Deuteronomy 30

Shan

← Chapter 29 Jump to: Chapter 31 →

1မိူဝ်ႈဢၼ်လွင်ႈတၢင်းၸိူဝ်းၼႆႉၵႃႈမီးဢၼ်ဝႃႈ တၢင်းလီမင်ႇၵလႃႇ ဢိၵ်ႇတင်းဢႃႉမင်ႇၵလႃႇ တၢင်းဢၼ်ၵိၼ်ႇဢၼ်ဝႃႈ ဢၼ်ၵဝ်ဝႆႉၵႃႈတီႈၽၢႆႇၼႃႈမႂ်းမႃးယဝ်ႉၸိူဝ်းၼၼ်ႉ ႁွတ်ႈထိုင်ၵႃႈၼိူဝ်မႂ်းလႄႈ မႂ်းယူႇၵႃႈၼႂ်းမဵဝ်းၵူၼ်းၵူႈၸိူဝ်ႉၵူႈမဵဝ်းတီႈဢၼ်ထႃႇဝရႃႉၽြႃး ၽြႃးပဵၼ်ၸဝ်ႈမႂ်း ဢဝ်မႂ်းႁေႃႈဢွၵ်ႇၸူးၸိူဝ်းၼၼ်ႉသေလႄႈ ၶုၵ်းၸႂ်လႆႈၶႆႈၸႂ်ထူပ်းလွင်ႈတၢင်းၸိူဝ်းၼၼ်ႉသေယဝ်ႉ၊-

2ၶိုၼ်းမႃးၸူးၵႃႈတီႈထႃႇဝရႃႉၽြႃး ၽြႃးပဵၼ်ၸဝ်ႈမႂ်းလႄႈ မႂ်းဢိၵ်ႇတင်းလုၵ်ႈလၢင်းမႂ်းတင်းလၢႆ ဢွၼ်ၵၼ်ပႃးတင်းၸႂ်သဵင်ႈသဵင်ႈ တင်းႁူဝ်ၸႂ်သဵင်ႈသဵင်ႈသေလႄႈ ထွမ်ႇဢဝ်ၵႂၢမ်းမၼ်းၸဝ်ႈ ၸွမ်းၵႃႈၼင်ႇဢၼ်ၵဝ်သင်ႇလၢတ်ႈဝႆႉတီႈမႂ်းဝၼ်းမိူဝ်ႈၼႆႉယဝ်ႉၼၼ်ႉၸိုင်၊-

3ထႃႇဝရႃႉၽြႃး ၽြႃးပဵၼ်ၸဝ်ႈမႂ်းတၵ်းသမ်ႉၶိုၼ်းသိမ်းဢဝ်မႂ်းသေၵႃႈၼႂ်းတၢင်းဢၼ်သိမ်းဢဝ်မႂ်းၵႂႃႇၼၼ်ႉလႄႈ ဢဵတ်းလူမႂ်းသေယဝ်ႉ၊ ၶိုၼ်းမႃးလႄႈသိမ်းဢဝ်မႂ်းသေၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းတီႈဢၼ်ထႃႇဝရႃႉၽြႃး ၽြႃးပဵၼ်ၸဝ်ႈမႂ်းဢဝ်မႂ်းၸၢတ်ႇပိုၼ်ပႅတ်ႈၼၼ်ႉဢေႃႈ။-

4ပိၵ်ႉသမ်ႉၵူၼ်းမႂ်းၵမ်ႈၽွင်ႈ လႆႈၶၢမ်ႇတၢင်းဢၼ်ႁေႃႈဢွၵ်ႇပႅတ်ႈတေႃႇထိုင်ႁွတ်ႈၵႃႈတီႈဢၼ်ၵႆၼႃႇ သေပိုၼ်ႉတႂ်ႈၽႃႉၵၢင်ႁၢဝ်သေၵေႃႈ၊ ထႃႇဝရႃႉၽြႃး ၽြႃးပဵၼ်ၸဝ်ႈမႂ်းတၵ်းသိမ်းဢဝ်မႂ်းသေၵႃႈတီႈၼၼ်ႈလႄႈ ဢဝ်မႂ်းဢွၵ်ႇသေၵႃႈတီႈၼၼ်ႈမႃးဢေႃႈ။-

