Joshua 17

Romani Baltic Latin (Biblija - Pe Baltitko Romani čib (Romanes) 2019)

← Chapter 16 Jump to: Chapter 18 →

1I vypyja žriébijo Manasijáskire rodycóske, adiáke syr jov sys Iosifoskiro anglatunó čhavó. Mahiroske, Manasijáskire anglatuné čhavéske, Galaadóskire dadéske, savó sys muršari pe maribén, jaciápe Galaádo i Vasáno.

2Jaciápe mištypnáskiri miéra i javirénge Manasijáskire čhavénge, pir léngire kherítka ródy, i Avijezeroskire čhavénge, i Xieliekoskire čhavénge, i Asriiloskire čhavénge, i Xiefieraskire čhavénge, i Šiemidaskire čhavénge. Ĥáda, sys čhavé Manasijáskire, Iosifóskire-čhavéskire muršá, pir léngire kherítka ródy (pliémi).

3Salpaadoste, Xiefieroskire čhavéste, Galaadóskire čhavéste, Mahiroskire čhavéste, Manasijáskire čhavéste, na sys čhavén, a sys jekh čhaja. Ĥáda, isyn léngire čhajengire lavá: Mahla, Noa, Xogla, Milka i Firca.

4Jone javné ke rašáj Jelizáro i ke Isúso, Navinoskiro čhavó, i ke barydyrá, i phendlé: “Raj Devél phendiá Mojzáske te del aménge mištypnáskiri miéra maškír amaré pšalénde”. I dyné lénge mištypnáskiri miéra, pir Ráskire-Devléskiro uphenybén, maškír léngire dadéskire pšalénde.

5I vygijá Manasijaske deš rozdyibena (učastki), apríč Galaadóskire i Vasanoskiri phuv, saví sys pal Iordáno;

6pal-dová so Manasijáskire čhaja doresné (dolyne) mištypnáskiri miéra maškirál léskire čhavénde, a Galaadoskiri phuv jaciápe javire Manasijáskire čhavénge.

7Miežakiri rig Manasijaskiri džála Asirostyr ke Mihmiefafo, savó isyn proti Sihiema; adathýr džála miéža pe čačí (pravo) rig ke En-Tapuahoskire manušá.

8Phuv Tapuaho jaciápe Manasijaske, a fóro Tapuahoskiro pašýl miežakiri rig jaciápe Manasiijaskire-Jefriemóskire čhavénge.

9Adathýr miežakiri rig džála telé ke sýgno rékica (lenorí) Kano, paš-dyvesytkoné (južnone) panieskire rigátyr. Fórja dalé isyn Jefriemóskire, usajékh so jone isyn terdé maškír Manasijáskire fórja. Miéža Manasijaskiri – pe sieviernone rekicakiri (len'rjakiri) rig, i končynelape dro mórjo (derjáv).

10Dová, so isyn ke paš-dyvés, dová isyn Jefriemoskiro, a so isyn ke paš-rat, dová isyn Manasijáskiro; mórjo (derjáv) sys léngire miežasa; ke Asiro jone prijačena paš-dyvesytkoné rigátyr, i ke Isaharo vastočnone rigátyr.

11Isaharoste i Asiroste isyn i Manasijaske Bief-San i štéty, savé isyn tel léskiri zor, Ivlieamo i léskire štéty, i manušá Dorakire i štéty, savé sys tel léskiri zor, manušá En-Dorakire i štéty, savé sys tel léskiri zor, manušá Faanahoskire i štéty, savé sys tel léskiri zor, manušá Miegidonoskire i štéty, savé sys tel léskiri zor, i tríto okrugakire pašá Nafiefoskiro.

12Manasijáskire čhavé na mogindlé te vytraden dalé-for'jengire manušén, i Xananiei jačnépe te dživén pe daja phuv.

13Kiéli Izrailjoskire čhavé javné dre zor, tedy jone kerdé Xananiejen andynarščykenca (danikenca), ne te vytraden len na vytradyné.

14Iosifóskire (Jozáskire) čhavé rakirdé Isusóske i phendlé: “Sóske tu dyján mánge dre mištypnáskiri miéra jekh žriébijo i jekh učastko, tedy syr amen but manušá, pal-dová so adiáke bahtiakirdiá man Raj Devél?

15Isúso phendiá lénge: “Kóli túte isyn but manušá, tedy džá dro veš i odój, pe phuv Fierieziejengiri i Riefaimengiri, rosker péske štéto, kóli Jefriemóskiri bérga vaš túke isyn tiasno (tango).

16Iosifóskire čhavé phendlé: “Na jačélape pal aménde bérga, pal-dová so sastruné maribnýtka vurdyná saré Xananiejende, savé dživéna pe dólo, syr odolénde, savé isyn dre Bief-Sana i dre štéty, savé isyn tel léskiri zor, adiáke i odolénde, savé isyn pe Izrailjoskiro dólo.”

17Ne Isúso phendiá Iosifóskire, Jefriemóskire i Manasijáskire kheréske: “Túte isyn but manušá i zor túte isyn bari; na jekh žriébijo javéla túte:

18i bérga javéla tyrí, i davá veš, tu roskeresa čašča i joj iavéla ke kokoró lákiro jagóro; pal-dová so tu vytradesa Xananiejen, mek i isyn lénde maribnýtka vurdyná sastruné, i mek isyn jone zoralé.”

← Chapter 16 Jump to: Chapter 18 →