Esther 9 — Shan

1ၼႂ်းလိူၼ်တႂႃႇတႃႉသမႃႉ ဢၼ်လႆႈၸိုဝ်ႈ ဢႃႇတႃႇ သိပ်းသၢမ်ဝၼ်း ဢၼ်ဝႃႈဝၼ်းဢၼ်ပဵၼ်ၶိင်ႇဢၼ်လႆႈႁဵတ်း ၸွမ်းၵႃႈၼင်ႇဢၼ်ဢမိင်ႉၶုၼ်ႁေႃၶမ်းမီးၼၼ်ႉၸမ်ႉမႃးလႄႈ ရၢၼ်ႇသူႇမဵဝ်း ယူႉတႃႉ တင်းလၢႆ မုင်ႈမွင်းလူၺ်ႈလွင်ႈဢၼ်ၶဝ်တၵ်းပႄႉၼႅင်ႇၼၼ်ႉ ဝၼ်းဢၼ်ဢမူႉၶၢႆႉပုတ်ႈလႄႈ ၵူၼ်း ယူႉတႃႉ တင်းလၢႆ လႆႈပႄႉၼႅင်ႇၶဝ်ၸိူဝ်းဢၼ်သီႈၵေႉႁေႈတႃၶဝ်ၼၼ်ႉၼၼ်ႉ၊-

2ၵူၼ်း ယူႉတႃႉ ၸိူဝ်းၼၼ်ႉ ၸူႉၵၼ်တုမ်ၵၼ်ၵႃႈတီႈဝၢၼ်ႈၶဝ်ဝဵင်းၶဝ် ၵႃႈၼႂ်းသိုင်ႇၸိုင်ႈဝၢၼ်ႈမိူင်းၶုၼ်ႁေႃၶမ်း ဢႃႇသူၺ်ႇရူႉ ၵူႈသိုင်ႇၵူႈမိူင်း ၵူႈဢိူင်ႇၵူႈၵျၢၵ်ႈ ႁႂ်ႈလႆႈႁႄႉတိုၵ်းႁႄႉတေႃး ၶဝ်ၸိူဝ်းဢၼ်မီးဢလူဝ်ႇၶႂ်ႈၼိၵ်ႈၸၢၵ်ႈငႅၼ်းသႄးၶဝ်ၼၼ်ႉဢေႃႈ။ ၵွပ်ႈပိူဝ်ႈဢၼ် ၵူၼ်းဝၢၼ်ႈၵူၼ်းမိူင်း ၵူႈၸိူဝ်ႉၵူႈမဵဝ်း ၵူဝ်ႁႄၶဝ်ၼၼ်ႉလႄႈ ၽူႈလႂ်သေၵေႃႉသေၵူၼ်း ဢမ်ႇၸုၵ်းဢမ်ႇၶၢမ်ႇၶဝ်လႆႈ။-

3ၶုၼ်ဢၼ်ဢုပ်ႉၵႃႈၼိူဝ် ၵူႈသိုင်ႇၵူႈမိူင်း ၵူႈဢိူင်ႇၵူႈၵျၢၵ်ႈလႂ်၊ ၸဝ်ႈၽႃႉလႂ်၊ မဵဝ်ႉဝုၼ်ႇလႂ်၊ ဢရႃႇသီႉဢၼ်ပႂ်ႉဢမူႉၶုၼ်ႁေႃၶမ်းလႂ် တင်းသဵင်ႈတင်းလူင်ၸိူဝ်းၼၼ်ႉ ဢွၼ်ၵၼ်ၸွႆႈထႅမ်မႃႉၸႃႉ ၵူၼ်း ယူႉတႃႉ တင်းလၢႆ ၵွပ်ႈပိူဝ်ႈဢၼ်ၶဝ်ၵူဝ်ႁႄ မေႃႇတၵႄး ၼၼ်ႉဢေႃႈ။-

4လွင်ႈမၼ်းၸမ်ႉ မေႃႇတၵႄး ၼၼ်ႉမုၼ်ၽုင်းယႂ်ႇၵႃႈတီႈႁေႃၸဝ်ႈယူႇသေလႄႈ သတၢင်းသဵင်ၶၢဝ်ႇမၼ်းသႃႈၸွတ်ႇၵႂႃႇ ၵႃႈတီႈၵူႈသိုင်ႇၵူႈမိူင်း ၵူႈဢိူင်ႇၵူႈၵျၢၵ်ႈလႄႈ မေႃႇတၵႄး ၼၼ်ႉ မီးတၢင်းဢၼ်ယႂ်ႇၽႄႈတူဝ်းတွၼ်းမႃးယူႇတိၵ်းတိၵ်းဢေႃႈ။-

