Deuteronomy 2

Shan

← Chapter 1 Jump to: Chapter 3 →

1ႁဝ်းဝၢႆႇၶိုၼ်းလႄႈၵႂႃႇတၢင်းပႆတၢင်းၸွမ်းသဵၼ်ႈတၢင်းပၢင်ႇလၢႆႇ ဢေႇတုမ်ႇ ၸွမ်းၵႃႈၼင်ႇဢၼ် ထႃႇဝရႃႉၽြႃးမီးဢမိင်ႉတီႈၵဝ်ၼၼ်ႉသေလႄႈ လႄႇလဵပ်ႈလွႆ ၸီႉရႃႉ ယူႇ မိုဝ်ႉဝၼ်းၼမ်ၼႃႇလူင်လၢင်ဢေႃႈ။-

2ထႃႇဝရႃႉၽြႃးသင်ႇလၢတ်ႈတီႈၵဝ်လႄႈဝႃႈ၊-

3သူလႄႇလဵပ်ႈလွႆၼႆႉႁိုင်ၼႃႇလႄႈပေႃးယဝ်ႉ။ သမ်ႉဝၢႆႇၶိုၼ်းၵႂႃႇၽၢႆႇတၢင်းႁွင်ႇလူးၵွၼ်ႇတႃႉ။-

4မႂ်းလၢတ်ႈတီႈၵူၼ်းတင်းလၢႆလႄႈဝႃႈ၊ သူတၵ်းလႆႈပႆၸွမ်းၵႃႈၼႂ်းလႅၼ်လိၼ်မိူင်းပီႈၼွင်ႉသူ ၵူၼ်းမဵဝ်း ဢေးသေႃး ဢၼ်ယူႇၵႃႈၼႂ်းမိူင်း ၸီႉရႃႉ ၸိူဝ်းၼၼ်ႉၵႂႃႇဢေႃႈ။ ၶဝ်ၼၼ်ႉတၵ်းၵူဝ်တၵ်းႁႄသူဢေႃႈ။ ပိူဝ်ႈၼႆလႄႈ တူဝ်သူႁဵတ်းသတီႉတီႈတူဝ်သူတႃႉ။-

5ယႃႇပေၽိတ်းၵၼ်တင်းၶဝ်လႃးလႃး။ မိူင်းၶဝ်ၼၼ်ႉၸိုင် ၵဝ်ဢမ်ႇပၼ်တီႈသူ။ တၢၼ်ႇၵႃႈတီႈဢၼ်တိၼ်တၵ်းယဵပ်ႇသေၵေႃႈ ၵဝ်ဢမ်ႇပၼ်တီႈသူ၊ လွင်ႈမၼ်းၸမ်ႉ ၵဝ်ဢဝ်လွႆ ၸီႉရႃႉ ပၼ်တီႈ ဢေးသေႃး ႁႂ်ႈမၼ်းပိူင်ႇဢေႃႈ။-

6သူတၵ်းလႆႈဢဝ်ငိုၼ်းသိုဝ်ႉဢဝ်တၢင်းၵိၼ်တၢင်းၶူပ်း ပုၼ်ႈဢၼ်သူတၵ်းၵိၼ်တၵ်းၶူပ်း ဢိၵ်ႇတင်းၼမ်ႉပုၼ်ႈဢၼ်သူတၵ်းၵိၼ်တၵ်းသူတ်ႉၼၼ်ႉတီႈၶဝ်ဢေႃႈ။-

7ထႃႇဝရႃႉၽြႃး ၽြႃးပဵၼ်ၸဝ်ႈမႂ်းၼၼ်ႉ ပၼ်တၢင်းလီတီႈမႂ်းၼႂ်းၵႃႈဢၼ်မႂ်းႁဵတ်းမႂ်းသၢင်ႈၼၼ်ႉယဝ်ႉ။ မၼ်းၸဝ်ႈႁူႉလွင်ႈတၢင်းဢၼ်သူၵႂႃႇၵႂႃႇမႃးမႃး ၵႃႈၼႂ်းထိူၼ်ႇလူင်ၼႆႉၼၼ်ႉယူႇဢေႃႈ။ သီႇသိပ်းပီႊတဵမ်တဵမ်ယဝ်ႉၼႆႉ၊ ထႃႇဝရႃႉၽြႃး ၽြႃးပဵၼ်ၸဝ်ႈမႂ်း မီးယူႇလူၺ်ႈၵၼ်တင်းမႂ်းလႄႈ မႂ်းဢမ်ႇလူဝ်ႇထႅင်ႈၵႃႈသင်လႃးလႃး၊ ဝႃႈၼင်ႇၼႆတႃႉ၊ ဝႃႈၼင်ႇၼႆယဝ်ႉ။