5ထႃႇဝရႃႉၽြႃး ၽြႃးပဵၼ်ၸဝ်ႈမႂ်းတၵ်းသမ်ႉဢဝ်မႂ်းၶိုၼ်းမႃးၵႃႈၼႂ်းမိူင်းဢၼ်ပူႇမႂ်းမွၼ်ႇမႂ်းၶဝ်ႈၸၢမ်ႇၸႃးၼၼ်ႉလႄႈ မႂ်းၵေႃႈတၵ်းလႆႈၶဝ်ႈၸၢမ်ႇၸႃးဢေႃႈ။ မိူဝ်ႈၼၼ်ႉ မၼ်းၸဝ်ႈတၵ်းသမ်ႉႁဵတ်းၵျေးၸူးတီႈမႂ်းလႄႈ ႁႂ်ႈမႂ်းယဵင်ႈၶႅၼ်းယႂ်ႇၽႄႈၼမ်ၵိုၼ်းၼႃႇလိူဝ်တွၼ်းသေ ပူႇမႂ်းမွၼ်ႇမႂ်းၸိူဝ်းၼၼ်ႉဢေႃႈ။-

6မၼ်းၸဝ်ႈတၵ်းထိူဝ်ႁိမ်းပၢႆၼင်ႁူဝ်ၸႂ်မႂ်း ဢိၵ်ႇတင်းႁူဝ်ၸႂ်ၸိူဝ်ႉၶိူဝ်းမႂ်း ႁႂ်ႈလႆႈပႃးတင်းၸႂ်သဵင်ႈသဵင်ႈ ဢိၵ်ႇတင်းႁူဝ်ၸႂ်သဵင်ႈသဵင်ႈသေလႄႈ ႁၵ်ႉထႃႇဝရႃႉၽြႃး ၽြႃးပဵၼ်ၸဝ်ႈမႂ်း ႁႂ်ႈဢသၢၵ်ႈမႂ်းလႆႈလိပ်းဢေႃႈ။-

7ထႃႇဝရႃႉၽြႃး ၽြႃးပဵၼ်ၸဝ်ႈမႂ်း တၵ်းႁႂ်ႈဢႃႉမင်ႇၵလႃႇတၢင်းဢၼ်ၵိၼ်ႇဢၼ်ဝႃႈၵႃႈမီးၸိူဝ်းၼႆႉၼၼ်ႉ တူၵ်းႁွတ်ႈၵႃႈၼိူဝ်ရၢၼ်ႇသူႇမႂ်း ဢိၵ်ႇတင်းၵႃႈၼိူဝ်ၶဝ်ၸိူဝ်းဢၼ်ၸင်းမႂ်းလႄႈ ၼိၵ်ႈၸၢၵ်ႈငႅၼ်းသႄးမႂ်းၸိူဝ်းၼၼ်ႉဢေႃႈ။-

8မႂ်းတၵ်းလႆႈၶိုၼ်းမႃးလႄႈထွမ်ႇဢဝ်ၵႂၢမ်းထႃႇဝရႃႉၽြႃးသေလႄႈ ပႂ်ႉၸွမ်းပိင်းၺၢပ်ႈၸဝ်ႈၵႃႈဢၼ်ၵဝ်သင်ႇလၢတ်ႈဝႆႉတီႈမႂ်း ဝၼ်းမိူဝ်ႈၼႆႉၸိူဝ်းၼၼ်ႉဢေႃႈ။-

