Deuteronomy 9

Shan

← Chapter 8 Jump to: Chapter 10 →

1မဵဝ်း ဢီႉသရေႇလႃႉ ဢိူၺ်း၊ ထွမ်ႇငိၼ်းတႃႉ။ ဝၼ်းမိူဝ်ႈၼႆႉ မႂ်းၸမ်ႉတၵ်းၶၢမ်ႈၼမ်ႉႁွင်ႈ ယေႃးတၢၼ်ႇ ၵႂႃႇ ႁႂ်ႈလႆႈၶဝ်ႈလႄႈတိုၵ်းဢဝ်ၵူၼ်းမဵဝ်းဢၼ်ႁႅင်းယႂ်ႇၼႃႇလႄႈၼမ်ၼႃႇသေမႂ်း၊ ဝဵင်းလူင်ဢၼ်ပျေႉၸုမ်ႇတင်းလမ်းဝဵင်း ဢၼ်ၶိုတ်းထိုင်ၽႃႉၵၢင်ႁၢဝ်၊-

2ၵူၼ်းမဵဝ်းဢၼ်ယႂ်ႇၼႃႇသုင်ၼႃႇဢၼ်ဝႃႈ ၵူၼ်းမဵဝ်း ဢႃႇၼၵႃႉ ဢၼ်မႂ်းႁူႉလႄႈငိၼ်းၵႂၢမ်းဢၼ်ဝႃႈ ၽူႈလႂ်တၵ်းၸုၵ်းၶၢမ်ႇယူႇ ၵႃႈတီႈၽၢႆႇၼႃႈၵူၼ်းမဵဝ်း ဢႃႇၼၵႃႉ လႆႈ၊ ဝႃႈၼင်ႇၼႆၼၼ်ႉၸိူဝ်းၼၼ်ႉယဝ်ႉ။-

3ပိူဝ်ႈၼႆလႄႈ ဝၼ်းမိူဝ်ႈၼႆႉ တူၵ်းၵၢင်ၸႂ်လွင်ႈဢၼ်ထႃႇဝရႃႉၽြႃး ၽြႃးပဵၼ်ၸဝ်ႈမႂ်း ပဵၼ်ၸဝ်ႈဢၼ်တၵ်းဢွၼ်ႁူဝ်မႂ်းၵႂႃႇမိူၼ်ၸိူဝ်ႉၼင်ႇၽႆးဢၼ်မႆႈယူႇၼၼ်ႉလႄႈ တၵ်းယႃႉၽဵဝ်ႈၶဝ်ပႅတ်ႈလႄႈ ၶျႃးတူၵ်းတီႈတႅမ်ႇသိုဝ်ႈၼႃႈတႂ်ႈတႃမႂ်းၼၼ်ႉတႃႉ။ မႂ်းတၵ်းလႆႈႁေႃႈၶဝ်ဢွၵ်ႇပႅတ်ႈသေလႄႈ ယႃႉၽဵဝ်ႈၶဝ်ပႅတ်ႈၶၼ်ၶၼ်ၽႂ်းၽႂ်း ၸွမ်းၵႃႈၼင်ႇဢၼ်ထႃႇဝရႃႉၽြႃး မီးဢမိင်ႉဝႆႉတီႈမႂ်းၼၼ်ႉဢေႃႈ။-

