Joshua 4

Romani Baltic Latin (Biblija - Pe Baltitko Romani čib (Romanes) 2019)

← Chapter 3 Jump to: Chapter 5 →

1Kiéli saré manušá piriginé pirdál Iordáno, Raj Devél phendiá Isusóske:

2“Len péske manušéndyr dešudúj manušén, pir jekhe manušéste rodycóstyr (čangatyr),

3i den lénge uphenybén i phenén: “Len péske adathýr, maškirál Iordanos, kaj sys terdé tvardes ĥerá rašángire, dešudúj bará, i lydžán len pésa, i čhuvén len pe rat, kaj javéna te rat'kiren dre daja rat”.

4Isúso khardiá dešudujen manušén, savén vykedyjá Izrailjoskire čhavéndyr, pir jekhe manušéste rodycóstyr;

5i phendiá lénge Isúso: “Džán angíl Ráskire-Devléskiro, tumaré Devléskiro kovčego, maškirál Iordáno, i len odothýr i čhuvén pe péskiro psikó kažno (sváko) manúš pir jekh bar, pir Izrailjoskire čhavéngire-rodycoskiro ginybén,

6sob (kaj) jone te javén tuménde syr znamiénii (ĥiertyká). Kiéli phučena tuméndyr dro (časo), savó javéla tumaré čhavé i phenéna: “Ke so tuménde dalé bará?”

7Tumé phenéna lénge: “Dro ripiribén pal dová, so paní Iordanoskiro rozgijápe angíl Ráskire-Devléskiro zavietóskiro kovčego; kiéli jov gijá pirdál Iordáno, tedy paní Iordanoskiro rozgijápe. Adiáke bará dalé javéna vaš Izrailjoskire čhavénge ripiribnasa pe viéko”.

8I kerdé Izrailjoskire čhavé adiáke, syr priphendiá Isúso: lyné dešudúj bará Iordanostyr, syr rakirdiá Raj Devél Isusóske, pir Izrailjoskiro čhavéngiro-rodycoskiro ginybén, i jandlé len pésa pe rat, i čhudé len odój.

9I javír dešudúj bará čhudiá Isúso maškír Iordáno pe štéto, kaj sys terdé rašángire ĥerá, savé lydžiné zavietóskiro kovčego. Jone isyn odój i ke davá dyvés.

10Rašaja, savé lydžiné kovčego, sys terdé maškír Iordáno, paka kerdó sys saró, so Raj Devél priphendiá Isusóske te phenés manušénge, – adiáke, syr rakirdiá Mójza Isusóske; a manušá dalé časosa bahtales piridžanas.

11Kiéli saré manušá piriginé Iordáno, tedy pirigija i Ráskire-Devléskiro zavietóskiro kovčego, i rašaja angíl manušénde;

12I čhavé Ruvimóskire, i čhavé Gadóskire, i paš Manasijáskiro ródyco piriginé angíl Izrailjoskire čhavénde mardytkonenca, syr rakirdiá lénge Mójza.

13Pašýl štardešá tysjoncy mardytkonenca pe bran' piriginé angíl Raste-Devléste pe Jerihonoskire loščyny, sob (kaj) te marénpe.

14Dre dová-pac' dyvés barjakirdia Raj Devél Isusós angíl saré Izrailjoskire jakhá, i jačné te darenpe léndyr, syr dardepe Mojzastyr, dre saré léskire džiibnáskire dyvesá.

15I phendiá Raj Devél Isusóske:

16“Priphen rašange, savé lydžána kovčego dosykaibnása (otkrovienijasa) te vydžán Iordanostyr”.

17Isúso priphendiá rašange i phendiá: “Vydžán Iordanostyr”.

18I kiéli rašaja, savé lydžiné Ráskire-Devléskiro zavietóskiro kovčego, vyginé Iordanostyr, tedy, syr léngire ĥerá terdiné pe phuv, paní Iordanoskiro sýges pothadyja pir péskiro štéto i gijá, syr tasiá i pe tríto dyvés, vučedýr saré péskire bregendyr.

19I vyginé manušá Iordanostyr pe déšto dyvés pervoné-čhonéskiro, i čhudé stáno dre Galgálo, pe vastočno Jerihonoskiri rig.

20I dešudúj bará, savé lyné jone Iordanostyr, Isúso čhudiá dro Galgálo.

21I phendiá Izrailjoskire čhavénge: “Kiéli sphučena dre pérvo časo čhavé tumaré péskire dadyr: ‘So značynena dalé bará?’”

22Phenén tumaré čhavénge: “Izrailjo pirigija pirdál saró Iordáno pir šukí phuv.”

23Paldavá so Raj Devél, Devél tumaró, vyšut'kirdia paní Iordanoskiro vaš tumenke, paka tumé piriginé les, adiáke-pac' syr Raj Devél, Devél tumaró, kerdiá Lolé morjosa, savó vyšut'kirdia angíl aménde, paka ame pirigijam les,

24sob (kaj) saré phuvjákire manušá udžindlé, so vast Ráskire Devléskiro isyn zoraló, i sob (kaj) tumé te darén Rástyr-Devléstyr, Devléstyr tumarestyr, dre saré dyvesá.

← Chapter 3 Jump to: Chapter 5 →