9ပေႃးမႂ်းထွမ်ႇဢဝ်ၵႂၢမ်းထႃႇဝရႃႉၽြႃး ၽြႃးပဵၼ်ၸဝ်ႈမႂ်းလႄႈ ပႂ်ႉၸွမ်းပိင်းၺၢပ်ႈၸဝ်ႈ ဢိၵ်ႇတင်းထုင်းၽိင်ႈတြႃးၸဝ်ႈ ဢၼ်တႅမ်ႈသႂ်ႇဝႆႉၵႃႈၼႂ်းၵျၢမ်းပိင်းၺၢပ်ႈတီႉၼႆႉၸိူဝ်းၼၼ်ႉ၊ ပေႃးမႂ်းပႃးတင်းၸႂ်သဵင်ႈသဵင်ႈ ဢိၵ်ႇတင်းႁူဝ်ၸႂ်သဵင်ႈသဵင်ႈသေလႄႈ ၶိုၼ်းၸူးထႃႇဝရႃႉၽြႃး ၽြႃးပဵၼ်ၸဝ်ႈမႂ်းၸိုင်၊-

10ထႃႇဝရႃႉၽြႃး ၽြႃးပဵၼ်ၸဝ်ႈမႂ်း တၵ်းႁႂ်ႈမႂ်းပျေႉၸုမ်ႇလိူင်ႇၸႂ်ၼႂ်းၵႃႈဢၼ်မႂ်းဢဝ်မိုဝ်းႁဵတ်းၼၼ်ႉ ဢိၵ်ႇတင်းၼႂ်းမၢၵ်ႇတွင်ႉတူဝ်ၶၼ်ႇထႃႇမႂ်း၊ မၢၵ်ႇတွင်ႉတရိၵ်ႈသၢၼ်ႇမႂ်း တင်းမၢၵ်ႇလိၼ်ႁူင်းလိၼ်မႂ်းၸိူဝ်းၼၼ်ႉပုၼ်ႈဢၵျူဝ်းမႂ်းဢေႃႈ။ ထႃႇဝရႃႉၽြႃးတၵ်းၸူမ်းသိူဝ်းမူၼ်ႈပျေႃႇၼႂ်းမႂ်း ပုၼ်ႈဢၵျူဝ်းမႂ်းမိူၼ်ၸိူဝ်ႉၼင်ႇဢၼ် မၼ်းၸဝ်ႈၸူမ်းသိူဝ်းမူၼ်ႈပျေႃႇၼႂ်းပူႇမႂ်းမွၼ်ႇမႂ်းၸိူဝ်းၼၼ်ႉဢေႃႈ။

11ပိင်းၺၢပ်ႈတြႃးဢၼ်ၵဝ်သင်ႇလၢတ်ႈဝႆႉတီႈမႂ်းဝၼ်းမိူဝ်ႈၼႆႉၼၼ်ႉ ပဵၼ်တြႃးဢၼ်မႂ်းဢမ်ႇႁူႉၸႅင်ႈလႆႈဢမ်ႇၸႂ်ႈ။ ၵႆၵၼ်တင်းမႂ်းဢမ်ႇၸႂ်ႈ။-

12မီးၵႃႈတီႈၵၢင်ႁၢဝ်ပုၼ်ႈႁႂ်ႈမႂ်းထၼ်ႈပေႃးလႆႈတွင်ႈထၢမ်လႄႈဝႃႈ၊ ၽူႈလႂ်တၵ်းၶိုၼ်ႈၵႃႈၼိူဝ်ၵၢင်ႁၢဝ်သေလႄႈ ဢဝ်တြႃးၼၼ်ႉမႃးၵႃႈတီႈႁဝ်းႁႂ်ႈႁဝ်းလႆႈထွမ်ႇဢဝ်ပႂ်ႉၵမ်ပႂ်ႉၸွမ်း၊ ဝႃႈၼင်ႇၼႆၼၼ်ႉဢမ်ႇၸႂ်ႈ။-

