1 Samuel 1

Romani Sinte 2024 (O Debleskro Lab 2024 (Sinte-Manouche))

Jump to: Chapter 2 →

1His i morsh i menshendar Efrayim. Kova djivas an o foro Ramatayim-Zofim an o pralstouno them Efrayim. Leskro lab his Elkana. Koleskro dad his o Yeroham, koleskro dad his o Elihou, koleskro dad his o Tohou, oun koleskro dad his o Souf.

2O Elkana, les his douy romya; koy yek kharas Hanna oun koy vavar Peninna. Oun kolat his čave. I Hannat his kek čave.

3Oun ko morsh djas hako bersh vin dran peskro foro, te mangell lo an o foro Shilo o baro Debles an, ko rayes pral o bolepen oun i phoub, oun te anell lo leske i firhes, hoy vell leske maredo. Kote his douy phrala o baro Debleskre rashaya: o Hofni oun o Pinhas. Kolengro dad his o Eli.

4Te vas ko dives, kay anas o Elkana i firhes o Debleske, das yob peskri romyat Peninna oun lakre morsh čaven oun čen, hakeneste yek kotar mass.

5I Hannat das yob douy kotya. Yob kamas lat o djiyestar, ninna te kras o baro Devel lah yaake, te nay las li kek čave.

6Oun i Peninna, koy vavar romni, rodas, har te doukrell li lat, oun kras lat i labentsa tele, doleske, kay nashte lell li kek čave.

7Oun yaake djas kova hako bersh: Te djan le pre pash o baro Debleskro kheer, doukras i Peninna lat yaake. Palle rovas i Hanna oun rhas či.

8O Elkana, lakro rom, penas ap late: “Hanna, hoske roveh tou? Oun hoske rhah tou či? Oun hoske hi tiro dji yaake phares? Hom me touke gar boudeder moldo har deesh morsh čave?”

9Har yon an Shilo his, stas i Hanna pre pal o rhapen oun o pipen, oun djas an o baro Debleskro kheer. Kote his o rashay Eli beshdo glan o voudar.

10Oun lakro dji rovas, oun yoy mangas o baro Debles oun rovas zoreles ap leste,

11oun das pes sovel oun penas: “Tou, baro Devel oun ray pral o bolepen oun i phoub, tou te dikeh kanna tiri čorveli boudepaskretsa an, oun bistreh lat gar, oun deh tiri boudepaskretsat i morsh čaves, palle dau me les toute o tselo tsiro, hoy yob djivella. Oun kek čouri vell ap leskre balla, hoy činals len tele.”

12Oun har yoy i rah tsiro o baro Debleha rakras, das o Eli yak ap lakro mouy.

13I Hanna rakras peske kokres an peskro dji. Ninna te djas lakro mouy, har te rakrals li, nay shounas kek lakre laba. Kote patsas o Eli, te hi li mati.

14Oun o Eli penas ap late: “Har rah kameh tou gomme mati kate te ačell? Dja khere oun sob tiro matepen vin, te vess pale pash toute!”

15I Hanna penas: “Ma rikrenn man mateske, miro ray! Mool piyom me gar oun či vavar, hoy yekes mato krell. Me hom či vavar har i djouvel, kay lat i pharo dji hi. Oun kova čorom vin glan o baro Debleste.

16Rike tiri boudepaskretsat gar i djouvyake, kay či moldo hi. Miro dji hi phagedo oun phares, doleske rakrom me kate yaake rah.”

17Kote penas o Eli ap late: “Dja o Debleha! O Israeleskro Devel dell tout kova, hoy tou lestar mangal.”

18Oun yoy penas: “Mou dikenn tire yaka kamles ap mande!” Oun koy djouvel djas peskro drom, oun rhas, oun dikas bouder gar yaake phagedo vin har glan kova.

19Oun sik o vavar dives stan le pre. Oun har sharan le o baro Debles, djan le khere an Rama. Oun o Elkana djas rati pash i Hannate dren. Oun o baro Devel bistras i Hannat gar oun kras,

20te vas li vavarčandes. Oun har lakro tsiro vas, las li i morsh čaves, oun das les o lab Samuel. Yoy penas: “O baro Deblestar mangom les mange.”

21O vavar bersh, har djas o Elkana pale pre peskri tseli familyah har hako bersh, te anell lo o baro Debleske i firhes, hoy vell leske rhačedo, ninna yekes, te rikrell lo peskri sovel, hoy yob das,

22koy djas i Hanna gar lentsa. Yoy penas ap peskro romeste: “Te piyell o čavo bouder gar ap o beč, kamau me les pre te anell glan o baro Debleste. Oun yob ačell palle koy, yaake rah yob djivella.”

23Oun lakro rom Elkana penas ap late: “Kre yaake har tou kameh, ač kay, bis te yob phouro doha hi. Mou rikrell o baro Devel lauter, hoy yob pral kava čaveste penas!” Yaake ačas koy romni khere oun das o čaves o beč, yaake rah bis te yob phouro doha his.

24Oun har yob phouro doha his, las li les peha, oun djas leha pre an o foro Shilo. Oun las koy pashel yek triin-bershengro gouroum oun deesh kilogramme yarro oun yek ledertikro gono pherdi mool, oun anas kova pash o baro Debleskro kheer. O čavo his gomme terno.

25Oun yon maran o gouroum, oun anan o čaves pash o Eli.

26Oun yoy penas ap o Eli: “Ah, miro ray, yaake har čačo hi, kay tou djiveh: Me hom koy djouvel, kay kate tardo his oun o baro Deblestar mangas.

27Kava čaves mangom mange o baro Deblestar. Oun yob shounas man oun das les mande.

28Doleske dau les me kanna ninna o baro Debleste pale, te vell lo leskro, yaake rah har yob djivella.” Oun yon mangan kote o baro Debles an.

Jump to: Chapter 2 →