Esther 2

Shan

← Chapter 1 Jump to: Chapter 3 →

1လိုၼ်းၼၼ်ႉ ၶုၼ်ႁေႃၶမ်း ဢႃႇသူၺ်ႇရူႉ ၼၼ်ႉ၊ မိူဝ်ႈဢၼ်ၸႂ်ၸဝ်ႈပေႇယဝ်ႉၼၼ်ႉၸိုင် ၶုၵ်းၸႂ်လႆႈၶႆႈၸႂ်ထူပ်း ဝႃႇသတီႉ ဢိၵ်ႇတင်းဢမူႉဢၼ်မၼ်းႁဵတ်း ဢိၵ်ႇတင်းဢမူႉဢၼ်ၸီႇယၢင်ႇတီႈမၼ်းၼၼ်ႉဢေႃႈ။-

2ၶႃႈၶုၼ်ႁေႃၶမ်းဢၼ်ၶႃးၸႃးယူႇၸိူဝ်းၼၼ်ႉၵေႃႈ၊ ဢွၼ်ၵၼ်လဝ်ႊလၢတ်ႈလႄႈဝႃႈ၊ ၶႅၼ်းတေႃႈပၼ်ဢၶႂၢင်ႉႁႂ်ႈလႆႈႁႃဢဝ်ၵၼ်ႇၺႃႇလုၵ်ႈယိင်းသၢဝ်ဢၼ်ႁၢင်ႈလီတင်းလၢႆ ပုၼ်ႈၸဝ်ႈၶုၼ်လူင်သေၵမ်းတီႈၶႃႈ။-

3ၶႅၼ်းတေႃႈၶၢၼ်းၶုၼ်ဢရႃႇသီႉဝႆႉၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈ ၵူႈသိုင်ႇၵူႈမိူင်း ၵူႈဢိူင်ႇၵူႈၵျၢၵ်ႈ ႁႂ်ႈၶဝ်ႁႂ်ႈၵၼ်ႇၺႃႇလုၵ်ႈယိင်းသၢဝ်ဢၼ်ႁၢင်ႈလီတင်းသဵင်ႈတင်းလူင် ၸူႉၵၼ်တုမ်ၵၼ်ၵႃႈၼႂ်းတီႈယူႇၸိူင်ႉၼၢင်း ၵႃႈတီႈႁေႃၶမ်း သူႉသၼ်ႇ လႄႈ ဢၢပ်ႈဝႆႉၵႃႈတီႈ ႁေႇၵႄး ၵူၼ်းထိင်းၼၢင်းဢၼ်ဢုပ်ႉၵႃႈၼိူဝ်ၸိူင်ႉၼၢင်းၼၼ်ႉသေၵမ်းတီႈၶႃႈ။ ၶႅၼ်းတေႃႈဢဝ်မဵဝ်းယႃႈမဵဝ်းယႃဢၢပ်ႇပၼ်ပုၼ်ႈဢၼ်တၵ်းႁႂ်ႈၶဝ် မူတ်းသႂ်ၼၼ်ႉသေၵမ်းတီႈၶႃႈ၊-

4ၶႅၼ်းတေႃႈဢဝ် ၵၼ်ႇၺႃႇလုၵ်ႈယိင်းသၢဝ် ဢၼ်ထုၵ်ႇၸႂ်ၵျိူၵ်ႈၸႂ်ၸဝ်ႈၶုၼ်လူင်ၼၼ်ႉ ႁႂ်ႈပဵၼ်ၼၢင်းႁေႃၶမ်း တၢင်တူဝ် ဝႃႇသတီႉ သေၵမ်းတီႈၶႃႈ၊ ဝႃႈၼင်ႇၼႆလႄႈ ၵႂၢမ်းဢၼ်လဝ်ႊလၢတ်ႈၼၼ်ႉ ထုၵ်ႇၸႂ်ၵျိူၵ်ႈၸႂ်ၶုၼ်ႁေႃၶမ်းလႄႈ မၼ်းၸီႇယၢင်ႇၸိူဝ်ႉၼင်ႇၼၼ်ဢေႃႈ။