4လိုၼ်းသေထႃႇဝရႃႉၽြႃး ၽြႃးပဵၼ်ၸဝ်ႈမႂ်းႁေႃႈၶဝ်ဢွၵ်ႇပႅတ်ႈသေၵႃႈတီႈၽၢႆႇၼႃႈမႂ်းၼၼ်ႉ၊ မႂ်းဢမ်ႇလႆႈလၢတ်ႈၵႃႈၼႂ်းၸႂ်လႄႈဝႃႈ၊ ၵွပ်ႈပိူဝ်ႈတၢင်းသိုဝ်ႈတေႃႇၵဝ်လႄႈ ထႃႇဝရႃႉၽြႃးဢဝ်ၵဝ်ၶဝ်ႈသႂၢင်းလႄႈ ပၼ်ၵဝ်ပိူင်ႇမိူင်းၼႆႉဢေႃႈ။ ၵွပ်ႈပိူဝ်ႈလွင်ႈတၢင်းဢၼ်ႁၢႆႉဢၼ်ႁုၵ်းၵူၼ်းမဵဝ်းၸိူဝ်းၼၼ်ႉလႄႈ ထႃႇဝရႃႉၽြႃးႁေႃႈၶဝ်ဢွၵ်ႇပႅတ်ႈသေၵႃႈတီႈၽၢႆႇၼႃႈၵဝ်ယဝ်ႉ၊ ဝႃႈၼင်ႇၼႆၼၼ်ႉလႃးလႃး။-

5ၵွပ်ႈပိူဝ်ႈတၢင်းသိုဝ်ႈတေႃႇဢၼ်မႂ်းႁဵတ်း၊ ဢမ်ႇၼၼ် ၵွပ်ႈပိူဝ်ႈၸႂ်သၽေႃးဢၼ်မႂ်းသိုဝ်ႈယူဝ်းၼၼ်ႉလႄႈ၊ တၵ်းလႆႈၵႂႃႇလႄႈၶဝ်ႈၸၢမ်ႇၸႃးမိူင်းၼၼ်ႉဢမ်ႇၸႂ်ႈ။ ၵွပ်ႈပိူဝ်ႈလွင်ႈတၢင်းဢၼ်ႁၢႆႉဢၼ်ႁုၵ်းၵူၼ်းမဵဝ်းၸိူဝ်းၼၼ်ႉလႄႈ ထႃႇဝရႃႉၽြႃး ၽြႃးပဵၼ်ၸဝ်ႈမႂ်းၼၼ်ႉ ႁေႃႈၶဝ်ဢွၵ်ႇပႅတ်ႈသေၵႃႈတီႈၽၢႆႇၼႃႈမႂ်း ႁႂ်ႈလႆႈႁႂ်ႈၵႂၢမ်းဢၼ် ထႃႇဝရႃႉၽြႃးတိူင်ႇဝႃႈဝႆႉတီႈပူႇမွၼ်ႇမႂ်း ဢႃႇပြႃႇႁၢမ်ႇ၊ ဢီႉၸၢၵ်ႈ၊ ယႃႇၵုပ်ႈ ၸိူဝ်းၼၼ်ႉၼၼ်ႉတႄႇပဵၼ်ဢေႃႈ။-

6ပိူဝ်ႈၼႆလႄႈ တူၵ်းၵၢင်ၸႂ်လွင်ႈဢၼ်ထႃႇဝရႃႉၽြႃး ၽြႃးပဵၼ်ၸဝ်ႈမႂ်း ဢဝ်မိူင်းဢၼ်လီဢၼ်ငၢမ်းၼၼ်ႉ ပၼ်တီႈမႂ်းႁႂ်ႈမႂ်းပိူင်ႇ ၵွပ်ႈပိူဝ်ႈတၢင်းသိုဝ်ႈတေႃႇမႂ်းဢမ်ႇၸႂ်ႈၼၼ်ႉတႃႉ။ လွင်ႈမၼ်းၸမ်ႉ မႂ်းပဵၼ်ၵူၼ်းမဵဝ်းဢၼ်လမ်းၶေႃးၵႅၼ်ႇၶႅင်ဢေႃႈ။-

7ၶုၵ်းၸႂ်လႆႈၶႆႈၸႂ်ထူပ်းတႃႉ။ ယႃႇပေလူင်ပေလိုမ်းလွင်ႈဢၼ်မႂ်း ႁဵတ်းႁႂ်ႈတၢင်းၸႂ်မႆႈၶႆႈၸႃႉ ထႃႇဝရႃႉၽြႃး ၽြႃးပဵၼ်ၸဝ်ႈမႂ်းလႆႈဢွၵ်ႇၵႃႈၼႂ်းထိူၼ်ႇမႅၼ်ႈၼၼ်ႉ။ ၸႃႉၸဵမ်ဝၼ်းဢၼ်မႂ်းဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ လႄႈ မႃးတေႃႇထိုင်ႁွတ်ႈၵႃႈတီႈၼႆႈလႄႈ မႂ်းပုင်ႇၵၢၼ်ႇထႃႇဝရႃႉၽြႃးယဝ်ႉ။-

