Deuteronomy 28 — Shan

1ပေႃးမႂ်းထွမ်ႇဢဝ်ၵႂၢမ်းထႃႇဝရႃႉၽြႃး ၽြႃးပဵၼ်ၸဝ်ႈမႂ်းၸေးၸေးၸွတ်ႇၸွတ်ႇ ႁႂ်ႈလႆႈပႂ်ႉၸွမ်းၵမ်ၵျၢင်ႉပိင်းၺၢပ်ႈၸဝ်ႈ ဢၼ်ၵဝ်သင်ႇလၢတ်ႈဝႆႉတီႈမႂ်းဝၼ်းမိူဝ်ႈၼႆႉတင်းသဵင်ႈတင်းလူင်ၼၼ်ႉၸိုင် ထႃႇဝရႃႉၽြႃး ၽြႃးပဵၼ်ၸဝ်ႈမႂ်း တၵ်းယုၵ်ႉယွင်ႈမႂ်းလိူဝ်တွၼ်းၼႃႇသေၵူၼ်းမဵဝ်းၵႃႈၼိူဝ်လိၼ်မိူင်းတင်းသဵင်ႈတင်းလူင်ဢေႃႈ။-

2ပေႃးမႂ်းတၵ်းထွမ်ႇဢဝ်ၵႂၢမ်းထႃႇဝရႃႉၽြႃး ၽြႃးပဵၼ်ၸဝ်ႈမႂ်းၼၼ်ႉၸိုင်၊ တၢင်းလီမင်ႇၵလႃႇၵူႈၸိူဝ်ႉၵူႈပိူင် ဢၼ်တၵ်းတူၵ်းႁွတ်ႈၵႃႈၼိူဝ်မႂ်းလႄႈ ၽႅဝ်ထိုင်ၵႃႈတီႈမႂ်းၸမ်ႉ၊-

3မႂ်းတၵ်းမီးမင်ႇၵလႃႇၵႃႈၼႂ်းဝၢၼ်ႈၼႂ်းဝဵင်းဢေႃႈ။ တၵ်းမီးမင်ႇၵလႃႇၵႃႈၼႂ်းႁႆႊၼႂ်းၼႃးဢေႃႈ။-

4တၵ်းမီးမင်ႇၵလႃႇတီႈမၢၵ်ႇတွင်ႉတူဝ်ၶၼ်ႇထႃႇမႂ်း၊ တီႈမၢၵ်ႇလိၼ်ႁူင်းလိၼ်မႂ်း၊ တီႈမၢၵ်ႇတွင်ႉတရိၵ်ႈသၢၼ်ႇမႂ်း၊ တီႈတၢင်းဢၼ်ယႂ်ႇၽႄႈတူဝ်းတွၼ်းမႃးတီႈဝူဝ်းမႂ်း၊ တီႈတူဝ်ဢွၼ်ႇၽုင်သူဝ်းၽုင်ပႄႉမႂ်းဢေႃႈ။-

5တၵ်းမီးမင်ႇၵလႃႇတီႈပဵတ်ႈမႂ်းၵူၺ်မႂ်း၊ တီႈၵွၵ်းဢၼ်ၼူတ်ႈၶဝ်ႈမုၼ်းမႂ်းၼၼ်ႉဢေႃႈ။-

6တၵ်းမီးမင်ႇၵလႃႇမိူဝ်ႈဢၼ်မႂ်းၶဝ်ႈၵႃႈၼႂ်းႁိူၼ်းမႂ်းဢေႃႈ။ တၵ်းမီးမင်ႇၵလႃႇမိူဝ်ႈဢၼ်မႂ်းဢွၵ်ႇၵႃႈၼွၵ်ႈဢေႃႈ။-

7ထႃႇဝရႃႉၽြႃး တၵ်းႁႂ်ႈရၢၼ်ႇသူႇမႂ်း ဢၼ်လုၵ်ႉယူႇၽၢႆႇၼိုင်ႈတင်းမႂ်းၸိူဝ်းၼၼ်ႉ လႆႈၶၢမ်ႇတၢင်းဢၼ်တိုၵ်းတေႃးယႃႉပႅတ်ႈသိုဝ်ႈၼႃႈတႂ်ႈတႃမႂ်းဢေႃႈ။ ၶဝ်ၸွမ်းသဵၼ်ႈတၢင်းသဵၼ်ႈလဵဝ်ၵူၺ်းမႃးႁႂ်ႈလႆႈတိုၵ်းတေႃးမႂ်းလႄႈ တၵ်းၸွမ်းသဵၼ်ႈတၢင်းၸဵတ်းသဵၼ်ႈသေလႄႈ ဢွၵ်ႇပၢႆႈသေၵႃႈတီႈၽၢႆႇၼႃႈမႂ်းၵႂႃႇဢေႃႈ။-

8ထႃႇဝရႃႉၽြႃးတၵ်းမီးဢမိင်ႉ ႁႂ်ႈမင်ႇၵလႃႇလႆႈႁွတ်ႈထိုင်ၵႃႈၼိူဝ်မႂ်းတီႈတိူၵ်ႈၽၼ်ႇတႃႇမႂ်းဢိၵ်ႇတင်း တီႈလွင်ႈတၢင်းၵႃႈဢၼ်မႂ်းဢဝ်မိုဝ်းႁဵတ်းၼၼ်ႉဢေႃႈ။ မၼ်းၸဝ်ႈတၵ်းပၼ်တၢင်းလီမင်ႇၵလႃႇတီႈမႂ်း ၵႃႈၼႂ်းမိူင်းဢၼ် ထႃႇဝရႃႉၽြႃး ၽြႃးပဵၼ်ၸဝ်ႈမႂ်း ပၼ်တီႈမႂ်းၼၼ်ႉဢေႃႈ။-

9ပေႃးမႂ်းပႂ်ႉၵမ်ပႂ်ႉၵျၢင်ႉပိင်းၺၢပ်ႈထႃႇဝရႃႉၽြႃး ၽြႃးပဵၼ်ၸဝ်ႈမႂ်းတင်းလၢႆလႄႈ ၸွမ်းသဵၼ်ႈတၢင်းမၼ်းၸဝ်ႈၸိုင်၊ ထႃႇဝရႃႉၽြႃးတၵ်းႁႂ်ႈမႂ်းပဵၼ်ၵူၼ်းမဵဝ်းဢၼ်မူတ်းၸၢင်ႇပုၼ်ႈမၼ်းၸဝ်ႈ ၸွမ်းၵႃႈၼင်ႇဢၼ်မၼ်းၸဝ်ႈတိူင်ႇဝႃႈဝႆႉတီႈမႂ်းၼၼ်ႉဢေႃႈ။-

10ၵူၼ်းမဵဝ်းၵႃႈၼိူဝ်လိၼ်မိူင်းတင်းသဵင်ႈတင်းလူင် တၵ်းႁူႉႁၼ်လွင်ႈဢၼ်မႂ်းလႆႈၶၢမ်ႇတၢင်းဢၼ် ဢဝ်ၼႃႇမႃႉၸိုဝ်ႈသဵင်ထႃႇဝရႃႉၽြႃး ႁွင်ႉႁဵၵ်ႈဝႃႈၼၼ်ႉလႄႈ ၵူဝ်ႁႄမႂ်းဢေႃႈ။-