5မိူဝ်ႈၼၼ်ႉၵူၼ်း ယူႉတႃႉ တင်းလၢႆ ဢွၼ်ၵၼ်တိုၵ်းတေႃးယႃႉပႅတ်ႈရၢၼ်ႇသူႇၶဝ်တင်းသဵင်ႈတင်းလူင် လူၺ်ႈလၢပ်ႇလူၺ်ႈလႅဝ်း လူၺ်ႈတၢင်းဢၼ်ၶႃႈၽၼ်းဢဝ်တၢႆ၊ လူၺ်ႈတၢင်းဢၼ်လူႉဢၼ်လႅဝ်ၼၼ်ႉလႄႈ ႁဵတ်းတီႈၶဝ်ၸိူဝ်းဢၼ်သီႈၵေႉႁေႈတႃၶဝ်ၼၼ်ႉ ၸွမ်းၵႃႈၼင်ႇဢၼ်ၶဝ်ၶႂ်ႈႁဵတ်းၼၼ်ႉဢေႃႈ။-

6ၶဝ်ဢွၼ်ၵၼ်ၶႃႈၽၼ်းဢဝ်ၵူၼ်းတၢႆပႅတ်ႈႁႃႈပၢၵ်ႇ ၵႃႈၼႂ်းႁေႃၶမ်း သူႉသၼ်ႇ ၼၼ်ႉဢေႃႈ။-

7ပႃႇသၼ်ႇတႃႇလႃႉ၊ တႃႇလၽူၼ်း၊ ဢႃႇသပႃႇသႃႉ ၊-

8ပေႃႇရသႃႉ၊ ဢႃႇတလီႉ၊ ဢႃႇရီႉတႃႇသႃႉ ၊-

9ပႃႇမသႃႇတႃႉ၊ ဢရီႉသေႇ၊ ဢရီႉထေး၊ ဝႃႇၸေႇၸႃႇသႃႉ ၊-

10ဢၼ်ဝႃႈလုၵ်ႈၸၢႆး ႁႃႇမၢၼ်ႇ ဢၼ်ပဵၼ်လုၵ်ႈၸၢႆး ႁမ်ႇမေႇတႃႇသႃႉ လႄႈ ပဵၼ်ရၢၼ်ႇသူႇမဵဝ်း ယူႉတႃႉ ၼၼ်ႉသိပ်းၵေႃႉၼၼ်ႉၵေႃႈ၊ ၶဝ်ဢွၼ်ၵၼ်ဢဝ်တၢႆဢေႃႈ။ ၵူၺ်းၵႃႈၶဝ်ယင်းဢမ်ႇႁိမ်ႁူင်ႇသိမ်းဢဝ် ဢုၵ်ႉၸႃႇၶဝ်ၼၼ်ႉလႄႈယူႇဢေႃႈ။-

11ၼႂ်းဝၼ်းၼၼ်ႉ လႆႈဢဝ်ၸရၢင်းၶဝ်ၸိူဝ်းဢၼ်လႆႈၶၢမ်ႇတၢႆၵႃႈၼႂ်းႁေႃၶမ်း သူႉသၼ်ႇ ၼၼ်ႉ သႂၢင်းၶဝ်ႈၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။