8ၵႃႈတီႈ ႁေႃးရပ်ႉ ၼၼ်ႉၵေႃႈ မႂ်းႁႂ်ႈတၢင်းၸႂ်မႆႈၶႆႈၸႃႉထႃႇဝရႃႉၽြႃးဢွၵ်ႇလႄႈ မၼ်းၸဝ်ႈၸႂ်မႆႈၶႆႈၸႃႉ ႁႂ်ႈထၼ်ႈပေႃးငႃတၵ်းယႃႉၽဵဝ်ႈမႂ်းပႅတ်ႈဢေႃႈ။-

9မိူဝ်ႈဢၼ်ၵဝ်ၶိုၼ်ႈၵႃႈၼိူဝ်လွႆ ႁႂ်ႈလႆႈၶၢမ်ႇဢဝ်ၶႅပ်းမၢၵ်ႇႁိၼ်ၽႅပ်ႉဢၼ်ဝႃႈ ၶႅပ်းမၢၵ်ႇႁိၼ်ဢၼ်တႅမ်ႈသႂ်ႇပတီႉၺိၺ်ႇတြႃး ဢၼ်ထႃႇဝရႃႉၽြႃးႁဵတ်းလူၺ်ႈၵၼ်တင်းသူၼၼ်ႉၸိုင်၊ သီႇသိပ်းဝၼ်းသီႇသိပ်းၶိုၼ်းတဵမ်တဵမ် ၵဝ်ယင်းဢမ်ႇၵိၼ်ၶဝ်ႈမုၼ်း၊ ယင်းဢမ်ႇၵိၼ်ၼမ်ႉလႄႈ ယူႇၵႃႈၼိူဝ်လွႆၼၼ်ႉဢေႃႈ။-

10ထႃႇဝရႃႉၽြႃးဢဝ်ၶႅပ်းမၢၵ်ႇႁိၼ်သွင်ၽႅၼ်ႇ ဢၼ်ၽြႃးပဵၼ်ၸဝ်ႈဢဝ်တင်းၼိဝ်ႉမိုဝ်းတႅမ်ႈသႂ်ႇၼၼ်ႉ ဢၢပ်ႈပၼ်တီႈၵဝ်ဢေႃႈ။ ၵႃႈၼိူဝ်သွင်ၽႅၼ်ႇၼၼ်ႉ လႆႈတႅမ်ႈၸွမ်းၵႃႈၼင်ႇၵႂၢမ်းၵႃႈဢၼ် ထႃႇဝရႃႉၽြႃးဝႃႈဢွၵ်ႇသူပ်းသေၵႃႈၼႂ်းၽႆးၵႃႈၼိူဝ်လွႆၼၼ်ႉသႂ်ႇၼၼ်ႉ ၼႂ်းဝၼ်းဢၼ်သူၸူႉၵၼ်တုမ်ၵၼ်ယူႇၼၼ်ႉဢေႃႈ။-

11မိူဝ်ႈဢၼ်ၸေးသီႇသိပ်းဝၼ်းသီႇသိပ်းၶိုၼ်းယဝ်ႉၼၼ်ႉၸိုင်၊ ထႃႇဝရႃႉၽြႃးဢဝ်ၶႅပ်းမၢၵ်ႇႁိၼ်သွင်ၽႅၼ်ႇဢၼ်ဝႃႈ ၶႅပ်းမၢၵ်ႇႁိၼ်ပတီႉၺိၺ်ႇၸိူဝ်းၼၼ်ႉ ဢၢပ်ႈပၼ်တီႈၵဝ်သေယဝ်ႉ၊-

