Deuteronomy 1 — Shan

1ၵႂၢမ်းဢၼ် မူဝ်းသေႇ ၶိုၼ်းႁေႃးလၢတ်ႈတီႈၵူၼ်းမဵဝ်း ဢီႉသရေႇလႃႉ တင်းလၢႆ ၵႃႈႁိမ်းၼမ်ႉႁွင်ႈ ယေႃးတၢၼ်ႇ ၼႂ်းထိူၼ်ႇလူင်ၼႂ်းပၢင်ႇပဵင်း ဢႃႇရၽႃႉ ၊ သိုဝ်ႈ သူႉၽႃႉ ၵႃႈတီႈၵႄႇဝူင်ႈၵၢင်ဝဵင်း ပႃႇရၼ်ႇ ၊ ဝဵင်း တေႃႇၽေးလႃႉ ၊ ဝဵင်း လႃႇပၢၼ်ႇ ၊ ဝဵင်း ႁႃႇၸရုတ်ႉ ၊ တင်းဝဵင်း တီႉၸႁပ်ႉ ၸိူဝ်းၼၼ်ႉၼႆႉၸမ်ႉ၊-

2ဢဝ်ၵႃႈတီႈ ႁေႃးရပ်ႉ ၸွမ်းသဵၼ်ႈတၢင်းလွႆ ၸီႉရႃႉ ၵႂႃႇတေႃႇထိုင်ႁွတ်ႈၵႃႈတီႈ ၵႃႇတေႇသပႃႇၼႃႇ ၼၼ်ႉ ၶၢဝ်းတၢင်းယၢၼ်ၵၼ် သိပ်းဢဵတ်းဝၼ်းဢေႃႈ။-

3သၢၵ်ႈၵရဵတ်ႈသီႇသိပ်းပီႊ လိူၼ်ဢေႇၵႃႉတႃႉသမႃႉ၊ ဝၼ်းပထမႃႉ၊ မူဝ်းသေႇ ႁေႃးလၢတ်ႈတီႈၵူၼ်းမဵဝ်း ဢီႉသရေႇလႃႉ တင်းလၢႆ ၸွမ်းၵႃႈၼင်ႇဢၼ်ထႃႇဝရႃႉၽြႃး သင်ႇလၢတ်ႈဝႆႉတီႈမၼ်းလူၺ်ႈလွင်ႈၶဝ်ၼၼ်ႉဢေႃႈ။-

4ဝၢႆးသေတိုၵ်းတေႃးယႃႉပႅတ်ႈ သီႉႁုၼ်ႇ ၶုၼ်ႁေႃၶမ်း ဢႃႇမေႃးရီႉ ဢၼ်ယူႇၵႃႈတီႈဝဵင်း ႁေႇသၽုၼ်ႇ ဢိၵ်ႇတင်း ဢေႃႇၶႃႉ ၶုၼ်ႁေႃၶမ်း ပႃႇသၢၼ်ႇ ဢၼ်ယူႇၵႃႈတီႈဝဵင်း ဢႃႇသတႃႇရုတ်ႉ မိူင်း ဢေႇတြီႉ ၼၼ်ႉယဝ်ႉၼၼ်ႉ၊-

5မူဝ်းသေႇ ၸႃႉႁေႃးလၢတ်ႈတြႃးၼႆႉ ၵႃႈႁိမ်းၼမ်ႉႁွင်ႈ ယေႃးတၢၼ်ႇ ၵႃႈၼႂ်းမိူင်း မေႃႇၽႃႉ လႄႈဝႃႈၸမ်ႉ။

6ထႃႇဝရႃႉၽြႃး ၽြႃးပဵၼ်ၸဝ်ႈႁဝ်း မီးဢမိင်ႉတီႈႁဝ်း ၵႃႈၼႂ်းတီႈ ႁေႃးရပ်ႉ ၼၼ်ႉၸမ်ႉ၊ သူယူႇၵႃႈတီႈလွႆၼႆႉႁိုင်ၼႃႇလႄႈ ပေႃးယဝ်ႉ။-

