Revelation 11

Romani Baltic Latin (Biblija - Pe Baltitko Romani čib (Romanes) 2019)

← Chapter 10 Jump to: Chapter 12 →

1I sys dynó mánge triščynitko kašt (trost') syr destó te mierinav, i sys phendló: “Uštý i vymierin Devléskiri Khangirí i altárjo i odolén manušén, savé kloninenape patyvása odój.

2A gréda (dvóro), saví isyn javriestyr pal Khangirí, mek la i na mierin la. Joj sys dyný Najudénge. Jone javéna te štakiren ĥerénca Svénto Fóro štardešá duj čhoná.

3I me dáva zor miré duje Jakhitkonenge i jone javéna te angilphenen tysjonco duj šelá šovdešá dyvesá, savé javéna uridé dre goné balendyr.”

4Dalé duj Jakhítka isyn olivitka kaštá i duj momolytka (svietil'niki), savé isyn terdé angíl Devléste pir phuv.

5I kóli vari-kon vykedéla te kerél čoripén lénge, tedy jag vydžála léngire móstyr i xasiakiréla léngire vergén. I kóli vari-kon zakaméla te kerél čoripén lénge, tedy adiáke-pac' odoléske trej te merél.

6Adalé Jakhitkonende isyn zor te phanden bolybén, sob (kaj) te na džal bryšýnd, kiéli jone javéna te angilphenen (te proročynen). I jone rikiréna zor, sob (kaj) paniá te pirikerenpe dro rat i te muliakirén len fransenca adákicy but móly, kicý jone vykedena.

7I kiéli jone končyndle péskiro dophenybén, tedy drakono, savó vydžála liunostyr, javéla te marélpe lénca, i léla upralypén pe lénde i muliakiréla len.

8I javéna léngire trúpy pe baré-foróskire vulícy (gásy). Davá fóro pir dúho (fáno) javéla te kharelpe Sodómo i Jegípto, kaj adiáke-pac' amaró Raj Devél sys primardo pe trušúl.

9I manušá manušytkoné nacyiéndyr, jekhe-čibakire ir'jéndyr (sem'iéndyr), kheritkoné rodendyr i javire manušéndyr javéna te dykhén pe duj dalé trúpy trin pašésa dyvesá i na domekena te zaganaven len dre phuv.

10I odolé, savé javéna te dživén pe phuv, javéna te radynénpe léngire meribnástyr. Jone javéna te radyneppe zoralés i te bičhaven dáry jekh jekhéske, pal-dová so kodolé duj proróki drieván menčyndle manušén.

11I paló trin pašésa dyvesá džiibnáskiro dúho (fáno) Devléstyr zagijá dre lénde. Jone terdiné pe péskire ĥerá i bari dar pyjá pe odolénde, savé dykhné pe lénde.

12I jone šundlé zoralý zan bolybnástyr, so rakirdiá lénge: “Džán upré adarík.” I adalé duj proróki giné upré pe bolybén dro óbloko, i léngire vérgi dykhné pe lénde.

13I dro dova-pac' mardó (štúnda) kerdiápe drieván baró phuvjákiro trinskiriben i déšto foróskiri paš pyjá, i eftá tysjoncy manušén sys zamardé. I odolé, savé jačnépe, strahádyne i slavindle Devlés, Savó isyn dro Bolybnáskiro Rajo.

14Javír bída gijá krig: dykh, tríto bída džála sýges.

15I eftáto (bitrinentiro déšto) Jangólo phurdyja dre péskiro rógo (truba): i sys zoralé zaniá pe bolybén, so rakirdé: “Svetytko Kralipén amaré Ráskire-Devléskiro i Léskire Xristosóskiro javdiá i Jov javéla te kralinen pe saré viéki.”

16I biš te štar godephuré, savé sys bešté pal péskire trony angíl Devléste pyné pe péskire muiá i poklonindlepe patyvása Devléske, phení:

17“Ame parikirasa Túke, Baró Rajo Dévla, Sarezorjákiro, Jekh, Kon isyn i Kon sys, pal-dová so Tu lyjan Tyró zoralypén i jacián te kralines.

18Náiudy xoliasyne doléske, so javdiá Tyrí xolý dro časo te sendiakires mulen, i te otdes pale Péskire pishar'jénge, prorokenge, i sventonenge i odolénge, savé daréna Tyré lavéstyr, barenge i tyknenge. Te muliakires odolén, savé xasiakirena phuv.”

19I psiradyja (otphandiápe) Devléskiri Khangirí, saví isyn dro Bolybnáskiro Rajo i Kovčégo (Mohtó) Devléskire zavietósa sys dyc'lo dre Khangirí. I jačné bliskavícy, i zaniá (glosiá), i grómy, i phuvjákiro triinskiriben i baró ĥrádo.

← Chapter 10 Jump to: Chapter 12 →