12ထႃႇဝရႃႉၽြႃးမီးဢမိင်ႉတီႈၵဝ်လႄႈဝႃႈ၊ မႂ်းလုၵ်ႉလႄႈလူင်းၵႂႃႇသေၵႃႈတီႈၼႆႈၶၼ်ၶၼ်ၽႂ်းၽႂ်းတႃႉ။ ၵူၼ်းဢၼ်မႂ်းၼုၵ်ႈဢဝ်ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃးၸိူဝ်းၼၼ်ႉ ဢွၼ်ၵၼ်ၽွၵ်ႈပျၢၼ်ႇၶိုၼ်းၵႂႃႇယဝ်ႉ။ ၶဝ်ပိူင်ႈသေၵႃႈၼႂ်းသဵၼ်ႈတၢင်းဢၼ်ၵဝ်သင်ႇလၢတ်ႈဝႆႉၼၼ်ႉၵႂႃႇၶၼ်ၶၼ်ၽႂ်းၽႂ်းလႄႈ လေႃႇႁဵတ်းရုၵ်ႈထူႉယဝ်ႉ၊ ဝႃႈၼင်ႇၼႆဢေႃႈ။-

13ထႃႇဝရႃႉၽြႃးသမ်ႉလၢတ်ႈတီႈၵဝ်လႄႈဝႃႈ၊ ၵဝ်တူၺ်းလႄႈ လႆႈႁၼ်ၵူၼ်းမဵဝ်းၼႆႉယဝ်ႉ။ တူၺ်းလူး၊ ပဵၼ်မဵဝ်းဢၼ်လမ်းၶေႃးၵႅၼ်ႇၶႅင်ဢေႃႈ။-

14ပိူဝ်ႈၼႆလႄႈ ယႃႇၵဝ်တႃႉ။ ၵဝ်တၵ်းယႃႉၽဵဝ်ႈၶဝ်ပႅတ်ႈလႄႈ ထူမွတ်ႇၼႃႇမႃႉၸိုဝ်ႈသဵင်ၶဝ်ပႅတ်ႈသေ ၵႃႈတႂ်ႈၽႃႉၵၢင်ႁၢဝ်ဢေႃႈ။ မႂ်းၸမ်ႉ၊ ၵဝ်တၵ်းႁႂ်ႈပဵၼ်မဵဝ်းဢၼ်ႁႅင်းယႂ်ႇၼႃႇလႄႈ ၼမ်ၵိုၼ်းၼႃႇသေၶဝ်ၼၼ်ႉဢေႃႈ၊ ဝႃႈၼင်ႇၼႆဢေႃႈ။-

15မိူဝ်ႈၼၼ်ႉ ၵဝ်ဝၢႆႇၶိုၼ်းလႄႈလူင်းသေၵႃႈၼိူဝ်လွႆမႃးလႄႈ လွႆၼၼ်ႉမႆႈၽႆးယူႇဢေႃႈ။-

16ၶႅပ်းမၢၵ်ႇႁိၼ်ပတီႉၺိၺ်ႇ သွင်ၽႅၼ်ႇၼၼ်ႉၵေႃႈ မီးယူႇၵႃႈၼႂ်းမိုဝ်းၵဝ်သွင်ၽၢႆႇဢေႃႈ။ ၵဝ်တူၺ်းလႄႈလႆႈႁၼ်လွင်ႈဢၼ်သူၽိတ်းပိူင်ႈထႃႇဝရႃႉၽြႃး ၽြႃးပဵၼ်ၸဝ်ႈသူလႄႈ သွၼ်းလေႃႇႁၢင်ႈရုၵ်ႈထူႉဝူဝ်းဢွၼ်ႇ ဢိၵ်ႇတင်းလွင်ႈဢၼ်သူပိူင်ႈသဵၼ်ႈတၢင်းဢၼ် ထႃႇဝရႃႉၽြႃးသင်ႇလၢတ်ႈဝႆႉတီႈသူၼၼ်ႉၵႂႃႇ ၶၼ်ၶၼ်ၽႂ်းၽႂ်းၼၼ်ႉသေယဝ်ႉ၊-