7ဝၢႆႇၶိုၼ်းလႄႈၵႂႃႇတၢင်းပႆတၢင်းတႃႉ။ ဢွၼ်ၵၼ်ၶိုၼ်ႈၵႂႃႇၵႃႈတီႈမိူင်းလွႆ ဢႃႇမေႃးရီႉ ဢိၵ်ႇတင်းၵႃႈတီႈ ၵႃႈဢၼ်ၸမ်ၵၼ်တင်းတီႈၼၼ်ႈ ၵႃႈတီႈပၢင်ႇပဵင်း ဢႃႇရၽႃႉ ၵႃႈတီႈၼိူဝ်လွႆၼိူဝ်ၵုင်း၊ ၵႃႈတီႈႁူၺ်ႈတီႈႁွင်ႈ၊ ၵႃႈတီႈပွတ်းတၢင်းၸၢၼ်း၊ ၵႃႈတီႈႁိမ်းပၢင်ႇလၢႆႇ မိူင်းၵူၼ်း ၶႃႇၼၼီႉ တင်းလွႆ လေႇပၼုၼ်ႇ တေႃႇထိုင်ႁွတ်ႈ ၼမ်ႉႁွင်ႈလူင် ဢူႉၽရတ်ႉ ၼၼ်ႉတႃႉ။-

8တူၺ်းလူး၊ ၵဝ်ဢဝ်မိူင်းၼၼ်ႉဝႆႉ ၵႃႈတီႈၽၢႆႇၼႃႈသူယဝ်ႉ။ ဢွၼ်ၵၼ်ၶဝ်ႈလႄႈ သိမ်းဢဝ်မိူင်းဢၼ်ထႃႇဝရႃႉၽြႃးတိူင်ႇတီႈ ပူႇပေႃႈသူ ဢႃႇပြႃႇႁၢမ်ႇ၊ ဢီႉၸၢၵ်ႈ၊ ယႃႇၵုပ်ႈ ၸိူဝ်းၼၼ်ႉလႄႈ ဝႃႈတၵ်းပၼ်တီႈၶဝ် ဢိၵ်ႇတင်းမဵဝ်းၸိူဝ်ႉၶိူဝ်းၶဝ် လိုၼ်းၶဝ်ၼၼ်ႉဢေႃႈ၊ ဝႃႈၼင်ႇၼႆဝႆႉၼၼ်ႉတႃႉ၊ ဝႃႈၼင်ႇၼႆဢေႃႈ။

9မိူဝ်ႈၼၼ်ႉ ၵဝ်လၢတ်ႈတီႈသူလႄႈဝႃႈၸမ်ႉ၊ ၵဝ်ၵေႃႉလဵဝ်ၵူၺ်း ဢမ်ႇႁၢပ်ႇဢဝ်သူၵႂႃႇလႆႈ။-

10ထႃႇဝရႃႉၽြႃး ၽြႃးပဵၼ်ၸဝ်ႈသူၼၼ်ႉ ႁႂ်ႈသူယႂ်ႇၽႄႈၼမ်ၵိုၼ်းၼႃႇလူင်လၢင်လႄႈ၊ ဝၼ်းမိူဝ်ႈၼႆႉ ၼပ်ႉဢၢၼ်ႇသူလႄႈ သူပဵၼ်ၸိူဝ်ႉၼင်ႇ လၢဝ်ၵၢင်ႁၢဝ်ဢေႃႈ။-

11ႁႂ်ႈထႃႇဝရႃႉၽြႃး ၽြႃးပဵၼ်ၸဝ်ႈပူႇပေႃႈသူၼၼ်ႉ ႁႂ်ႈသူယႂ်ႇၽႄႈၼမ်ၵိုၼ်းသေမိူဝ်ႈလဵဝ်ၼႆႉ ႁဵင်ပုၼ်ႈသေၵမ်းလူၺ်ႈ။ ႁႂ်ႈမၼ်းၸဝ်ႈပၼ်တၢင်းလီတီႈသူ ၸွမ်းၵႃႈၼင်ႇဢၼ်မၼ်းၸဝ်ႈဝႆႉၵတီႉတီႈသူၼၼ်ႉသေၵမ်းလူၺ်ႈ။-

12ၵဝ်ၵေႃႉလဵဝ်ၵူၺ်း တၵ်းႁၢပ်ႇဢဝ်ၶူဝ်းႁၢပ်ႇသူဢၼ်ယၢပ်ႇၼႃႇၽိုတ်ႇၼႃႇ၊ တၢင်းဢၼ်ပွင်ႇႁဵတ်းဢမူႉသူ ဢၼ်ၼၵ်းၼႃႇ၊ တၢင်းဢၼ်သူၽိတ်းၵၼ်ၽႅတ်ႇၵၼ်ၸိူဝ်းၼၼ်ႉၵႂႃႇလႆႈၸိူဝ်ႉၼင်ႇႁိုဝ်။-