11ထႃႇဝရႃႉၽြႃးတၵ်းႁႂ်ႈမႂ်းမၢၵ်ႈမီးပျေႉၸုမ်ႇလႄႈ လႆႈလီလႆႈပဵၼ်ဝႆႉတင်းမၢၵ်ႇတွင်ႉတူဝ်ၶၼ်ႇထႃႇမႂ်း၊ မၢၵ်ႇတွင်ႉတရိၵ်ႈသၢၼ်ႇမႂ်း၊ မၢၵ်ႇလိၼ်ႁူင်းလိၼ်မႂ်းၸိူဝ်းၼၼ်ႉ ၵႃႈၼႂ်းမိူင်းဢၼ်ထႃႇဝရႃႉၽြႃးတိူင်ႇဝႃႈဝႆႉ တီႈပူႇမွၼ်ႇမႂ်းႁႂ်ႈလႆႈပၼ်တီႈမႂ်းၼၼ်ႉဢေႃႈ။-

12ထႃႇဝရႃႉၽြႃး တၵ်းၽုၺ်ႇတိူၵ်ႈၽၼ်ႇတႃႇမၼ်းၸဝ်ႈဢၼ်ဝႃႈ ၽႃႉၵၢင်ႁၢဝ်ၼၼ်ႉႁႂ်ႈၽူၼ်တူၵ်းလူင်းၵႃႈၼိူဝ်မိူင်းမႂ်း မိူဝ်ႈဢၼ်ၶိင်ႇမၼ်းထုၵ်ႇၼၼ်ႉ ဢိၵ်ႇတင်းႁႂ်ႈလႆႈပၼ်တၢင်းလီ တီႈလွင်ႈတၢင်းၵႃႈဢၼ်မႂ်းဢဝ်မိုဝ်းႁဵတ်းၼၼ်ႉဢေႃႈ။ မႂ်းတၵ်းမီးဢၶႂၢင်ႉဢၼ်လႆႈပၼ်ၵူႈပၼ်ယိမ် တီႈၵူၼ်းမဵဝ်းၼမ်ၼႃႇဢေႃႈ။ မႂ်းတၵ်းဢမ်ႇၵူႈဢဝ်ယိမ်ဢဝ်။-

13ထႃႇဝရႃႉၽြႃးယင်းဢမ်ႇႁႂ်ႈမႂ်းပဵၼ်ႁၢင်လႄႈ တၵ်းႁႂ်ႈမႂ်းပဵၼ်ႁူဝ်ဢေႃႈ။ မႂ်းယင်းဢမ်ႇလႆႈယူႇၵႃႈတႂ်ႈလႄႈ တၵ်းမီးဢၶႂၢင်ႉဢၼ်လႆႈယူႇၵႃႈၼိူဝ်ၵူၺ်းဢေႃႈ။ ပေႃးမႂ်းထွမ်ႇဢဝ်ပိင်းၺၢပ်ႈထႃႇဝရႃႉၽြႃး ၽြႃးပဵၼ်ၸဝ်ႈမႂ်း ဢၼ်ၵဝ်သင်ႇလၢတ်ႈဝႆႉတီႈမႂ်းဝၼ်းမိူဝ်ႈၼႆႉၸိူဝ်းၼၼ်ႉ ႁႂ်ႈလႆႈပႂ်ႉၸွမ်းလႄႈၵမ်ၵျၢင်ႉ၊-

14ပေႃးဢမ်ႇဝႄႈပိူင်ႈသေၵႃႈၼႂ်းသဵၼ်ႈတၢင်းၵႂၢမ်းဢၼ်ၵဝ်သင်ႇလၢတ်ႈဝႆႉတီႈသူဝၼ်းမိူဝ်ႈၼႆႉၼၼ်ႉၵႂႃႇ ၵႃႈတီႈၽၢႆႇသၢႆႉၽၢႆႇၶႂႃ၊ ဢမ်ႇၸွမ်းလင်ၽြႃးတၢင်ႇသူႇတၢင်ႇပႃးလႄႈ ႁဵတ်းဝၢတ်ႈၸိုင်၊ မႂ်းတၵ်းလႆႈဢေႃႈ။

15ပေႃးမႂ်းဢမ်ႇထွမ်ႇဢမ်ႇဢဝ်ၵႂၢမ်းထႃႇဝရႃႉၽြႃး ၽြႃးပဵၼ်ၸဝ်ႈမႂ်း ႁႂ်ႈလႆႈပႂ်ႉၸွမ်းၵမ်ၵျၢင်ႉပိင်းၺၢပ်ႈမၼ်းၸဝ်ႈ ဢိၵ်ႇတင်းထုင်းၽိင်ႈတြႃးမၼ်းၸဝ်ႈ ၵႃႈဢၼ်ၵဝ်သင်ႇလၢတ်ႈဝႆႉတီႈမႂ်းဝၼ်းမိူဝ်ႈၼႆႉၼၼ်ႉၸိုင်၊ ဢႃႉမင်ႇၵလႃႇတၢင်းဢၼ်ၵိၼ်ႇဢၼ်ဝႃႈ ၵႃႈဢၼ်တၵ်းတူၵ်းႁွတ်ႈၵႃႈၼိူဝ်မႂ်းလႄႈ ၽႅဝ်ထိုင်ၵႃႈတီႈမႂ်းၼၼ်ႉၸမ်ႉ၊-

16မႂ်းတၵ်းမီးဢႃႉမင်ႇၵလႃႇၵႃႈၼႂ်းဝၢၼ်ႈၼႂ်းဝဵင်းဢေႃႈ။ တၵ်းမီးဢႃႉမင်ႇၵလႃႇၵႃႈၼႂ်းႁႆႊၼႂ်းၼႃးဢေႃႈ။-

17တၵ်းမီးဢႃႉမင်ႇၵလႃႇတီႈပဵတ်ႈမႂ်းၵူၺ်မႂ်း၊ တီႈၵွၵ်းဢၼ်ၼူတ်ႈၶဝ်ႈမုၼ်းမႂ်းၼၼ်ႉဢေႃႈ။-

18တၵ်းမီးဢႃႉမင်ႇၵလႃႇတီႈမၢၵ်ႇတွင်ႉတူဝ်ၶၼ်ႇထႃႇမႂ်း၊ တီႈမၢၵ်ႇလိၼ်ႁူင်းလိၼ်မႂ်း၊ တီႈတၢင်းဢၼ်ယႂ်ႇၽႄႈတူဝ်းတွၼ်းမႃးတီႈဝူဝ်းမႂ်း၊ တီႈတူဝ်ဢွၼ်ႇၽုင်သူဝ်းၽုင်ပႄႉမႂ်းဢေႃႈ။-

19တၵ်းမီးဢႃႉမင်ႇၵလႃႇ မိူဝ်ႈဢၼ်မႂ်းၶဝ်ႈၵႃႈၼႂ်းႁိူၼ်းမႂ်းဢေႃႈ။ တၵ်းမီးဢႃႉမင်ႇၵလႃႇ မိူဝ်ႈဢၼ်မႂ်းဢွၵ်ႇၵႃႈၼွၵ်ႈဢေႃႈ။-

