Proverbs 8

Romani from Romanian (E Romaii Biblia 2020 (Kăldărărihko))

← Chapter 7 Jump to: Chapter 9 →

1Či çîpil o xaraimos, thai či vazdel o prinjeandimos o mui?

2Oi tinzol pe opră pel vazdimata, avri po drom, kal răskruči,

3thai çîpil pašal udara, koa šutimos la četateako, koa šutimos le udarăngo:

4„Manušale, karing tumende çîpi, thai karing le šeave le manušengă ortol pe muŕo mui.

5Sîteon godi, dilealealelor, thai xareon čealadealelor!

6Ašunen, kă sî ma butea bară te phenau, thai mîŕă ušt pîtărdeon kaste sîkaven avrăn so sî orta.

7Kă o mui muŕo phenel o čeačimos, thai mîŕă ušt čidabadikhăn o xoxaimos!

8Sa le divanuri mîŕă mohkă sî orta, nai le khanči bičeačimahkoči amblado ande lende.

9Sa sî nakhadine anda kukoa o prinjeando, thai orta anda kukola kai arakhadine o sîkadimos.

10Len mai iekhatar le phendimata mîŕă dă sar o rup, thai mai iekhatar o sîkadimos dă sar o sumnakai o mai kuči.

11Kă o xaraimos sî mai kuči dă sar le perle, thai či khă buti kučimasti našti ameazăl lasa.

12Me, o Xaraimos, sîma sar than e godi, thai dašti ankalavau le mai lašardine planurea.

13E dar le Raiestar sî o bidikhlimos le nasulimahko; O barimos thai biarăsadimos, o phirimos o jungalo thai o mui o xoxamno, dikta so či dabadikhau me.

14Mandar avel o phendimos thai e izbînda, me sîm o prinjeandimos, mîŕî sî e zor.

15Anda mande thagarin le thagar thai den le voeivoduri phendimata orta.

16Anda mande trden le šerăbară, thai le mai bară, sal krisînitorea la phuweakă.

17Me kamau kolen kai kamen ma, thai kolen kai roden ma sa pehka zorasa thai arakhăn ma.

18Mança sî o bravalimos thai slava, o nikărdimos le mandimatăngo thai o čeačimos.

19O rodo muŕo sî mai lašo dă sar o sumnakai o mai ujo, thai o avimos muŕo nakhavel o rup o mai alosardo.

20Me phirau po drom le bidošalimahko, po maškar le dromengo le bibezexalimahkă,

21kaste dau khă čeači mandimos kai kamen ma, thai te pherau lengă visterimata.

22O rai kărdea ma e mai anglal anda Lehkă butea, angla kolengă le mai purane butea Lehkă.

23Me sîmas thodino anglae vešničia, angla orsao anglaimos, anglal te avel e phuw.

24Sîmas kărdo kana înkă nas andraimata, či isvoare pherdine paiesa;

25sîmas kărdo anglal le zuralimahko le baŕăbarăngo, anglal te aven le pleaia,

26kana înkă nas či e phuw, či le islazurea, či kutea anglal prušuk andai poši la lumeati.

27Kana kărdea o Rai le čerurea, me sîmas oče; kana çîrdea khă dikhlimos po mui le andraimahko,

28kana karfosardea le norea opral, thai kana xutile la zorasa le isvoare le andarimahkă,

29kana thodea rig la mareakă, ta le paia te na nakhăn pa Lehko mothodimos, kana thodea le temelii la phuweakă,

30me sîmas Lehko buteari, kai buti paša Leste, khălindoi biatărdimahko angla Leste,

31khălindoi po rotokolo Lehka phuweako, thai arakhlindoi mangă o čeailimos andel šeave le manušengă.

32Thai akana, šeavena, ašunen ma, kă baxtale kolendar kai arakhăn le droma mîŕă!

33Ašunen o sîkaimos, kaste kărdeon xarane, thai na šuden o divano muŕo.

34Baxtalo le manušestar kai ašunel ma, kai dikhăl ande sako des kal udara mîŕă, thai arakhăl o prago mîŕă udarăhko.

35Kă kukoa kai arakhăl ma, arakhăl e čivava, thai lel o lašimos le Raiehko.

36Ta kukoa kai bezexarăl pa mande dukhavel pehko duxo; sa kola kai čidabadikhăn ma man, kamen o merimos.

← Chapter 7 Jump to: Chapter 9 →