bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Romani
/
Romani Sinte 2024 (O Debleskro Lab 2024 (Sinte-Manouche))
/
1 Samuel 19
1 Samuel 19
Romani Sinte 2024 (O Debleskro Lab 2024 (Sinte-Manouche))
← Chapter 18
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 20 →
1
Oun o Saul rakras peskro čaveha oun peskre boudepangrentsa, te kamell lo o Davides te marell. O Yonatan, kay kamas o Davides o djiyestar,
2
penas kova o Davideske oun penas: “Miro dad kamell tout te marell. Yaake khate tout taysarlakro oun rike tout khatemen.
3
Me kamau miro dadeha vin te djal kote ap kay platsa, kay tou hal, oun rakrau leha pral toute. Oun hoy shounau, kova penau touke pale.”
4
Oun o Yonatan rakras peskro dadeha oun rakras lačes pral o Davideste oun penas: “Miro baro ray, an kek doosh ap toute oun kre o Davideske či! Yob hi tiro boudepaskro oun kras touke kek čilačepen. Oun lauter, hoy yob kras, his touke mishto.
5
Yob dikas gar ap peskro djipen, har djas lo koy oun kouras pes o Filistareha oun das les moulo. Yaake te las o baro Devel o tselo Israel dran i vasta i Filistarendar. Oun tou dikal kova oun hals barhtelo. Hoske kameh tou doosh ap toute te anell oun i rat yekestar, koles kek doosh ap peste hi? Hoske kameh tou o Davides moulo te dell čičeske?”
6
Oun o Saul shounas ap o Yonatan oun das pes sovel oun penas: “Me dau man sovel pash o djido Debleste, o David hounte merell gar!”
7
Kote das o Yonatan o Davides gole, oun penas leske lauter, oun anas les pash o Saul. Oun yob boudras leske pale, har glan ko tsiro.
8
Oun pale vas i baro kourepen, oun o David djas vin te marell lo pes i Filistarentsa. Oun yob das len yaake zoreles, te hounte nashan le.
9
Oun ko čilačo dourho, bičedo o baro Deblestar, vas pral o Saul, har yob khere beshdo his oun peskro vitsepaskro čouri an o vast rikras. Ninna o David his koy oun bashras ap peskri doryengri bashepaskri.
10
Oun o Saul vitsras peskro čouri, te dell lo o Davides ap i vanta. Oun o David stas ap i rig, yaake te djas ko čouri an i vanta. Oun yob nashas peske.
11
An koy rat bičras o Saul lourden pash o Davideskro kheer, te denn le yak, te nashell lo gar peske, oun te denn le les moulo taysarlakro. Oun leskri romni, i Mikal, penas leske kova oun penas: “Te nasheh tou gar kay rat, palle denn le tout taysarlakro moulo.”
12
Oun i Mikal moukas o Davides dran i vorhni tele, oun yob nashas peske.
13
Palle las i Mikal o khereskro devel, o Terafim, oun čivas les ap o čiben, oun čivas bouzyengre balla kote, kay o shero čiddo vals, oun čakras kova lauter i ripyeha.
14
Har van o Sauleskre bičepangre, te lenn le o Davides, penas i Mikal: “Yob hi nasselo.”
15
Kote bičras len o Saul i douyto kopo, te dikenn le pal leste, oun penas: “Anenn les an peskro čiben kay pash mande, te dap les moulo.”
16
Oun kol lourde djan koy oun hatsan či har ko khereskro devel Terafim an o čiben čiddo, oun kol bouzyengre balla pash leskro shero.
17
Kote poučas o Saul i Mikalatar: “Hoske rhorhral tou man, oun moukal koles te nashell, kay mange čilačepen kamell?” Oun i Mikal penas ap o Saul: “Yob penas ap mande: Mouk man te djal, te dap tout gar moulo! ”
18
O David nashte nashas peske, oun djas pash o Samuel an o foro Rama oun penas leske halauter, hoy o Saul leha kras. Oun o David djas khetne o Samueleha pash i khera, kay o Debleskre rakepangre djivan, oun yon ačan koy.
19
Oun o Sauleske vas penlo: “Dik, o David hi pash o Debleskre rakepangre an Rama.”
20
Kote bičras o Saul lourden, te anenn le o Davides. Har dikan kolla kol tsele Debleskre rakepangren oun lengro pralstounes, o Samueles, oun shounan, har kolla o Debleskro rakepen vin rakran, koy vas o Debleskro dourho pral kol bičepangren. Oun yon rakran ninna o Debleskro rakepen vin.
21
Oun kova vas o Sauleske penlo. Oun yob bičras vavar bičepangren koy. Oun ninna kolla rakran o Debleskro rakepen vin. Oun o Saul bičras o triinto kopo vavaren koy. Oun ninna kolla rakran o Debleskro rakepen vin.
22
Kote kras yob pes ap o drom an o foro Rama. Har vas lo pash koy bari brounna, hoy pash i djobeskri platsa Sekou hi, poučas lo: “Kay hi o Samuel oun o David?” Oun yon penan leske: “Pash kol khera, kay o Debleskre rakepangre djivenn an o foro Rama.”
23
Oun yob djas koy. Ap peskro drom vas ninna pral leste o Debleskro dourho. Oun yob djas oun rakras o Debleskro rakepen vin, bis te vas yob pash kol khera, kay o Debleskre rakepangre djivenn an o foro Rama.
24
Kote rivas yob ninna peskre koola vin, oun rakras glan o Samuel o Debleskro rakepen vin, oun peras ap i phoub oun his nanges koy čiddo o tselo dives oun i tseli rat. Doleske vell penlo: “Hi o Saul ninna mank o Debleskre rakepangre?”
← Chapter 18
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 20 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31