20ထႃႇဝရႃႉၽြႃးတၵ်းႁႂ်ႈတၢင်းဢၼ်ၵိၼ်ႇဢၼ်လႃႇ၊ တၢင်းဢၼ်ယႃႉဢၼ်ယူၵ်ႉ၊ တၢင်းဢၼ်သႄႉဢၼ်သွမ်းတူၵ်းႁွတ်ႈၵႃႈၼိူဝ်မႂ်း ၼႂ်းလွင်ႈတၢင်းၵႃႈဢၼ်မႂ်းဢဝ်မိုဝ်းႁဵတ်းၼၼ်ႉ တေႃႇထိုင်ႁွတ်ႈမႂ်းထၼ်ႈပေႃးႁွတ်ႈထိုင်တၢင်းဢၼ်လူႉလႅဝ်လႄႈ သုမ်းၸွမ်းၶၼ်ၶၼ်ၽႂ်းၽႂ်း ၵွပ်ႈပိူဝ်ႈဢပႅတ်ႈတူႉၸရိူၵ်ႈ ဢၼ်မႂ်းႁဵတ်းမႅၼ်ႈလႄႈ ၸုၼ်ႉပႅတ်ႈၵဝ်ၼၼ်ႉဢေႃႈ။-

21ထႃႇဝရႃႉၽြႃးတၵ်းႁႂ်ႈၵႃႇလႃႉႁႃႈလႅင်မိူင်း ၸပ်းတီႈမႂ်းတေႃႇထိုင်ႁွတ်ႈမၼ်းၸဝ်ႈထၼ်ႈပေႃး ပႄႇၽဵဝ်ႈမႂ်းပႅတ်ႈသေၵႃႈၼႂ်းမိူင်းဢၼ်မႂ်းၵႂႃႇလႄႈၶဝ်ႈၸၢမ်ႇၸႃးၼၼ်ႉဢေႃႈ။-

22ထႃႇဝရႃႉၽြႃးတၵ်းဢဝ်တင်းတူႇလႃႇ တၢင်းဢၼ်ၶႆႈၼၢဝ်၊ တၢင်းၶႆႈတၢင်းပဵၼ်ဢၼ်မႆႈဢၼ်ႁွၼ်ႉ၊ တၢင်းၶႆႈတၢင်းပဵၼ်ဢၼ်မိူၼ်ၸိူဝ်ႉၼင်ႇၽႆးမႆႈ၊ ၽေးလၢပ်ႇ၊ ၽေးဢၼ်လူမ်းတိူဝ်ႉထုၵ်ႇသႂ်ႇလႄႈ မၢၵ်ႇမၼ်းႁူင်းမၼ်းလိပ်ႈၵႂႃႇၽင်ႉၵႂႃႇ၊ ၽေးဢၼ်မၢၵ်ႇမၼ်းႁူင်းမၼ်း သႃးၵႂႃႇၼဝ်ႈၵႂႃႇၸိူဝ်းၼၼ်ႉ ပၼ်တၢမ်ႇတီႈမႂ်းလႄႈ ၽေးၸိူဝ်းၼၼ်ႉ တၵ်းလိုပ်ႈၸွမ်းမႂ်းတေႃႇထိုင်ႁွတ်ႈမႂ်းထၼ်ႈပေႃးလူႉလႅဝ်ဢေႃႈ။-

23ၽႃႉၵၢင်ႁၢဝ်ဢၼ်မီးယူႇၵႃႈၼိူဝ်ႁူဝ်မႂ်းၼၼ်ႉ တၵ်းပဵၼ်တွင်းလိူင်လႄႈ၊ လိၼ်ဢၼ်မီးယူႇၵႃႈတႂ်ႈမႂ်းၼၼ်ႉ တၵ်းပဵၼ်လဵၵ်းဢေႃႈ။-

24ထႃႇဝရႃႉၽြႃးတၵ်းႁႂ်ႈၼမ်ႉၽူၼ်ဢၼ်တူၵ်းသႂ်ႇၵႃႈၼိူဝ်မိူင်းမႂ်းၼၼ်ႉ ပဵၼ်မုၼ်ႈလိၼ်၊ ပဵၼ်ၽုၼ်ႇမုၵ်ႉသေလႄႈ တၵ်းတူၵ်းသႂ်ႇၵႃႈၼိူဝ်မႂ်းတေႃႇထိုင်ႁွတ်ႈမႂ်းထၼ်ႈပေႃးလူႉလႅဝ်ဢေႃႈ။-

25ထႃႇဝရႃႉၽြႃးတၵ်းပၼ်ႁႂ်ႈမႂ်းလႆႈၶၢမ်ႇတၢင်းဢၼ်တိုၵ်းတေႃးယႃႉပႅတ်ႈၵႃႈတီႈၽၢႆႇၼႃႈရၢၼ်ႇသူႇမႂ်းဢေႃႈ။ မႂ်းၸွမ်းသဵၼ်ႈတၢင်းသဵၼ်ႈလဵဝ်ၵူၺ်း ၵႂႃႇႁႂ်ႈလႆႈတိုၵ်းတေႃးၶဝ်လႄႈ တၵ်းၸွမ်းသဵၼ်ႈတၢင်းၸဵတ်းသဵၼ်ႈသေလႄႈ ဢွၵ်ႇပၢႆႈသေၵႃႈတီႈၽၢႆႇၼႃႈၶဝ်လႄႈ ပိဝ်သဵၼ်ၵႂႃႇ၊ ပိဝ်သဵၼ်မႃး ယူႇၵႃႈၼႂ်းၵူႈသိုင်ႇၵူႈမိူင်း ဢၼ်မီးၵႃႈၼိူဝ်လိၼ်မိူင်းၼႆႉၼၼ်ႉဢေႃႈ။-

26တူဝ်တၢႆမႂ်းၼၼ်ႉတၵ်းလႆႈပဵၼ်ပုၼ်ႈၼူၵ်ႉၵၢင်ႁၢဝ် တင်းတူဝ်ထိူၼ်ႇႁၢႆႉတင်းလၢႆတၵ်းၵိၼ်တၵ်းၶူပ်းဢေႃႈ။ ၵေႃႉဢၼ်တၵ်းႁေႃႈတရိၵ်ႈသၢၼ်ႇၸိူဝ်းၼၼ်ႉပႅတ်ႈဢမ်ႇမီးသေၵေႃႉသေၵူၼ်း။-

27ထႃႇဝရႃႉၽြႃး တၵ်းဢဝ်တုမ်ႇၸဵပ်းတုမ်ႇၽီမိူင်း ဢေႇၵိပ်ႉတူႉ ၊ တၢင်းပဵၼ်မႅင်းသရိူၵ်ႈ၊ တၢင်းပဵၼ်ႁိတ်း၊ တၢင်းပဵၼ်ႁဝ်ႈ ဢၼ်ဢမ်ႇႁၢႆလႆႈၸိူဝ်းၼၼ်ႉ ပၼ်တၢမ်ႇတီႈမႂ်းဢေႃႈ။-

28ထႃႇဝရႃႉၽြႃးတၵ်းဢဝ်တၢင်းပဵၼ်ဢၼ်ယွင်ႇဢၼ်မႃႈ၊ တၢင်းပဵၼ်ဢၼ်တႃမွတ်ႇ၊ တၢင်းပဵၼ်ဢၼ်ၵႂင်ၸႂ်ယုင်ႈၸႂ်ၸိူဝ်းၼၼ်ႉ ပၼ်တၢမ်ႇတီႈမႂ်းဢေႃႈ။-