5မိူဝ်ႈၼၼ်ႉမီးၵူၼ်း ယူႉတႃႉ ဢၼ်လႆႈၸိုဝ်ႈလႆႈသဵင် မေႃႇတၵႄး ပဵၼ်လုၵ်ႈၸၢႆး ယႃႇဢီႉရႃႉ ၊ လုၵ်ႈၸၢႆး သီႉမီႉ ၊ လုၵ်ႈၸၢႆး ၵီႉသႃႉ မဵဝ်း ပိၼ်ႇယႃႇမိၼ်ႇ ၼၼ်ႉၵေႃႉၼိုင်ႈ ၵႃႈၼႂ်းႁေႃၶမ်း သူႉသၼ်ႇ ၼၼ်ႉဢေႃႈ။-

6မၼ်းၼၼ်ႉပဵၼ်ၵေႃႉဢၼ် လႆႈၶၢမ်ႇတၢင်းဢၼ်သိမ်းဢဝ်ၵႂႃႇသေ ၵႃႈတီႈဝဵင်း ယေႇရူႉသလႅမ်ႇ လႄႈ ၶဝ်ႈပႃးၼႂ်းမုၵ်ႉၼႂ်းၸိူဝ်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇလူၺ်ႈၵၼ်တင်း ယေႇၶေႃးၼီႉ ၶုၼ်ႁေႃၶမ်း ယူႉတႃႉ ဢၼ် ၼေႇပူႉၶတ်ႉၼေႇၸႃႇ ၶုၼ်ႁေႃၶမ်း ပႃႇပူႉလုၼ်ႇ သိမ်းဢဝ်ၵႂႃႇၼၼ်ႉဢေႃႈ။-

7မၼ်းၼၼ်ႉၵဵပ်းလဵင်ႉၵဵပ်းလူ ႁတတ်ႉသႃႉ ၊ ဢၼ်ဝႃႈ ဢေးသတႃႇ လုၵ်ႈယိင်းပေႃႈၼႃႉမၼ်းၼၼ်ႉဝႆႉဢေႃႈ။ လုၵ်ႈယိင်းၼၼ်ႉ ဢမ်ႇမီးပေႃႈမီးမႄႈ၊ ပဵၼ်ၵေႃႉဢၼ်ႁၢင်ႈၽၢင်တူဝ်ၶိင်းယဵၼ်ႇလႄႈ ၼိူဝ်ႉၼင်ႁၢင်ႈလီဢေႃႈ။ မိူဝ်ႈဢၼ်ပေႃႈမႄႈမၼ်းတၢႆၼၼ်ႉ မေႃႇတၵႄး ဢဝ်မၼ်းႁဵတ်းလုၵ်ႈႁဵတ်းလၢင်းဝႆႉ ပဵၼ်ၸိူဝ်ႉၼင်ႇလုၵ်ႈယိင်းဢွၵ်ႇတူဝ်ၸဝ်ႈၵဝ်ႇဢေႃႈ။

8မိူဝ်ႈဢၼ် ဢဝ်ဢမိင်ႉၶုၼ်ႁေႃၶမ်းဢွၵ်ႇလႄႈပၢဝ်ႇသေႃႇလႄႈ ၶဝ်ႁႂ်ႈၵၼ်ႇၺႃႇလုၵ်ႈယိင်းသၢဝ်ၼမ်ၼႃႇ ၸူႉၵၼ်တုမ်ၵၼ်ၵႃႈတီႈႁေႃၶမ်း သူႉသၼ်ႇ သေလႄႈ ဢၢပ်ႈတီႈ ႁေႇၵႄး ၼၼ်ႉၸိုင် ၶဝ်ဢဝ် ဢေးသတႃႇ ၼၼ်ႉသႂၢင်းၶဝ်ႈၵႃႈၼႂ်းႁေႃၸဝ်ႈလႄႈ ဢၢပ်ႈပၼ်တီႈ ႁေႇၵႄး ၵေႃႉဢၼ်ထိင်းၼၢင်းၼၼ်ႉဢေႃႈ။-