8ႁဝ်းၵၢႆၵႂႃႇၵႃႈတီႈႁိမ်းပီႈၼွင်ႉႁဝ်း ၵူၼ်းမဵဝ်း ဢေးသေႃး ဢၼ်ယူႇၵႃႈၼႂ်းမိူင်း ၸီႉရႃႉ ၸိူဝ်းၼၼ်ႉ ပႅတ်ႈၶဝ်ဝႆႉသေလႄႈ ၸွမ်းသဵၼ်ႈတၢင်းပၢင်ႇပဵင်း ဢႃႇရၽႃႉ ဢၼ်လုၵ်ႉသေၵႃႈတီႈဝဵင်း ဢေးလတ်ႉ ဢိၵ်ႇတင်းဝဵင်း ဢေးၸရုၼ်ႇၵႃႇပႃႉ ၼၼ်ႉသေယဝ်ႉ၊ သမ်ႉဝၢႆႇၶိုၼ်းလႄႈ ၸွမ်းသဵၼ်ႈတၢင်းထိူၼ်ႇ မေႃႇၽႃႉ ဢေႃႈ။-

9ထႃႇဝရႃႉၽြႃးၵေႃႈ မီးဢမိင်ႉတီႈၵဝ်လႄႈဝႃႈ၊ ယႃႇပေယႃႉယူၵ်ႉမိူင်း မေႃႇၽႃႉ ။ ယႃႇပေတိုၵ်းသိုၵ်းၵၼ်တင်းၶဝ်။ လွင်ႈမၼ်းၸမ်ႉ ၵွပ်ႈပိူဝ်ႈဢၼ်ၵဝ်ဢဝ်မိူင်း ဢႃႇရႃႉ ပၼ်တီႈၵူၼ်းမဵဝ်း လေႃးတႃႉ ႁႂ်ႈၶဝ်ပိူင်ႇယဝ်ႉလႄႈ၊ ၵဝ်ဢမ်ႇဢဝ်မိူင်းၶဝ်ၼၼ်ႉပၼ်တီႈမႂ်းႁႂ်ႈမႂ်းပိူင်ႇ။-

10ၵူၼ်းမဵဝ်း ဢေႇမိမ်ႇ ဢၼ်ပဵၼ်ၵူၼ်းဢၼ်ယႂ်ႇၼႃႇၼမ်ၼႃႇသုင်ၼႃႇ မိူၼ်ၸိူဝ်ႉၼင်ႇၵူၼ်းမဵဝ်း ဢႃႇၼၵႃႉ ၼၼ်ႉ ယူႇၵႃႈတီႈမိူင်းၼၼ်ႉ မိူဝ်ႈၵွၼ်ႇဢွၼ်ၼႆႉၼၼ်ႉဢေႃႈ။-

11ပိူၼ်ႈမၢတ်ႈၶဝ်ၼၼ်ႉ ၶဝ်ႈပႃးၵႃႈၼႂ်းၵူၼ်းဢၼ်ယႂ်ႇၼႃႇႁႅင်းၼႃႇမိူၼ်ၸိူဝ်ႉၼင်ႇၵူၼ်းမဵဝ်း ဢႃႇၼၵႃႉ ၼၼ်ႉဢေႃႈ။ ၼႂ်းဝႃႈၼၼ်သေၵေႃႈ ၵူၼ်းမိူင်း မေႃႇၽႃႉ တင်းလၢႆႁွင်ႉၶဝ်ၼၼ်ႉ ဢေႇမိမ်ႇ ဢေႃႈ။-