12ၶုၼ်ႁေႃၶမ်းၵေႃႈ မီးဢမိင်ႉတီႈၼၢင်းႁေႃၶမ်း ဢေးသတႃႇ လႄႈဝႃႈ၊ ၵူၼ်း ယူႉတႃႉ တင်းလၢႆ ဢွၼ်ၵၼ်ၶႃႈၽၼ်းဢဝ်ၵူၼ်းႁႃႈပၢၵ်ႇ ဢိၵ်ႇတင်းလုၵ်ႈၸၢႆး ႁႃႇမၢၼ်ႇ သိပ်းၵေႃႉတၢႆပႅတ်ႈ ၵႃႈၼႂ်းႁေႃၶမ်း သူႉသၼ်ႇ ၼႆႉယဝ်ႉ။ ၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈၼႆႉ ၵူႈသိုင်ႇၵူႈမိူင်း ၵူႈဢိူင်ႇၵူႈၵျၢၵ်ႈ ဢၼ်ၵိုတ်းၵျၢၼ်ႇၸိူဝ်းၼၼ်ႉၸိုင် ၶဝ်ႁဵတ်းၸိူဝ်ႉၼင်ႇႁိုဝ်ယဝ်ႉဢမ်ႇႁူႉ။ မႂ်းယင်းမီးဢလူဝ်ႇၶႂ်ႈလႆႈၵႃႈသင်လူးၵွၼ်ႇ။ ၵဝ်တၵ်းႁဵတ်းၸွမ်းၵႃႈဢၼ်မႂ်းမီးဢလူဝ်ႇၶႂ်ႈလႆႈၼၼ်ႉဢေႃႈ။ မႂ်းၶႂ်ႈယွၼ်းဢဝ်သူးလၢပ်ႈၵႃႈသင်လူးၵွၼ်ႇ။ ၵဝ်တၵ်းပၼ်ၵႃႈဢၼ်မႂ်းယွၼ်းဢဝ်ၼၼ်ႉဢေႃႈ၊ ဝႃႈၼင်ႇၼႆသေယဝ်ႉ၊-

13ဢေးသတႃႇ ၶိုၼ်းလဝ်ႊလၢတ်ႈလႄႈဝႃႈ၊ ပေႃးၸဝ်ႈၶုၼ်လူင်မီးဢလူဝ်ႇၸိုင်ၶႅၼ်းတေႃႈမီးဢမိင်ႉႁႂ်ႈၵူၼ်း ယူႉတႃႉ ဢၼ်မီးၵႃႈၼႂ်းဝဵင်း သူႉသၼ်ႇ ၸိူဝ်းၼႆႉ လႆႈႁဵတ်းထႅင်ႈဝၼ်းမိူဝ်ႈၽုၵ်ႈ ၸွမ်းၵႃႈၼင်ႇဢၼ်ဢမိင်ႉၸဝ်ႈမီးဝႆႉပုၼ်ႈဝၼ်းမိူဝ်ႈၼႆႉၼၼ်ႉလႄႈ ႁႂ်ႈဢဝ်လုၵ်ႈၸၢႆး ႁႃႇမၢၼ်ႇ သိပ်းၼိုင်ႈၼၼ်ႉ မတ်ႉႁွႆႈၶႅၼ်ၶေႃးတူၵ်းၵႃႈတီႈသဝ်ဢၼ်မတ်ႉႁွႆႈၶႅၼ်ၶေႃးတူၵ်းၼၼ်ႉသေၵမ်းတီႈၶႃႈ၊ ဝႃႈၼင်ႇၼႆလႄႈ၊-

14ၶုၼ်ႁေႃၶမ်းမီးဢမိင်ႉႁႂ်ႈႁဵတ်းၸိူဝ်ႉၼင်ႇၼၼ်လႄႈ ထုတ်ႇဢွၵ်ႇဢမိင်ႉၸဝ်ႈၵႃႈတီႈဝဵင်း သူႉသၼ်ႇ သေယဝ်ႉ၊ ၶဝ်ဢွၼ်ၵၼ်ဢဝ်လုၵ်ႈၸၢႆး ႁႃႇမၢၼ်ႇ သိပ်းၼိုင်ႈၼၼ်ႉမတ်ႉႁွႆႈၵႅၼ်ၶေႃးတူၵ်းဢေႃႈ။-

15ၵူၼ်း ယူႉတႃႉ ဢၼ်မီးၵႃႈၼႂ်းဝဵင်း သူႉသၼ်ႇ ၸိူဝ်းၼၼ်ႉ ၸူႉၵၼ်တုမ်ၵၼ် ၼႂ်းဝၼ်းဢၼ်လိူၼ် ဢႃႇတႃႇ လႆႈသိပ်းသီႇဝၼ်းၼၼ်ႉသေလႄႈ ဢွၼ်ၵၼ်ဢဝ်ၵူၼ်းၵႃႈၼႂ်းဝဵင်း သူႉသၼ်ႇ တၢႆ သၢမ်ပၢၵ်ႇဢေႃႈ။ ၵူၺ်းၵႃႈၶဝ်ဢမ်ႇႁိမ်ႁူင်ႇသိမ်းဢဝ်ဢုၵ်ႉၸႃႇၶဝ်ၼၼ်ႉလႄႈယူႇဢေႃႈ။-