9မႄႈယိင်းၼၼ်ႉ ထုၵ်ႇၸႂ်ၵျိူၵ်ႈၸႂ်မၼ်းၼၼ်ႉလႄႈ လႆႈၼႃႈလႆႈတႃတီႈမၼ်းၼၼ်ႉသေလႄႈ၊ မၼ်းၼၼ်ႉဢဝ်မဵဝ်းယႃႈမဵဝ်းယႃပုၼ်ႈဢၼ်တၵ်းႁႂ်ႈမူတ်းသႂ် ဢိၵ်ႇတင်းၶိူင်ႈၼုင်ႈတၢင်းမႆ ဢၼ်တၵ်းလႆႈဢၢပ်ႈပၼ်ၼၼ်ႉ တင်းၶႃႈမႄႈယိင်းဢၼ်လိူၵ်ႈၵဵပ်းဢဝ်ၵႃႈၼႂ်းႁေႃၸဝ်ႈလႄႈ ထုၵ်ႇလီပၼ်ၼၼ်ႉၸဵတ်းၵေႃႉ ဢၢပ်ႈပၼ်ၶၼ်ၶၼ်ၽႂ်းၽႂ်းလႄႈ ယုၵ်ႉယွင်ႈဢဝ်မၼ်း ဢိၵ်ႇတင်းၶႃႈမႄႈယိင်းမၼ်းၸိူဝ်းၼၼ်ႉဝႆႉတီႈဢၼ်မျၢတ်ႈၼႃႇသေပိူၼ်ႈ ၵႃႈၼႂ်းႁေႃမႄႈယိင်းၼၼ်ႉဢေႃႈ။-

10ဢေးသတႃႇ ယင်းဢမ်ႇၽုၺ်ႇဢွၵ်ႇၼႄပျႃးမဵဝ်းမၼ်း ဢိၵ်ႇတင်း ပီႈၼွင်ႉၸိူဝ်ႉၶိူဝ်းမၼ်း ၵွပ်ႈပိူဝ်ႈဢၼ် မေႃႇတၵႄး ပၼ်သတီႉ လွင်ႈဢၼ်မၼ်းတၵ်းဢမ်ႇလႆႈၽုၺ်ႇဢွၵ်ႇၼႄပျႃးၼၼ်ႉလႄႈယူႇဢေႃႈ။-

11မေႃႇတၵႄး ၵေႃႈ ၵႂႃႇမႃးၵႃႈတီႈၽၢႆႇၼႃႈဝၢင်းႁေႃမႄႈယိင်းၸိူဝ်းၼၼ်ႉယူႇၵူႈဝၼ်း ႁႂ်ႈလႆႈႁူႉလွင်ႈဢၼ် ဢေးသတႃႇ ယူႇလီယူႇၸႃႉၸိူဝ်ႉၼင်ႇႁိုဝ် ဢိၵ်ႇတင်းလွင်ႈဢၼ်ၶဝ်တၵ်းႁဵတ်းတီႈမၼ်းၸိူဝ်ႉၼင်ႇႁိုဝ်ၼၼ်ႉဢေႃႈ။

12လုၵ်ႈယိင်းသၢဝ်ၵေႃႉလႂ်သေဢမ်ႇဝႃႈ၊ လိုၼ်းသေဢၼ်မၼ်းလႆႈၶၢမ်ႇတၢင်းဢၼ်ႁဵတ်းတီႈမၼ်း ၸွမ်းၵႃႈၼင်ႇဢၼ်ထုင်းၸၢမ်ႇမႄႈယိင်းတင်းလၢႆမီးလႄႈၸေးသိပ်းသွင်လိူၼ်တဵမ်တဵမ်ယဝ်ႉၼၼ်ႉ၊ မၼ်းလႆႈၶဝ်ႈၸူးၵႃႈတီႈၶုၼ်ႁေႃၶမ်း ဢႃႇသူၺ်ႇရူႉ ၸွမ်းၵႃႈၼင်ႇဢၼ် ထုၵ်ႇလႄႉထုၵ်ႇၵမ်းၼၼ်ႉဢေႃႈ။ လႆႈသုင်းသွင်ႇယၢင် မူႉရၼ်ႇ ႁူၵ်းလိူၼ်တဵမ်တဵမ်၊ မဵဝ်းၼၢမ်ႇသႃႇ ဢိၵ်ႇတင်းမဵဝ်းယႃႈမဵဝ်းယႃပုၼ်ႈဢၼ်တၵ်းႁႂ်ႈမူတ်းသႂ်ၸိူဝ်းၼၼ်ႉ ႁူၵ်းလိူၼ်တဵမ်တဵမ်လႄႈ လႆႈႁႂ်ႈပူၼ်ႉၶိင်ႇၵႃႇလႃႉထၢၼ်ႇၼၼ်ႉ တေႃႇထိုင်ႁွတ်ႈထၼ်ႈပေႃး ႁႂ်ႈဢမူႉတၢင်းဢၼ်မူတ်းသႂ်ၼၼ်ႉယဝ်ႉတူဝ်ႈၼၼ်ႉဢေႃႈ။-