13မီးၵႃႈတီႈၽၢႆႇပုၼ်ႉပၢင်ႇလၢႆႇ ႁႂ်ႈမႂ်းထၼ်ႈပေႃးလႆႈတွင်ႈထၢမ်လႄႈဝႃႈ၊ ၽူႈလႂ်တၵ်းၶၢမ်ႈပၢင်ႇလၢႆႇၵႂႃႇသေလႄႈဢဝ်တြႃးၼၼ်ႉမႃးၵႃႈတီႈႁဝ်း ႁႂ်ႈႁဝ်းလႆႈထွမ်ႇဢဝ်လႄႈပႂ်ႉၸွမ်း၊ ဝႃႈၼင်ႇၼႆၼၼ်ႉဢမ်ႇၸႂ်ႈ။-

14တြႃးၸဝ်ႈၼၼ်ႉ မီးၸမ်ၵၼ်တင်းမႂ်းၼႃႇလူင်လၢင်လႄႈ မီးယူႇၵႃႈၼႂ်းသူပ်းမႂ်း ဢိၵ်ႇတင်းၵႃႈၼႂ်းႁူဝ်ၸႂ်မႂ်း ပုၼ်ႈဢၼ်မႂ်းတၵ်းပႂ်ႉၵမ်ပႂ်ႉၸွမ်းဢေႃႈ။-

15တူၺ်းလူး၊ ၵဝ်ဢဝ်တၢင်းဢၼ်ဢသၢၵ်ႈလိပ်းတင်းတၢင်းဢၼ်ၵတ်းယဵၼ်ၶျၢမ်းသႃႇ ဢိၵ်ႇတင်းတၢင်းဢၼ်တၢႆ တင်းတၢင်းဢၼ်တုၵ်ႉၶႃႉၶၢၼ်ၸႂ်ဝႆႉၵႃႈတီႈၽၢႆႇၼႃႈမႂ်းဝၼ်းမိူဝ်ႈၼႆႉယဝ်ႉ။-

16လွင်ႈၼင်ႇႁိုဝ်မႂ်းတၵ်းဢသၢၵ်ႈလိပ်းလႄႈ ယႂ်ႇၽႄႈၼမ်ၵိုၼ်းမႃး ဢိၵ်ႇတင်းလွင်ႈၼင်ႇႁိုဝ်ထႃႇဝရႃႉၽြႃး ၽြႃးပဵၼ်ၸဝ်ႈမႂ်းတၵ်းပၼ်တၢင်းလီတီႈမႂ်းၵႃႈၼႂ်းမိူင်းဢၼ်မႂ်းတၵ်းၵႂႃႇလႄႈ ၸၢမ်ႇၸႃးၼၼ်ႉၸိုင်၊ ၵဝ်သင်ႇလၢတ်ႈဝႆႉတီႈမႂ်းလႄႈဝႃႈ၊ ႁၵ်ႉထႃႇဝရႃႉၽြႃး ၽြႃးပဵၼ်ၸဝ်ႈမႂ်းသေလႄႈ ၸွမ်းသဵၼ်ႈတၢင်းမၼ်းၸဝ်ႈလႄႈ ပႂ်ႉၵမ်ပႂ်ႉၵျၢင်ႉပိင်းၺၢပ်ႈမၼ်းၸဝ်ႈ ဢိၵ်ႇတင်းထုင်းၽိင်ႈတြႃးမၼ်းၸဝ်ႈ တင်းလွင်ႈတၢင်းဢၼ်မၼ်းၸဝ်ႈၸီႇယၢင်ႇဝႆႉၸိူဝ်းၼၼ်ႉတႃႉ၊ ဝႃႈၼင်ႇၼႆဢေႃႈ။-

17ပေႃးဢမ်ႇၼၼ် ပေႃးႁူဝ်ၸႂ်မႂ်းပိူင်ႈၵႂႃႇသေလႄႈ မႂ်းယင်းဢမ်ႇထွမ်ႇဢမ်ႇဢဝ်လႄႈ ၸွမ်းတၢင်းဢၼ်ပိူၼ်ႈတိုၵ်းယူင်းၸူဝ်းဢဝ်ၼၼ်ႉသေလႄႈ ႁဵတ်းဝၢတ်ႈၵူဝ်းၵႂၢႆႇၽြႃးတၢင်ႇသူႇတၢင်ႇပႃးၸိုင်၊-