13ၸွမ်းလူၺ်ႈမဵဝ်းသူတင်းလၢႆ ၼၼ်ႉသေလႄႈ လိူၵ်ႈၵဵပ်းဢဝ်ၶဝ်ၸိူဝ်းဢၼ် ပျေႉၸုမ်ႇတင်းၺၢၼ်ႇပိင်ႇၺႃႇလႄႈ မီးသရေႇၼၼ်ႉတႃႉ။ ၵဝ်တၵ်းၶၢၼ်းၶဝ်ဝႆႉ ႁႂ်ႈပဵၼ်ၵႄႇပဵၼ်ႁူဝ်ၵႃႈၼိူဝ်သူဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

14သူဢွၼ်ၵၼ်ၶိုၼ်းလၢတ်ႈလႄႈဝႃႈ၊ လွင်ႈတၢင်းဢၼ်ၸဝ်ႈႁဝ်းလၢတ်ႈၼႆႉၸိုင် ထုၵ်ႇလီႁဵတ်းၶႃႈဢေႃႈ၊ ဝႃႈၼင်ႇၼႆဢေႃႈ။-

15ပိူဝ်ႈၼႆလႄႈ ၵဝ်လိူၵ်ႈၵဵပ်းဢဝ်ၵူၼ်းယႂ်ႇၵူၼ်းလူင် ၵႃႈတီႈမဵဝ်းသူတင်းလၢႆၼၼ်ႉ ဢၼ်ဝႃႈၶဝ်ၸိူဝ်းဢၼ် ပျေႉၸုမ်ႇတင်းၺၢၼ်ႇပိင်ႇၺႃႇလႄႈ မီးသရေႇၼၼ်ႉသေလႄႈ ၶၢၼ်းဝႆႉႁႂ်ႈပဵၼ်ၵႄႇပဵၼ်ႁူဝ် ၵႃႈၼိူဝ်သူဢၼ်ဝႃႈ ၵူၼ်းဢၼ်ဢုပ်ႉၵႃႈၼိူဝ်ယေႈႁဵင်၊ ၵူၼ်းဢၼ်ဢုပ်ႉၵႃႈၼိူဝ်ယေႈပၢၵ်ႇ၊ ၵူၼ်းဢၼ်ဢုပ်ႉၵႃႈၼိူဝ်ယေႈႁႃႈသိပ်း၊ ၵူၼ်းဢၼ်ဢုပ်ႉၵႃႈၼိူဝ်ယေႈသိပ်း ဢိၵ်ႇတင်းၵူၼ်းဢၼ်သေႃႇဢၼ်ၵျၢပ်ႈတင်းလၢႆဢေႃႈ။-

16ၵဝ်လႆႈသင်ႇလၢတ်ႈဝႆႉတီႈၶဝ်ၸိူဝ်းဢၼ် ၸီႇယၢင်ႇတြႃးတီႈသူၼၼ်ႉလႄႈဝႃႈ၊ ထွမ်ႇငိၼ်းဢမူႉပီႈၼွင်ႉသူသေလႄႈ၊ ပဵၼ်ပီႈၼွင်ႉၼင်ႇၵၼ်ၵၼ်ထူပ်းတြႃးၵၼ်သေဢမ်ႇဝႃႈ၊ ထူပ်းၵၼ်တင်းၵူၼ်းတၢင်ႇၸိူဝ်ႉတၢင်ႇၶိူဝ်း သေဢမ်ႇဝႃႈ၊ ၸွမ်းလူၺ်ႈတြႃးသေလႄႈ ၸီႇယၢင်ႇတႃႉ။-

