1 Samuel 11

Romani Sinte 2024 (O Debleskro Lab 2024 (Sinte-Manouche))

← Chapter 10 Jump to: Chapter 12 →

1Oun o ray pral i Ammonarya, o Nahash, las peskre tsele lourden, djas vin oun čivas pes lentsa troul o foro Yabesh an o them Gilead, yaake te nay vas kek dren oun kek vin. Oun i tsele morsha dran o foro Yabesh penan ap o Nahash: “Kre mentsa vin, te kress menge kek čilačepen. Palle nay veh tou o ray pral mende!”

2O Nahash penas ap lende: “Kava hi, hoy t'mentsa vin krau: Me dau hakeneske t'mendar o čačo yak vin. Yaake anau ladj ap o tselo Israel!”

3Koy penan i phoureder an o foro Yabesh ap leste: “Mouk men efta divessa tsiro, te nay bičras morshen an o tselo them Israel! Oun te hi palle kek koy, kay lell men vin dran tiro vast, palle kamah pash toute vin te djal.”

4Koy van kol morsha, kay dran Yabesh bičedo van an o foro Gibea, kay o Saul djivas, oun penan kol laba i tsele menshenge an o foro. Har kolla kova shounan, rovan le zoreles.

5An ko tsiro vas o Saul peskre groumyentsa pale peskri boudyatar ap peskro kotar phoub, oun poučas: “Hoy hi i menshenge, te rovenn le yaake?” Oun yon penan leske i laba, hoy i morsha dran Yabesh lenge penan.

6Oun har o Saul kol laba shounas, vas o Debleskro dourho pral leste, oun i rholi rhačras an leste pre.

7Oun yob las douy groumya oun činas len an kotya, oun bičras kol bičepangre kol kotyentsa mass an o tselo them Israel trouyel oun moukas te penell: “Koon djal gar vin an o kourepen o Sauleha oun o Samueleha, kolengre groumyenge djal yaake har kalenge!” Koy peras o baro Debleskri daar ap i tsele menshenge, oun i tsele morsha djan vin har te vans le yek morsh.

8Oun o Saul kharas len khetne pash o foro Besek. Kol morsha dran Israel his 300.000 (triin-sheel-zerya) morsha, oun kolla dran Youda 30.000 (triyanda-zerya).

9Oun yob penas ap kol bičepangre: “Penenn t'mare menshenge an o foro Yabesh: Taysar mashkral o dives han bouder gar dren pandlo.” Oun kol bičepangre djan khere, oun penan lauter i morshenge an Yabesh, oun kolla van pale barhteles.

10Oun yon bičran morshen pash i Ammonarya oun moukan lenge te penell: “Taysar vah pash t'mende, te nay krenn mentsa, hoy mishto hi an t'mare yaka.”

11Sik taysarlakro moukas o Saul peskre lourden yaake khetne tardo te vell, te his hako kopo i triinto kotar khetne tardo. Yaake djan le triin rigyendar ap i platsa, kay i Ammonarya hi. Kova his gomme glan o tsiro, kay o kham pre djas. Oun yon maran i Ammonarya bis mashkral o dives. Oun kolla, kay djides ačan, nashan penge, yaake te ačan gar douy lendar khetne.

12Koy penan i Israelitarya ap o Samuel: “Koon hi kolla, kay kaman gar, te vell o Saul o ray pral mende? Denn kol morshen vin, te nay das len moulo.”

13O Saul penas: “Kava dives vell kek moulo dino. Kava dives las o baro Devel peskre menshen Israel vin dran i vasta kolendar, kay lenge čilačepen kaman.”

14Oun o Samuel penas ap i Israelitarya: “Avenn, te djas mer khetne an Gilgal, te das gomme yek kopo vin gole, te hi o Saul maro baro ray!”

15Oun yon lauter djan pre an Gilgal. Oun kote, pash o Debleskro kheer čivan le o Saules pral pende, te vell lo lengro baro ray. Oun kote maran le firhen o baro Debleske, oun kran i baro rhapen. Oun o Saul oun i tsele Israelitarya rhan oun piyan barhteles khetne.

← Chapter 10 Jump to: Chapter 12 →