17ၵမ်ၶႅပ်းမၢၵ်ႇႁိၼ်သွင်ၽႅၼ်ႇၼၼ်ႉ ဝတ်ႉပႅတ်ႈသေၵႃႈၼႂ်းမိုဝ်းၵဝ်သွင်ၶွၼ်လႄႈ ႁၵ်းႁဵၵ်းပႅတ်ႈသေၵႃႈတီႈသိုဝ်ႈၼႃႈတႂ်ႈတႃသူဢေႃႈ။-

18ၵဝ်လႆႈၶုပ်ႉမူပ်ႇယူႇၵႃႈတီႈၽၢႆႇၼႃႈထႃႇဝရႃႉၽြႃး သီႇသိပ်းဝၼ်းသီႇသိပ်းၶိုၼ်းမိူၼ်ၸိူဝ်ႉၼင်ႇၵမ်းဢွၼ်တၢင်းၼၼ်ႉ၊ ယင်းဢမ်ႇၵိၼ်ၶဝ်ႈမုၼ်း၊ ယင်းဢမ်ႇၵိၼ်ၼမ်ႉလႄႈယူႇ ၵွပ်ႈပိူဝ်ႈဢပႅတ်ႈၵႃႈဢၼ်သူၽိတ်းပိူင်ႈၼႂ်းလွင်ႈတၢင်းဢၼ်သူႁဵတ်းတူႉၸရိူၵ်ႈ ၵႃႈတီႈၽၢႆႇၼႃႈထႃႇဝရႃႉၽြႃးမႅၼ်ႈႁႂ်ႈတၢင်းၸႂ်မႆႈၶႆႈၸႃႉမၼ်းၸဝ်ႈလႆႈဢွၵ်ႇၼၼ်ႉဢေႃႈ။-

19လွင်ႈမၼ်းၸမ်ႉ ၵဝ်ၵူဝ်ႁႄတၢင်းၸႂ်မႆႈၶႆႈၸႃႉဢိၵ်ႇတင်းတၢင်းဢၼ်ဢမ်ႇထုၵ်ႇၸႂ်ၵျိူၵ်ႈၸႂ်ဢၼ်မႆႈႁႅင်းၼႃႇ ဢၼ်ထႃႇဝရႃႉၽြႃး ဢွၵ်ႇႁႅင်းယႂ်ႇၼႃႇလူင်လၢင်တီႈသူ ႁႂ်ႈလႆႈယႃႉၽဵဝ်ႈသူပႅတ်ႈၼၼ်ႉဢေႃႈ။ ၵူၺ်းၵႃႈ ထႃႇဝရႃႉၽြႃး သမ်ႉထွမ်ႇဢဝ်ၵႂၢမ်းၵဝ်ပွၵ်ႈၼၼ်ႉထႅင်ႈဢေႃႈ။-

20ၵွပ်ႈပိူဝ်ႈဢၼ်ထႃႇဝရႃႉၽြႃး ၸႂ်မႆႈၶႆႈၸႃႉတီႈ ဢႃႇရုၼ်ႇ ႁႅင်းယႂ်ႇၼႃႇလူင်လၢင် ႁႂ်ႈလႆႈယႃႉၽဵဝ်ႈမၼ်းပႅတ်ႈၼၼ်ႉလႄႈ၊ ပုၼ်ႈ ဢႃႇရုၼ်ႇ ၵေႃႈ ၵဝ်သူးတွင်းၶိင်ႇမိူဝ်ႈလဵဝ်ၵၼ်တင်းၼၼ်ႉဢေႃႈ။-