29မႂ်းတၵ်းလႆႈၵုမ်းၵီႈၵုမ်းၵမ်းၵႃႈတီႈၶိင်ႇၵၢင်ဝၼ်းတဵင်ႈ မိူၼ်ၸိူဝ်ႉၼင်ႇဢၼ်ၵေႃႉဢၼ်တႃမွတ်ႇ လႆႈၵုမ်းၵီႈၵုမ်းၵမ်းၵႃႈၼႂ်းလပ်းသိင်ႇမၼ်းၼၼ်ႉဢေႃႈ။ မႂ်းဢမ်ႇလႆႈလီလႆႈပဵၼ်ၼႂ်းသဵၼ်ႈတၢင်းဢၼ်မႂ်းၵႂႃႇၸိူဝ်းၼၼ်ႉ။ မႂ်းတၵ်းလႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသႄး၊ တၢင်းဢၼ်ႁိမ်ဢဝ်ႁူင်ႇဢဝ်ၵူၺ်းၵူၺ်းယူႇတႃႇသေႇဢေႃႈ။ ၵေႃႉဢၼ်တၵ်းၵႄႇသႄႇၶျွတ်ႈဢဝ်ဢမ်ႇမီးသေၵေႃႉသေၵူၼ်း။-

30မႂ်းမၢႆၵၼ်တင်းမႄႈယိင်းဝႆႉလႄႈ ၵူၼ်းတၢင်ႇၵေႃႉတၵ်းလႆႈၼွၼ်းလူၺ်ႈမၼ်းဢေႃႈ။ မႂ်းႁဵတ်းႁိူၼ်းႁဵတ်းယေးလႄႈ၊ မႂ်းဢမ်ႇလႆႈယူႇ။ မႂ်းၽုၵ်ႇသူၼ်ဢူးယဵၼ်ႇၸပိတ်ႈလႄႈ မႂ်းဢမ်ႇလႆႈဝိတ်းလႆႈဢဝ်မၢၵ်ႇမၼ်း။-

31ဢဝ်ဝူဝ်းမႂ်းတၢႆသိုဝ်ႈၼႃႈတႂ်ႈတႃမႂ်းလႄႈ၊ မႂ်းဢမ်ႇလႆႈၵိၼ်။ ႁဵတ်းပႄႉႁဵတ်းၼႅင်ႇဢဝ်လီႈမႂ်းၵႂႃႇသေၵႃႈတီႈၽၢႆႇၼႃႈမႂ်းလႄႈ ၵမ်းလိုၼ်းဢမ်ႇလႆႈသမ်ႉၶိုၼ်းမႅင်ႇၶိုၼ်းပၼ်။ ဢဝ်သူဝ်းမႂ်းတင်းလၢႆဢၢပ်ႈပၼ်တီႈရၢၼ်ႇသူႇမႂ်းလႄႈ ၵေႃႉဢၼ်ၵႄႇသႄႇၼုၵ်ႈဢဝ်မႂ်းဢမ်ႇမီးသေၵေႃႉသေၵူၼ်း။-

32ဢဝ်လုၵ်ႈၸၢႆးလုၵ်ႈယိင်းမႂ်းဢၢပ်ႈပၼ်တီႈၵူၼ်းတၢင်ႇၸိူဝ်ႉတၢင်ႇမဵဝ်းလႄႈ မၢၵ်ႇတႃမႂ်းတၵ်းမုင်ႈတူၺ်းယူႇသေလႄႈ ႁႅင်းတၵ်းဢူၼ်ႈၵႂႃႇယွမ်းၵႂႃႇၵွပ်ႈပိူဝ်ႈၶဝ်ၼၼ်ႉယူႇတင်းဝၼ်းဢေႃႈ။ မိုဝ်းမႂ်းၵေႃႈဢမ်ႇလႆႈမီးႁႅင်း။-

33ၵူၼ်းမဵဝ်းဢၼ်မႂ်းဢမ်ႇႁူႉၸၵ်းမိုတ်ႈၵိုဝ်းၼၼ်ႉတၵ်းၵိၼ်မၢၵ်ႇလိၼ်ႁူင်းလိၼ်မႂ်း ဢိၵ်ႇတင်းဢုၵ်ႉၸႃႇဢၼ်မႂ်းသၢင်ႈႁဵတ်းလႄႈလႆႈၼၼ်ႉဢေႃႈ။ မႂ်းတၵ်းလႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသႄး၊ တၢင်းဢၼ်ၶိုတ်ႈလႅဝ်ၼူတ်ႈလႅဝ်ၵူၺ်းၵူၺ်းယူႇတႃႇသေႇဢေႃႈ။-

34ၼင်ႇၼၼ်လႄႈ မႂ်းတၵ်းလႆႈပဵၼ်ဢၼ်ယွင်ႇဢၼ်မႃႈၵႂႃႇ ၵွပ်ႈပိူဝ်ႈလွင်ႈတၢင်းဢၼ်မၢၵ်ႇတႃမႂ်းလႆႈထူပ်းလႆႈႁၼ်ၼၼ်ႉဢေႃႈ။-

35ထႃႇဝရႃႉၽြႃးတၵ်းဢဝ်တုမ်ႇၸဵပ်းတုမ်ႇၽီဢၼ်ဢမ်ႇႁၢႆလႆႈၼၼ်ႉ ပၼ်တၢမ်ႇတီႈႁူဝ်ၶဝ်ႇမႂ်းတင်းတီႈတိၼ်မႂ်းၵူၺ်းဢမ်ႇၵႃး၊ တၵ်းပၼ်တီႈၸႃႉၸဵမ်ၽႃႇတိၼ်မႂ်းလႄႈ တေႃႇထိုင်ႁွတ်ႈၸိၵ်းႁူဝ်မႂ်းဢေႃႈ။

36ထႃႇဝရႃႉၽြႃးတၵ်းဢဝ်မႂ်း ဢိၵ်ႇတင်းၶုၼ်ႁေႃၶမ်းဢၼ်မႂ်းယုၵ်ႉယွင်ႈဝႆႉၼၼ်ႉ ၵႂႃႇၵႃႈတီႈဢၼ်ၵူၼ်းမဵဝ်းဢၼ်မႂ်း ဢိၵ်ႇတင်းပူႇမွၼ်ႇမႂ်းတင်းလၢႆဢမ်ႇႁူႉၸၵ်းမိုတ်ႈၵိုဝ်းၼၼ်ႉမီးၼၼ်ႉလႄႈ မႂ်းတၵ်းလႆႈႁဵတ်းဝၢတ်ႈတီႈၽြႃးတၢင်ႇသူႇတၢင်ႇပႃး၊ ၽြႃးမႆႉ၊ ၽြႃးမၢၵ်ႇႁိၼ်ၸိူဝ်းၼၼ်ႉဢေႃႈ။-