12မိူဝ်ႈၵွၼ်ႇဢွၼ်ၼႆႉၼၼ်ႉ ၵူၼ်း ႁေႃးရီႉ တင်းလၢႆၵေႃႈ ယူႇၵႃႈၼႂ်းမိူင်း ၸီႉရႃႉ ဢေႃႈ။ ၵူၼ်းမဵဝ်း ဢေးသေႃး တင်းလၢႆ ပုတ်ႈဢဝ်တီႈၶဝ်ၼၼ်ႉလႄႈ ပႄႇၽဵဝ်ႈၶဝ်ပႅတ်ႈသေယဝ်ႉ၊ ယူႇၵႃႈၼႂ်းတီႈယူႇၶဝ်ၼၼ်ႉ မိူၼ်ၸိူဝ်ႉၼင်ႇဢၼ် ၵူၼ်းမဵဝ်း ဢီႉသရေႇလႃႉ တင်းလၢႆ လႆႈႁဵတ်းၵႃႈတီႈမိူင်းဢၼ် ထႃႇဝရႃႉၽြႃးပၼ်ပိူင်ႇၼၼ်ႉဢေႃႈ။-

13တေႃႈလဵဝ်ၼႆႉလုၵ်ႉလႄႈဢွၼ်ၵၼ်ၶၢမ်ႈၼမ်ႉႁွင်ႈ ၸေႇရိတ်ႉ တႃႉ၊ ဝႃႈၼင်ႇၼႆလႄႈ၊ ႁဝ်းဢွၼ်ၵၼ်ၶၢမ်ႈၼမ်ႉႁွင်ႈ ၸေႇရိတ်ႉ ဢေႃႈ။-

14ၶိင်ႇၵႃႇလႃႉမိုဝ်ႉဝၼ်းဢၼ် ဢဝ်ၸႃႉၸဵမ်ဢၼ်ႁဝ်းလုၵ်ႉသေၵႃႈတီႈ ၵႃႇတေႇသပႃႇၼႃႇ ၵႂႃႇတေႃႇထိုင်ႁွတ်ႈဢၼ်ႁဝ်းၶၢမ်ႈၼမ်ႉႁွင်ႈ ၸေႇရိတ်ႉ ဢၼ်ဝႃႈတေႃႇထိုင်ႁွတ်ႈၵူၼ်းသိုၵ်း ၸုပ်ႈဢွၼ်တၢင်းၵႃႈမီးၼၼ်ႉ လႆႈလူႉႁၢႆတၢႆၵႂႃႇၵႃႈၼႂ်းၵၢင်မုၵ်ႉၵူၼ်းၸိူဝ်းၵူၼ်း ၸွမ်းၵႃႈၼင်ႇဢၼ်ထႃႇဝရႃႉၽြႃး ၵိၼ်ႇဝႃႈၼၼ်ႉၼၼ်ႉ လႆႈသၢမ်သိပ်းပၢႆပႅတ်ႇပီႊဢေႃႈ။-

15ထႃႇဝရႃႉၽြႃးယဵတ်ႇမိုဝ်းမၼ်းၸဝ်ႈယူႇၽၢႆႇၼိုင်ႈတင်းၶဝ် ႁႂ်ႈလႆႈပႄႇၽဵဝ်ႈၶဝ်ပႅတ်ႈသေၵႃႈၼႂ်းၵၢင်မုၵ်ႉၵူၼ်းၸိူဝ်းၵူၼ်း တေႃႇထိုင်ႁွတ်ႈၶဝ်ထၼ်ႈပေႃးလူႉႁၢႆတၢႆၵႂႃႇၼၼ်ႉဢေႃႈ။-

16ၵူၼ်းသိုၵ်းၸိူဝ်းၼၼ်ႉ လူႉႁၢႆတၢႆသေၵႃႈၼႂ်းၵၢင်မုၵ်ႉၵူၼ်းၸိူဝ်းၵူၼ်းသေယဝ်ႉ၊-

17ထႃႇဝရႃႉၽြႃး မီးဢမိင်ႉတီႈၵဝ်လႄႈဝႃႈ၊-

18ဝၼ်းမိူဝ်ႈၼႆႉ မႂ်းတၵ်းလႆႈၶၢမ်ႈလိၼ် ဢႃႇရႃႉ ဢၼ်ပဵၼ်လႅၼ်လိၼ်မိူင်း မေႃႇၽႃႉ ၵႂႃႇဢေႃႈ။-

