Joshua 16

Romani Baltic Latin (Biblija - Pe Baltitko Romani čib (Romanes) 2019)

← Chapter 15 Jump to: Chapter 17 →

1Tén'ci (potom) vypyja žriébijo Iosifóskire (Jozáskire) čhavénge: Iordanostyr pašýl Jerihóno, pašýl Jerihonoskiro paní pe vastóko, ke čhučí phuv, saví tyrdelape Jerihonostyr ke Viefiljoskiri bérga;

2Viefiljostyr džála miežakiri rig ke Luza, i piridžala ke Arhakiri miéža ke Atarofo,

3i zmekelape ke mórjo (derjáv), ke Iaflietoskiri rig, pe Telatuny rig Bief-Oronoskiri i ke Gaziero, i jagóro isyn pašýl mórjo (derjáv).

4Davá doresné (dolyne) dre mištypnáskiri miéra Iosifóskire (Jozáskire) čhavé: Manásija i Jefriémo.

5Rig pir miéža Jefriemóskire čhavéngiro pir léngire kherítka ródy sys dasaví: vastokóstyr léngire mištypnaskire mierakire rigasa sys Atarofo-Adaro ke Bief-Orono upratuno;

6Tén'ci (potom) džála miežakiri rig ke mórjo (derjáv) sieviernone Mihmiefafoskire rigasa i riskiréla ke vastočno rig pe Faanaf-Silómo, i obdžala les vastočnone Ianohoskire rigátyr;

7Ianohostyr, miéža džála telé ke Atarofo i Naarafo, prijačela ke Jerihóno i dodžála ke Iordáno.

8Tapuahostyr džála miežakiri rig ke mórjo (derjáv), ke sýgno rékica (lenorí) Kaná, i lákiro jagóro zadžála dre mórjo (derjáv). Ĥáda, isyn mištypnáskiri miéra Jefriemóskire čhavéngire pir ródycy, pir kherítka ródy (pliémi).

9I fórja otginé Jefriemóskire čhavénge dre Manasijáskire-čhavengiri mištypnáskiri miéra, saré fórja léngire gavenca.

10Ne Jefriemliani na vytradyné Xananiejen, savé dživdé ke Gaziero; paldavá Xananiei dživdé maškirál Jefriemlianende ke davá-pac' dyvés, pleskiri lénge dan'.

← Chapter 15 Jump to: Chapter 17 →