17သူဢမ်ႇလႆႈထွၵ်ႈၼႃႈၽူႈလႂ် ၼႂ်းတၢင်းဢၼ်ၸီႇယၢင်ႇဢမူႉတြႃးၼၼ်ႉ။ သူတၵ်းလႆႈထွမ်ႇဢဝ်ၵႂၢမ်းၵူၼ်းဢွၼ်ႇဢိၵ်ႇတင်းၵႂၢမ်းၵူၼ်းလူင် မိူၼ်မိူၼ်ၵၼ်ဢေႃႈ။ သူဢမ်ႇလႆႈၵူဝ်လႆႈႁႄၼႃႈၵူၼ်းလႃးလႃး။ လွင်ႈမၼ်းၸမ်ႉ ၽြႃးပဵၼ်ၸဝ်ႈပိူင်ႇဢမူႉတြႃးဢေႃႈ။ ဢမူႉဢၼ်သူဢမ်ႇၸၢင်ႈၸီႇယၢင်ႇၼၼ်ႉၸိုင်၊ သူတၵ်းလႆႈဢဝ်မႃးၸူးၵႃႈတီႈၵဝ်လႄႈ၊ ၵဝ်ၵေႃႈတၵ်းထွမ်ႇငိၼ်းဢေႃႈ၊ ဝႃႈၼင်ႇၼႆမႃးယဝ်ႉ။-

18လွင်ႈတၢင်းၵႃႈဢၼ်သူတၵ်းလႆႈႁဵတ်းၼၼ်ႉၵေႃႈ ၵဝ်လႆႈသင်ႇလၢတ်ႈဝႆႉမိူဝ်ႈၼၼ်ႉမႃးယဝ်ႉ။

19ႁဝ်းလႆႈဢွၼ်ၵၼ်လုၵ်ႉသေၵႃႈတီႈ ႁေႃးရပ်ႉ ၼၼ်ႉ ၸွမ်းၵႃႈၼႂ်းၵၢင်ထိူၼ်ႇလူင်ဢၼ်လီၵူဝ်လီႁႄ ဢၼ်သူလႆႈထူပ်းမၼ်းႁၼ်မၼ်းၵႃႈတီႈ ႁိမ်းသဵၼ်ႈတၢင်းဢၼ်ၵႂႃႇၸူးၵႃႈတီႈမိူင်းလွႆၵူၼ်း ဢႃႇမေႃးရီႉ ၼၼ်ႉၵႂႃႇလႄႈ ႁွတ်ႈထိုင်ၵႃႈတီႈ ၵႃႇတေႇသပႃႇၼႃႇ ပုၼ်ႉဢေႃႈ။-

20မိူဝ်ႈၼၼ်ႉ ၵဝ်လၢတ်ႈလႄႈဝႃႈ၊ သူႁွတ်ႈထိုင်ၵႃႈတီႈမိူင်းလွႆ ၵူၼ်း ဢႃႇမေႃးရီႉ ဢၼ်ထႃႇဝရႃႉၽြႃး ၽြႃးပဵၼ်ၸဝ်ႈႁဝ်း ပၼ်တီႈႁဝ်းၼၼ်ႉယဝ်ႉ။-

21တူၺ်းလူး၊ ထႃႇဝရႃႉၽြႃး ၽြႃးပဵၼ်ၸဝ်ႈမႂ်းၼၼ်ႉ ဢဝ်မိူင်းဝႆႉၵႃႈတီႈၽၢႆႇၼႃႈမႂ်းယဝ်ႉ။ ၶိုၼ်ႈလႄႈသိမ်းဢဝ်ၸွမ်းၵႃႈၼင်ႇဢၼ် ထႃႇဝရႃႉၽြႃး ၽြႃးပဵၼ်ၸဝ်ႈပူႇပေႃႈမႂ်း မီးဢမိင်ႉတီႈမႂ်းၼၼ်ႉတႃႉ၊ ယႃႇပေၵူဝ်ပေႁႄ၊ ၸႂ်ၵေႃႈယႃႇပေလူႉ၊ ဝႃႈၼင်ႇၼႆဢေႃႈ။

22မိူဝ်ႈၼၼ်ႉ သူၵႃႈမီးဢွၼ်ၵၼ်သုတ်ႉၸပ်းသုတ်ႉၸူးၵႃႈတီႈၵဝ်သေလႄႈ လဝ်ႊဝႃႈ၊ ႁဝ်းၶႃႈတၵ်းပွႆႇၸႂ်ႉၵူၼ်းၵႂႃႇ ဢွၼ်တၢင်းႁဝ်းၶႃႈ ႁႂ်ႈၶဝ်လွမ်တူၺ်းမိူင်းၼၼ်ႉသေလႄႈ မွၵ်ႇလၢတ်ႈလွင်ႈဢၼ်ႁဝ်းၶႃႈ တၵ်းလႆႈၵႂႃႇသဵၼ်ႈတၢင်းဢၼ်လႂ် ဢိၵ်ႇတင်း လွင်ႈဢၼ်ႁဝ်းၶႃႈ တၵ်းလႆႈႁွတ်ႈထိုင်ဝဵင်းဢၼ်လႂ်ၼၼ်ႉ တီႈႁဝ်းၶႃႈ ၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