21ၵဝ်ဢဝ်တူႉၸရိူၵ်ႈသူဢၼ်ဝႃႈ ဝူဝ်းဢွၼ်ႇဢၼ်သူႁဵတ်းၼၼ်ႉၽဝ်ၽႆးလႄႈ ထုပ်ႉတမ်ၶိုတ်ႈလႅဝ် ႁႂ်ႈပဵၼ်မုၼ်ႈပဵၼ်ၽွင်သေယဝ်ႉ၊ ဢဝ်မုၼ်ႈဢဝ်ၽွင်မၼ်းၶျႃးတူၵ်းပႅတ်ႈၵႃႈၼႂ်းၼမ်ႉႁွင်ႈ ဢၼ်ဢွၵ်ႇၵႃႈၼႂ်းလွႆလူင်းမႃးၼၼ်ႉဢေႃႈ။-

22ၵႃႈတီႈ တပေႇရႃႉ ဢိၵ်ႇတင်းၵႃႈတီႈ မတ်ႉသႃႇ တင်းၵႃႈတီႈ ၵီႉပြုတ်ႉႁတ်ႉတဝႃႇ ၵေႃႈ သူဢွၼ်ၵၼ်ႁဵတ်းႁႂ်ႈတၢင်းၸႂ်မႆႈၶႆႈၸႃႉထႃႇဝရႃႉၽြႃးဢွၵ်ႇဢေႃႈ။-

23မိူဝ်ႈဢၼ်ထႃႇဝရႃႉၽြႃး ပွႆႇၸႂ်ႉသူဢွၵ်ႇသေၵႃႈတီႈ ၵႃႇတေႇသပႃႇၼႃႇ ၼၼ်ႉ ၵႂႃႇလႄႈလၢတ်ႈဝႃႈ၊ ၶိုၼ်ႈၵႂႃႇလႄႈသိမ်းဢဝ်မိူင်းဢၼ် ၵဝ်ပၼ်တီႈသူၼၼ်ႉတႃႉ၊ ဝႃႈၼင်ႇၼႆၼၼ်ႉၸိုင်၊ သူဢွၼ်ၵၼ်တွပ်ႇထဵင်ဢမိင်ႉထႃႇဝရႃႉၽြႃး ၽြႃးပဵၼ်ၸဝ်ႈသူပႅတ်ႈဢေႃႈ။ သူယင်းဢမ်ႇယုမ်ႇမၼ်းၸဝ်ႈ၊ ယင်းဢမ်ႇထွမ်ႇဢဝ်ၵႂၢမ်းမၼ်းၸဝ်ႈလႄႈယူႇဢေႃႈ။-

24သူပုင်ႇၵၢၼ်ႇထႃႇဝရႃႉၽြႃး ၸႃႉၸဵမ်မိုဝ်ႉဝၼ်းဢၼ်ၵဝ်ႁူႉၸၵ်းသူၼၼ်ႉမႃးယဝ်ႉ။-

25ၼင်ႇၼၼ်လႄႈ ၵဝ်လႆႈၶုပ်ႉမူပ်ႇသီႇသိပ်းဝၼ်းသီႇသိပ်းၶိုၼ်း ဢၼ်ၵဝ်လႆႈၶုပ်ႉမူပ်ႇၵွပ်ႈပိူဝ်ႈဢၼ် ထႃႇဝရႃႉၽြႃးမီးဢမိင်ႉလႄႈဝႃႈ၊ တၵ်းယႃႉၽဵဝ်ႈသူပႅတ်ႈဢေႃႈ၊ ဝႃႈၼင်ႇၼႆၼၼ်ႉဢေႃႈ။-

