa e sueto, katar laki mol pile sa e forura, zalime achile sa e phuvia.

8Oma pelitar e Babilonia ta phagili, roven pe late, len zeitino pala laki duk sai avelpe kai ka sastol.

9Diam o drab e Babilonia, ta ni sastili. Muken la ta te llaltar suako lleno kai pi phuv, soke llik kai o miloso avili e kris pala laki dos, vazdinaili llik kai e oblakura.

10O Del cherda te dikhol amaro chachipe, aven ta phena ando Sion so cherda o Gazda amaro Del.

11Chistosaren e llide, len e eskudura, o Del cherda te llungadon e charura katar e Media, soke lengo mislo si te zatrin e Babilonia, soke si te ikandol e duk e Devleki ta e duk katar leko cher.

12¡Vazden iek chiti pe zidura katar e Babilonia! ¡Lacharen o than kai gurudon! ¡Thoven llenen te arakhen! ¡Gurudon te na dikhen tumen! Soke o Del chinda kris ta ka cherel so phenda cheres e llene katar e Babilonia.

13Tu kai zivi maskar but paia, kai si tut but barvalipe, avilo cho son, o son katar e jamllia kai si tut po barvalipe. ¡Akana avilo o vreme te mere!

14O Del kai si le sa e zor, Jala sovel isto pe pete ta phenda: Me ka cherav te pherdo llene sargo langoste, ta pe tute ka urkin soke dobisarde.

15Vou si kai cherda e phuv pe zoriaia, kai cherda te achel chapeni e phuv pe bizaimaia ta buliarda o miloso pe llanglimaia.

16Kana asundol leko avazi cherdon bare paia ando miloso ta chak duratar cherel te liken e oblakura. Vou cherel e esterliche e bursindea ta ikanel e balav katar o than kai si gurudini.

17Sa e llene dilaile ta inai len bizaipe. E llene kai cheren ezgode pe vastenchar lallan katar e slike kai cheren soke lenge dela si iek kojaipe ta inai llunde.

18Ni mol len niso, von si iek ezgoda dili. Kana ka avel o vreme o Del ka zatril len.

19O Del katar o Jakob inai sargo von, soke vou cherda sa e ezgode ta po maskaral si o Israel kai si leko. Leko anav si o Del kai si le sa e zor.

20Tumen sen mange iek chokano, ta sen ezgode kai mardol lenchar ta tuia ka marav e phuvien ta ka zatriv e charoine tuia.

21Tuia ka phagav e grasten ta e llenen kai llan pe lende ta tuia ka phagav e bordona ta golen kai liken upral.

22Ta tuia ka phagav murusen ta diskinien, tuia ka phagav phuren ta ternen ta tuia ka phagav chaven ta cheen.

23Ta i tuia ka phagav e chobano ta leke stoka, tuia ka phagav e gazden ta e sudonen.

24Ta ka merel e Babilonia ta lake llene kai zivin ande Kaldea ta sa o bilachipe kai cherde ando Sion angla tumare akha, gia phenel le o Del.

25Me avilem pe tute, phenel o Del, kai san o burdo kai zatril, kai zatrisardan sa e phuv, me ka vazdav mo va pe tute ta ka cherav te tauli tut pe barra ta ka cherav tut iek burdo phabardo.

26Ta niko ni ka lel tutar barr te cherel cher ni te thovel le telal katar iek zido, soke ostade ka ache zatrime, gia phenda le o Del.

27Vazdel o bariako pe phuv, basalen e tuturuga ande forura, lacharen forura te marenpe laia, chiden pe late e charoine katar o Ararat, katar o Mini ta katar o Askenaz, thoven iek gazda e boñikonengo, te anel e grasten sargo langoste pe late.

28Lacharen e phuvien te marenpe laia, e charonenchar katar e Media ta lenge gazdenchar ta lenge sudonenchar ta sa e phuvienchar kai von gazdarin.

29E phuv ka izdral ta ka dukhal la, soke cherdilo sa so mislila latar o Del, te mukel pusto o foro katar e Babilonia ta te na zivil niko kote.

30E llene tromane katar e Babilonia ni mardepe, gurudile pala e zidura, ni saia len zor, cherdile sargo diskinie. Phabarde si lenge chera ta phage lenge alkave.

31Iek pala aver praste e llene kai o charo katar e Babilonia te phenen leke kai len peke leki phuv katar suako rig.

32Lie peke e droma katar e paia, phabarde e zidura ta e boñikura daraile.

33Soke o Del kai si le sa e zor, o Del katar o Israel phenda gia: E chei katar e Babilonia si sargo e umal kai bariol o lliu, ta lacharen o than kai ka avel ustado.

34Jala man, chinda man pe kotora o Nabukodonosor o charo katar e Babilonia ta mukla man sargo iek taso chucho, nakhada man sargo iek iagartano jala mandar o mai lachipe ta chudia man avri.