19မိူဝ်ႈဢၼ်မႂ်းႁွတ်ႈထိုင်ၵႃႈတီႈႁိမ်းၵူၼ်းမဵဝ်း ဢမ်ႇမုၼ်ႇ ၸိူဝ်းၼၼ်ႉၸိုင် ယႃႇပေယႃႉယူၵ်ႉၶဝ်။ ယႃႇပေၽိတ်းၵၼ်တင်းၶဝ်လႃးလႃး။ ၵဝ်ဢမ်ႇဢဝ်မိူင်းဢၼ်ၵူၼ်းမဵဝ်း ဢမ်ႇမုၼ်ႇ ၶဝ်ယူႇၼၼ်ႉပၼ်တီႈမႂ်းႁႂ်ႈမႂ်းပိူင်ႇ။ မိူင်းၼၼ်ႉၸိုင်ၵဝ်ပၼ်တီႈၵူၼ်းမဵဝ်း လေႃးတႃႉ ႁႂ်ႈၶဝ်ပိူင်ႇယဝ်ႉ၊ ဝႃႈၼင်ႇၼႆဢေႃႈ။-

20မိူင်းၼၼ်ႉၵေႃႈ ပိူၼ်ႈမၢတ်ႈပဵၼ်တီႈဢၼ်ၵူၼ်းဢၼ်ယႂ်ႇၼႃႇႁႅင်းၼႃႇၼၼ်ႉယူႇဢေႃႈ။ ၵူၼ်းဢၼ်ယႂ်ႇၼႃႇႁႅင်းၼႃႇၸိူဝ်းၼၼ်ႉ ယူႇၵႃႈၼႂ်းမိူင်းၼၼ်ႉမိူဝ်ႈၵွၼ်ႇဢွၼ်ၼႆႉၼၼ်ႉဢေႃႈ။ ၵူၼ်းမိူင်း ဢမ်ႇမုၼ်ႇ တင်းလၢႆႁွင်ႉၶဝ်ၼၼ်ႉ ၸမ်ႇၸုမ်ႇမိမ်း ဢေႃႈ။-

21ၵူၼ်းမဵဝ်းၼၼ်ႉပဵၼ်ၵူၼ်းဢၼ်ယႂ်ႇၼႃႇၼမ်ၼႃႇသုင်ၼႃႇမိူၼ်ၸိူဝ်ႉၼင်ႇၵူၼ်းမဵဝ်း ဢႃႇၼၵႃႉ ဢေႃႈ။ ၵူၺ်းၵႃႈ ထႃႇဝရႃႉၽြႃးယႃႉၶဝ်ၼၼ်ႉပႅတ်ႈသေၵႃႈတီႈၽၢႆႇၼႃႈၶဝ်လႄႈ၊ ၶဝ်ပုတ်ႈတီႈၶဝ်ၼၼ်ႉသေလႄႈ ယူႇၵႃႈၼႂ်းတီႈယူႇၶဝ်ၼၼ်ႉ၊-

22မိူၼ်ၸိူဝ်ႉၼင်ႇဢၼ်မၼ်းၸဝ်ႈယႃႉၵူၼ်း ႁေႃးရီႉ တင်းလၢႆပႅတ်ႈသေၵႃႈတီႈၽၢႆႇၼႃႈ ၵူၼ်းမဵဝ်း ဢေးသေႃး ဢၼ်ယူႇၵႃႈတီႈမိူင်း ၸီႉရႃႉ လႄႈ ၶဝ်ပုတ်ႈတီႈၶဝ်ၼၼ်ႉလႄႈ ယူႇၵႃႈၼႂ်းတီႈယူႇၶဝ်ၼၼ်ႉတေႃႇထိုင်ႁွတ်ႈဝၼ်းမိူဝ်ႈၼႆႉၼၼ်ႉဢေႃႈ။-

23မိူၼ်ၼင်ႇၼၼ် ၵူၼ်း ဢႃႇဝိမ်ႇ ဢၼ်ယၢမ်ႈယူႇၵႃႈၼႂ်းဝၢၼ်ႈတင်းလၢႆတေႃႇထိုင်ႁွတ်ႈဝဵင်း ၵႃႇၸႃႉ ၸိူဝ်းၼၼ်ႉၵေႃႈ၊ ၵူၼ်း ၵပ်ႉတေႃးရိမ်ႇ ဢၼ်ဢွၵ်ႇသေၵႃႈတီႈဝဵင်း ၵပ်ႉတေႃး ၸိူဝ်းၼၼ်ႉ ဢွၼ်ၵၼ်ယႃႉပႅတ်ႈလႄႈ ယူႇၵႃႈၼႂ်းတီႈယူႇၶဝ်ၼၼ်ႉဢေႃႈ။