37မႂ်းတၵ်းလႆႈပဵၼ်တီႈဢၼ်လီဢၢမ်း၊ တီႈဢၼ်ႁဵတ်းဢပုမ်ႇတႅၵ်ႈ၊ တီႈဢၼ်သႄႉသွမ်း ၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းၵႃႈတီႈဢၼ်ထႃႇဝရႃႉၽြႃး ဢဝ်မႂ်းၵႂႃႇၼၼ်ႉဢေႃႈ။-

38မႂ်းဢဝ်ၸိူဝ်ႉၽၼ်းၼမ်ၼႃႇၵႂႃႇၸူးၵႃႈတီႈႁႆႊတီႈၼႃးလႄႈ တၵ်းလႆႈသိမ်းဢဝ်ၵေႇၼႃႇ ၵွပ်ႈပိူဝ်ႈဢၼ်မႅင်းၵႅင်းၶူပ်းၵိၼ်ၼၼ်ႉဢေႃႈ။-

39မႂ်းၽုၵ်ႇသူၼ်ဢူးယဵၼ်ႇၸပိတ်ႈသေလႄႈ လုမ်းလႃးလႄႈမႂ်းဢမ်ႇလႆႈၵိၼ်ၼမ်ႉၸပိတ်ႈ။ ဢမ်ႇလႆႈဝိတ်းဢဝ်မၢၵ်ႇမၼ်း ၵွပ်ႈပိူဝ်ႈဢၼ်မူင်ႈၶူပ်းၵိၼ်ၼၼ်ႉ။-

40မႂ်းမီးတူၼ်ႈ သၢၼ်ႇလုၼ်ႇ တီႈဢၼ်မႂ်းယူႇၵူႈတီႈၵူႈလႅၼ်လႄႈ မႂ်းဢမ်ႇလႆႈဢဝ်ၼမ်ႉမၼ်း သၢၼ်ႇလုၼ်ႇ တႃးတူဝ်မႂ်း ၵွပ်ႈပိူဝ်ႈဢၼ်မၢၵ်ႇမၼ်းဢမ်ႇတၼ်းသုၵ်းလႄႈႁူင်ႈတူၵ်းၼၼ်ႉ။-

41မႂ်းၵိူတ်ႇလဵင်ႉလုၵ်ႈၸၢႆးလုၵ်ႈယိင်းလႄႈ ဢမ်ႇလႆႈမူၼ်ႈလႆႈပျေႃႇလူၺ်ႈၵၼ်တင်းၶဝ်။ ၶဝ်တၵ်းလႆႈၶၢမ်ႇတၢင်းဢၼ်ရၢၼ်ႇသူႇသိမ်းဢဝ်ၵႂႃႇဢေႃႈ။-

42မႅင်းၵႅင်းတင်းလၢႆ တၵ်းၶူပ်းတၵ်းယႃႉတူၼ်ႈမႆႉတူၼ်ႈတွၵ်ႇၵႃႈမီး ဢိၵ်ႇတင်းမၢၵ်ႇလိၼ်ႁူင်းလိၼ်မႂ်းၵႃႈမီးဢေႃႈ။-

43ၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ယူႇၵႃႈၼႂ်းမႂ်းၼၼ်ႉ တၵ်းယႂ်ႇမႃးသုင်မႃးၶိုၼ်ႈၵႃႈၼိူဝ်မႂ်းယူႇလႄႈ မႂ်းၸမ်ႉ၊ တၵ်းလႆႈတႅမ်ႇၵႂႃႇယေႃႈၵႂႃႇယူႇဢေႃႈ။-

44မၼ်းၼၼ်ႉတၵ်းမီးဢၶႂၢင်ႉဢၼ်လႆႈပၼ်ၵူႈပၼ်ယိမ်တီႈမႂ်းဢေႃႈ။ မႂ်းၸမ်ႉ၊ ဢမ်ႇလႆႈပၼ်ၵူႈပၼ်ယိမ်တီႈမၼ်း။ မၼ်းၼၼ်ႉတၵ်းပဵၼ်ႁူဝ်လႄႈ မႂ်းၸမ်ႉ၊ တၵ်းပဵၼ်ႁၢင်ဢေႃႈ။-

45ဢႃႉမင်ႇၵလႃႇတၢင်းဢၼ်ၵိၼ်ႇဢၼ်ဝႃႈၵႃႈမီးၸိူဝ်းၼႆႉ တၵ်းတူၵ်းႁွတ်ႈၵႃႈၼိူဝ်မႂ်းယူႇ၊ လိုပ်ႈၸွမ်းလမ်းၸွမ်းမႂ်းယူႇသေလႄႈ ၶိုတ်းမႂ်းတေႃႇထိုင်ႁွတ်ႈမႂ်းထၼ်ႈပေႃးလူႉလႅဝ် ၵွပ်ႈပိူဝ်ႈဢၼ်မႂ်းဢမ်ႇထွမ်ႇဢမ်ႇဢဝ်ၵႂၢမ်းထႃႇဝရႃႉၽြႃး ၽြႃးပဵၼ်ၸဝ်ႈမႂ်း ႁႂ်ႈလႆႈပႂ်ႉၸွမ်းပိင်းၺၢပ်ႈၸဝ်ႈ ဢိၵ်ႇတင်းထုင်းၽိင်ႈတြႃးဢၼ်မၼ်းၸဝ်ႈသင်ႇလၢတ်ႈဝႆႉတီႈမႂ်းၼၼ်ႉၸိူဝ်းၼၼ်ႉဢေႃႈ။-

46တၵ်းပဵၼ်ၼီႉမိၵ်ႈလၢၵ်ႈၶၼႃႇ ဢိၵ်ႇတင်းလွင်ႈတၢင်းဢၼ်လီဢၢမ်းယူႇၵႃႈၼိူဝ်မႂ်း ဢိၵ်ႇတင်းၵႃႈၼိူဝ်ၸိူဝ်ႉၶိူဝ်းမႂ်းယူႇတႃႇသေႇဢမ်ႇထၢတ်ႇဢေႃႈ။-

47ၵွပ်ႈပိူဝ်ႈဢၼ်မႂ်းဢမ်ႇပႃးတင်းၸႂ်ဢၼ်ၸူမ်းသိူဝ်း၊ ၸႂ်ဢၼ်မူၼ်ႈပျေႃႇလူၺ်ႈလွင်ႈတၢင်းဢၼ်မၢၵ်ႈမီးပျေႉၸုမ်ႇဝႆႉ တင်းၵႃႈဢၼ်မီးၼၼ်ႉသေလႄႈ ပွင်ႁဵတ်းဢမူႉၽြႃးပဵၼ်ၸဝ်ႈမႂ်းထႃႇဝရႃႉၽြႃးလႄႈ၊-