16ၵူၼ်း ယူႉတႃႉ တၢင်ႇတီႈတၢင်ႇလႅၼ် ဢၼ်မီးယူႇၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈ ၵူႈသိုင်ႇၵူႈမိူင်း ၵူႈဢိူင်ႇၵူႈၵျၢၵ်ႈၸိူဝ်းၼၼ်ႉ ၸူႉၵၼ်တုမ်ၵၼ်သေလႄႈ ပႂ်ႉဢသၢၵ်ႈၶဝ်လႄႈ လႆႈၵတ်းယဵၼ်ၶျၢမ်းသႃႇၵၢင်းလွတ်ႈၵႃႈၼႂ်းမိုဝ်းရၢၼ်ႇသူႇၶဝ်သေလႄႈ ဢဝ်ၶဝ်ၸိူဝ်းဢၼ်ၸင်းၶဝ်ၼၼ်ႉတၢႆၸဵတ်းမိုၼ်ႇပၢႆႁႃႈႁဵင်ဢေႃႈ။ ၵူၺ်းၵႃႈၶဝ်ယင်းဢမ်ႇႁိမ်ႁူင်ႇသိမ်းဢဝ်ဢုၵ်ႉၸႃႇၶဝ်ၼၼ်ႉလႄႈ ယူႇဢေႃႈ။-

17ၶဝ်ႁဵတ်းၸိူဝ်ႉၼင်ႇၼၼ်ၼႂ်းလိူၼ် ဢႃႇတႃႇ သိပ်းသၢမ်ဝၼ်းၼၼ်ႉလႄႈ ၼႂ်းဝၼ်းလိုၼ်း ဢႃႇတႃႇ သိပ်းသီႇဝၼ်းၼၼ်ႉ ၶဝ်ယူႇၼိမ်ၼိမ်လီလီသေလႄႈ ဢွၼ်ၵၼ်ႁႂ်ႈပဵၼ်ဝၼ်းဢၼ်ၶၢမ်ႇပွႆး၊ ဝၼ်းဢၼ်ၸူမ်းသိူဝ်းမူၼ်ႈပျေႃႇဢေႃႈ။-

18ၵူၼ်း ယူႉတႃႉ ဢၼ်မီးၼႂ်းဝဵင်း သူႉသၼ်ႇ ၸိူဝ်းၼၼ်ႉၸမ်ႉ၊ ၸူႉၵၼ်တုမ်ၵၼ်ၼႂ်းဝၼ်းသိပ်းသၢမ်ဝၼ်း တင်းဝၼ်းသိပ်းသီႇဝၼ်းၼၼ်ႉဢေႃႈ။ ၼႂ်းဝၼ်းဢၼ်ထူၼ်ႈထိုင်သိပ်းႁႃႈဝၼ်းၼၼ်ႉၸိုင်၊ ၶဝ်ယူႇၼိမ်ၼိမ်လီလီလႄႈ ဢွၼ်ၵၼ်ႁႂ်ႈပဵၼ်ဝၼ်းဢၼ် ၶၢမ်ႇပွႆး၊ ဝၼ်းဢၼ်ၸူမ်းသိူဝ်းမူၼ်ႈပျေႃႇဢေႃႈ။-

19ပိူဝ်ႈၼႆလႄႈ ၵူၼ်း ယူႉတႃႉ ဢၼ်မီးၵႃႈၼွၵ်ႈၵႃႈပၢင်ႇလႄႈယူႇၵႃႈၼႂ်းဝၢၼ်ႈဢၼ်ဢမ်ႇမီးလမ်းဝဵင်းၼၼ်ႉၸိူဝ်းၼၼ်ႉၵေႃႈ ဢွၼ်ၵၼ်ႁႂ်ႈဝၼ်းလိူၼ် ဢႃႇတႃႇ သိပ်းသီႇဝၼ်းၼၼ်ႉ ပဵၼ်ဝၼ်းဢၼ်ၸူမ်းသိူဝ်းမူၼ်ႈပျေႃႇ၊ ဝၼ်းဢၼ်ၶၢမ်ႇပွႆး၊ ဝၼ်းမင်ႇၵလႃႇ၊ ဝၼ်းဢၼ်ၵေႃႉၼိုင်ႈလႄႈၵေႃႉၼိုင်ႈ ပၼ်လၢၵ်ႈသွင်ႇၸူးၵၼ်ဢေႃႈ။