23ၵႂၢမ်းဢၼ်လဝ်ႊဝႃႈၼၼ်ႉ ထုၵ်ႇၸႂ်ၵဝ်လႄႈ ၵဝ်လိူၵ်ႈၵဵပ်းဢဝ်ၵူၼ်းသိပ်းသွင်ၵေႃႉ ၵႃႈၼႂ်းသူယေႈမဵဝ်းယေႈၵေႃႉဢေႃႈ။-

24ၶဝ်ၼၼ်ႉ ဢွၼ်ၵၼ်လဵပ်ႈၵႂႃႇၶိုၼ်ႈၵႃႈၼိူဝ်လွႆလႄႈ ႁွတ်ႈထိုင်ၵႃႈတီႈပၢင်ႇႁူၺ်ႈ ဢေႇသၵေႃးလႃႉ သေယဝ်ႉ၊ လွမ်တူၺ်းဢေႃႈ။-

25ၶဝ်ဢွၼ်ၵၼ်ဢဝ်မိုဝ်းၶဝ် ဢဝ်မၢၵ်ႇမႆႉမၢၵ်ႇတွၵ်ႇ ဢၼ်လႆႈၵႃႈတီႈမိူင်းၼၼ်ႉ လူင်းမႃးၸူးၵႃႈတီႈႁဝ်းလႄႈ မွၵ်ႇလၢတ်ႈလႄႈဝႃႈ၊ မိူင်းဢၼ်ထႃႇဝရႃႉၽြႃး ၽြႃးပဵၼ်ၸဝ်ႈႁဝ်း ပၼ်တီႈႁဝ်းၼၼ်ႉ ပဵၼ်မိူင်းဢၼ်လီဢေႃႈ၊ ဝႃႈၼင်ႇၼႆဢေႃႈ။-

26ၵူၺ်းၵႃႈ သူဢမ်ႇမီးဢလူဝ်ႇၶႂ်ႈၵႂႃႇလႄႈ ႁဵတ်းတၢင်းဢၼ်ၶတ်းၵၼ်တင်း ဢမိင်ႉထႃႇဝရႃႉၽြႃး ၽြႃးပဵၼ်ၸဝ်ႈသူသေယဝ်ႉ၊-

27ပွင်ႉၶၢင်းပွင်ႉမိူၼ်ႇ ၵႃႈၼႂ်းမူဝ်းၵႃႇသူလႄႈဝႃႈ၊ ၵွပ်ႈပိူဝ်ႈဢၼ်ထႃႇဝရႃႉၽြႃးၸင်းႁဝ်းလႄႈ မၼ်းၸဝ်ႈၼုၵ်ႈဢဝ်ႁဝ်းဢွၵ်ႇသေ ၵႃႈၼႂ်းမိူင်း ဢေႇၵိပ်ႉတူႉ ႁႂ်ႈလႆႈဢဝ်ႁဝ်းဢၢပ်ႈပၼ် ၵႃႈၼႂ်းမိုဝ်းၵူၼ်းမဵဝ်း ဢႃႇမေႃးရီႉ တင်းလၢႆ ႁႂ်ႈၶဝ်လႆႈဢဝ်ႁဝ်းတၢႆလူင်ပႄႇ။-

28ႁဝ်းတၵ်းလႆႈၵႂႃႇၵႃႈတီႈလႂ်၊ ပီႈၼွင်ႉႁဝ်းၸိူဝ်းၼၼ်ႉ ဢွၼ်ၵၼ်ႁႂ်ႈၸႂ်ႁဝ်းလူႉၵႂႃႇ ဢူၼ်ႈၵႂႃႇလႄႈဝႃႈ၊ ၵူၼ်းဝၢၼ်ႈၵူၼ်းမိူင်းၸိူဝ်းၼၼ်ႉၼၼ်ႉ ယဵင်ႈၶႅၼ်းယႂ်ႇၼႃႇ၊ တၢင်းဢၼ်သုင်ၶဝ်ၵေႃႈ ယဵင်ႈၶႅၼ်းသုင်ၼႃႇသေႁဝ်းဢေႃႈ။ ဝဵင်းၸိူဝ်းၼၼ်ႉၵေႃႈ မီးလမ်းဝဵင်းဢၼ်သုင်ၶိုၼ်ႈထိုင်ၽႃႉၵၢင်ႁၢဝ်ဢေႃႈ။ ႁဝ်းလႆႈႁၼ်ၵူၼ်းမဵဝ်း ဢႃႇၼၵႃႉ တင်းလၢႆ ၵႃႈတီႈၼၼ်ႈဢေႃႈ၊ ဝႃႈၼင်ႇၼႆယဝ်ႉ၊ ဝႃႈၼင်ႇၼႆဢေႃႈ။-

