Revelation 9

Romani Baltic Latin (Biblija - Pe Baltitko Romani čib (Romanes) 2019)

← Chapter 8 Jump to: Chapter 10 →

1I pándžto Jangólo phurdyja dre péskiro rógo; i me dykhcjom čergen, so pyjá bolybnástyr pe phuv, i láke sys dynó klydyn liunoskire ganyngatyr (bieznatyr).

2I čergen psiradia (otphandia) liunoskiri ĥanýng i thuv (dymo) vygijá ĥanyngatyr, syr thuv baré bovestyr: kham i fáno (vozduho) kalyne ĥanyngakire thuvestyr.

3I phakitka skočki (saranča) vyginé pe phuv thuvestyr i sys dyný lénge zor, saví isyn phuvitkone skorpionende.

4Lénge sys phendló te na kerén čoripén ni phuvitkone čarjake, ni savé zelene raslinake, ni savé kašteske (drevoske), a jekh manušénge, savénde na sys Devléskiro távro pe léngire čekata:

5i phakitkone skočkenge sys dynó te na muliakirén len, a te menčynen manušén pandž čhoná; i léngiri men'ka sys syr skorpiono menčynela, kiéli dukhavela manušés.

6I dre dolé dyvesá manušá javéna te rodén meribén, ne jone na lathéna; jone javéna te mangén, sob (kaj) te merén, ne meribén našela léndyr.

7Kadalé phakitka skočki (saranča) sys syr graja, savé kedynepe pe meribén; i pe léngire šeré sys vianki (korony) sýrby suvnakástyr, i léngire muiá sys sýrby muiá manušýtka.

8I léngire balá sys sýrby balá džuvlikané, i léngire dandá sys sýrby ščerende (lievende),

9i sys lénde sastruné kolyna syr sastruné pancyri, i lopotymo léngire phakendyr sys syr lopotymo ĥaratuné vurdenendyr, kiéli graja prastána pe meribén;

10i sys lénde porja syr skorpionengire žaly i dre kadalé porja sys zor te dukhaven manušén pe pandž čhoná.

11Liunoskiro (Adoskiro) Jangólo sys králi pe lénde. Léskiro lav pir Judýtko čib sys “Abaddon”, a grekítkes (balamítkes) “Appolion.”

12Pérvo bída gijá krig, ake, iščo (inké) duj bidy, so džána pal pervonate.

13I šóvto Jangólo phurdyja dre péskiro rógo i me šundjom zan štartone venglendyr suvnakuné altarjostyr, so sys angíl Devléste,

14ĥáda, zan phenelas šovtone Jangoloske, savéste sys rógo: “Rosphande štaré Jangolen, savé isyn phandle pašýl reka (len') Jevfrato.”

15I štar Jangóly sys rosphandle, savé sys skedyné vaš štúnda i dyvés, i čhon, i berš te muliakirén tríto paš manušéndyr;

16i sys duj miliony xaladén pe grénde i me šundjom léngiro kicypen (količestvo).

17I, ĥáda, me dykhcjom gren sýrby dre suné i odolén, savé sys bešté uklisté pe lénde; lénde sys sastruné pancyri, lolé syr jag, cjomna-sine syr giacynto, žylta syr siéra (dzevélia). Grengire šeré sys syr ščerengire (lievengire) šeré, i léngire móstyr džálas jag, thuv i siéra (dzevélia).

18Tríto paš manušypnastyr sys muliakirdy dalé triné franséndyr: jagása, thuvesa i dzeveliasa, so džánas javrí grengire mujendyr.

19Pal-dová so grengiri zor sys dre muiá i porja léngire: i léngire porja sys syr sapa šerenca, savénca jone dukhavenas.

20I javír manúš, savé na sys muliakirdé kadalé fransenca, až na riskirdé pale doléstyr, so jone kerdé péskire vasténca. Jone na pirijačne te bandiakiren šeré nalačhé duhenge, xohané devlenge suvnakástyr, rupéstyr i xarkomátyr, baréstyr i kaštéstyr, savé na moginéna ni te dykhén, ni te šunén, ni te psirén.

21I jone na pridžindle péskiri bang dre meribena, ni dre čovahanypena, ni dre biladžakuné réndy, ni dre čoribena.

← Chapter 8 Jump to: Chapter 10 →