Revelation 4

Romani Baltic Latin (Biblija - Pe Baltitko Romani čib (Romanes) 2019)

← Chapter 3 Jump to: Chapter 5 →

1Paló (poslie) davá me dykhcjom, – ĥáda, so vudár isyn psirado (otphandlo) dro Bolybnáskiro Rajo. I doiá-pac' zan, so ĥaredyr me šundjom, xaj, rogoskiri (trubakiri), saví rakirdiá mánca, phendiá: “Jav upré adarík, i Me sykaváva túke, so syg javéla paló davá.

2Jekhátyr Dúho (Fáno) lyjá upralypén pe mánde. I, ake, sys trono dro Bolybnáskiro Rajo, i pe davá trono sys beštó Vari-Kon.

3I Odová, Kon sys beštó, ziaindia syr bar jaspiso i sardiso, i sys bryšyndeskiri bangi (raduga) trusciál trono sýrby smaragdo.

4I trusciál kadavá trono sys biš te štar javír trony i biš te štar godephuré sys bešté pe kadalé trony dre parné uribená i pe šeré sys lénde suvnakuné vianki (korony).

5I tronostyr džánas bliskavícy, i zaniá, i grómy i eftá šandale (podsviečniki) xačonas angíl trono, savé isyn eftá Devléskire dúhi.

6Angíl trono sys stjoklýtko (balunaló) mórjo (derjáv) syr kristalo, i maškirál i trusciál trono sys štar džidale (žyvotna), savénde sys pherdó jakhá palál i angíl;

7i pérvo džidalo sys syr ščer (liévo), javír džidalo sys syr guruvoro, i tritoneste džidaleste sys manušýtko muj, i štárto džidalo sys syr vurniaibnytko órlo (kído).

8I kažnoné džidaleste sys šov phaká (kryly) pe saré rigá, i andré sys pherdó jakhá i dyvesé i ratý jone rakirénas: “Svénto, Svénto, Svénto isyn Raj Devél, Sarezorjákiro, Savó sys isyn, i Savó trej isyn te javél.”

9I kiéli štar džidale (žyvotna) slavinena, déna patýv i parikirena Odoléske, Kon isyn beštó pe trono i Savó dživéla viéčnes pe saré viéki,

10tedy dešuštar godephuré kloninenape patyvása angíl Kadaleste, Kon isyn beštó pe trono, i Savó dživéla viéčnes pe saré viéki. Jone čhurdena péskire vianki (korony) angíl trono, phení:

11“Amaró Raj Devél i Devél! Tu san mol te priles sláva, patýv i zor, pal-dová so Tu sozdyjan saró i pir Tyrí vólia saró sys sozdynó i dživéla.”

← Chapter 3 Jump to: Chapter 5 →