24မၼ်းၸဝ်ႈမီးဢမိင်ႉလႄႈဝႃႈ၊ သူဢွၼ်ၵၼ်လုၵ်ႉလႄႈ ၵႂႃႇတၢင်းပႆတၢင်းသေလႄႈ ၶၢမ်ႈၼမ်ႉႁွင်ႈ ဢႃႇၼုၼ်ႇ ၵႂႃႇတႃႉ။ ၵဝ်ဢဝ် သီႉႁုၼ်ႇ ၵူၼ်း ဢႃႇမေႃးရီႉ ဢၼ်ပဵၼ်ၶုၼ်ႁေႃၶမ်း ႁေႇသၽုၼ်ႇ ဢိၵ်ႇတင်းလိၼ်မၼ်း ဢၢပ်ႈပၼ်ၵႃႈၼႂ်းမိုဝ်းမႂ်းဢေႃႈ။ ဢွၼ်ၵၼ်ၸႃႉသိမ်းဢဝ်လႄႈ တိုၵ်းသိုၵ်းၵၼ်တင်းမၼ်းၼၼ်ႉတႃႉ။-

25ဝၼ်းမိူဝ်ႈၼႆႉ ၵဝ်တၵ်းၸႃႉႁႂ်ႈတၢင်းဢၼ်တူၵ်းၸႂ်ၵွပ်ႈပိူဝ်ႈမႂ်း ဢိၵ်ႇတင်းတၢင်းဢၼ်ၵူဝ်ႁႄမႂ်းၼၼ်ႉ ႁွတ်ႈထိုင်ၵႃႈၼိူဝ်ၵူၼ်းမဵဝ်းတင်းလၢႆ ဢၼ်မီးတႂ်ႈၽႃႉၵၢင်ႁၢဝ်ၵူႈတီႈၵူႈလႅၼ် ဢၼ်တၵ်းငိၼ်းသတၢင်းသဵင်ၶၢဝ်ႇလွင်ႈမႂ်းလႄႈ ႁွတ်ႈထိုင်တၢင်းဢၼ်သၼ်ႇဝႆ ဢိၵ်ႇတင်းတၢင်းဢၼ်ယၢပ်ႇၸႂ်ၽိုတ်ႇၸႂ်ၼႃႇလူင်လၢင် ၵွပ်ႈပိူဝ်ႈမႂ်းၸိူဝ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။

26ၵဝ်ၵေႃႈပွႆႇၸႂ်ႉသၢၼ်ႇတမၢၼ်ႇတင်းလၢႆ ဢွၵ်ႇသေၵႃႈတီႈထိူၼ်ႇ ၵေႇတမုတ်ႉ ၵႂႃႇၵႃႈတီႈ သီႉႁုၼ်ႇ ၶုၼ်ႁေႃၶမ်း ႁေႇသၽုၼ်ႇ သေလႄႈ ဢဝ်တင်းၵႂၢမ်းမိၵ်ႉသႃႇႁႃယႃႉလၢတ်ႈလႄႈဝႃႈ၊-

27ႁႂ်ႈၵဝ်ၶႃႈလႆႈၽႃႇလတ်းၵႃႈၼႂ်းမိူင်းၶုၼ်လူင်ၵႂႃႇသေၵမ်းလူၺ်ႈ။ တၵ်းၸွမ်းသဵၼ်ႈတၢင်းၶုၼ်ၵူၺ်းၶႃႈဢေႃႈ။ ဢမ်ႇဝႄႈပိူင်ႈၵႂႃႇ ၵႃႈတီႈၽၢႆႇသၢႆႉၽၢႆႇၶႂႃၶႃႈ။-

28ၶုၼ်လူင်ၶၢႆတၢင်းၵိၼ်တၢင်းၶူပ်း ပုၼ်ႈဢၼ်ၵဝ်ၶႃႈတၵ်းၵိၼ်တၵ်းၶူပ်းၼၼ်ႉပၼ်လႄႈဢဝ်ငိုၼ်းသေၵမ်း။ ၶၢႆၼမ်ႉပုၼ်ႈဢၼ်ၵဝ်ၶႃႈတၵ်းၵိၼ်တၵ်းသူတ်ႉၼၼ်ႉပၼ်လႄႈ ဢဝ်ငိုၼ်းသေၵမ်း။-

