Revelation 16

Romani Baltic Latin (Biblija - Pe Baltitko Romani čib (Romanes) 2019)

← Chapter 15 Jump to: Chapter 17 →

1I me šundjom zoralý zan Khangirjátyr, saví phendiá eftá (efte) Jangolenge: “Džán i vyčhuven pe phuv eftá tahtáia (čašy) Devléskire xoliása.”

2I pérvo Jangólo vygijá i vyčhudiá péskiro tahtáj pe phuv: čoré i fuj fránsy (rány) jačné pe manušénde, pe savénde sys riskiribnáskire-murdaleskire (zvierjoskire) špery, i, savé poklonindlepe patyvása angíl léskiri patrín (óbrazo).

3I javír Jangólo vygijá i vyčhudiá péskiro tahtáj dro mórjo (derjáv): i paní kerdiápe sýrby mulé-manušéskiro rat i kažno džidó di (sozdyiben) myjá dro mórjo (derjáv).

4I tríto Jangólo vyčhudiá péskiro tahtáj dre réki (leniá) i paniengire ĥanyngorja: i jone kerdépe ratésa.

5I me šundjom Jangolós, savó rikirdia zor pe paní, phení: “Čačunó san Tu, Savó san i Savó sánas, Svénto san Tu, so Tu sendiakiresa adiáke”,

6Pal-dová so jone pročhude rat Tre sventonengire i prorokengiro, I paldavá Tu dyján lénge rat te p'jen, syr jone isyn mol davá.

7I me šundjom zan altarjostyr, so phendiá: “Čačó, Rajo Dévla, Sarezorjákiro Devél, čačuné i čačipnaskire isyn Tyré sendy!”

8I štárto Jangólo vyčhudiá péskiro tahtáj pe kham: i sys dynó khameske te xačkirel manušén jagása.

9I manušá sys xačkirdé baré xačkiribnasa i jone kaliakirenas Devléskiro lav, Savó rikirdia zor pe dalé fránsy. Ne jone na riskirdé péskiro džiibén grehéndyr ke Devél i na vyphendle sláva Léske.

10I pándžto Jangólo vyčhudiá péskiro tahtáj pe riskiribnáskire-murdaleskiro (zvierjoskiro) altárjo: i kalypén čhakirdia riskiribnáskire-murdaleskiro kralipén i manušá dandyrenas pes pal péskire čibá (čibjá) dukhendyr;

11i jone kaliakirenas Bolybnáskire Devlés pal péskire dukhá i fránsy. Ne jone na riskirdé péskiro džiibén grehéndyr ke Devél doléstyr, so jone kerdé.

12I šóvto Jangólo vyčhudiá péskiro tahtáj dre bari reka (len') Jevfrato: reka (len') vyšutija, sob (kaj) te javél skedynó drom kral'jenge dolé rigátyr, kaj kham uštéla.

13I me dykhcjom trin beda dúhi, savé sys syr capnia (žamby). Jone džánas javrí móstyr drakonostyr, riskiribnáskire murdalestyr i xohané prorokostyr.

14I dalé benglane dúhi, so keréna ĥiertyká (znamiénii), džána angle ke králja pe davá saró svéto, kaj isyn manušá, sob (kaj) te kedenpe khetané maribnása pe Devléste Sarezorjakireste pe baró Dyvés.

15“Ake, me džáva syr čor. Bahtaló isyn odová, kon isyn nasuto i rakhéla péskiro uribén, sob (kaj) te na psirél nango i, sob (kaj) te na dykhél léskiri ladž!”

16I kadalé benglane dúhi kedyne khetané kral'jén pe štéto, so kharélape Judytkes “Armagiedono.”

17I eftáto Jangólo vyčhudiá péskiro tahtáj pe fáno (vozduho): zoralý zan javdiá tronostyr, savó sys dre Khangirí, saví phendiá: “Davá kerdiápe.”

18I sys bliskavícy, grómy i zaniá, i jaciá baró phuvjákiro trinskiriben, so na sys angíl dová, syr manúš lyjá te dživél pe phuv-dasavo zoraló sys phuvjákiro trinskiriben.

19I baró fóro rospyjape pe trin pašá, i fórja, kaj napatiaibnaskire, pyné. Devél ripirdia bari phuv Bari Vavilonija i dyjá láke te p'jel mol Léskire tahtastyr – mol (vino) Léskire xoliása, kiéli Jov drieván xoliasóla.

20I kažno óstrovo (džip) xasijá, i bérgi na sys dyc'le.

21Baré-gradóskire ĥirilá, savé sys pašé pandždešá kilo pharipnasa, pyné bolybnástyr pe manušénde, savé kaliakirenas Devlés pal fránsy gradostyr, pal-dová so drieván darano sys davá fránso.

← Chapter 15 Jump to: Chapter 17 →