35Te perel pe Babilonia o silnope kai cherde pe mande ta pe mo mas, ta mo rat te perel pe llene katar e Kaldea, gia ka phenel o Jerusalem, e chei katar o Sion.

36Goleke gia phenda o Del: Me krisiu chuke ta ka ikanav chi duk. Ta ka sukarav lengi mora ta ka cherav te sukol lengo pai.

37E Babilonia ka achel ando phagipe, ka achel pusti ta ka maren latar espurnia kote ka zivin e llukela dive ta ni ka zivin e manusa.

38Saurre ka basen sargo lionura, sargo lionichura ka basen.

39Pe lengo tatipe ka thovav lenge siña ta ka cherav te maton ta te veselinpe, te soven ostade ta te na usten nikada, gia phenel le o Del.

40Ka inllarav len sargo bakre te meren, sargo bakre ta busne.

41¡Phangli si e Babilonia, ta lie la peke e blagosime katar sa e phuvia! ¡E Babilonia cherdili o chudo maskar e phuvia!

42Vazdinaili e mora pe Babilonia, sa lake valura ucharde la.

43Lake forura zatrisaile, e phuv achili suki ta pusti, kote ni ka zivil niko ta ni niko ni ka nakhel latar.

44Me ka krisiu e Bele ande Babilonia ta ka ikanav katar leko mui so nakhada, ta ni ka aven ios phuvia late, ta o zido katar e Babilonia ka perel.

45Liken latar mo foro, na daran ta suako lleno te kurtulil po zivoto katar e joli e Devleki.

46Na jasaren e zor ande tumaro lio ta na daran katar e orbe kai ka asundon, ande iek burs ka aven e orbe ta pala aver burs pale e orbe, ta mapalal ka avel o silnope pe phuv, iek gazda ka marelpe avere gazdaia.

47Goleke, aven llivesa kai me ka zatriv e dela katar e Babilonia, ta sa laki phuv ka achel ando lallao, ta sa lake mule ka peren po maskaral latar.

48O miloso ta e phuv ta sa gola kai zivin ande lende ka llilaben veselimatar pe Babilonia, soke katar o norte ka avel pe late gola kai zatrin, gia phenel le o Del.

49Pala e llene katar o Israel kai mule, ka perel e Babilonia, gia sar mule pala e Babilonia sa e llene katar e phuv.

50Gola kai nasle katar o jarni, llan, ta na achen. Den tumen golli but vreme katar o Del ta den tumen golli katar o Jerusalem.

51Mera lallaimatar soke asundam sar kusen, amaro mui pherdilo lallao soke avile llene katar aver phuv pe thana sante katar o cher e Devleko.

52Goleke, aven llivesa, phenel o Del, kai me ka zatriv lenge dela ta ande sa lengi phuv ka auchinpe e dukhade.

53I te likela e Babilonia chak ando miloso, ta te istarel zor chak upre, mandar ka llan late gola kai zatrin, gia phenel o Del.

54¡Asundol sar kukil e Babilonia ta e bari duk katar e phuv e kaldeonengi!

55Soke o Del ka zatril e Babilonia ta ka ikanel latar lako baripe. Ka basen lake valura ta sargo but paia ka asundol lengo avazi.

56Soke avilo pe late gua kai zatril pe Babilonia, ta lake llene tromane achile phangle, phagilo lengo arko soke o Del gua kai pochinel, ka pochinda.

57Ta ka matarav lenge sudonen ta lenge bizaien, lenge gazda e boñikonenge ta e glamne, ta lenge tromane ta lenge zurale, ta ka soven ande lindri ostade ta ni ka usten ios, gia phenel le o Charo, kai leko anav si o Del kai si le sa e zor.

58Gia phenda o Del kai si le sa e zor: O zido bulo katar e Babilonia ka avel peradino ostade ta leke bare udara ka aven phabarde, samo gia radisarde e phuvia ta e forura chinile samo pala e iag.

59Ando panchto burs kai gazdarila o Sedekias ando Juda, o Jeremias bichalda te phenen e Seraiaseke chavo katar o Nerias ta unuko katar o Mesaias, kana llala e Sedekiasea po pusto katar e Babilonia, soke saia leko mai baro sluga.

60Ta o Jeremias pisisarda pe iek lil sa o bilachipe kai saia te avel pe Babilonia, ta sa so saia pisime kai saia te nakhel e Babilonia.

61Ta o Jeremias phenda e Seraiaseke: Kana ka ave ande Babilonia, ta ka dikhe ta ka chiti sa gala ezgode,

62ka phene gia: Devla, tu phendan katar gava than kai ka zatri le, ta kai ni ka achel niko kate, ni manus ni zivirinia, ta kai ka achel pusto ostade.

63Ta kana ka chiti sa so phenel gava lil, ka phande pe lete iek barr, ta ka chude le ando pai o Eufrates,

64ta ka phene: Gia ka llaltar tele e Babilonia ta ni ka ustel katar o bilachipe kai me anav pe late, ta ka dobin len. Llik kate aven e alava e Jeremiaseke.