Revelation 1

Romani Baltic Latin (Biblija - Pe Baltitko Romani čib (Romanes) 2019)

Jump to: Chapter 2 →

1Sykadyipén (ob'iavlienijo) Isusóstyr Xristosostyr, Savó Devél dyjá Léske te sykavél Péskire pishar'jénge (rabénge), so trej syg te javél. I Xristóso phendiá zorjása davá, kiéli Jov bičhadiá Péskire Jangolós ke Péskiro pishári Iáno (Ioano),

2savó phenelas zorjása Devléskiro lav i Isusóskiro Xristosóskiro dophenybén i dová saró, so Iáno dykhciá.

3Bahtaló isyn odová, kon ginéla i šunéla lavá kadalé angilphenybnástyr i rikirélape doléske, so isyn čhindló dro daja lylvarí, pal-dová so časo javéla syg, kiéli saré dalé čačipená kerénape.

4Ianóstyr eftá (bitrinengire deše) khangir'jénge, savé isyn dre Azija: Mek bahtalypén i ramánjo (miro) te javél tuménge Odoléstyr, Savó isyn, Savó sys, i Savó javéla, i eftá duhéndyr, savé isyn angíl Léskiro trono;

5i Isusóstyr Xristosostyr, Savó isyn patiaibnýtko Jakhítko (Svidietieljo), Savó isyn Pérvo, kon uštyjá muléndyr i Savó isyn Barydyró pe kral'jénde pir phuv. Léske, Savéske jaciám dróga ame, Jov otmekciá amaré gréhi Péskire ratésa,

6Savó sozdyjá améndyr rašángiro Kralipén te dynarinél Léskire Devléske i Dadéske, mek sláva i zoralypén te javél pe saré viéki. Amín'.

7Ake, Jov javéla oblokénca, i kažno (sváko) manúš udykhéla Les, i kodolé, savé phusadé Les čhurdybnytkone bustiasa (kopjosa) i saré phuvjákire ródy javéna te den gódla jasvénca angíl Léste. Mek adiáke te javél. Amín'.”

8“Me som Al'fa i Omiega, Anglypén i Kónco (Jagóro), rakiréla Raj Devél, Sarezorjákiro.”

9Me som Iáno, tumaró pšal, i mal (drúgo), kon isyn khetané tuménca dre bída i dro kralipén i khetané vyrikiréla pal Isusóste Xristosóste. Me sómas pe óstrovo (džip), savó kharélape “Patmoso” pal Devléskiro lav i pal dová, so me dophenávas manušénge pal Isusóste Xristosóste.

10Dro Ráskire-Devléskiro dyvés Dúho (Fáno) lyjá upralypén pe mánde i me šundjom palál zoralý zan, saví sýrby rogóstyr (trubátyr) rakirdiá:

11“Me som Al'fa i Omiega, Anglypén i Kónco (Jagóro), dová, so tu dykhésa, čhin dre lylvarí i bičháv eftá khangir'jénge, savé isyn [ke Asija-r.s.]: dro Jefieso, dre Smirna, dro Piergamo, dre Fiatira, dro Sardiso, dre Filadel'fija i dre Laodikija.”

12Me risijom pale te dykháv, kon rakirdiá mánca, i dykhcjom eftá suvnakuné momolytka (svietil'niki),

13i maškír eftá momolytka sys vari-kon, Savó zdelaspe (sys pohožo) pe Manušéste, Savó sys dro dlengo uribén ke ĥerá, i sys suvnakuný kustýk trusciál (krugom) Léste:

14šeró i balá Léskire sys parné syr sámo parnó than ci syr iv, i Léskire jakhá ziaindle syr jag;

15i Léskire ĥerá sys syr xarkóma (mied'), saví sys probindly dro bov, i Léskiri zan sys syr buté-paniengire šolia;

16i sys Léste eftá čergeniá dro Léskiro čačó vast, i Léskire móstyr vydžálas vostro (čolalý) dujé-rigéngiri kurtála (miečo), i Léskiro muj ziainelas sýrby kham saré péskire zorjátyr.

17I kiéli me dykhcjom Les, me pyjom angíl Léskire ĥerá syr muló. Jov čhudiá Péskiro čačó (právo) vast pe mánde, i phendiá: “Na dar! Me som Pérvo i Palatunó (Posliednjo),

18Me som džidó: i Me sómas muló, i, ĥáda, Me javáva te dživáv pe saré beršá, Mánde isyn klydyna meribnaskire liunostyr (adostyr).

19Paldavá čhin (rande), so tu dykhcián, so isyn kakaná, i kodová, so javéla te kerélpe paló davá,

20ake, isyn garady znáčyma pal dová, so tu dykhésa dro miro čačó vast i pal eftá suvnakuné momolytka: eftá čergeniá-davá isyn Jangóly eftá khangir'jendyr, i eftá momolytka-davá isyn eftá khangirja.

Jump to: Chapter 2 →