1 Samuel 13

Romani Sinte 2024 (O Debleskro Lab 2024 (Sinte-Manouche))

← Chapter 12 Jump to: Chapter 14 →

1Oun o Saul his … bersha phouro, har vas lo baro ray. Oun yob his … douy bersha ray pral o Israel.

2Oun o Saul rodas peske 3.000 (triin-zerya) morshen vin. 2.000 (douy-zerya) lendar his pash leste an o foro Mikmas oun ap i berge pash Betel. Oun 1.000 (yek zero) morsha his peskro čaveha, o Yonatan, pash o foro Gibea an o them Benyamin. Kol tsele vavar bičras lo khere.

3His i dives, koy maras o Yonatan kol lourden i Filistarendar, kay an Gibea his oun koy yak dan. Oun har i Filistarya kova shounan, moukas o Saul an i phourdepangre te phourdell oun penas: “I tsele Hebrearya hounte shounenn kava!”

4Oun i tsele Israelenge vas penlo: “O Saul maras kol lourden i Filistarendar, kay yak dan. Oun kanna hi len rholi ap o tselo Israel.” Oun i tsele Israelengre lourde van khetne gole dino, te djan le an Gilgal pash o Saul.

5Ninna i Filistarya van khetne, te djan le an o kourepen i Israelentsa: 3.000 (triyanda-zerya) vourdya, oun 6.000 (shob-zerya) morshentsa koy pre, ninna boud lourde, kay nashenn, yaake boud har i santa pash o baro pani hi. Kolentsa djan le pre oun čivan pen pash o foro Mikmas tardo ap koy rig o forestar Bet-Aven, kay o kham pre djal!

6Har i Israelitarya dikan, har zorelo i Filistarya hi, tapras len i daar, oun yon khatran pen an i phoub, pal soubyengre bourra, mank bare barra, an grufte oun panyengre rhebya.

7His ninna save, kay nashan pral o Yordan an i themma Gad oun Gilead. Oun o Saul his gomme an Gilgal oun kol lourden, kay pash leste his, his bari daar.

8O Samuel penas leske, te ačell lo efta divessa koy. Palle kamell yob ninna pash leste te vell. Kol efta divessa his trouyel, oun o Samuel his gomme gar koy. Oun i lourde, yek pal o vavar nashan penge o Saulestar krik.

9Kote penas o Saul: “Anenn mange i firhen, hoy o Debleske rhačedo venn oun kolen, hoy rhah khetne.” Oun yob maras kol firhen, hoy o Debleske rhačedo venn.

10Oun har rhačras lo len, vas o Samuel. Oun o Saul djas pash leste oun penas: “Lačo dives.”

11“Hoy kral tou?” poučas o Samuel lestar. Oun o Saul penas: “Me dikom, te nashenn penge i lourde, oun tou val gar ko tsireske, hoy tou penal. Oun i Filistarya van an Mikmas khetne.

12Kote patsom, te venn i Filistarya tele pash mande kay an Gilgal, oun me anom o baro Debleske gomme gar i firhes, te vell lo ap miri rig. Doleske lom man khetne, oun rhačrom leske i firhes.”

13O Samuel penas ap o Saul: “Tou kral dinelo koova, oun kral gar pal ko lab, hoy penal touke o baro Devel, kay tiro Devel hi. Te krals tou pal ko lab, čivals lo tout hako tsireske pral o Israel, te ačals lengro baro ray.

14Kanna kral tou gar pal leskro lab. Doleske ačeh gar baro ray. O baro Devel rodas peske i vavar morshes vin, yekes pal peskro dji. Koles krell lo ray pral peskre menshende.”

15Oun o Samuel djas doureder oun moukas Gilgal pal peste. Kol vavar menshe djan pal o Sauleste, har djas yob pash peskre lourdende ap o drom dran Gilgal pre an o foro Gibea an o them Benyamin. Oun o Saul dikas peske kol lourden an, kay pash leste hi. Kolla his yaake shob-sheel (600) morsha.

16Oun o Saul oun peskro čavo, o Yonatan, oun i lourde, kay pash lende hi, ačan an Geba an o them Benyamin. Oun i Filistaryen his lengri platsa pash Mikmas.

17Kotar djan i Filistarya ap triin rigya vin, te randenn le oun denn o them paash. Ap yek rig djan le ap o drom, hoy djal an Ofra an o them Shoual.

18Ap i vavar rig djan le ap o drom, hoy djal pash Bet-Horon, oun pale ap i vavar rig djan le ap o drom an o them pal i tala Seboyim, kay o moulo tato them vell.

19An ko tsiro his kek morsh an o tselo them Israel, kay hayvas mishto sasterne koola te krell. I Filistarya daran, te krenn pen i Israelitarya rhare oun vitsepaskre čourya. Doleske moukan le kekes, kay kova hayvas, peskri boudi te krell.

20Oun yaake hounte djas hako Israelitari tele pash i Filistarya, te kaman peskre harhetikre koola oun peskro tover bouder gar te činell. Oun i Filistarya kran, te činenn le pale.

21Kay boudjake hounte playsrenn i Israelitarya love: douy tikne roupene beme koy boudjake ap i sasterne koola, kolentsa boudran le an i phoub, oun yek tikni roupeni bema koy boudjake ap i tover.

22Har vas o dives, kay hounte djan le an o kourepen, his kek rharo oun kek vitsepaskro čouri an i vasta kol Israelengre lourdendar. Kokres o Saules oun peskro čaves Yonatan his pengre rhare oun marepaskre koola.

23Oun i Filistarya bičran pengre morshen vin, te denn le yak, te djal kek ap ko tikno drom, hoy djal ap i berga pash Mikmas.

← Chapter 12 Jump to: Chapter 14 →