Acts 3

Romani Baltic Latin (Biblija - Pe Baltitko Romani čib (Romanes) 2019)

← Chapter 2 Jump to: Chapter 4 →

1Pétri i Iáno jékhvar giné khetané dre Khangirí pe bel'velitko mangipén:

2i sys odój jekh manúš, savó sys langalo bijanypnastyr, savés so dyvés janénas i čhuvénas te bešél pašýl Khangirjákiri pórta, saví kharéna Loly, sob (kaj) jov te mangél dyibén manušéndyr, savé zadžanas dre Khangirí;

3kiéli adavá manúš dykhciá Petris Ianosa angíl zagiibén dre Khangirí, jov lyjá te mangél léndyr.

4I Pétri rakhunes dykhciá Ianosa pe léste i phendiá: “Dykh po aménde.”

5I jov lyjá rakhunes te dykhél pe lénde, užakiri, so jone déna vari-so léske.

6Ne Pétri phendiá: “Suvnakáj i rup mánde nane; ne dová, so mánde isyn, me dáva túke: vaš lav Isusóskiro Xristosóskiro Nazarietostyr, uštý i psir.”

7I jov lyjá les pal čačó vast i ĥazdyjá; i dre dová-pac' časo langaleskire ĥerá vysastine.

8Manúš uhtia pe ĥerá i lyjá te psirél, i khetané lénca gijá dre Khangirí, jov psirdiá i uhtia i šardia Devlés.

9I saré manušá dykhné les, syr jov psirelas i šarelas Devlés;

10i jone ĥalyné les, so jov sys dová-pac' manúš, savó sys beštó pašýl Khangirjákiri Loly pórta i mangelas dyibén; dar i dívo oblyne len, so kerdiápe adalé manušésa.

11Ne paldová, so langalo, savó vysastija, na otdžalas Petristyr Ianosa, saré manušá prastandynepe odorík ke jone, pe dová štéto, savó kharéna Solomonóskiro trémo.

12I kiéli Pétri dykhciá davá, jov phendiá manušénge: “Manušále Izrailjoskire! So tumé divinenape pe davá? Sóske tumé dykhéna adiáke pe aménde, sýrby, ake, ame péskire zorjása ci džiibnasa dre dar angíl Devléste kerdiám adiáke, so adavá manúš lyjá te psirél?

13Devél Avraamóskiro i Isakóskiro i Jakovóskiro, Devél amaré dadéngiro, proslavindia Péskire Čhavés Isusós, Saves tumé zdyne i Savéstyr otphendlepe angíl Pilatoste, kiéli Piláto otsendindia te otmekél Les pe vólia.

14Ne tumé Sventonestyr i Čačunestyr otphendlepe, a vymangne, sob (kaj) tuménge te otmeken rozmaribnaris;

15ne tumé muliakirdé džiibnáskire Šere Ras, Konés Devél otdžidiakirdiá meribnástyr i ame sam jakhítka dro davá.

16I patiaibnása dro Léskiro lav kerdiá zoraledýr adales, savés tumé dykhéna i džinéna, i patiaibén, savó isyn Léstyr, vysastiakirdiá les angíl tuménde sarénde.

17Pšalále! Kakaná me džinóm (džináv), so tumé i tumaré rajo, kerdé davá pir nadžinyben;

18ne Devél saró kerdiá ke kónco/iagóro (spolnindia), so rakirdé Léskire proróki, so Léskire Xristosóske javéna baré mén'ki.

19Riskirén péskiro džiibén i risjon ke Devél, sob (kaj) tumaré gréhi te javén khosle tuméndyr;

20sob (kaj) te bičhavel Raj Devél tuménge javír lačhó časo te podrikirél tumen, sob (kaj) Jov moginelas te bičhavel Isusós Xristosós, Savó sys uže vykedyno tuménge;

21Saves bolybén sys bangó te prilel ke/žýko davá časo, paka Devél keréla saró, i pal Konéste angledýr rakirdiá pir Péskire sventoné prorokénde svetóskire anglypnástyr.

22Mójza ž phendiá: “Tumaro Raj Devél čhuvéla tumaré pšaléndyr Prorokós, syr i man; kandén Les dro saró, so Jov javéla te rakirél tuménge.

23I javéla adiáke, so kažno manúš, kon na javéla te kandel odolé Prorokós, lélape krig manušéndyr te xasjol.”

24Saré proróki, Samuilostyr i savé sys korigedýr (pozže) léste, saré rakirdé, uphendle pe dalé dyvesá.

25Tumé san prorokéngire čhavé i zavietoskire, pal savénde Devél dyjá lav tumaré dadénge; Jov rakirdiá Avraamóske: ‘Saré manušá tyré rodóstyr pe phuv javéna bahtiakirde Devléstyr’.

26Ke tumé pérva, Devél otdžidiakirdiá meribnástyr Péskire Čhavés i bičhadiá Les ke tumé, sob (kaj) te bahtiakirél tumen, sob (kaj) kažnones tuméndyr te otriskirel nalačhé tumaré rendéndyr.”

← Chapter 2 Jump to: Chapter 4 →