Revelation 13

Romani Baltic Latin (Biblija - Pe Baltitko Romani čib (Romanes) 2019)

← Chapter 12 Jump to: Chapter 14 →

1I me sómas terdó pe morjoskiro (derjavéskiro) práho. I me dykhcjom riskiribnáskire murdales (zvierjos), savó ĥazdelaspe morjostyr (derjavestyr), savéste sys eftá šeré i deš šyngá (rógi). Pe kažno léskiro šyng sys diadema, a pe kažno šeró sys lav te kaliakiren Devlés.

2I riskiribnáskiro murdál, savés me dykhcjom, sys sýrby lieopardo, a ĥerá (piré) sys léste sýrby ričeskire ĥerá, a muj léskiro sys sýrby muj ščereste (lievoste). I drakono dyjá léske péskiri zor i trono i bari zor.

3I jekh šeró riskiribnáskire – murdaleskire šerendyr sys xasiakirdo ke meribén, ne davá meribnytko fránso (rana) sys sastiakirdo. I sarí phuv divindiape i gijá pal riskiribnáskire murdaléste. I jone klonindlepe drakonoske, savó dyjá zor riskiribnáskire murdaleske.

4I jone klonindlepe patyvása riskiribnáskire murdaleske, rakirí: “Kon isyn adasavó, syr davá riskiribnáskiro murdál? Kon moginéla (saštynela) te marélpe lésa?”

5I murdaleskire moske sys dyný vólia te phenél phut'kirdé lavá te kaliakirel Devlés, i léske sys dyný zor te kerél péskiri butý štardešá duj čhoná.

6I jov otphandia péskiro muj te kaliakirel Devlés i te kaliakirel Léskiro lav i štéto, kaj Jov dživéla i odolén, savé dživéna dro Bolybnáskiro Rajo.

7I léske sys dynó te džal maribnása pe sventonende i te lel upralypén pe lénde, i léske sys dynó pravo pe kažno ródyco (kolieno) i pe manušýtko nacyja (narodo), i pe kažno jekhé-čibákiri irí/sém'ia (čib), i pe kažno kherítko ródo (pliemjo).

8I saré, kon dživéla pe phuv, javéna te kloninenpe patyvása dalé riskiribnáskire murdaleske, kon isyn na začhindló dre džiibnáskiri lylvarí, saví isyn Sventoné Bakroreste, Savó sys muliakirdo svetóskire anglypnástyr.

9Konéste isyn kaná, mek jov te šunél.

10Konéske trej te lydžál dro pliéno, odová kokoró džála dro pliéno. Kon zamarela kurtalása, odová kokoró javéla zamardo kurtalátyr. Adáj trej vyrikiriben i patiaibén Devléskire manušénge.”

11I me dykhcjom javire riskiribnáskire murdalés, savó džálas javrí phuvjátyr. Léste sys duj šyngá syr bakroreste i jov rakirdiá syr drakono.

12I jov kerélas saró pervoné-murdaléskire pravósa. Jov začhuvelas sarí phuv i odolén, savé dživéna pe joi, te kloninenpe patyvása pervoné riskiribnáskire murdaleske, savéste meribnytko fránso sys sastiakirdo.

13I jov kerélas baré znamiénii (ĥiertyká), so až lydžalas telé jag bolybnástyr pe phuv angíl manušénde.

14I jov xohavelas odolén, savé dživéna pe phuv kodolenca ĥiertykénca, so léske sys dynó te kerél angíl pervoné-riskiribnáskire murdaléste, rakirí sarénge, kon dživéla pe phuv, te kerén daja partín (óbrazo) adalé murdaleskiri, savéste sys fránso kurtalátyr i savó dživdiá.

15Adalé javire-riskiribnáskire murdaleske sys dyný zor te del džidó dúho (fáno) dre daja patrín (óbrazo) pervoné murdaleskiri adiáke, sob (kaj) daja patrín (óbrazo) te lel te rakirél i sozdyjá adiáke, sob (kaj) saré, kon na kloninenape patyvása murdaleskire patriniake (obrazoske), te javén muliakirdé.

16I kadavá javír riskiribnáskiro murdál kerélas adiáke, sob (kaj) saré manušénge, tyknenge i barenge, barvalenge i bogenge, vol'none i pishar'jénge te doresen špéra (znako) pe čačó (pravo) vast ci pe léngiro čekat;

17sob (kaj) nikón na moginelas te kinel, te biknel apríč odoléste, savéste isyn špéra; ci murdaleskire lavésa ci léskire-lavéskire ginésa (čyslosa).

18Adáj isyn godypén. Konéste isyn péskiri godý, mek jov te vyginel murdaleskiro gin (čyslo): davá isyn manušýtko gin (čyslo), léskiro gin (čyslo) isyn šovšelá šovdešá šov.

← Chapter 12 Jump to: Chapter 14 →