29မိူဝ်ႈၼၼ်ႉ ၵဝ်လၢတ်ႈတီႈသူလႄႈဝႃႈ၊ ယႃႇပေတူၵ်းၸႂ်။ ယႃႇပေၵူဝ်ပေႁႄၶဝ်ၼၼ်ႉ။-

30ထႃႇဝရႃႉၽြႃး ၽြႃးပဵၼ်ၸဝ်ႈသူ ဢၼ်ဢွၼ်ႁူဝ်သူၵႂႃႇၼၼ်ႉ တၵ်းၸွႆႈသိုၵ်းထႅမ်သိုၵ်းသူ ၸွမ်းၵႃႈၼင်ႇဢၼ်မၼ်းၸဝ်ႈႁဵတ်းပုၼ်ႈသူ ၵႃႈၼႂ်းမိူင်း ဢေႇၵိပ်ႉတူႉ သိုဝ်ႈၼႃႈတႂ်ႈတႃသူ၊-

31ဢိၵ်ႇတင်းၵႃႈၼႂ်းထိူၼ်ႇဢၼ်သူလႆႈႁၼ်လွင်ႈဢၼ်ထႃႇဝရႃႉၽြႃး ၽြႃးပဵၼ်ၸဝ်ႈသူ ႁွပ်ႇဢုမ်ႈသူ မိူၼ်ၸိူဝ်ႉၼင်ႇဢၼ် ပေႃႈႁွပ်ႇဢုမ်ႈလုၵ်ႈမၼ်းၼၼ်ႉ ၵႃႈၼႂ်းသဵၼ်ႈတၢင်းၵႃႈဢၼ်သူၸွမ်းမႃး တေႃႇထိုင်ႁွတ်ႈၵႃႈတီႈၼႆႈၼၼ်ႉဢေႃႈ၊ ဝႃႈၼင်ႇၼႆသေၵေႃႈ၊-

32ၼႂ်းတီႈႁဵင်းၼၼ်ႉၸိုင် သူဢမ်ႇယုမ်ႇၵႂၢမ်းထႃႇဝရႃႉၽြႃး ၽြႃးပဵၼ်ၸဝ်ႈသူ၊-

33ဢၼ်ဢွၼ်ႁူဝ်သူ ၵႃႈတီႈၶိင်ႇၵၢင်ၶိုၼ်းၵႃႈၼႂ်းၽႆး၊ ၵႃႈတီႈၶိင်ႇၵၢင်ဝၼ်း ၵႃႈၼႂ်းမွၵ်ႇၵုမ်ႈ ႁႂ်ႈလႆႈႁႃဢဝ်တီႈဢၼ်သူတၵ်းၶျႃးပၢင်မူဝ်းၵႃႇသူ ဢိၵ်ႇတင်းႁႂ်ႈလႆႈၼႄပျႃးသဵၼ်ႈတၢင်းဢၼ် သူတၵ်းလႆႈၵႂႃႇလႆႈပႆၼၼ်ႉလူင်ပႄႇ။

34ထႃႇဝရႃႉၽြႃးငိၼ်းသဵင်ၵႂၢမ်းသူၼၼ်ႉလႄႈ တၢင်းၸႂ်မႆႈၶႆႈၸႃႉဢွၵ်ႇသေယဝ်ႉ၊ တိူင်ႇဝႃႈလႄႈဝႃႈ၊-

