Deuteronomy 34

Shan

← Chapter 33 Jump to:

1လိုၼ်းၼၼ်ႉ မူဝ်းသေႇ လုၵ်ႉသေၵႃႈတီႈပၢင်ႇပဵင်း မေႃႇၽႃႉ ၵႂႃႇလႄႈ ၶိုၼ်ႈၵႃႈၼိူဝ်လွႆ ၼေႇပေႃႇ ၸူးၵႃႈၼိူဝ်ၸိၵ်း ပီႉသၵႃႇ ၊ သိုဝ်ႈဝဵင်း ယေႇရီႉၶူဝ်း ၼၼ်ႉသေယဝ်ႉ၊ ထႃႇဝရႃႉၽြႃး ၼႄပျႃးမိူင်း ၵီႉလတ်ႉ တင်းသဵင်ႈတင်းလူင်တေႃႇထိုင်ႁွတ်ႈဝဵင်း တၢၼ်ႇ ၊-

2မိူင်း ၼပ်ႉထလီႉ တင်းသဵင်ႈတင်းလူင်၊ မိူင်း ဢေႇၽရိမ်ႇ ၊ မိူင်း မၼႃႇသေႇ ဢိၵ်ႇတင်းမိူင်း ယူႉတႃႉ တင်းသဵင်ႈတင်းလူင်တေႃႇထိုင်ႁွတ်ႈပၢင်ႇလၢႆႇ တၢင်းဝၼ်းတူၵ်း၊-

3ပွတ်းတၢင်းၸၢၼ်းဢိၵ်ႇတင်းပၢင်ႇပဵင်းၵႄႈလွႆဝဵင်း ယေႇရီႉၶူဝ်း ဢၼ်ဝႃႈဝဵင်းတူၼ်ႈထၢၼ်ၼၼ်ႉ တေႃႇထိုင်ႁွတ်ႈဝဵင်း ၸေႃးရႃႉ ၼၼ်ႉ တီႈမၼ်းဢေႃႈ။-

4ထႃႇဝရႃႉၽြႃးၵေႃႈ မီးဢမိင်ႉတီႈမၼ်းလႄႈဝႃႈ၊ မိူင်းၼႆႉပဵၼ်မိူင်းဢၼ်ၵဝ်တိူင်ႇဝႃႈဝႆႉတီႈ ဢႃႇပြႃႇႁၢမ်ႇ၊ ဢီႉၸၢၵ်ႈ တင်း ယႃႇၵုပ်ႈ လႄႈဝႃႈ၊ ၵဝ်တၵ်းပၼ်တီႈၸိူဝ်ႉၶိူဝ်းမႂ်းဢေႃႈ၊ ဝႃႈၼင်ႇၼႆဝႆႉၼၼ်ႉဢေႃႈ။ ၵဝ်ပၼ်ဢၶႂၢင်ႉဢၼ်မႂ်းလႆႈဢဝ်မၢၵ်ႇတႃမႂ်းႁၼ်ဢေႃႈ။ ၵူၺ်းၵႃႈ မႂ်းဢမ်ႇလႆႈၶၢမ်ႈၵႂႃႇၵႃႈတီႈၼၼ်ႈ၊ ဝႃႈၼင်ႇၼႆဢေႃႈ။

5ၼင်ႇၼၼ်လႄႈ မူဝ်းသေႇ ၶႃႈထႃႇဝရႃႉၽြႃးၼၼ်ႉ ႁွတ်ႈဢၼိၵ်ႈၸႃႉ ၵႃႈတီႈၼၼ်ႈၵႃႈၼႂ်းမိူင်း မေႃႇၽႃႉ ၼၼ်ႉၸွမ်းၵႃႈၼင်ႇဢၼ် ထႃႇဝရႃႉၽြႃးမီးဢမိင်ႉဝႆႉၼၼ်ႉလႄႈ၊-

6မၼ်းၸဝ်ႈဢဝ်မၼ်းသၢင်းၵျူဝ်ႇၵႃႈတီႈၵႄႈႁူၺ်ႈၵႄႈလွႆသေတီႈတီႈၵႃႈၼႂ်းမိူင်း မေႃႇၽႃႉ သိုဝ်ႈဝဵင်း ပႅတ်ႉပေႇၵူႉရႃႉ ၼၼ်ႉဢေႃႈ။ ၽူႈလႂ်သေၵေႃႉသေၵူၼ်း ဢမ်ႇႁူႉပႃႇႁဵဝ်ႈသၢင်းၶႅင်းမၼ်းၼၼ်ႉႁၢၼ်ႉတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။-

