Acts 17

Romani Baltic Latin (Biblija - Pe Baltitko Romani čib (Romanes) 2019)

← Chapter 16 Jump to: Chapter 18 →

1Kiéli Pávli i Sila proginé pir Amfipoljo i Apolonija, tedy javné jone dre Fiesalonika, kaj sys Judengiri sinagoga.

2Pávli, syr jov prisyklyja te kerél, zagijá dre sinagoga i trin sávaty (suboty) rakirdiá lénca Sventoné Čhinybnástyr,

3jov obrakirelas i dophenelas lénge, so Xristosóske treindiá adiáke te javél, sob (kaj) Jov te pirilydžal saré mén'ki i te otdžidjol muléndyr, i so: “Kadavá-pac' Xristóso isyn Isúso, pal Savéste me rosphenava tuménge.”

4I vari-savé léndyr patiandyné i javné ke Pávli Silasa, i but devlytkoné Griekéndyr (Balaméndyr) i adiáke-pac' but džuvliá barvalendyr javné.

5Ne Judy, savé na patiandyné, xoliasyne i lyné javriestyr vari-savé pirangačen foruniátyr (ploščátyr) i kedynepe saré khetané i ĥazdyné saré manušén dro fóro: i jone giné pe Jasonoskiro kher, sob (kaj) te vylydžan len ke manušá;

6a kiéli odój jone na lathné Pavlís Silasa, tedy lydžiné zorjása Jasonos i javire pšalén ke foritka barydyrá, dyi gódla: “Kadalé manušá keréna bizlado pir saró svéto, a kakaná javné i adarík;

7a Jasono prilyjá len dro péskiro kher; i saré jone isyn proti khieningoskire uphenybená i rakiréna, so isyn javír králi, Isúso.”

8Manušá i foritka baré raja, kiéli šundlé saró davá, xoliasyne.

9Jone lyné Jasonostyr i javirendyr symadý (zalogo) i otmekne len.

10Pšála dre dová-pac' časo (momiento) ratiákiro otbičhade Pavlís i Silas dre Vierija, a odolé, syr javné odorík, giné dre Judengiri sinagoga.

11Adalé manušá sys patyvaledyr Fiesalonikiicendyr, jone baré jakhénca šundlé phenybnytko lav, kažno dyvés jone roskedenas Svénto Čhinybén, sob (kaj) te džinén, ci čačipén Pávli rakirdiá.

12I but Judendyr patiandyné; adiáke-pac' patiandyné barvalé Griekítka (Balamítka) džuvliá i muršá.

13Ne kiéli Judy Fiesalonikatyr udžindlé, so i dre Vierija Pávli rosphenelas Devléskiro lav, jone javné i odorík te podrakiren manušén.

14I tedy pšála dre dová-pac' časo (momiento) bičhadé Pavlís dre rig ke morjoskiro (derjavéskiro) brégo; a Sila i Xima jačnépe odój.

15A manušá, savé lydžánas Pavlís, doginé lésa ke Afiny, i Pávli dyjá priphenybén lénge vaš Silaske i Ximoske, syr saštý (možna) sygedýr te javén ke jov.

16I paka Pávli užakirdia len dre Afiny, jov divindiape i piridživelas, dykhí, so dro fóro sys pherdó ídoly.

17Paldavá jov rakirdiá Judenca dre sinagogi i Najudenca (devlytkoné manušénca), i pe foruný (plóšča), kažno dyvés rakirdiá manušénca, savén jov streninelas (pirilelas).

18A vari-savé Epikurieine i Stoikone filosofendyr giné te xanpe lésa dro rakiribén. I vari-savé phučné: “So davá balvalitko manúš kaméla te phenél?” A javír rakirdé: “Jov, zdelape, rosphenéla pal čužoné naamare devlende?” – pal-dová so Pávli rosphenelas lénge bahtalý zan (zvies') pal Xristosóste i Léskiro otdžidyiben muléndyr

19I jone jandlé Pavlís dro Arieopago i phendlé: “Ci saštý (možna) te džinas aménge, savó davá isyn dasavo nevó sykliakiribén, so tu rosphenesa?

20Pal-dová so dová, so tu rakirésa, ame nijékhvar na šundiám; i ame kamasa te džinas, so davá saró značynéla?”

21Saré Afiniani i manušá, savé dživdé odój javire rigéndyr, nisosa na zalenaspe dre péskiro vól'no časo, apríč dová, so rakirénas, ci šunenas vari-savé nevipená.

22I, ĥáda, Pávli uštyjá maškirál Arieopago i phendiá: “Afinianiále! Pir saró me dykháva, so tumé drieván kutiakirena péskire devlen:

23kiéli me psirdjom i dykhcjom tumaré svénta štéty, me lathjom altárjo, pe savó sys čhindló: “Nadžindle Devléske.” Pal Adaleste, Saves tumé na džiný, priĥaljona, me i kamám tuménge te rosphenav.

24Devél, Savó sozdyjá svéto i saró, so isyn dre léste, Jov, Savó isyn Devél bolybnaske i phuvjake; Jov na dživéla dre khangirja, savé kerdé manušýtka vastá.

25Léske na trej, sob (kaj) manušá te dynarinén (te služynen) Léske péskire vasténca; Jov Kokoró déla sarénge džiibén i saró;

26i Jov kerdiá saró manušýtko ródo jekhe manušéstyr, sob (kaj) manušá te dživén pir sarí phuv; Devél vykedyjá vaš saré manušénge časo i štéto vaš džiibén pe phuv,

27sob (kaj) manušá te rodén, te kamen te javén pašyledýr ke Jov i te lathén Les, pal-dová so Jov isyn nádur améndyr:

28so ame dre Léste dživasa i psirasa i ame sam, syr vari-savé i tumaré poety phendlé: ‘Ame adiáke-pac' bijandyjam Léstyr’.

29I kóli ame bijandyjam Léstyr, tedy aménge na trej te duminas, so davá isyn Devél, ci savó isyn kerdó suvnakástyr ci rupéstyr, ci barestyr, savó isyn kerdó manušytkoné vasténca i pir manušýtko godý.

30Paldavá Devél promekcia dová časo, kiéli ame na džindiam čačipén, a Devél kakaná rakiréla saré manušénge pir saró svéto, sob (kaj) jone te riskirén péskiro džiibén ke Devél,

31pal-dová so Jov vykedyjá dyvés, kiéli Jov javéla te sendiakirél svéto čačuné sendosa pir Manušéste, Saves Jov vykedyjá, Jov sykadiá davá vykedyiben saré manušénge, kiéli otdžidiakirdiá Les muléndyr.”

32I kiéli jone šundlé pal otdžidiakiriben muléndyr, vari-savé léndyr sandlepe, a javír phendlé: “Ame javása te šunas pal davá tut javír mólo.”

33I Pávli gijá krig léngire skedyibnástyr.

34A vari-savé manušá piriginé pe Pavliskiri rig i patiandyné; maškír lénde sys Dionisijo, Arieopagoskiro barydyró, i džuvlý, savjá khardé Damar', i javír manušá.

← Chapter 16 Jump to: Chapter 18 →