Proverbs 2

Romani from Romanian (E Romaii Biblia 2020 (Kăldărărihko))

← Chapter 1 Jump to: Chapter 3 →

1Šeaua, te lesa le divanuri mîŕă, te garavesa tusa le sîkadimata mîŕă,

2te lesa godi koa xaraimos, thai te bandearăsa teo illo koa prinjeandimos;

3kana mangăsa xaraimos, thai kana rudisa tu andoa prinjeandimos,

4te rodesa les sar le rupes, thai phirăsa pala leste sar pala khă mandimos,

5atunčea atearăsa e dar le Raiestar, thai arakhăsa o prinjeandimos le Devllehko.

6Kă o Rai del xaraimos; Anda Lehko mui anklel prinjeandimos thai atearimos.

7O del skăpimos kolen bibezexako, del khă skuto kolen kai phirăn ando bidošalimos.

8Nikăr le droma le bibezexalimahkă, thai arakh o drom Lehkă pateamnengo.

9Atunčeara atearăsa o čeačimos, e kris, o biathaimos, sal droma kai nigrăn koa mištimos.

10Kă o xaraimos avela ando illo tiro, thoa prinjeandimos avela o čeailimos te duxohko;

11o jeanglimos avela pa tute, o prinjeandimos arakhăla tu,

12kaste skăpil tu le dromestar le jungalestar, le manušestar kai nikrăl divanuri rimome;

13kolendar kai mekăn le droma le čeačimahkă, kaste phirăn pel droma le tunerikohkă;

14kai bukurin pe te kărăn nasul, thai thon pehko čeailimos ando nasulimos,

15kai phirăn pel droma bangă, thai astarăn pel droma amblade;

16kaste skăpintu i la romneatar avrăhkăreatar, i la străinatar, kai phenel divanuri astardimahkă,

17kai mekăl ăl romes pehkă tărnimahko, thai bîstrăl o phanglimos lakă Devllehko.

18Kă lako khăr ulel koa merimos, thai o drom lako nigrăl ka kola le mulle:

19či iekh kai jeal late či mai amboldel, thai či mai arakhăl o drom la čivavako.

20Anda kodea, tu te phirăs po drom le manušengo dă mišto, thai te nikrăs le droma kolengă le bibezexalengă!

21Kă le manuši bibezexako bešena ando čem, thai le manuši bidošako ašena ande leste;

22ta kola le jungale avena xasardine andoa čem, thai kola bipateamne avena ankalade anda leste.

← Chapter 1 Jump to: Chapter 3 →