29ၵွမ်ႉၵူၺ်း ႁႂ်ႈၵဝ်ၶႃႈလႆႈဢဝ်တိၼ်ယဵပ်ႇၵႂႃႇ ၵႃႈၼႂ်းမိူင်းၶုၼ်လူင်ၵူၺ်း မိူၼ်ၸိူဝ်ႉၼင်ႇဢၼ်ၵူၼ်းမဵဝ်း ဢေးသေႃး ဢၼ်ယူႇၵႃႈတီႈမိူင်း ၸီႉရႃႉ ဢိၵ်ႇတင်းၵူၼ်းမဵဝ်း မေႃႇၽႃႉ ဢၼ်ယူႇၵႃႈတီႈလိၼ် ဢႃႇရႃႉ ၸိူဝ်းၼၼ်ႉႁဵတ်းတီႈၵဝ်ၶႃႈၼၼ်ႉ တေႃႇထိုင်ႁွတ်ႈၵဝ်ၶႃႈၶၢမ်ႈၼမ်ႉႁွင်ႈ ယေႃးတၢၼ်ႇ ယဝ်ႉလႄႈ ႁွတ်ႈထိုင်ၵႃႈၼႂ်းမိူင်းဢၼ်ထႃႇဝရႃႉၽြႃး ၽြႃးပဵၼ်ၸဝ်ႈႁဝ်းၶႃႈပၼ်ၼၼ်ႉသေၵမ်း၊ ဝႃႈၼင်ႇၼႆသေၵေႃႈ၊-

30သီႉႁုၼ်ႇ ၶုၼ်ႁေႃၶမ်း ႁေႇသၽုၼ်ႇ ဢမ်ႇပၼ်ဢၶႂၢင်ႉဢၼ်ႁဝ်းလႆႈၽႃႇလတ်းၵႂႃႇၼၼ်ႉတီႈႁဝ်း။ လွင်ႈမၼ်းၸမ်ႉ ထႃႇဝရႃႉၽြႃး ၽြႃးပဵၼ်ၸဝ်ႈမႂ်းႁႂ်ႈၸႂ်သၽေႃးမၼ်းၵႅၼ်ႇၶႅင်လႄႈ ႁႂ်ႈႁူဝ်ၸႂ်မၼ်းႁၢဝ်ႈပျၢင်းႁႂ်ႈလႆႈဢဝ်မၼ်းဢၢပ်ႈပၼ်ၵႃႈၼႂ်းမိုဝ်းမႂ်း ၵႃႈၼင်ႇဢၼ်ပဵၼ်မႃးမီးဝႆႉယဝ်ႉဝၼ်းမိူဝ်ႈၼႆႉၼၼ်ႉဢေႃႈ။-

31ထႃႇဝရႃႉၽြႃးၵေႃႈမီးဢမိင်ႉတီႈၵဝ်လႄႈဝႃႈ၊ တူၺ်းလူး၊ ၵဝ်ၸႃႉဢဝ်ၶုၼ် သီႉႁုၼ်ႇ ဢိၵ်ႇတင်းလိၼ်မၼ်းဢၢပ်ႈပၼ်တီႈမႂ်းဢေႃႈ။ ၸႃႉသိမ်းဢဝ်ႁႂ်ႈလႆႈၶၢမ်ႇဢဝ်ဢမူၺ်ႇလိၼ်ၼၼ်ႉတႃႉ၊ ဝႃႈၼင်ႇၼႆဢေႃႈ။-

32မိူဝ်ႈၼၼ်ႉ ၶုၼ် သီႉႁုၼ်ႇ ဢိၵ်ႇတင်းၵူၼ်းမၼ်းတင်းသဵင်ႈတင်းလူင် ဢွၼ်ၵၼ်ဢွၵ်ႇမႃးႁႂ်ႈလႆႈႁပ်ႉတိုၵ်းႁဝ်း ၵႃႈတီႈဝဵင်း ယႃႇႁတ်ႉ ဢေႃႈ။-