35ၼွၵ်ႈသေ ၵႃႇလႅပ်ႉ လုၵ်ႈၸၢႆး ယေႇၽုၼ်ႇၼႃႉ ၼၼ်ႉ ၵူၼ်းမဵဝ်းဢၼ်ႁၢႆႉယုတ်ႈၼႆႉ ဢမ်ႇလႆႈႁၼ်မိူင်းလီမိူင်းငၢမ်း ဢၼ်ၵဝ်တိူင်ႇလႄႈဝႃႈ တၵ်းပၼ်တီႈပူႇပေႃႈသူဢေႃႈ၊ ဝႃႈၼင်ႇၼႆၼၼ်ႉသေၵေႃႉသေၵူၼ်း ဢမၢၼ်ႇၶၼ်ပဵၼ်။-

36ၵေႃႉၼၼ်ႉတၵ်းလႆႈႁၼ်လႄႈ ၵဝ်တၵ်းဢဝ်မိူင်းဢၼ်တိၼ်မၼ်းလႆႈယဵပ်ႇယဝ်ႉၼၼ်ႉပၼ်တီႈမၼ်း ဢိၵ်ႇတင်းၸူဝ်ႈလုၵ်ႈၸူဝ်ႈလၢင်းမၼ်း ၵွပ်ႈပိူဝ်ႈဢၼ်မၼ်းၸွမ်းလင်ထႃႇဝရႃႉၽြႃးလုမ်းလုမ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။-

37လိူဝ်သေၼၼ်ႉ ထႃႇဝရႃႉၽြႃးၸႂ်မႆႈၶႆႈၸႃႉတီႈၵဝ်ၵွပ်ႈပိူဝ်ႈသူလႄႈ မီးဢမိင်ႉဝႃႈ၊ မႂ်းဢမ်ႇလႆႈၶဝ်ႈၵႃႈၼႂ်းမိူင်းၼၼ်ႉ။-

38ယေႃးသူႉ လုၵ်ႈၸၢႆး ၼုၼ်ႇ ဢၼ်ပဵၼ်ၵူၼ်းၸွႆႈၵူၼ်းထႅမ်မႂ်းၼၼ်ႉတၵ်းလႆႈၶဝ်ႈဢေႃႈ။ ၵွပ်ႈပိူဝ်ႈဢၼ်မၼ်းပဵၼ်ၵေႃႉဢၼ် တၵ်းႁႂ်ႈၵူၼ်းမဵဝ်း ဢီႉသရေႇလႃႉ တင်းလၢႆၶၢမ်ႇဢမူၺ်ႇၼၼ်ႉလႄႈ၊ ပၼ်ႁႅင်းတီႈမၼ်းတႃႉ။-

39လုၵ်ႈဢွၼ်ႇသူဢၼ်သူဝႃႈ တၵ်းပဵၼ်တီႈဢၼ်ပိူၼ်ႈတီႉဢဝ်သိမ်းဢဝ်ဝႃႈၼင်ႇၼႆၼၼ်ႉ ဢိၵ်ႇတင်းလုၵ်ႈလၢင်းသူ ဢၼ်ဢမ်ႇပႆႇၸၵ်းၽႄႁူႉၶိင်ႇမိူဝ်ႈလႆႈၼၼ်ႉ ၸိူဝ်းၼၼ်ႉ တၵ်းလႆႈၶဝ်ႈမိူင်းၼၼ်ႉလႄႈ ၵဝ်တၵ်းဢဝ်ပၼ်တီႈၶဝ်လႄႈ ၶဝ်တၵ်းပိူင်ႇဢေႃႈ။-

40သူၸမ်ႉ၊ ဢွၼ်ၵၼ်ဝၢႆႇၶိုၼ်းလႄႈ ၵႂႃႇတၢင်းပႆတၢင်းၵႃႈၼႂ်းထိူၼ်ႇ ၸွမ်းသဵၼ်ႈတၢင်းပၢင်ႇလၢႆႇ ဢေႇတုမ်ႇ ၵႂႃႇလူးၵွၼ်ႇတႃႉ၊ ဝႃႈၼင်ႇၼႆဢေႃႈ။