26ၵဝ်သူးတွင်းတီႈထႃႇဝရႃႉၽြႃးလႄႈလဝ်ႊဝႃႈ၊ ဢူဝ်းၸဝ်ႈၽြႃးပဵၼ်ၸဝ်ႈ၊ ၶႅၼ်းတေႃႈယႃႇပေယႃႉၽဵဝ်ႈၵူၼ်းမဵဝ်းၸဝ်ႈႁဝ်း ဢၼ်ပဵၼ်ဢမူၺ်ႇဢုၵ်ႉၸႃႇၸဝ်ႈႁဝ်း ဢၼ်ၸဝ်ႈႁဝ်းဢဝ်တင်းတၼ်းၶူဝ်းၸဝ်ႈႁဝ်းထုတ်ႇဢဝ်လႄႈဢဝ်တင်းမိုဝ်းၸဝ်ႈႁဝ်း ဢၼ်ႁႅင်းယႂ်ႇၼႃႇၼုၵ်ႈဢဝ်ဢွၵ်ႇသေ ၵႃႈၼႂ်းမိူင်း ဢေႇၵိပ်ႉတူႉ မႃးၸိူဝ်းၼႆႉပႅတ်ႈသေၵမ်းတီႈၶႃႈ၊-

27ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းၶႃႈၸဝ်ႈႁဝ်း၊ ဢႃႇပြႃႇႁၢမ်ႇ၊ ဢီႉၸၢၵ်ႈ တင်း ယႃႇၵုပ်ႈ ၸိူဝ်းၼၼ်ႉသေၵမ်းတီႈၶႃႈ၊ ၶႅၼ်းတေႃႈယႃႇပေတူၺ်းမၢတ်ႈတၢင်းဢၼ် ၵူၼ်းမဵဝ်းၼႆႉ မီးၸႂ်သၽေႃးဢၼ်ၵႅၼ်ႇဢၼ်ၶႅင်၊ တၢင်းဢၼ်ၶဝ်ၽိတ်းပိူင်ႈမႅၼ်ႈဢပႅတ်ႈတူႉၸရိူၵ်ႈၶဝ်ၸိူဝ်းၼၼ်ႉသေၵမ်းတီႈၶႃႈ။-

28ၵူဝ်မိူင်းတီႈဢၼ်ၸဝ်ႈႁဝ်းၼုၵ်ႈဢဝ်ၶႃႈၸဝ်ႈႁဝ်းၸိူဝ်းၼႆႉ ဢွၵ်ႇမႃးၼၼ်ႉတၵ်းလၢတ်ႈလႄႈဝႃႈ၊ ၵွပ်ႈပိူဝ်ႈဢၼ်ထႃႇဝရႃႉၽြႃး ဢမ်ႇတၢတ်ႈၼိူင်ႇလႆႈ ႁႂ်ႈလႆႈဢဝ်ၶဝ်သႂၢင်းၶဝ်ႈၵႃႈၼႂ်းမိူင်းဢၼ်မၼ်းၸဝ်ႈမီးၵတီႉဝႆႉတီႈၶဝ်ၼၼ်ႉ ဢိၵ်ႇတင်းၵွပ်ႈပိူဝ်ႈဢၼ်မၼ်းၸဝ်ႈၸင်းၶဝ်လႄႈ၊ မၼ်းၸဝ်ႈဢဝ်ၶဝ်ဢွၵ်ႇၵႂႃႇႁႂ်ႈလႆႈဢဝ်ၶဝ်တၢႆၵႃႈတီႈၼႂ်းထိူၼ်ႇယဝ်ႉ၊ ဝႃႈၼင်ႇၼႆတီႈၶႃႈလူင်ပႄႇ။-

29ၶဝ်ၸိူဝ်းၼႆႉၸမ်ႉ၊ ပဵၼ်ၵူၼ်းၸဝ်ႈႁဝ်း၊ ဢမူၺ်ႇဢုၵ်ႉၸႃႇၸဝ်ႈႁဝ်း ဢၼ်ၸဝ်ႈႁဝ်းဢဝ်တင်းမႁႃႇတၼ်းၶူဝ်းၸဝ်ႈ ဢိၵ်ႇတင်းတၢင်းဢၼ်ယဵတ်ႇၶႅၼ်ၸဝ်ႈသေလႄႈ ၼုၵ်ႈဢဝ်ဢွၵ်ႇမႃးတီႈၶႃႈဢေႃႈ၊ ဝႃႈၼင်ႇၼႆဢေႃႈ။

← Chapter 8 Jump to: Chapter 10 →