33ထႃႇဝရႃႉၽြႃး ၽြႃးပဵၼ်ၸဝ်ႈႁဝ်းဢဝ်မၼ်းၼၼ်ႉ ဢၢပ်ႈပၼ်တီႈႁဝ်းလႄႈ ႁဝ်းတိုၵ်းတေႃးယႃႉပႅတ်ႈၸႃႉၸဵမ်မၼ်း ဢိၵ်ႇတင်းလုၵ်ႈၸၢႆးမၼ်းတင်းလၢႆလႄႈ ၵူၼ်းမၼ်းတင်းသဵင်ႈတင်းလူင်ဢေႃႈ။-

34မိူဝ်ႈၼၼ်ႉ ႁဝ်းတိုၵ်းဢဝ်ဝဵင်းမၼ်းၵႃႈမီးလႄႈ ယႃႉၽဵဝ်ႈၵူၼ်းၸၢႆး၊ ၵူၼ်းယိင်း၊ လုၵ်ႈဢွၼ်ႇတင်းသဵင်ႈတင်းလူင် ၵႃႈတီႈဝဵင်းတင်းလၢႆပႅတ်ႈမူတ်းမူတ်းသဵင်ႈသဵင်ႈ တေႃႇထိုင်ႁွတ်ႈထၼ်ႈပေႃးဢမ်ႇၵိုတ်းဢမ်ႇၵျၢၼ်ႇဝႆႉသေၵေႃႉသေၵူၼ်းဢေႃႈ။-

35ၵွမ်ႉၵႃႈတရိၵ်ႈသၢၼ်ႇ ဢိၵ်ႇတင်းဢုၵ်ႉၸႃႇဢၼ်ႁိမ်လႆႈ ၵႃႈတီႈဝၢၼ်ႈဝဵင်းဢၼ်ႁဝ်းတိုၵ်းဢဝ်ၼၼ်ႉၸိူဝ်းၼၼ်ႉၵူၺ်း ႁဝ်းသိမ်းဢဝ်ပုၼ်ႈတူဝ်ၸဝ်ႈၵဝ်ႇဢေႃႈ။-

36ၸႃႉၸဵမ်ဝဵင်း ဢႃႇရေႃႇ ဢၼ်မီးၵႃႈတီႈႁိမ်းပၢင်ႇႁူၺ်ႈ ဢႃႇၼုၼ်ႇ ဢိၵ်ႇတင်းၸႃႉၸဵမ်ဝဵင်း ဢႃႇရႃႉ ဢၼ်မီးၵႃႈၼႂ်းပၢင်ႇႁူၺ်ႈၼၼ်ႉၵႂႃႇလႄႈ တေႃႇထိုင်ႁွတ်ႈမိူင်း ၵီႉလတ်ႉ ၼၼ်ႉ၊ ဝဵင်းဢၼ်တၼ်းၶူဝ်းယႂ်ႇလႄႈ ႁဝ်းဢမ်ႇပႄႉဢမ်ႇၼႅင်ႇလႆႈၼၼ်ႉဢမ်ႇမီးသေဝဵင်း။ ထႃႇဝရႃႉၽြႃး ၽြႃးပဵၼ်ၸဝ်ႈႁဝ်းဢဝ်ၵႃႈမီးဢၢပ်ႈပၼ်တီႈႁဝ်းဢေႃႈ။-

37ၵူၺ်းၵႃႈ ၵႃႈတီႈလိၼ်ဢၼ်ၵူၼ်းမဵဝ်း ဢမ်ႇမုၼ်ႇ ယူႇဢၼ်ဝႃႈ လိၼ်ဢၼ်ၸွမ်းႁိမ်းၼမ်ႉႁွင်ႈ ယပ်ႉပုၵ်ႉ တင်းဝဵင်းဢၼ်မီးၵႃႈၼိူဝ်လွႆ ၼိူဝ်ၵုင်းတင်းလၢႆ ဢိၵ်ႇတင်းၵႃႈဢၼ်ထႃႇဝရႃႉၽြႃး ၽြႃးပဵၼ်ၸဝ်ႈႁဝ်းႁႄႉၶႅၼ်ႁဝ်းဝႆႉၼၼ်ႉၸိုင်၊ ႁဝ်းဢမ်ႇသုတ်ႉၸပ်းသုတ်ႉၸူးလႃးလႃး။

← Chapter 1 Jump to: Chapter 3 →