13လိုၼ်းၼၼ်ႉ မိူဝ်ႈဢၼ်ထိုင်ႁွတ်ႈၶိင်ႇဢၼ်ၵၼ်ႇၺႃႇလုၵ်ႈယိင်းသၢဝ်ၼၼ်ႉၶဝ်ႈၸူးၵႃႈတီႈၶုၼ်ႁေႃၶမ်းၼၼ်ႉၸိုင် ၵႃႈဢၼ်မၼ်းမီးဢလူဝ်ႇလႄႈယွၼ်းဢဝ်ၼၼ်ႉၶဝ်ပၼ်သေလႄႈ ႁႂ်ႈမၼ်းလႆႈဢဝ်ဢွၵ်ႇသေၵႃႈၼႂ်းႁေႃမႄႈယိင်းၼၼ်ႉ ၵႂႃႇၸူးတီႈၶုၼ်ႁေႃၶမ်းဢေႃႈ။-

14မၼ်းၶဝ်ႈၶိင်ႇႁူဝ်ၶမ်ႈလႄႈ ၶိင်ႇၵၢင်ၼႂ်လႆႈဢွၵ်ႇၸူးၵႃႈတီႈႁေႃမႄႈယိင်းဢၼ်တူႉတီႉယႃႉ ဢၼ် သႃႇၵၸႃႉ ၵူၼ်းထိင်း ၼၢင်းႁေႃၸဝ်ႈ ဢၼ်လႆႈဢုပ်ႉထိင်းၵႃႈၼိူဝ်ၸိူင်ႉၼၢင်းၼၼ်ႉ လႆႈပႂ်ႉၼၼ်ႉဢေႃႈ။ ပေႃးၶုၼ်ႁေႃၶမ်းဢမ်ႇထုၵ်ႇၸႂ်ၵျိူၵ်ႈၸႂ်လႄႈ ဢဝ်ၸိုဝ်ႈဢဝ်သဵင်မၼ်းႁွင်ႉဢဝ်မၼ်းၸိုင်၊ ၵမ်းလိုၼ်းမၼ်းဢမ်ႇလႆႈၶဝ်ႈၸူးတီႈၶုၼ်ႁေႃၶမ်းထႅင်ႈ။

15မိူဝ်ႈဢၼ် ဢေးသတႃႇ လုၵ်ႈယိင်း ဢၽီႉႁေးလႃႉ ပေႃႈၼႃႉ မေႃႇတၵႄး ဢၼ်မၼ်းၵဵပ်းလဵင်ႉၵဵပ်းလူဝႆႉ မိူၼ်ၸိူဝ်ႉၼင်ႇလုၵ်ႈယိင်းဢွၵ်ႇတူဝ်ၸဝ်ႈၵဝ်ႇၼၼ်ႉ ထုၵ်ႇလႄႉထုၵ်ႇၵမ်းလႄႈ လႆႈၶဝ်ႈၸူးတီႈၶုၼ်ႁေႃၶမ်းၼၼ်ႉၸိုင်၊ ၼွၵ်ႈသေလွင်ႈတၢင်းဢၼ် ႁေႇၵႄး ၵူၼ်းထိင်းၼၢင်းႁေႃၸဝ်ႈ ဢၼ်လႆႈဢုပ်ႉထိင်းၵႃႈၼိူဝ်ၸိူင်ႉၼၢင်းၼၼ်ႉ ၸီႇယၢင်ႇဝႆႉၸိူဝ်းၼၼ်ႉ၊ မၼ်းဢမ်ႇယွၼ်းဢဝ်လွင်ႈတၢင်းဢၼ်လႂ်သေၸိူဝ်ႉသေပိူင်။ ဢေးသတႃႇ ၼၼ်ႉ လႆႈၼႃႈလႆႈတႃ ၵႃႈတီႈၽၢႆႇၼႃႈၶဝ် ၵႃႈဢၼ်ထူပ်းႁၼ်မၼ်းၸိူဝ်းၼၼ်ႉဢေႃႈ။-

