1 Samuel 7

Romani Sinte 2024 (O Debleskro Lab 2024 (Sinte-Manouche))

← Chapter 6 Jump to: Chapter 8 →

1Oun kol morsha dran Kiryat-Yearim van oun lan o morhton o baro Deblestar. Oun yon anan les an o kheer i morshestar, kay kharas Abinadab. Kova djivas ap i tikni berga. Oun leskro čaves, o Elazar, rodan le vin, te dell lo yak ap o morhton.

2Ko morhton, kay o baro Debleskre deesh laba dren hi, ačas i rah tsiro an Kiryat-Yearim, yaake biish bersha. An ko tsiro poučan i Israelitarya pale pal o baro Debleste.

3Kote penas o Samuel ap lende: “Te kamenn t'mer t'maro tselo djiyeha pale ap o baro Debleskro drom te djal, palle čivenn i rhorhene deblen t'mendar krik, ninna i debletsa Astarte! Patsenn ap o baro Debleste, oun mangenn les kokres an oun kek vavares! Palle lell yob t'men vin dran i vasta i Filistarendar.”

4Oun i Israelitarya čivan i rhorhene deblen krik, kay kharenn Baal oun Astarte, oun mangan kokres o baro Debles an.

5Oun o Samuel das i tsele morshen an Israel khetne gole an Mispa, te mangas lo lenge o baro Deblestar.

6Oun yon van khetne an Mispa. Kote lan le pani, oun čoran les glan o baro Debleste vin. Oun ap ko dives rhan le či, te dikell o baro Devel ap lende. Oun yon penan: “Mer anam doosh ap mende glan o baro Debleste.” Oun kote an Mispa vas o Samuel lengro čačepaskro ray.

7Har i Filistarya shounan, te van i Israelitarya khetne an Mispa, djan lengre raya pengre lourdentsa vin, te kourenn le pen i Israelentsa. Har i Israelitarya kova shounan, tapras len i bari daar.

8Oun yon penan ap o Samuel: “Mouk gar tele, te mangess menge maro baro Deblestar, te lell lo men vin dran i vasta kol Filistarendar.”

9Oun o Samuel las i terno bakro, hoy gomme thoud piyas, oun maras les oun rhačras les tseles o baro Debleske. Oun yob das ap o baro Debleste gole, oun mangas les o Israeleske. Oun o baro Devel shounas ap leste.

10Oun har yob gomme o bakres rhačras, van i Filistarya te kourenn le pen i Israelentsa. Oun o baro Devel moukas o bolepen bari gole te dell pral lende ap ko dives, yaake te tapras kol Filistaryen i bari daar, oun yon nashan penge glan i Israelitarya.

11Oun i Israelitarya djan vin dran Mispa, oun lan len palla yaake dour har Bet-Kar, oun dan len moulo ap o drom.

12Oun o Samuel las i bar oun čivas les pre mashkral Mispa oun Shen, oun das les o lab Eben-Eser, oun penas: O tselo drom his o baro Devel ap mari rig.

13Yaake peras i ladj ap i Filistarya. Oun yon van bouder gar an o Israeleskro them. Oun o vast o baro Deblestar his phares čiddo ap lende, yaake rah har o Samuel djivas.

14Oun o Israel las peske kol forya pale, kolen i Filistarya lendar krik lan an o them mank Ekron oun Gat. Kal forya las o Israel vin dran i vasta i Filistarendar. Oun ninna mank i Israelitarya oun i Amorarya his bouder kek kourepen.

15Oun yaake rah har o Samuel djivas, his yob o čačepaskro ray pral o Israel.

16Oun hako bersh djas lo an Betel oun Gilgal oun Mispa oun rakras kote o čačepen vin pral i menshende.

17Palle djas lo pale an Rama, kay lo khere hi, oun rakras kote o čačepen vin pral i Israelitarya. Ninna kote kras lo i rhačepaskri, kay čomone rhačedo vell o baro Debleske.

← Chapter 6 Jump to: Chapter 8 →