48မႂ်းတၵ်းလႆႈပႃးဢဝ်တင်းတၢင်းဢၼ်တွင်ႉမႆႈသႆႈလိူတ်ႇ၊ တၢင်းဢၼ်ယၢၵ်ႇၼမ်ႉ၊ တၢင်းဢၼ်ဢမ်ႇမီးၶူဝ်းၼုင်ႈယူႇတူဝ်ပူၺ်၊ တၢင်းဢၼ်ယၢၵ်ႈၽၢၼ်ၼႂ်းလွင်ႈတၢင်းၵူႈၸိူဝ်ႉၵူႈပိူင်ၸိူဝ်းၼၼ်ႉသေလႄႈ ပွင်ႁဵတ်းဢမူႉရၢၼ်ႇသူႇမႂ်းတင်းလၢႆ ဢၼ်ထႃႇဝရႃႉၽြႃး ပွႆႇၸႂ်ႉမႃးတိုၵ်းတေႃးမႂ်းၼၼ်ႉဢေႃႈ။ မၼ်းၸဝ်ႈတၵ်းဢဝ်ၵၢၼ်းလဵၵ်းတၢင်ႇသႂ်ႇဝႆႉၵႃႈၼိူဝ်ၶေႃးမႂ်း တေႃႇထိုင်ႁွတ်ႈထၼ်ႈပေႃးမၼ်းၸဝ်ႈယႃႉၽဵဝ်ႈမႂ်းပႅတ်ႈၼၼ်ႉဢေႃႈ။-

49ထႃႇဝရႃႉၽြႃးတၵ်းႁွင်ႉဢဝ်ၵူၼ်းမဵဝ်းဢၼ်ၶၼ်ၽႂ်းၸိူဝ်ႉၼင်ႇဢၼ်ႁုင်ႉလူင်ၸၢင်ႈမိၼ်ၼၼ်ႉ၊ ၵူၼ်းမဵဝ်းဢၼ်မႂ်းဢမ်ႇၸၢင်ႈႁူႉၵႂၢမ်းၶဝ်၊-

50ၵူၼ်းမဵဝ်းဢၼ်ပျေႉၸုမ်ႇတင်း ၼႃႈဢၼ်လိူင်းၵျၢမ်းၼႃႇယူႇသေလႄႈ ဢမ်ႇၸၢင်ႈရူဝ်ႇသေႇၵူဝ်ယမ်ၵေႃႉဢၼ်ဢသၢၵ်ႈယႂ်ႇ၊ ဢမ်ႇၸၢင်ႈဢဵတ်းလူၵေႃႉဢၼ်ဢသၢၵ်ႈလဵၵ်ႉၼၼ်ႉသေၵႃႈတီႈႁိမ်းလႅၼ်သုတ်းလိၼ်မိူင်းတီႈဢၼ်ၵႆပုၼ်ႉ မႃးတိုၵ်းတေႃးမႂ်းဢေႃႈ။-

51ၵူၼ်းမဵဝ်းၼၼ်ႉ တၵ်းလႆႈၵိၼ်မၢၵ်ႇတွင်ႉတရိၵ်ႈသၢၼ်ႇမႂ်း၊ မၢၵ်ႇလိၼ်ႁူင်းလိၼ်မႂ်း တေႃႇထိုင်ႁွတ်ႈမႂ်းထၼ်ႈပေႃးလူႉလႅဝ်ဢေႃႈ။ တၵ်းဢမ်ႇဝႆႉၵိုတ်းဝႆႉၵျၢၼ်ႇၶဝ်ႈပိူၵ်ႇၶဝ်ႈသၢၼ်၊ ၼမ်ႉၸပိတ်ႈ၊ ၼမ်ႉမၼ်း၊ တၢင်းဢၼ်ယႂ်ႇၽႄႈတူဝ်းတွၼ်းမႃးတီႈဝူဝ်းမႂ်း၊ တူဝ်လဵၵ်ႉတူဝ်ဢွၼ်ႇၵႃႈၼႂ်းၽုင်သူဝ်းၽုင်ပႄႉမႂ်းၼၼ်ႉလႃးလႃး တေႃႇထိုင်ႁွတ်ႈထၼ်ႈပေႃး မၼ်းၸဝ်ႈႁႂ်ႈမႂ်းလူႉလႅဝ်ဢေႃႈ။-

52တၵ်းလွမ်ႉႁွပ်ႈမႂ်းဝႆႉၵႃႈၼႂ်းၽၵ်းတူဝဵင်းမႂ်းၵႃႈမီးၸိူဝ်းၼၼ်ႉ တေႃႇထိုင်ႁွတ်ႈထၼ်ႈပေႃးလမ်းဝဵင်းဢၼ်သုင်ၼႃႇလႄႈမၼ်ႈၶိူင်ႇ၊ ဢၼ်မႂ်းဢိင်ပိုင်ႈယူႇ ၵႃႈၼႂ်းမိူင်းမႂ်းတင်းမိူင်းၼၼ်ႉၸိူဝ်းၼၼ်ႉ ၵိူၼ်ႇတူၵ်းပင်းတူၵ်းဢေႃႈ။ တၵ်းလွမ်ႉႁွပ်ႈမႂ်းဝႆႉၵႃႈၼႂ်းၽၵ်းတူဝဵင်းမႂ်းၵႃႈမီး ၵႃႈၼႂ်းမိူင်းဢၼ်ထႃႇဝရႃႉၽြႃး ၽြႃးပဵၼ်ၸဝ်ႈမႂ်းပၼ်တီႈမႂ်းၼၼ်ႉတင်းမိူင်းဢေႃႈ။-

53မိူဝ်ႈဢၼ်လွမ်ႉႁွပ်ႈဝႆႉၼင်ႇၼၼ်လႄႈ မႂ်းၵိတ်ႇၸႂ်ၵႅၼ်းၸႂ်လူၺ်ႈတၢင်းဢၼ်ရၢၼ်ႇသူႇမႂ်း ႁႂ်ႈမႂ်းၵိတ်ႇၸႂ်ၵႅၼ်းၸႂ်ယူႇၼၼ်ႉၸိုင်၊ မႂ်းတၵ်းလႆႈၵိၼ်မၢၵ်ႇတူဝ်ၶၼ်ႇထႃႇမႂ်းဢၼ်ဝႃႈ ၼိူဝ်ႉလုၵ်ႈၸၢႆးမႂ်းလုၵ်ႈယိင်းမႂ်း ဢၼ်ထႃႇဝရႃႉၽြႃး ၽြႃးပဵၼ်ၸဝ်ႈမႂ်းပၼ်တီႈမႂ်းၼၼ်ႉဢေႃႈ။-

54မိူဝ်ႈဢၼ်လွမ်ႉႁွပ်ႈဝႆႉၼင်ႇၼၼ်လႄႈ မႂ်းၵိတ်ႇၸႂ်ၵႅၼ်းၸႂ်လူၺ်ႈတၢင်းဢၼ်ရၢၼ်ႇသူႇမႂ်း ႁႂ်ႈမႂ်းၵိတ်ႇၸႂ်ၵႅၼ်းၸႂ်ယူႇၵႃႈၼႂ်းၽၵ်းတူဝဵင်းမႂ်းၵႃႈမီးၸိူဝ်းၼၼ်ႉယူႇၼၼ်ႉၸိုင်၊ ၵူၼ်းၸၢႆးဢၼ်ၼိူဝ်ႉဢူၼ်ႈၼိူဝ်ႉဢွၼ်ႇ ၼုမ်ႇလီမူႈလီၼႃႇလူင်လၢင်ၼၼ်ႉ၊ တၵ်းမီးၸႂ်ဢၼ်သီႈၵေႉႁေႈတႃတီႈပီႈၼွင်ႉမၼ်း ဢိၵ်ႇတင်းမေးမၼ်း ဢၼ်မီးၵႃႈၼႂ်းဝၢင်ႈႁူဝ်ဢူၵ်းမၼ်း၊ တင်းလုၵ်ႈမၼ်းလၢင်းမၼ်း ဢၼ်ယင်းၵိုတ်းဝႆႉၵျၢၼ်ႇဝႆႉတီႈမၼ်းၼၼ်ႉ၊-