18ၵဝ်ပၼ်သတီႉတီႈသူဝၼ်းမိူဝ်ႈၼႆႉ လွင်ႈဢၼ်သူတၵ်းႁွတ်ႈထိုင်တၢင်းလူႉတၢင်းလႅဝ်ဢမၢၼ်ႇၶၼ်ပဵၼ်လႄႈ ၸူဝ်ႈဢသၢၵ်ႈသူ တၵ်းဢမ်ႇယၢဝ်းဢမ်ႇယိုၼ်းၵႃႈၼႂ်းမိူင်းဢၼ်မႂ်းတၵ်းၶၢမ်ႈၼမ်ႉႁွင်ႈ ယေႃးတၢၼ်ႇ ၵႂႃႇလႄႈ ၶဝ်ႈၸၢမ်ႇၸႃးၼၼ်ႉဢေႃႈ။-

19ၵဝ်ဢဝ်ၵၢင်ႁၢဝ်တင်းလိၼ်မိူင်းတိူင်ႇဝႃႈယူႇၽၢႆႇၼိုင်ႈတင်းမႂ်း လူၺ်ႈလွင်ႈဢၼ်ၵဝ်ဢဝ်တၢင်းဢၼ်ဢသၢၵ်ႈလိပ်း၊ တၢင်းဢၼ်တၢႆ၊ တၢင်းဢၼ်ပၼ်တၢင်းလီ၊ တၢင်းဢၼ်ၵိၼ်ႇဢၼ်ဝႃႈ ဝႆႉၵႃႈတီႈၽၢႆႇၼႃႈမႂ်းၼၼ်ႉဢေႃႈ။-

20ပိူဝ်ႈၼႆလႄႈ မႂ်းလိူၵ်ႈၵဵပ်းဢဝ်တၢင်းဢၼ်ဢသၢၵ်ႈလိပ်း ႁႂ်ႈမႂ်းဢိၵ်ႇတင်းၸိူဝ်ႉၶိူဝ်းမႂ်းလႆႈဢသၢၵ်ႈလိပ်းယူႇသေလႄႈ ႁၵ်ႉထႃႇဝရႃႉၽြႃး ၽြႃးပဵၼ်ၸဝ်ႈမႂ်းလႄႈ ထွမ်ႇဢဝ်ၵႂၢမ်းမၼ်းၸဝ်ႈလႄႈ ႁွႆႈၸပ်းယူႇတီႈမၼ်းၸဝ်ႈ ၵွပ်ႈပိူဝ်ႈဢၼ်မၼ်းၸဝ်ႈပဵၼ်တၢင်းဢၼ်မႂ်းဢသၢၵ်ႈလိပ်း တင်းတၢင်းဢၼ်ၸူဝ်ႈဢသၢၵ်ႈမႂ်းယၢဝ်းယိုၼ်းၼၼ်ႉ ဢိၵ်ႇတင်းႁႂ်ႈမႂ်းလႆႈယူႇၵႃႈၼႂ်းမိူင်းဢၼ်ထႃႇဝရႃႉၽြႃးတိူင်ႇဝႃႈဝႆႉတီႈပူႇမွၼ်ႇမႂ်း ဢႃႇပြႃႇႁၢမ်ႇ၊ ဢီႉၸၢၵ်ႈ၊ ယႃႇၵုပ်ႈ ၸိူဝ်းၼၼ်ႉလႄႈဝႃႈ၊ တၵ်းပၼ်တီႈၶဝ်ဢေႃႈ၊ ဝႃႈၼင်ႇၼႆၼၼ်ႉတႃႉ၊ ဝႃႈၼင်ႇၼႆဢေႃႈ။

← Chapter 29 Jump to: Chapter 31 →