41မိူဝ်ႈၼၼ်ႉ သူဢွၼ်ၵၼ်ၶိုၼ်းလဝ်ႊလၢတ်ႈတီႈၵဝ်လႄႈဝႃႈ၊ ႁဝ်းၶႃႈၽိတ်းပိူင်ႈထႃႇဝရႃႉၽြႃးမႅၼ်ႈၶႃႈယဝ်ႉ။ ႁဝ်းၶႃႈတၵ်းၵႂႃႇလႄႈ တိုၵ်းသိုၵ်းၸွမ်းၵႃႈၼင်ႇဢၼ်ထႃႇဝရႃႉၽြႃး ၽြႃးပဵၼ်ၸဝ်ႈႁဝ်းၶႃႈသင်ႇလၢတ်ႈဝႆႉၼၼ်ႉၶႃႈဢေႃႈ၊ ဝႃႈၼင်ႇၼႆသေယဝ်ႉ၊ သူၵႃႈမီးဢွၼ်ၵၼ်ယိပ်းၵမ်လၢၵ်ႈၼၢၵ်ႈယူႇသေလႄႈ ႁႅၼ်းဝႆႉဢွမ်ႈပွမ်ႈ ႁႂ်ႈလႆႈၶိုၼ်ႈၵႃႈၼိူဝ်လွႆဢေႃႈ။-

42ထႃႇဝရႃႉၽြႃး မီးဢမိင်ႉတီႈၵဝ်လႄႈဝႃႈၸမ်ႉ၊ သင်ႇလၢတ်ႈတီႈၶဝ်ၼၼ်ႉလႄႈဝႃႈ၊ ယႃႇပေၶိုၼ်ႈၸူး။ ယႃႇပေတိုၵ်းတေႃး။ ၵဝ်ဢမ်ႇမီးယူႇၵႃႈၼႂ်းသူ။ ပေႃးသူတိုၵ်းၸိုင်၊ သူတၵ်းတူၵ်းသုမ်း ၵႃႈတီႈၽၢႆႇၼႃႈရၢၼ်ႇသူႇသူဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။-

43ၼင်ႇၼၼ်လႄႈ ၵဝ်သင်ႇလၢတ်ႈတီႈသူသေၵေႃႈ၊ သူဢမ်ႇထွမ်ႇဢမ်ႇဢဝ်။ သူထဵင်ပႅတ်ႈဢမိင်ႉထႃႇဝရႃႉၽြႃးလႄႈ ဢွၼ်ၵၼ်မီးတၢင်းၸႂ်ဢၼ်ႁတ်းႁၢၼ် လိူဝ်တွၼ်းၼႃႇလူင်လၢင်သေလႄႈ ၶိုၼ်ႈၵႂႃႇၵႃႈၼိူဝ်လွႆဢေႃႈ။-

44မိူဝ်ႈၼၼ်ႉ ၵူၼ်းမဵဝ်း ဢႃႇမေႃးရီႉ ဢၼ်မီးဝႆႉထႃႈၵႃႈၼိူဝ်လွႆၼၼ်ႉၸိူဝ်းၼၼ်ႉ ဢွၼ်ၵၼ်ဢွၵ်ႇမႃးႁႄႉတိုၵ်းသူသေယဝ်ႉ၊ လိုပ်ႈလမ်းၸွမ်းသူ မိူၼ်ၸိူဝ်ႉၼင်ႇဢၼ် ၽိုင်ႈတင်းလၢႆဢုမ်ႇလႄႈလိုပ်ႈၸွမ်းၼၼ်ႉသေလႄႈ ယႃႉၽဵဝ်ႈသူပႅတ်ႈ ၵႃႈၼႂ်းတီႈ ၸီႉရႃႉ တေႃႇထိုင်ႁွတ်ႈ ႁေႃႇမႃႇ ဢေႃႈ။-

45သူၵေႃႈၶိုၼ်းမႃးလႄႈ ဢွၼ်ၵၼ်ႁွင်ႉႁႆႈၵႃႈတီႈ ၽၢႆႇၼႃႈထႃႇဝရႃႉၽြႃးဢေႃႈ။ ၵူၺ်းၵႃႈ ထႃႇဝရႃႉၽြႃးဢမ်ႇထွမ်ႇဢဝ်သဵင်ႁွင်ႉသူ။ ဢမ်ႇဝၢႆႇႁူတေႃႇသူ။-

46ပိူဝ်ႈၼႆလႄႈ သူသမ်ႉလႆႈၶိုၼ်းယူႇ ၵႃႈတီႈ ၵႃႇတေႇသႃႉ ၼၼ်ႉ မိုဝ်ႉဝၼ်းၼမ်ၼႃႇလူင်လၢင် ၸွမ်းၵႃႈၼင်ႇမိုဝ်ႉဝၼ်းဢၼ်သူလႆႈယူႇၼၼ်ႉဢေႃႈ။