55ထၼ်ႈပေႃးဢမ်ႇမႅင်ႇပၼ်ၽႄပၼ်ၼိူဝ်ႉလုၵ်ႈမၼ်းလၢင်းမၼ်းဢၼ်မၼ်းၵိၼ်ယူႇၼၼ်ႉ ၵွပ်ႈပိူဝ်ႈဢၼ်တၢင်းၵိၼ်တၢင်းၶူပ်း ဢမ်ႇၵိုတ်းဢမ်ႇၵျၢၼ်ႇဝႆႉတီႈမၼ်းသေၸိူဝ်ႉသေပိူင်လႃးလႃးၼၼ်ႉဢေႃႈ။-

56မိူဝ်ႈဢၼ်လွမ်ႉႁွပ်ႈဝႆႉၼင်ႇၼၼ်လႄႈ မႂ်းၵိတ်ႇၸႂ်ၵႅၼ်းၸႂ်လူၺ်ႈတၢင်းဢၼ်ရၢၼ်ႇသူႇမႂ်း ႁႂ်ႈမႂ်းၵိတ်ႇၸႂ်ၵႅၼ်းၸႂ်ၵႃႈၼႂ်းၽၵ်းတူဝဵင်းမႂ်းၵႃႈမီးၸိူဝ်းၼၼ်ႉယူႇၼၼ်ႉၸိုင်၊ မႄႈယိင်းဢၼ်ၼိူဝ်ႉဢူၼ်ႈၼိူဝ်ႉဢွၼ်ႇ ၼုမ်ႇလီမူႈလီၼႃႇလူင်လၢင်လႄႈ ဢမ်ႇႁတ်းယဵပ်ႇႁတ်းတမ်းတီႈလိၼ် ၵွပ်ႈပိူဝ်ႈတၢင်းဢၼ်ၼိူဝ်ႉမၼ်းဢူၼ်ႈလီဢွၼ်ႇလီ၊ ၼုမ်ႇလီမူႈလီၼၼ်ႉ တၵ်းမီးၸႂ်ဢၼ်သီႈၵေႉႁေႈတႃတီႈၽူဝ်မၼ်း ဢၼ်မီးၵႃႈၼႂ်းဝၢင်ႈႁူဝ်ဢူၵ်းမၼ်း ဢိၵ်ႇတင်းလုၵ်ႈၸၢႆးမၼ်းလုၵ်ႈယိင်းမၼ်း၊-

57လူၺ်ႈလွင်ႈႁႄႇဢၼ်ဢွၵ်ႇသေၵႃႈၼႂ်းဝူင်ႈၵၢင်ၶႃၵၢင်တိၼ်မၼ်းတင်းလုၵ်ႈဢွၼ်ႇဢၼ်မၼ်းၵိူတ်ႇလဵင်ႉမႃးၼၼ်ႉသေလႄႈ လွမ်ၵိၼ်တဵတ်ႇတဵတ်ႇၵူၺ်းမၼ်း ၵွပ်ႈပိူဝ်ႈဢၼ်ဢမ်ႇမီးတၢင်းၵိၼ်တၢင်းၶူပ်းသေၸိူဝ်ႉသေပိူင်လႃးလႃးၼၼ်ႉဢေႃႈ။-

58ပေႃးမႂ်းယင်းဢမ်ႇပႂ်ႉၸွမ်းၵမ်ၵျၢင်ႉၵႂၢမ်းတြႃးၼႆႉၵူႈၸိူဝ်ႉၵူႈပိူင် ဢၼ်တႅမ်ႈသႂ်ႇဝႆႉၵႃႈၼႂ်းၵျၢမ်းလိၵ်ႈၼႆႉၼၼ်ႉ ႁႂ်ႈလႆႈၵူဝ်လႆႈႁႄၼႃႇမႃႉၸိုဝ်ႈသဵင်ဢၼ်မုၼ်ယႂ်ႇၼႃႇလႄႈ လီၵူဝ်လီႁႄဢၼ်ဝႃႈ ထႃႇဝရႃႉၽြႃး ၽြႃးပဵၼ်ၸဝ်ႈမႂ်းၼၼ်ႉယူႇၸိုင်၊-

59ထႃႇဝရႃႉၽြႃးတၵ်းႁႂ်ႈၽေးဢၼ်မႂ်းလႆႈၶၢမ်ႇ၊ ၽေးဢၼ်ၸိူဝ်ႉၶိူဝ်းမႂ်းလႆႈၶၢမ်ႇၸိူဝ်းၼၼ်ႉ ပဵၼ်ၽေးဢၼ်လီဢၢမ်း၊ ၽေးဢၼ်ယႂ်ႇၼႃႇလႄႈမၼ်ႈၶိူင်ႇ၊ ဝူၺ်ႇတၼႃႇတၢင်းၶႆႈတၢင်းပဵၼ်ဢၼ်ႁႅင်းယႂ်ႇၼႃႇလႄႈမၼ်ႈၶိူင်ႇဢေႃႈ။-

60လိူဝ်သေၼၼ်ႉ မၼ်းၸဝ်ႈတၵ်းႁႂ်ႈတၢင်းၶႆႈတၢင်းပဵၼ် မိူင်း ဢေႇၵိပ်ႉတူႉ ဢၼ်မႂ်းၸၢင်ႈၵူဝ်ၸၢင်ႈႁႄၵႃႈမီးၸိူဝ်းၼၼ်ႉ တူၵ်းႁွတ်ႈၵႃႈၼိူဝ်မႂ်းသေလႄႈ တၢင်းၶႆႈတၢင်းပဵၼ်ၸိူဝ်းၼၼ်ႉ တၵ်းၸပ်းၸွႆးယူႇတီႈမႂ်းဢေႃႈ။-

61လိူဝ်သေၼၼ်ႉ ထႃႇဝရႃႉၽြႃးတၵ်းႁႂ်ႈတၢင်းၶႆႈတၢင်းပဵၼ်၊ ၽေးဢူႉပၢတ်ႈ ဢၼ်ဢမ်ႇတႅမ်ႈသႂ်ႇဝႆႉၵႃႈတီႈၵျၢမ်းပိင်းၺၢပ်ႈတီႈၼႆႉၵႃႈမီးၸိူဝ်းၼၼ်ႉ တူၵ်းႁွတ်ႈၵႃႈၼိူဝ်မႂ်းတေႃႇထိုင်ႁွတ်ႈမႂ်းထၼ်ႈပေႃးလူႉလႅဝ်ဢေႃႈ။-

62ပိၵ်ႉသမ်ႉမႂ်းလႆႈၼမ်ၵိုၼ်းမိူၼ်ၸိူဝ်ႉၼင်ႇလၢဝ်ၵၢင်ႁၢဝ်သေၵေႃႈ၊ တၵ်းလႆႈပဵၼ်ဢၼ်လဵၵ်ႉဢၼ်ၵေႇ ၵွပ်ႈပိူဝ်ႈဢၼ်မႂ်းဢမ်ႇထွမ်ႇဢမ်ႇဢဝ်ၵႂၢမ်းထႃႇဝရႃႉၽြႃး ၽြႃးပဵၼ်ၸဝ်ႈမႂ်းၼၼ်ႉဢေႃႈ။-