7မိူဝ်ႈဢၼ် မူဝ်းသေႇ ႁွတ်ႈဢၼိၵ်ႈၸႃႉၼၼ်ႉၸိုင်၊ ဢသၢၵ်ႈမၼ်းလႆႈပၢၵ်ႇပၢႆသၢဝ်းပီႊဢေႃႈ။ တႃမၼ်းဢမ်ႇပႆႇမူဝ်း၊ ႁႅင်းမၼ်းၵေႃႈ ဢမ်ႇပႆႇဢူၼ်ႈပႆႇယွမ်း။-

8ၵူၼ်းမဵဝ်း ဢီႉသရေႇလႃႉ တင်းလၢႆၼၼ်ႉ ဢွၼ်ၵၼ်ႁဵတ်းတၢင်းဢၼ်ထိုင်ၸႂ်ႁႆႈႁွင်ႉပုၼ်ႈ မူဝ်းသေႇ သၢမ်သိပ်းဝၼ်းတဵမ်တဵမ် ၵႃႈၼႂ်းပၢင်ႇပဵင်းမိူင်း မေႃႇၽႃႉ ၼၼ်ႉဢေႃႈ။ ၼင်ႇၼၼ်လႄႈ ၶိင်ႇမိုဝ်ႉဝၼ်းဢၼ်ထိုင်ၸႂ်ႁႆႈႁွင်ႉလႄႈ ၶၢင်းၶီၶၢင်းၽၢၼ်ပုၼ်ႈ မူဝ်းသေႇ ၼၼ်ႉယဝ်ႉ တူဝ်ႈဢေႃႈ။-

9ယေႃးသူႉ လုၵ်ႈၸၢႆး ၼုၼ်ႇ ၼၼ်ႉပဵၼ်ၵေႃႉဢၼ်ပျေႉၸုမ်ႇဝႆႉတင်းၸႂ်ၺၢၼ်ႇပိင်ႇၺႃႇ ၵွပ်ႈပိူဝ်ႈဢၼ် မူဝ်းသေႇ ဢဝ်မိုဝ်းတၢင်ႇၵႃႈၼိူဝ်မၼ်းယဝ်ႉၼၼ်ႉလႄႈ ၵူၼ်းမဵဝ်း ဢီႉသရေႇလႃႉ တင်းလၢႆဢွၼ်ၵၼ်ထွမ်ႇဢဝ်ၵႂၢမ်းမၼ်းသေလႄႈ ႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး သင်ႇလၢတ်ႈဝႆႉတီႈ မူဝ်းသေႇ ၼၼ်ႉဢေႃႈ။-

10လိုၼ်းၼၼ်ႉ ပရေႃးၽႅတ်ႈဢၼ်မိူၼ်ၸိူဝ်ႉၼင်ႇ မူဝ်းသေႇ ဢၼ်ထႃႇဝရႃႉၽြႃး လႆႈမိုတ်ႈၵိုဝ်းၼႃႈတေႃႇၼႃႈၵၼ်တင်းမၼ်း၊-

11ၼႂ်းၼီႉမိၵ်ႈလၢၵ်ႈၶၼႃႇ ဢိၵ်ႇတင်းလွင်ႈတၢင်းဢၼ်လီဢၢမ်း ၵႃႈဢၼ်ထႃႇဝရႃႉၽြႃးပွႆႇၸႂ်ႉမၼ်းၵႂႃႇႁဵတ်းၵႃႈၼႂ်းမိူင်း ဢေႇၵိပ်ႉတူႉ ၵႃႈတီႈၸႃႉၸဵမ် ၶုၼ် ၽႃႇရေႃး တင်းၶႃႈမၼ်းၵူၼ်းမၼ်းတင်းသဵင်ႈတင်းလူင်လႄႈ မိူင်းမၼ်းတင်းသဵင်ႈတင်းမူတ်း၊-

12ဢိၵ်ႇတင်းၼႂ်းလွင်ႈတၢင်းဢၼ်မၼ်းၸဝ်ႈဢဝ်မိုဝ်းၸဝ်ႈဢၼ်ႁႅင်းယႂ်ႇၼႃႇ ႁဵတ်းတင်းလွင်ႈတၢင်းဢၼ်လီၵူဝ်လီႁႄ ဢၼ် မူဝ်းသေႇ ၼႄပျႃးသိုဝ်ႈၼႃႈတႂ်ႈတႃ ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ၸိူဝ်းၼၼ်ႉၼၼ်ႉ ဢမ်ႇပေႃႇဢမ်ႇမႃးၵႃႈၼႂ်းမဵဝ်း ဢီႉသရေႇလႃႉ သေၸဝ်ႈသေပႃး။ ၵျၢမ်းဢၼ်ႁေႃးတြႃးယဝ်ႉယဝ်ႉဢေႃႈ။

← Chapter 33 Jump to: