Deuteronomy 32 — Shan

1ၽႃႉၵၢင်ႁၢဝ်ဢိူၺ်း၊ ဝၢႆႇႁူတေႃႇၵဝ်တႃႉ။ ၵဝ်တၵ်းလၢတ်ႈဢေႃႈ။ လိၼ်မိူင်းဢိူၺ်း၊ ထွမ်ႇငိၼ်းၵႂၢမ်းဢၼ်ၵဝ်ဝႃႈဢွၵ်ႇသူပ်းၼႆႉတႃႉ။-

2တေႇသၼႃႇၵဝ်တၵ်းယွတ်ႇတူၵ်းယူႇ မိူၼ်ၸိူဝ်ႉၼင်ႇၼမ်ႉၽူၼ်လႄႈ ၵႂၢမ်းၵဝ်တၵ်းဢွႆတူၵ်းယူႇမိူၼ်ၸိူဝ်ႉၼင်ႇၼမ်ႉၼၢႆးဢေႃႈ။ တၵ်းပဵၼ်မိူၼ်ၸိူဝ်ႉၼင်ႇၽူၼ်ယွႆးဢၼ်တူၵ်းသႂ်ႇၵႃႈၼိူဝ်တူၼ်ႈၵႃႈဢၼ်ၼုမ်ႇလီဢူၼ်ႈလီ ဢိၵ်ႇတင်းမိူၼ်ၸိူဝ်ႉၼင်ႇႁႃႇၽူၼ်ၵႃႈၼိူဝ် တူၼ်ႈယိူဝ်ႈတူၼ်ႈယႃႈၼၼ်ႉဢေႃႈ။-

3ၵဝ်တၵ်းႁွင်ႉပၢဝ်ႇႁွင်ႉလၢတ်ႈလူၺ်ႈလွင်ႈ ၼႃႇမႃႉၸိုဝ်ႈသဵင်ထႃႇဝရႃႉၽြႃးလႄႈ၊ ဢွၼ်ၵၼ်ယွင်ႈယေႃးမုၼ်ဢႃႇၼူႉၽေႃႇ ၽြႃးပဵၼ်ၸဝ်ႈႁဝ်းၼၼ်ႉတႃႉ။-

4မၢၵ်ႇႁိၼ်မၢၵ်ႇၽႃၼၼ်ႉဢမူႉမၼ်းၸဝ်ႈ ပဵၼ်ဢၼ်ၸေးၸုမ်ႇဝႆႉလႄႈ သဵၼ်ႈတၢင်းမၼ်းၸဝ်ႈၵႃႈမီးၼၼ်ႉ မႅၼ်ႈၸွမ်းတြႃးဝႆႉဢေႃႈ။ မၼ်းၸဝ်ႈပဵၼ်ၽြႃးဢၼ်ပႂ်ႉသဵတ်ႈၸႃႇ၊ ဢၼ်ၵၢင်းလွတ်ႈတင်းဢပႅတ်ႈလႄႈ ပဵၼ်ဢၼ်ၸိုဝ်ႈၸႂ်ႈသိုဝ်ႈတေႃႇဢေႃႈ။-

5ၶဝ်ႁဵတ်းႁၢႆႉႁဵတ်းမိူၵ်ႈ တီႈမၼ်းၸဝ်ႈယဝ်ႉ။ ဢမ်ႇၸႂ်ႈလုၵ်ႈၸႂ်ႈလၢင်းမၼ်းၸဝ်ႈယဝ်ႉ။ ပဵၼ်ဢၼ်ၵူဝ်ႈဢၼ်ၵႂၵ်းဝႆႉတီႈၶဝ်ယဝ်ႉ။ ၶဝ်ပဵၼ်မဵဝ်းဢၼ်ၸၢင်ႈပႅၼ်းၸၢင်ႈႁၢႆႉလႄႈ ၸႂ်ၵူတ်ႉၸႂ်ငေႃးဢေႃႈ။-

6ၵူၼ်းဢၼ်မိူၵ်ႈလႄႈ ဢမ်ႇမီးပိင်ႇၺႃႇၶဝ်ဢိူၺ်း၊ သူတၵ်းတွပ်ႇတႅၼ်းၶိုၼ်းၵျေးၸူးထႃႇဝရႃႉၽြႃးၸိူဝ်ႉၼင်ႇၼၼ်ႁိုဝ်။ မၼ်းၸဝ်ႈပဵၼ်ပေႃႈဢၼ်ႁႂ်ႈမႂ်းပဵၼ်မႃးဢမ်ႇၸႂ်ႈႁိုဝ်။ ႁဵတ်းႁႂ်ႈမႂ်းပဵၼ်လႄႈႁႂ်ႈတႄႇယူႇဢမ်ႇၸႂ်ႈႁိုဝ်။-

7ၶုၵ်းၸႂ်လႆႈၶႆႈၸႂ်ထူပ်း ၶိင်ႇမိုဝ်ႉဝၼ်းမိူဝ်ႈၵွၼ်ႇဢွၼ်ၼႆႉၸိူဝ်းၼၼ်ႉတႃႉ။ ၶႆႈၸႂ်ဝူၼ်ႉၸႂ်လူၺ်ႈၶူပ်ႇပီႊဢၼ်သိုပ်ႇတၢမ်းလၢမ်းမႃးၼမ်ၼႃႇယဝ်ႉၸိူဝ်းၼၼ်ႉတႃႉ။ တွင်ႈထၢမ်တီႈပေႃႈမႂ်းတႃႉ။ မၼ်းတၵ်းၽုၺ်ႇဢွၵ်ႇၼႄပျႃးတီႈမႂ်းဢေႃႈ။ တွင်ႈထၢမ်တီႈၵူၼ်းထဝ်ႈၵူၼ်းၵႄႇမႂ်းတင်းလၢႆတႃႉ။ ၶဝ်တၵ်းမွၵ်ႇတၵ်ႉလၢတ်ႈတီႈမႂ်းဢေႃႈ။-

8မိူဝ်ႈဢၼ်ၽြႃးဢၼ်သုင်ၼႃႇသေပိူၼ်ႈ ဢဝ်လိၼ်ဢမူၺ်ႇမႅင်ႇပၼ်တီႈၵူၼ်းၵူႈမဵဝ်းလႄႈ ၽႄၸိူဝ်ႉၶိူဝ်းၵူၼ်းတင်းလၢႆဝႆႉၼၼ်ႉၸိုင်၊ မၼ်းၸဝ်ႈၸီႇယၢင်ႇဢၼ်ၶႅၼ်ႈဢၼ်ၶၼ်ႈတီႈယူႇၵူၼ်းၵူႈၸိူဝ်ႉၵူႈမဵဝ်း ၸွမ်းလူၺ်ႈတၢင်းဢၼ်ၼပ်ႉဢၼ်ဢၢၼ်ႇၵူၼ်းမဵဝ်း ဢီႉသရေႇလႃႉ တင်းလၢႆဢေႃႈ။-

9ပုၼ်ႈတႃႇထႃႇဝရႃႉၽြႃးၸမ်ႉ၊ ပဵၼ်မဵဝ်းၵူၼ်းမၼ်းၸဝ်ႈဢေႃႈ။ မဵဝ်း ယႃႇၵုပ်ႈ ၼၼ်ႉ ပဵၼ်တီႈဢၼ်မၼ်းၸဝ်ႈ ၶၢမ်ႇဢမူၺ်ႇဢေႃႈ။-

10မၼ်းၸဝ်ႈထူပ်းႁၼ်မၼ်းၵႃႈၼႂ်းတီႈဢၼ်သဵတ်ႇၵူၼ်းယဵၼ်ၵူၼ်း ၵႃႈၼႂ်းထိူၼ်ႇၼႂ်းၶိူဝ်း ဢၼ်ပဝ်ႇဢၼ်လၢပ်ႈဝႆႉလႄႈ တူဝ်ႁၢႆႉတူဝ်ၵျၢမ်းႁွင်ႉယူႇၶၢင်းယူႇၼၼ်ႉဢေႃႈ။ မၼ်းၸဝ်ႈလွမ်ႉႁွပ်ႈၵႅတ်ႇၶေႇႁႄႉၵင်ႈမၼ်းယူႇ၊ လုမ်းလႃးပႂ်ႉထိင်းမၼ်းယူႇသေလႄႈ ပႂ်ႉလူပႂ်ႉတူၺ်းမၼ်းယူႇမိူၼ်ၸိူဝ်ႉၼင်ႇႁူၺ်ႇတႃဢေႃႈ။-

11ၸိူဝ်ႉၼင်ႇဢၼ် လၢင်းတႃႉၶမ်းယႃႉတဝ်ႉႁင်းမၼ်းယူႇသေလႄႈ မိၼ်ယွပ်ႇယူႇၵႃႈၼိူဝ်လုၵ်ႈဢွၼ်ႇမၼ်းၼၼ်ႉ မၼ်းၸဝ်ႈၵီႈပိၵ်ႇမၼ်းၸဝ်ႈယူႇ၊ ဢဝ်ၶဝ်ယူႇသေလႄႈ ဢဝ်တၢင်ႇၵႃႈၼိူဝ်ပိၵ်ႇမၼ်းၸဝ်ႈၵႂႃႇလႄႈ၊-

12ထႃႇဝရႃႉၽြႃးပႃးလဵဝ်ၵူၺ်း ဢဝ်မၼ်းသူင်ႇဢေႃႈ။ ၽြႃးတၢင်ႇသူႇတၢင်ႇပႃးဢမ်ႇမီးလူၺ်ႈၵၼ်တင်းမၼ်းၼၼ်ႉလႃးလႃး။-

13မၼ်းၸဝ်ႈႁႂ်ႈမၼ်းၶီႇယဵပ်ႇၵႃႈၼိူဝ်ထႃႇၼႃႉ တီႈဢၼ်သုင်မျၢတ်ႈၼႃႇ ၵႃႈတီႈလိၼ်မိူင်းၼႆႉၸိူဝ်းၼၼ်ႉၵႂႃႇ ဢိၵ်ႇတင်းႁႂ်ႈမၼ်းၵိၼ်တၢင်းဢၼ်ယႂ်ႇၽႄႈတူဝ်းတွၼ်းမႃး တီႈႁႆႊတီႈၼႃးလႄႈ ႁႂ်ႈမၼ်းသူတ်ႉလုတ်ႇၼမ်ႉၽိုင်ႈၵႃႈၼႂ်းမၢၵ်ႇႁိၼ်၊ ၼမ်ႉမၼ်းၵႃႈၼႂ်းမၢၵ်ႇႁိၼ်လဵၵ်းပၢႆႇ၊-

14ၼမ်ႉၼူမ်းဝူဝ်းဢၼ်ၵၢမ်ႈ၊ ၼမ်ႉၼူမ်းသူဝ်း၊ ၵွၼ်ႈၶႆၵွၼ်ႈမၼ်းသူဝ်းဢွၼ်ႇ ဢိၵ်ႇတင်းသူဝ်းပေႃႈမဵဝ်း ပႃႇသၢၼ်ႇ ၊ ပႄႉပေႃႈတင်းလၢႆ၊ ၵွၼ်ႈၶႆၵွၼ်ႈမၼ်းမၢၵ်ႇလၼ်း ၶဝ်ႈၵျုင်ႇၸိူဝ်းၼၼ်ႉလႄႈ၊ မႂ်းလႆႈၵိၼ်လိူတ်ႈမၢၵ်ႇၸပိတ်ႈဢၼ်ၸႅတ်ႈဢေႃႈ။

15ၼႂ်းဝႃႈၼၼ်သေၵေႃႈ ယေႇသူႉရုၼ်ႇ ၼၼ်ႉ ပီးမၼ်းမႃးလႄႈ၊ ဢဝ်တိၼ်ပိတ်ႉဢေႃႈ။ ပီးမၼ်းယူႇ၊ ပီးပုၵ်းယူႇ၊ ပျေႉၸုမ်ႇတင်းၵွၼ်ႈၶႆၵွၼ်ႈမၼ်းယူႇသေလႄႈ ၸုၼ်ႉပႅတ်ႈၽြႃးပဵၼ်ၸဝ်ႈ ဢၼ်ႁဵတ်းႁႂ်ႈမၼ်းပဵၼ်ၼၼ်ႉလႄႈ ႁဵတ်းဢမ်ႇပေႃးၼင်ႇႁိုဝ် တီႈမၢၵ်ႇႁိၼ်မၢၵ်ႇၽႃ တီႈဢၼ်ၵႄႇသႄႇၶျွတ်ႈဢဝ်မၼ်းၼၼ်ႉဢေႃႈ။-

16ၶဝ်ဢဝ်ၽြႃးတၢင်ႇသူႇတၢင်ႇပႃးႁႂ်ႈမၼ်းၸဝ်ႈၽိတ်းၸႂ်ဢေႃႈ။ ၶဝ်ဢဝ်လွင်ႈတၢင်းဢၼ် လီႁင်ႈဢဵတ်ႇသဵတ်ႇ တိုၵ်းယူင်းတၢင်းၸႂ်မႆႈၶႆႈၸႃႉမၼ်းၸဝ်ႈဢေႃႈ။-

17ၶဝ်ပုၵ်ႈၸေႃႇယိတ်ႈတီႈၽီႁၢႆႉဢၼ်ဢမ်ႇၸႂ်ႈၽြႃး၊ ၽြႃးဢၼ်ၶဝ်ဢမ်ႇတွၼ်ႉႁူႉၸၵ်း၊ ၽြႃးဢၼ်မႂ်ႇဢၼ်ပူႇမွၼ်ႇသူဢမ်ႇတွၼ်ႉၵူဝ်တွၼ်ႉႁႄၸိူဝ်းၼၼ်ႉဢေႃႈ။-

18မႂ်းဢမ်ႇမၢတ်ႈဢမ်ႇတွင်းမၢၵ်ႇႁိၼ်မၢၵ်ႇၽႃဢၼ်ႁႂ်ႈမႂ်းပဵၼ်မႃးၼၼ်ႉ။ မႂ်းလူင်လိုမ်းၽြႃးပဵၼ်ၸဝ်ႈ ဢၼ်ၵိူတ်ႇလဵင်ႉမႂ်းမႃးၼၼ်ႉပႅတ်ႈယဝ်ႉ။-

19ထႃႇဝရႃႉၽြႃးႁၼ်လွင်ႈတၢင်းၼၼ်ႉလႄႈ ၶၢၼ်ႉႁၼ်ၶဝ်ၵွပ်ႈပိူဝ်ႈတၢင်းဢၼ် လုၵ်ႈၸၢႆးလုၵ်ႈယိင်းမၼ်းၸဝ်ႈ ၸုၼ်ႉပႅတ်ႈမၼ်းၸဝ်ႈၼၼ်ႉသေယဝ်ႉ၊-

20မီးဢမိင်ႉလႄႈဝႃႈ၊ ၵဝ်တၵ်းဝၢႆႇၼႃႇၵဝ်ပႅတ်ႈသေၵႃႈတီႈၶဝ်ဢေႃႈ။ ၵဝ်တၵ်းတူၺ်းတီႈသုတ်းၶဝ်တၵ်းပဵၼ်ၸိူဝ်ႉၼင်ႇႁိုဝ်ၼၼ်ႉဢေႃႈ။ ၶဝ်ပဵၼ်မဵဝ်းဢၼ်သၽေႃးၵႅၼ်ႇၶႅင်၊ လုၵ်ႈၸၢႆးလုၵ်ႈယိင်းဢၼ်ဢမ်ႇမီးသဵတ်ႈၸႃႇဢေႃႈ။-

21ၶဝ်ဢဝ်လွင်ႈတၢင်းဢၼ်ဢမ်ႇၸႂ်ႈၽြႃး ႁဵတ်းႁႂ်ႈၵဝ်ၽိတ်းၸႂ်ယဝ်ႉ။ ၶဝ်ဢဝ်လွင်ႈတၢင်းဢၼ်လၢႆလၢႆဢမ်ႇပွင်လွင်ႈၵႃႈသင်ၼၼ်ႉ တိုၵ်းယူင်းတၢင်းၸႂ်မႆႈၶႆႈၸႃႉၵဝ်ယဝ်ႉ။ ပိူဝ်ႈၼႆလႄႈ ၵဝ်တၵ်းဢဝ်ၵူၼ်းမဵဝ်းဢၼ်ဢမ်ႇလႆႈလွင်ႈၼၼ်ႉ၊ ႁဵတ်းႁႂ်ႈၶဝ်ၽိတ်းၸႂ်ဢေႃႈ။ ၵဝ်တၵ်းဢဝ်မဵဝ်းၵူၼ်းဢၼ်ဢမ်ႇမီးပိင်ႇၺႃႇၼၼ်ႉ ႁဵတ်းႁႂ်ႈၶဝ်ၸႂ်မႆႈၶႆႈၸႃႉဢေႃႈ။-

22တၢင်းၸႂ်မႆႈၶႆႈၸႃႉၵဝ်ဢွၵ်ႇလႄႈပဵၼ်ၽႆးသေယဝ်ႉ၊ တၵ်းမႆႈတေႃႇထိုင်ႁွတ်ႈမိူင်းမရၼႃႉ တီႈဢၼ်လိုၵ်ႉၼႃႇ သေပိူၼ်ႈၼၼ်ႉဢေႃႈ။ တၵ်းႁႂ်ႈလိၼ် ဢိၵ်ႇတင်းတၢင်းဢၼ်ယႂ်ႇၽႄႈတူဝ်းတွၼ်းမႃးတီႈမၼ်းမႆႈသုတ်းၵႂႃႇလႄႈ တုတ်ႇၽဝ်ႁၢၵ်ႈလွႆတိၼ်လွႆပႅတ်ႈဢေႃႈ။-

23ၵဝ်တၵ်းဢဝ်ၽေးဢူႉပၢတ်ႈတင်းလၢႆ ၸူႉၵွင်ဝႆႉၵႃႈၼိူဝ်ၶဝ်ဢေႃႈ။ ၵဝ်တၵ်းယိုဝ်းပိုၼ်ၵဝ်တင်းသဵင်ႈတင်းမူတ်းသႂ်ႇတီႈၶဝ်ဢေႃႈ။-

24ၶဝ်တၵ်းလႆႈၶၢမ်ႇတၢင်းဢၼ်ယွမ်ၵႂႃႇႁဵဝ်ႇၵႂႃႇလူၺ်ႈတၢင်းဢၼ်ဢိုပ်းဢၼ်ယၢၵ်ႈၼၼ်ႉလႄႈ သုမ်းၸွမ်းလူၺ်ႈတၢင်းဢၼ်မႆႈႁွၼ်ႉပဵၼ်ႁႃႈၵႃႇလႃႉ ဢိၵ်ႇတင်းၽေးတၢင်းဢၼ်ယႃႉပႅတ်ႈဢၼ်ၶူမ်ၶတ်းၼႃႇၼၼ်ႉဢေႃႈ။ ၵဝ်တၵ်းပွႆႇၸႂ်ႉၶဵဝ်ႈတူဝ်ႁၢႆႉ ဢိၵ်ႇတင်းၵွင်ႉတူဝ်ဢၼ်ၸၢင်ႈ လိူၼ်ႈၸၢင်ႈၵၢၼ်း ၵႃႈၼိူဝ်လိၼ်ၸိူဝ်းၼၼ်ႉၸူးတီႈၶဝ်ဢေႃႈ၊-

25ၽေးလၢပ်ႇၵႃႈတီႈၼွၵ်ႈႁိူၼ်း၊ ၽေးဢၼ်လီၵူဝ်လီႁႄၵႃႈတီႈၼႂ်းႁိူၼ်း တၵ်းယႃႉၽဵဝ်ႈၽူႈမၢဝ်ႇဢိၵ်ႇတင်းၽူႈသၢဝ်၊ လုၵ်ႈဢွၼ်ႇဢၼ်ၵိၼ်ၼူမ်း ဢိၵ်ႇတင်းၵေႃႉဢၼ်ႁူဝ်ႁွၵ်ႇၼၼ်ႉပႅတ်ႈဢေႃႈ။-

26သင်ၵဝ်ဢမ်ႇၵူဝ်ဢမ်ႇႁႄမၢၼ်ႇမႃႇၼႃႉရၢၼ်ႇသူႇ၊-

27သင်ၵဝ်ဢမ်ႇၵူဝ်ၶဝ်ၸိူဝ်းဢၼ် ႁဵတ်းၶတ်းၵၼ်တင်းၶဝ်ၼၼ်ႉတၵ်းဢဝ်ၽိတ်းဢဝ်ပိူင်ႈသေလႄႈလၢတ်ႈဝႃႈ၊ ႁဝ်းမီးမိုဝ်းဢၼ်သုင်ၼႃႇယဝ်ႉ။ ထႃႇဝရႃႉၽြႃးဢမ်ႇႁဵတ်းဢမူႉၼႆႉတင်းသဵင်ႈတင်းမူတ်းၵူၺ်ႉ၊ ဝႃႈၼင်ႇၼႆၼၼ်ႉၸိုင်၊ ၵဝ်မီးတၢင်းၵျၢမ်ႇတၢင်းပွင် တၵ်းဢဝ်ၶဝ်ၸၢတ်ႇပိုၼ်ပႅတ်ႈတီႈဢၼ်ၵႆလႄႈ ႁႂ်ႈတၢင်းဢၼ်ၶုၵ်းၸႂ်လႆႈၶႆႈၸႂ်ထူပ်းၶဝ်ထၼ်ႈပေႃးထၢတ်ႇယဵၼ်သေၵႃႈၼႂ်းၵူၼ်းတင်းလၢႆဢေႃႈ။-

28လွင်ႈမၼ်းၸမ်ႉ ၶဝ်ၼၼ်ႉပဵၼ်မဵဝ်းၵူၼ်းဢၼ်ဢမ်ႇမီးပိင်ႇၺႃႇသတီႉ၊ မဵဝ်းဢၼ်ၵၢင်းလွတ်ႈတင်းၺၢၼ်ႇဢေႃႈ။-

29ဢိူဝ်ႈ၊ ၶႂ်ႈႁႂ်ႈၶဝ်မီးၺၢၼ်ႇလႄႈ ႁူႉၸႅင်ႈဢမူႉၼႆႉၵူၺ်းယဝ်ႉ။ ဢိူဝ်ႈ၊ ၶႂ်ႈႁႂ်ႈၶဝ်ၶႆႈၸႂ်ဝူၼ်ႉၸႂ်လူၺ်ႈလွင်ႈတီႈသုတ်းၶဝ် ဢၼ်ပဵၼ်လိုၼ်းလင်သုတ်းၼၼ်ႉၵူၺ်းယဝ်ႉ၊ ဝႃႈၼင်ႇၼႆဢေႃႈ။

30သင်မၢၵ်ႇႁိၼ်မၢၵ်ႇၽႃၶဝ်ၼၼ်ႉ ဢမ်ႇဢဝ်ၶဝ်ၶၢႆႉပႅတ်ႈ၊ ထႃႇဝရႃႉၽြႃးဢမ်ႇဢဝ်ၶဝ်ဢၢပ်ႈပၼ်ၸိုင်၊ ၵေႃႉၼိုင်ႈတၵ်းႁေႃႈ ၵူၼ်းႁဵင်ၼိုင်ႈပႅတ်ႈလူင်ပႄႇ။ ၵူၼ်းသွင်ၵေႃႉတၵ်းႁႂ်ႈၵူၼ်းမိုၼ်ႇၼိုင်ႈဢွၵ်ႇပၢႆႈလူင်ပႄႇ။-

31ပိၵ်ႉသမ်ႉရၢၼ်ႇသူႇႁဝ်းတင်းလၢႆ ၸီႇယၢင်ႇတႅပ်းတတ်းသေၵေႃႈ မၢၵ်ႇႁိၼ်မၢၵ်ႇၽႃၶဝ် ဢမ်ႇမိူၼ်ၵၼ်တင်းမၢၵ်ႇႁိၼ်မၢၵ်ႇၽႃႁဝ်း။-

32ၶိူဝ်းတူၼ်ႈမၢၵ်ႇၸပိတ်ႈၶဝ်ၼၼ်ႉ ပဵၼ်မဵဝ်းတူၼ်ႈမၢၵ်ႇၸပိတ်ႈ သေႃးတုမ်ႇ ၊ ပဵၼ်မဵဝ်းတူၼ်ႈဢၼ်ဢွၵ်ႇၵႃႈတီႈ လိၼ် ၵေႃးမေႃးရႃႉ ဢေႃႈ။ မၢၵ်ႇၸပိတ်ႈၶဝ်ၼၼ်ႉ ပဵၼ်မၢၵ်ႇတူၼ်ႈဢၼ်ၶူမ်လႄႈ ပုၵ်ႉမၢၵ်ႇၸပိတ်ႈၶဝ်ၼၼ်ႉ ပျေႉၸုမ်ႇဝႆႉတင်း ဢရႃႉသႃႇဢၼ်ၶူမ်ၶတ်းၼႃႇဢေႃႈ။-

33ၼမ်ႉၸပိတ်ႈၶဝ်ၼၼ်ႉ ပဵၼ်ၵွင်ႉၼၵႃးလႄႈ ပဵၼ်ၵွင်ႉပဵၼ်ယၢင်ငူးႁၢႆႉ ဢၼ်ႁၢဝ်ႈၵျၢမ်းၼႃႇဢေႃႈ။-

34လွင်ႈတၢင်းၼႆႉၸိုင်၊ သိမ်းဝႆႉမီးယူႇၵႃႈတီႈၵဝ်လႄႈ တွၵ်ႇတၼ်းသိၵ်ႈဝႆႉ ၵႃႈတီႈတိူၵ်ႈၽၼ်ႇတႃႇၵဝ်ယဝ်ႉဢမ်ႇၸႂ်ႈႁိုဝ်။-

35ၵဝ်ပိူင်ႇဢၶႂၢင်ႉဢၼ်လႆႈၸီႇယၢင်ႇဢပႅတ်ႈတြႃး၊ ဢၶႂၢင်ႉဢၼ်လႆႈတွပ်ႇတႅၼ်းၶိုၼ်း ၸွမ်းလူၺ်ႈဢပႅတ်ႈၼႂ်းမိူဝ်ႈဢၼ်တိၼ်ၶဝ်ပရၢတ်ႈၼၼ်ႉဢေႃႈ။ ၶိင်ႇမိုဝ်ႉဝၼ်းဢၼ်ၽေးတၵ်းႁွတ်ႈထိုင်ၵႃႈတီႈၶဝ်ၼၼ်ႉၸမ်ယဝ်ႉ။ လွင်ႈတၢင်းဢၼ်တၵ်းတူၵ်းႁွတ်ႈၵႃႈၼိူဝ်ၶဝ်ၼၼ်ႉ တၵ်းၸဵဝ်းၽႅဝ်မႃးၶၼ်ၶၼ်ၽႂ်းၽႂ်းဢေႃႈ။-

36ထႃႇဝရႃႉၽြႃးတၵ်းၸီႇယၢင်ႇတြႃး တီႈၵူၼ်းမၼ်းၸဝ်ႈတင်းလၢႆလႄႈ ၶုၵ်းၸႂ်လႆႈမႆႈၸႂ်ၵွပ်ႈပိူဝ်ႈၶႃႈမၼ်းၸဝ်ႈၸိူဝ်းၼၼ်ႉ မိူဝ်ႈဢၼ်မၼ်းၸဝ်ႈႁၼ်လွင်ႈဢၼ် ႁႅင်းတၼ်းၶူဝ်းသဵင်ႈၵႂႃႇမူတ်းၵႂႃႇ၊ လွင်ႈဢၼ်ၵေႃႉဢၼ်လႆႈၶၢမ်ႇတၢင်းဢၼ်ၶျုၵ်ႈဝႆႉ၊ ၵေႃႉဢၼ်လွတ်ႈဢမ်ႇမီးသေၵေႃႉသေၵူၼ်းၼၼ်ႉသေလႄႈ၊-

37လၢတ်ႈလႄႈဝႃႈၽြႃးၶဝ်၊ မၢၵ်ႇႁိၼ်မၢၵ်ႇၽႃႇဢၼ်ၶဝ်သွၼ်ႈပိုင်ႈယူႇ၊-

38ဢၼ်ၵိၼ်ၵွၼ်ႈၶႆၵွၼ်ႈမၼ်းတၢင်းဢၼ်ၶဝ်ပုၵ်ႈၸေႃႇၼၼ်ႉလႄႈ သူတ်ႉၼမ်ႉၸပိတ်ႈၶိူင်ႈပုၵ်ႈၸေႃႇ ဢၼ်ၶဝ်သွၼ်းလေႃႇၸိူဝ်းၼၼ်ႉၼၼ်ႉ မီးၵႃႈလႂ်။ ႁႂ်ႈၶဝ်ၼၼ်ႉဢွၼ်ၵၼ်လုၵ်ႉလႄႈ ပႂ်ႉၸွႆႈပႂ်ႉထႅမ်သူသေၵမ်းလူၺ်ႈ။ ႁႂ်ႈၶဝ်ၼၼ်ႉဢွၼ်ၵၼ်ႁဵတ်းဢၼ်ႁႄႉဢၼ်ၵင်ႈတီႈသူသေၵမ်းလူၺ်ႈ။-

39ဢွၼ်ၵၼ်လူတူၺ်း လွင်ႈဢၼ်ၵဝ်ၼႆႉ ပဵၼ်ၸဝ်ႈၼၼ်ႉတႄႉတႄႉဝႃႈဝႃႈလႄႈ ၼွၵ်ႈသေၵဝ်ၼႆႉ ဢမ်ႇမီးၽြႃးတၢင်ႇသူႇတၢင်ႇပႃးၼၼ်ႉတႃႉ။ ၵဝ်ၼႆႉႁႂ်ႈဢသၢၵ်ႈတၢႆလႄႈ ၵဝ်ၼႆႉႁႂ်ႈဢသၢၵ်ႈလိပ်းဢေႃႈ။ ၵဝ်ၼႆႉပေႃႉယႅၼ်ႉႁႂ်ႈၸဵပ်းႁႂ်ႈသႅပ်ႇလႄႈ ၵဝ်ၼႆႉႁႂ်ႈတၢင်းၸဵပ်းတၢင်းသႅပ်ႇႁၢႆဢေႃႈ။ ၽူႈလႂ်သေၵေႃႉသေၵူၼ်းဢမ်ႇၵႄႇသႄႇၼုၵ်ႈဢဝ်ၵႃႈၼႂ်းမိုဝ်းၵဝ်လႆႈ။-

40ၵဝ်ယုၵ်ႉမိုဝ်းၵဝ်ၶိုၼ်ႈၵႃႈၼိူဝ်ၵၢင်ႁၢဝ်သေလႄႈတိူင်ႇလႄႈဝႃႈ၊ ၵႃႈၼင်ႇဢၼ်ၵဝ်ဢသၢၵ်ႈယင်းလိပ်းယူႇတႃႇသေႇဢမ်ႇထၢတ်ႇၼၼ်ႉ၊-

41ပေႃးၵဝ်လပ်ႉလၢပ်ႇၵဝ်ဢၼ်ႁိူဝ်ႈမၢပ်ႈမႅပ်ႈၼၼ်ႉလႄႈ ဢဝ်မိုဝ်းၵဝ်ယိပ်းတၢင်းဢၼ်ၸီႇယၢင်ႇၸွမ်းၼင်ႇတြႃးၼၼ်ႉၸိုင်၊ ၵဝ်တၵ်းၸီႇယၢင်ႇဢပႅတ်ႈတြႃးတီႈရၢၼ်ႇသူႇၵဝ်လႄႈ တွပ်ႇတႅၼ်းၶိုၼ်းၸွမ်းလူၺ်ႈဢပႅတ်ႈ တီႈၶဝ်ၸိူဝ်းဢၼ်ၸင်းၵဝ်ၼၼ်ႉဢေႃႈ။-

42ၵဝ်တၵ်းႁႂ်ႈပိုၼ်ၵဝ်မဝ်းလိူတ်ႈလႄႈ လၢပ်ႇၵဝ်လႅဝ်းၵဝ်တၵ်းလႆႈၵိၼ်ၼိူဝ်ႉ ဢိၵ်ႇတင်းလိူတ်ႈၶဝ်ၸိူဝ်းဢၼ်ၶၢမ်ႇတၢင်းဢၼ် ဢဝ်တၢႆတင်းၶဝ်ၸိူဝ်းဢၼ်ၶၢမ်ႇတၢင်းဢၼ်တီႉလႆႈ တင်းၵွၵ်းႁူဝ်ၵူၼ်းဢၼ်ပဵၼ်ၵူၼ်းယႂ်ႇၵူၼ်းလူင် ၼႂ်းရၢၼ်ႇသူႇတင်းလၢႆၼၼ်ႉဢေႃႈ၊ ဝႃႈၼင်ႇၼႆဢေႃႈ။-

43ၵူၼ်းတၢင်ႇၸိူဝ်ႉတၢင်ႇၶိူဝ်းၶဝ်ဢိူၺ်း၊ သူဢွၼ်ၵၼ်မီးတၢင်းဢၼ်ၸူမ်းသိူဝ်းမူၼ်ႈပျေႃႇ ၵွပ်ႈပိူဝ်ႈၵူၼ်းမၼ်းၸဝ်ႈတင်းလၢႆၼၼ်ႉတႃႉ။ လွင်ႈမၼ်းၸမ်ႉ မၼ်းၸဝ်ႈတၵ်းပၼ်တၢမ်ႇၸွမ်းလူၺ်ႈလိူတ်ႈၶႃႈမၼ်းၸဝ်ႈၸိူဝ်းၼၼ်ႉလႄႈ ၸီႇယၢင်ႇဢပႅတ်ႈတြႃး တီႈရၢၼ်ႇသူႇမၼ်းၸဝ်ႈဢေႃႈ။ မၼ်းၸဝ်ႈတၵ်းႁဵတ်းတၢင်းဢၼ်ၽေႇဢပႅတ်ႈပုၼ်ႈမိူင်းမၼ်းၸဝ်ႈ ဢိၵ်ႇတင်းၵူၼ်းမဵဝ်းမၼ်းၸဝ်ႈတင်းလၢႆဢေႃႈ၊ ဝႃႈၼင်ႇၼႆလႄႈ၊-

44မူဝ်းသေႇ မႃးလႄႈ ဢိၵ်ႇတင်း ယေႃးသူႉ လုၵ်ႈၸၢႆး ၼုၼ်ႇ ၼၼ်ႉ ဢွၼ်ၵၼ်ဢဝ်ၵႂၢမ်းဢၼ်ႁဵတ်းၵႂၢမ်းၼႆႉ မွၵ်ႇလၢတ်ႈထိုင်ႁူၵူၼ်းတင်းလၢႆဢေႃႈ။-

45ၼင်ႇၼၼ်လႄႈ မူဝ်းသေႇ ဢဝ်ၵႂၢမ်းၵႃႈမီးၸိူဝ်းၼႆႉမွၵ်ႇလၢတ်ႈတီႈ ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ယဝ်ႉတူဝ်ႈယဝ်ႉ၊-

46ၸင်ႇလၢတ်ႈတီႈၶဝ်လႄႈဝႃႈ၊ သူဢွၼ်ၵၼ်ဢဝ်ၵႂၢမ်း ၵႃႈဢၼ်ၵဝ်ၶၢမ်ႇသၢၵ်ႈသေႇတီႈသူဝၼ်းမိူဝ်ႈၼႆႉ ဢၼ်သူတၵ်းလႆႈသင်ႇလၢတ်ႈဝႆႉ တီႈလုၵ်ႈလၢင်းသူ ႁႂ်ႈၶဝ်လႆႈပႂ်ႉၸွမ်းၵမ်ၵျၢင်ႉၵႂၢမ်းပိင်းၺၢပ်ႈတြႃးၼႆႉ တင်းသဵင်ႈတင်းမူတ်းၸိူဝ်းၼၼ်ႉ သႂၢင်းၸႂ်ဝႆႉတႃႉ။-

47လွင်ႈတၢင်းၼႆႉ ပဵၼ်ဢၼ်ၸေႃႉၸႄႉမဝ်မၢင်ဢမ်ႇၸႂ်ႈ၊ ပဵၼ်ဢသၢၵ်ႈသူဢေႃႈ။ ၵွပ်ႈပိူဝ်ႈလွင်ႈတၢင်းၼႆႉလႄႈ ၸူဝ်ႈဢသၢၵ်ႈသူတၵ်းယၢဝ်းယိုၼ်းၵႃႈၼႂ်းမိူင်းဢၼ်သူ တၵ်းၶၢမ်ႈၼမ်ႉႁွင်ႈ ယေႃးတၢၼ်ႇ လႄႈ ၶဝ်ႈၸၢမ်ႇၸႃးၼၼ်ႉဢေႃႈ။-

48ၼႂ်းမိုဝ်ႉဝၼ်းၼၼ်ႉၵမ်းလဵဝ်၊ ထႃႇဝရႃႉၽြႃးမီးဢမိင်ႉတီႈ မူဝ်းသေႇ လႄႈဝႃႈ၊-

49မႂ်းၶိုၼ်ႈၵႃႈၼိူဝ်ႁၢၼ်ႉလွႆ ဢပႃႇရိမ်ႇ ၵႃႈၼိူဝ်လွႆ ၼေႇပေႃႇ ဢၼ်မီးၵႃႈၼႂ်းမိူင်း မေႃႇၽႃႉ သိုဝ်ႈဝဵင်း ယေႇရီႉၶူဝ်း ပုၼ်ႉသေလႄႈ လူတူၺ်းမိူင်း ၶႃႇၼၢၼ်ႇ ဢၼ်ၵဝ်တၵ်းပၼ်တီႈၵူၼ်းမဵဝ်း ဢီႉသရေႇလႃႉ တင်းလၢႆ ပုၼ်ႈဢၼ်ၶဝ်တၵ်းပိူင်ႇၼၼ်ႉတႃႉ။-

50မႂ်းတၢႆၵႃႈၼိူဝ်လွႆဢၼ်မႂ်းၶိုၼ်ႈၵႂႃႇၼၼ်ႉသေလႄႈ ႁွတ်ႈထိုင်ၵႃႈတီႈဢၼ်ၵူၼ်းမဵဝ်းမႂ်းတင်းလၢႆၸူႉတုမ်ၼၼ်ႉ မိူၼ်ၸိူဝ်ႉၼင်ႇဢၼ်ပီႈၸၢႆးမႂ်း ဢႃႇရုၼ်ႇ တၢႆၵႃႈၼိူဝ်လွႆ ႁေႃးရႃႉ လႄႈ ႁွတ်ႈထိုင်ၵႃႈတီႈဢၼ်ၵူၼ်းမဵဝ်းမၼ်းတင်းလၢႆၸူႉတုမ်ၼၼ်ႉတႃႉ။-

51လွင်ႈမၼ်းၸမ်ႉ သွင်ၶိူဝ်ၽိတ်းပိူင်ႈၵဝ်ၵႃႈၼႂ်းၶိုင်ႈၵၢင် ၵူၼ်းမဵဝ်း ဢီႉသရေႇလႃႉ တင်းလၢႆ ၵႃႈတီႈၼမ်ႉဢွၵ်ႇႁူး မေႇရီႇၽႃႉ ၊ ဝၢၼ်ႈ ၵႃႇတေႇသႃႉ ၊ ထိူၼ်ႇ ၸီႉၼႃႉ ၼၼ်ႉလႄႈ ဢမ်ႇႁႂ်ႈၵဝ်ပဵၼ်ဢၼ်မူတ်းၸၢင်ႇ ၵႃႈၼႂ်းၶိုင်ႈၵၢင်ၵူၼ်းမဵဝ်း ဢီႉသရေႇလႃႉ တင်းလၢႆၼၼ်ႉယဝ်ႉ။-

52ပိူဝ်ႈၼႆလႄႈ ပိၵ်ႉသမ်ႉမႂ်းလႆႈဢဝ်မၢၵ်ႇတႃမႂ်းႁၼ်မိူင်းမီးယူႇၵႃႈတီႈၽၢႆႇၼႃႈမႂ်းၼၼ်ႉသေၵေႃႈ မႂ်းဢမ်ႇလႆႈၵႂႃႇလႄႈ ၶဝ်ႈၵႃႈၼႂ်းမိူင်းဢၼ်ၵဝ်တၵ်းပၼ်တီႈ ၵူၼ်းမဵဝ်း ဢီႉသရေႇလႃႉ တင်းလၢႆၼၼ်ႉ၊ ဝႃႈၼင်ႇၼႆဢေႃႈ။