63မိူၼ်ၸိူဝ်ႉၼင်ႇဢၼ်ထႃႇဝရႃႉၽြႃးၸူမ်းသိူဝ်းၵႃႈၼႂ်းလွင်ႈတၢင်းဢၼ် ႁဵတ်းၵျေးၸူးတီႈသူလႄႈ ႁႂ်ႈသူယႂ်ႇၽႄႈၼမ်ၵိုၼ်းၼၼ်ႉ၊ ထႃႇဝရႃႉၽြႃးတၵ်းသမ်ႉၸူမ်းသိူဝ်းၵႃႈၼႂ်းလွင်ႈတၢင်းဢၼ်ယႃႉၽဵဝ်ႈသူပႅတ်ႈလႄႈ ႁႂ်ႈဢၵျူဝ်းသူလူႉၼၼ်ႉသေလႄႈ သူတၵ်းလႆႈႁွတ်ႈထိုင်တၢင်းဢၼ်ၸၵ်ႉၼုၵ်ႈဢွၵ်ႇသေၵႃႈၼႂ်းမိူင်းဢၼ်မႂ်းတၵ်းၵႂႃႇလႄႈ ၶဝ်ႈၸၢမ်ႇၸႃးၼၼ်ႉဢေႃႈ။-

64ထႃႇဝရႃႉၽြႃးတၵ်းဢဝ်မႂ်းၸၢတ်ႇပိုၼ်ပႅတ်ႈၵႃႈၼႂ်း ၵူၼ်းၵူႈၸိူဝ်ႉၵူႈမဵဝ်း ၸႃႉၸဵမ်လႅၼ်သုတ်းလိၼ်မိူင်းၽၢၵ်ႇၼိုင်ႈ တေႃႇထိုင်ႁွတ်ႈလႅၼ်သုတ်းလိၼ်မိူင်းၽၢၵ်ႇၼိုင်ႈၼၼ်ႉသေလႄႈ မႂ်းတၵ်းလႆႈႁဵတ်းဝၢတ်ႈတီႈၽြႃးတၢင်ႇသူႇတၢင်ႇပႃး ဢၼ်မႂ်းဢိၵ်ႇတင်းပူႇမွၼ်ႇမႂ်းတင်းလၢႆဢမ်ႇတွၼ်ႉႁူႉ ဢၼ်ဝႃႈၽြႃးမႆႉ၊ ၽြႃးမၢၵ်ႇႁိၼ်ၸိူဝ်းၼၼ်ႉဢေႃႈ။-

65ၵႃႈၼႂ်းၵူၼ်းမဵဝ်းၸိူဝ်းၼၼ်ႉ မႂ်းတၵ်းဢမ်ႇလႆႈမီးတၢင်းဢၼ်သၢၵ်ႈသႃႇ။ ဢမ်ႇလႆႈမီးတီႈဢၼ်ၽႃႇတိၼ်မႂ်းတၵ်းယဵပ်ႇတၵ်းတမ်း။ ထႃႇဝရႃႉၽြႃးတၵ်းၸီႇယၢင်ႇပၼ် တၢင်းဢၼ်ႁူဝ်ၸႂ်သၼ်ႇဝႆ၊ တၢင်းဢၼ်မၢၵ်ႇတႃမုင်ႈတူၺ်းလႄႈႁႅင်းသဵင်ႈၵႂႃႇ၊ တၢင်းဢၼ်ငိၼ်းၽၢၼ်ထိုင်ၸႂ်ၸိူဝ်းၼၼ်ႉသေလႄႈ၊-

66ဢသၢၵ်ႈမႂ်းတၵ်းလႆႈႁွႆႈယွၼ်ႇဝႆႉ ၵႃႈတီႈၽၢႆႇၼႃႈမႂ်းယူႇ၊ တၵ်းမႆႈၸႂ်ၵူဝ်ယူႇတင်းဝၼ်းတင်းၶိုၼ်းလႄႈ ယင်းဢမ်ႇႁူႉလွင်ႈဢၼ် တၵ်းၵၢင်းလွတ်ႈတင်းၽေးတၢႆႁိုဝ်။ ဢမ်ႇၵၢင်းလွတ်ႈႁိုဝ်ၼၼ်ႉလႄႈယူႇဢေႃႈ။-

67ၶိင်ႇၵၢင်ၼႂ်ၼၼ်ႉ မႂ်းတၵ်းလၢတ်ႈလႄႈဝႃႈ၊ ႁႂ်ႈႁွတ်ႈထိုင်ၶိင်ႇၵၢင်ၶမ်ႈသေၵမ်းလူၺ်ႈ၊ ဝႃႈၼင်ႇၼႆလႄႈ ၶိင်ႇၵၢင်ၶမ်ႈၼၼ်ႉ မႂ်းတၵ်းလၢတ်ႈလႄႈဝႃႈ၊ ႁႂ်ႈႁွတ်ႈထိုင်ၶိင်ႇၵၢင်ၼႂ်သေၵမ်းလူၺ်ႈ၊ ဝႃႈၼင်ႇၼႆယူႇၵွပ်ႈပိူဝ်ႈလွင်ႈတၢင်းဢၼ်ႁူဝ်ၸႂ်မႂ်းၵူဝ်ႁႄ ဢၼ်မႂ်းလႆႈၵူဝ်ႁႄၼၼ်ႉ ဢိၵ်ႇတင်းၵွပ်ႈပိူဝ်ႈလွင်ႈတၢင်းဢၼ်မၢၵ်ႇတႃမႂ်းလႆႈႁၼ်ၼၼ်ႉဢေႃႈ။-

68ထႃႇဝရႃႉၽြႃးသမ်ႉတၵ်းဢဝ်ႁိူဝ်းသၢင်းၽေႃးဢဝ်မႂ်းၵႂႃႇသူင်ႇ ၵႃႈတီႈမိူင်း ဢေႇၵိပ်ႉတူႉ ၸွမ်းသဵၼ်ႈတၢင်းဢၼ်မၼ်းၸဝ်ႈ မီးဢမိင်ႉတီႈမႂ်းလႄႈဝႃႈ၊ သဵၼ်ႈတၢင်းၼၼ်ႉၸိုင် ၵမ်းလိုၼ်းမႂ်းဢမ်ႇလႆႈႁၼ်၊ ဝႃႈၼင်ႇၼႆသေလႄႈ သူတၵ်းလႆႈၶၢမ်ႇတၢင်းဢၼ် ဢဝ်ၶၢႆပၼ်တီႈရၢၼ်ႇသူႇသူ ႁႂ်ႈလႆႈပဵၼ်ၶႃႈၵူၼ်းၸၢႆး၊ ၶႃႈၵူၼ်းယိင်းၵႃႈၼႂ်းမိူင်းၼၼ်ႉလႄႈ ၽူႈလႂ်သေၵေႃႉသေၵူၼ်း တၵ်းဢမ်ႇမီးဢလူဝ်ႇၶႂ်ႈသိုဝ်ႉဢဝ်မႂ်း၊ ဝႃႈၼင်ႇၼႆဢေႃႈ။