1 Samuel 10

Romani Sinte 2024 (O Debleskro Lab 2024 (Sinte-Manouche))

← Chapter 9 Jump to: Chapter 11 →

1Oun o Samuel las o khoro, kay o kouč djet dren hi, oun čoras les pral o Sauleskro shero. Oun yob čoumras les oun penas: “Ko djet sikrella, te čivas tout o baro Devel pral peskre menshende, te vess lengro ray.

2Tou te djah touke kanna mandar, palle veh tou pash o gab Selsa kote, kay i Rachel paskedo hi an o them Benyamin. Oun kote venna douy morsha ap o drom, kay touke penenna: Kol esle van hatslo, kolen tou rodal. Kanna krell pes tiro dad daar t'menge oun bouder gar kol eslenge. Yob poučell pes, kay nay hatsell lo peskro čaves.

3Te djah tou kotar doureder, palle veh pash ko baro rouk Tabor. Kote venn triin morsha, kay ap o drom hi, te djan le pre an Betel, te mangenn le o Debles an. Ko yek hidjrella triin terne bouzya, ko vavar triin mare, oun ko triinto hidjrella yek molyakro gono.

4Oun te dikenn le tout, poučenn le toutar, har touke djal. Oun yon denn tout douy mare. Oun tou less len dran lengre vasta.

5Pal kova veh tou pash o foro Gibea-Elohim, kay i lourde i Filistarendar yak denn. Te veh tou kote an o foro, dikeh tou, har Debleskre rakepangre i berga tele venn. Oun glan kolende hi bashepangre, kay bashrenn ap doryengre bashepangre oun ap phourdepangre, oun denn ap tikne pauke. Oun i Debleskre rakepangre rakrenn o Debleskro rakepen vin.

6Oun o baro Debleskro dourho vell pral toute, oun tou rakreh lentsa khetne o Debleskro rakepen vin. Oun kote veh tou i vavar mensho.

7Kanna, te vell kova lauter, palle kre kova, hoy glan tire vasta hi. O Devel hi pash toute.

8Tou djah glan mande tele an Gilgal. Kote kamau pash toute tele te vell, te marap kote firhen o Debleske, saven kay venn tseles rhačedo oun save, hoy rhah mer khetne. Efta divessa ačess tou koy. Palle vau oun penau touke, hoy te kress.”

9Oun har rissras o Saul trouyel, te djal lo peske o Samuelestar, koy das les o Devel i vavar dji. Oun lauter, hoy o Samuel glan-vi penas, vas yaake ap ko dives.

10Har van le pash Gibea, van Debleskre rakepangre ap o drom pash lende. Oun o Debleskro dourho vas pral leste, yaake te rakras lo lentsa khetne o Debleskro rakepen vin.

11Oun har dikan kolla, kay les prindjran, har rakras yob o Debleskro rakepen vin khetne o Debleskre rakepangrentsa, koy poučan le pen: “Hoy djas o Sauleha, koleskro dad o Kish hi? Vas yob ninna o Debleskro rakepaskro?”

12Oun yek, kay koy pashel tardo his, penas: “Koon hi kolengro pralstouno?” Doleske vas penlo: Vas o Saul ninna o Debleskro rakepaskro?

13Oun har heras o Saul pre te rakrell o Debleskro rakepen vin, djas lo pre ap koy pralstouni platsa.

14Oun o Sauleskro kak dikas les oun leskro boudepaskres oun poučas: “Kay hans t'mer?” Oun o Saul penas: “Mer rodam i eslen, oun har dikam, te hi le gar koy, djam pash o Samuel.”

15“Pen mange, hoy o Samuel ap t'mende penas,” penas o Sauleskro kak.

16“Yob penas, te hi i esle hatslo,” penas o Saul. Yob penas peskro kakeske gar, te penas o Samuel, te vell lo ray.

17Oun o Samuel moukas i Israelitaryen khetne gole te dell an Mispa, te venn le glan o baro Debleste.

18Oun yob penas ap lende: “Kava penell o baro Devel, kay o Israeleskro Devel hi: Me anom o Israel dran o them Egiptia vin, oun lom t'men dran o vast i Egiptarendar vin, oun ninna dran i vasta lauterendar, kay an i themma troul t'mende djivenn oun t'men tiknes rikran.

19T'mer vitsran kava dives t'maro Debles ap i rig, koles, kay las t'men vin dran t'mari daar oun t'maro pharo djipen. Ap koleste penan: Čip i baro rayes pral mende! Kanna mishto! Avenn glan o baro Debleste! Haki bari familya, hoy vell pal yekeste kol deesh-te-douy Yakobeskre čavendar vell tardo peske, oun mank lende ninna hako dadeskro kheer.”

20Oun o Samuel moukas haki bari familya glan te vell, oun vitsras i kashta. Koy sikran i kashta ap i familya Benyamin.

21Palle moukas lo hako dadeskro kheer dran i familya Benyamin glan te vell. Koy sikran i kashta ap o dadeskro kheer Matri. Oun mank i morshende dran o kheer Matri sikran i kashta ap o Saul, koleskro dad o Kish hi. Oun yon rodan les, oun hatsan les gar.

22Oun yon poučan o baro Deblestar: “Vas ko morsh kay?” Oun o baro Devel penas: “Yob khatras pes ap i platsa, kay i koola hi.”

23Koy nashan le kote oun anan les kay. Oun har yob mashkral i tsele menshende tardo his, kote dikan le, te his lo yek shero bareder har hako vavar.

24Oun o Samuel penas ap i tsele menshende: “Kate dikenn, kones o baro Devel vin rodas. Kek hi yaake har yob mank i tsele Israelitarya.” Koy dan i tsele menshe gole i barhtyatar oun penan: “O baro ray te djivell!”

25Oun o Samuel penas i menshenge, havo čačepen o baro rayes hi. Oun kova činas lo an i liil, oun čivas les glan o baro Debleste. Palle bičras lo hakenes khere.

26Oun ninna o Saul djas pale an peskro kheer an Gibea. Oun khetne leha djan lourde, kolen das o Devel kova yaake an o dji.

27Koy his ninna morsha, kay či-molde his. Kolla penan: “Har nay lell kava morsh men vin dran i bibarht?” Oun yon dikan tele ap leste, oun anan leske či. O Saul kras yaake har shounals lo kova gar.

← Chapter 9 Jump to: Chapter 11 →