16ၼင်ႇၼၼ်လႄႈ ဢေးသတႃႇ လႆႈၶၢမ်ႇတၢင်းဢၼ်ဢဝ်သႂၢင်းၶဝ်ႈၵႃႈၼႂ်းႁေႃၶုၼ်ႁေႃၶမ်း ဢႃႇသူၺ်ႇရူႉ ၼႂ်းပီႊဢၼ်ၸၢမ်ႇႁၢင်ႈၸၢမ်ႇႁေႃၸဵတ်းပီႊ လိူၼ်တႃႉသမႃႉ ဢၼ်လႆႈၸိုဝ်ႈ တႄႇပႅတ်ႉ ၼၼ်ႉလႄႈ၊-

17ၶုၼ်ႁေႃၶမ်း ယဵင်ႈၶႅၼ်းႁၵ်ႉ ဢေးသတႃႇ လိူဝ်တွၼ်းၼႃႇသေ မႄႈယိင်းၵႃႈမီးၼၼ်ႉလႄႈ ဢေးသတႃႇ လႆႈၼႃႈလႆႈတႃလႄႈ ထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈ လိူဝ်တွၼ်းၼႃႇသေၵၼ်ႇၺႃႇလုၵ်ႈယိင်းသၢဝ်ၵႃႈမီးၼၼ်ႉ ႁႂ်ႈမၼ်းထၼ်ႈပေႃးလႆႈဢဝ်ရႃႇၸႃႉသရၽူႇတၢင်ႇသႂ်ႇပၼ်ၵႃႈၼိူဝ်ႁူဝ်မၼ်းလႄႈ ႁႂ်ႈမၼ်းလႆႈပဵၼ်ၼၢင်းႁေႃၶမ်း တၢင်တူဝ် ဝႃႇသတီႉ ဢေႃႈ။-

18မိူဝ်ႈၼၼ်ႉၶုၼ်ႁေႃၶမ်းၼၼ်ႉ ၶၢမ်ႇပွႆးဢၼ်ယႂ်ႇၼႃႇဢၼ်ႁွင်ႉဝႃႈ ပွႆး ဢေးသတႃႇ ၼၼ်ႉပုၼ်ႈ မူးမၢတ်ႈၽွင်းမိူင်းမၼ်း၊ ၶႃႈၵူၼ်းမၼ်းတင်းသဵင်ႈတင်းလူင်လႄႈ ပွႆႇလွတ်ႈဢမူႉၶုၼ်ၵႃႈၼႂ်း ၵူႈသိုင်ႇၵူႈမိူင်း ၵူႈဢိူင်ႇၵူႈၵျၢၵ်ႈသေလႄႈ ၶျႃးသူးမႅၼ်ႈၸွမ်းၵႃႈၼင်ႇၸေးၸိမ်ႇၶုၼ်ႁေႃၶမ်းၼၼ်ႉဢေႃႈ။

19မိူဝ်ႈဢၼ်ၵၼ်ႇၺႃႇလုၵ်ႈယိင်းသၢဝ်ၸိူဝ်းၼၼ်ႉ ၸူႉၵၼ်တုမ်ၵၼ်ၵမ်းတူႉတီႉယႃႉၼၼ်ႉၸိုင်၊ မေႃႇတၵႄး ၼၼ်ႉလႆႈၼင်ႈယူႇၵႃႈတီႈၽၵ်းတူႁေႃၸဝ်ႈဢေႃႈ။-

20ဢေးသတႃႇ ၼၼ်ႉ ယင်းဢမ်ႇပႆႇတွၼ်ႉၽုၺ်ႇဢွၵ်ႇၼႄပျႃးမဵဝ်းမၼ်း၊ ပီႈၼွင်ႉၸိူဝ်ႉၶိူဝ်းမၼ်းၸွမ်းၵႃႈၼင်ႇဢၼ် မေႃႇတၵႄး ပၼ်သတီႉဝႆႉၼၼ်ႉ ၵွပ်ႈပိူဝ်ႈဢၼ် ဢေးသတႃႇ ထွမ်ႇဢဝ်ၵႂၢမ်း မေႃႇတၵႄး ယူႇမိူၼ်ၸိူဝ်ႉၼင်ႇ မိူဝ်ႈဢၼ်မၼ်းလႆႈၶၢမ်ႇတၢင်းဢၼ်မၼ်းၼၼ်ႉၵဵပ်းလဵင်ႉၵဵပ်းလူဝႆႉၼၼ်ႉယူႇဢေႃႈ။-

21မိူဝ်ႈၼၼ်ႉ ၼႂ်းမိူဝ်ႈဢၼ် မေႃႇတၵႄး ယင်းတိုၵ်ႉၼင်ႈယူႇ ၵႃႈတီႈၽၵ်းတူႁေႃၸဝ်ႈယူႇၼၼ်ႉၸိုင် ပီႉၵသၼ်ႇ တင်း တေႇရိတ်ႉ ဢၼ်ပဵၼ်ၵူၼ်းထိင်းၼၢင်း ၵႃႈၼႂ်းႁေႃၸဝ်ႈလႄႈၶဝ်ႈပႃးၼႂ်းၶဝ်ၸိူဝ်းဢၼ် ပႂ်ႉၽၵ်းတူၼၼ်ႉသွင်ၵေႃႉၼၼ်ႉ မီးၸႂ်တေႃးသႃႉလႄႈ ဢွၼ်ၵၼ်ၵျူဝ်းၸႃးႁႂ်ႈလႆႈဢဝ်ၶုၼ်ႁေႃၶမ်း ဢႃႇသူၺ်ႇရူႉ တၢႆဢေႃႈ။-

22မေႃႇတၵႄး ႁူႉလွင်ႈဢမူႉၼၼ်ႉလႄႈၽုၺ်ႇဢွၵ်ႇၼႄပျႃးလွင်ႈမၼ်းတီႈၼၢင်းႁေႃၶမ်း ဢေးသတႃႇ ဢေႃႈ။ ဢေးသတႃႇ ၵေႃႈဢဝ်ၸိုဝ်ႈဢဝ်သဵင် မေႃႇတၵႄး သေလႄႈ လဝ်ႊလၢတ်ႈလွင်ႈဢမူႉၼၼ်ႉတီႈၶုၼ်ႁေႃၶမ်းဢေႃႈ။-

23မိူဝ်ႈဢၼ်ၸႅတ်ႈထၢမ်ၸႅတ်ႈတူၺ်းလွင်ႈဢမူႉၼၼ်ႉလႄႈ ႁူႉလွင်ႈဢၼ်မၢၼ်ႇမႅၼ်ႈၸိုဝ်ႈၸႂ်ႈယဝ်ႉၼၼ်ႉၸိုင် သွင်ၶႃၼၼ်ႉလႆႈၶၢမ်ႇတၢင်းဢၼ် ၵႅၼ်ၶေႃးႁွႆႈတူၵ်းၵႃႈၼိူဝ်တူၼ်ႈမႆႉသေလႄႈ ဢဝ်လွင်ႈမၼ်းမၢတ်ႈမၢႆတႅမ်ႈသႂ်ႇဝႆႉၵႃႈၼႂ်းလိၵ်ႈရႃႇၸဝၢင်ႇ ဢၼ်မၢတ်ႈမၢႆတႅမ်ႈဝႆႉၸွမ်းၵူႈဝၼ်းၼၼ်ႉ ၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။

← Chapter 1 Jump to: Chapter 3 →