20လႆႈသမ်ႉ မေႃႇတၵႄး ၼၼ်ႉ တႅမ်ႈလွင်ႈတၢင်းၸိူဝ်းၼႆႉဝႆႉလႄႈ ပၼ်လိၵ်ႈၵႂႃႇတီႈၵူၼ်း ယူႉတႃႉ ၵႃႈဢၼ်မီးတီႈဢၼ်ၸမ်၊ တီႈဢၼ်ၵႆ၊ ၵႃႈၼႂ်းသိုင်ႇၸိုင်ႈဝၢၼ်ႈမိူင်း ဢႃႇသူၺ်ႇရူႉ ၵူႈသိုင်ႇၵူႈမိူင်း ၵူႈဢိူင်ႇၵူႈၵျၢၵ်ႈၼၼ်ႉၸိူဝ်းၼၼ်ႉလႄႈ၊-

21သင်ႇလၢတ်ႈၵႂႃႇႁႂ်ႈၶဝ်ႁဵတ်းထုင်းၸၢမ်ႇ ဢၼ်ပႂ်ႉဝၼ်းလိူၼ် ဢႃႇတႃႇ သိပ်းသီႇဝၼ်း ဢိၵ်ႇတင်းသိပ်းႁႃႈဝၼ်း ၵူႈပီႊၵူႈပီႊ၊-

22ဢၼ်ဝႃႈ ဝၼ်းဢၼ်ၵူၼ်း ယူႉတႃႉ တင်းလၢႆ လႆႈၵတ်းယဵၼ်ၶျၢမ်းသႃႇ ၵၢင်းလွတ်ႈၵႃႈၼႂ်းမိုဝ်းရၢၼ်ႇသူႇၶဝ်၊ လိူၼ်ဢၼ် တၢင်းဢၼ်ၶဝ်ယၢပ်ႇၸႂ်ၶၢၼ်ၸႂ်ၼၼ်ႉ ၶၢႆႉပုတ်ႈလႄႈႁွတ်ႈထိုင်တၢင်းဢၼ်ၸူမ်းသိူဝ်းမူၼ်ႈပျေႃႇ တၢင်းဢၼ်ၶဝ်ၶၢင်းၶီၶၢင်းၽၢၼ်ၼၼ်ႉ ၶၢႆႉပုတ်ႈလႄႈႁွတ်ႈထိုင်ဝၼ်းဢၼ်မင်ႇၵလႃႇ၊ ဢိၵ်ႇတင်းႁႂ်ႈပဵၼ်ဝၼ်းဢၼ်ၶၢမ်ႇပွႆး၊ ဝၼ်းဢၼ်ၸူမ်းသိူဝ်းမူၼ်ႈပျေႃႇ၊ ဝၼ်းဢၼ်ၵေႃႉၼိုင်ႈလႄႈၵေႃႉၼိုင်ႈပၼ်လၢၵ်ႈသွင်ႇၸူးၵၼ်လႄႈ ၽႄၸွၼ်းယိုၼ်ႈမႅင်ႇတီႈၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၼၼ်ႉဢေႃႈ။-

23ၵူၼ်း ယူႉတႃႉ ၸိူဝ်းၼၼ်ႉၵေႃႈ ဢွၼ်ၵၼ်ႁပ်ႉတုင်းဢဝ်လွင်ႈဢၼ်ၶဝ်တၵ်းႁဵတ်းၸွမ်းၵႃႈၼင်ႇဢၼ်ၶဝ် တႄႇၸႃႉႁဵတ်းၼၼ်ႉ ဢိၵ်ႇတင်းၵႃႈၼင်ႇဢၼ် မေႃႇတၵႄး တႅမ်ႈပၼ်ဝႆႉတီႈၶဝ်ၼၼ်ႉဢေႃႈ။-

24လွင်ႈမၼ်းၸမ်ႉ ႁႃႇမၢၼ်ႇ လုၵ်ႈၸၢႆး ႁမ်ႇမေႇတႃႇသႃႉ မဵဝ်း ဢႃႇၵတ်ႉ ဢၼ်ပဵၼ်ရၢၼ်ႇသူႇၵူၼ်း ယူႉတႃႉ တင်းသဵင်ႈတင်းလူင်ၼၼ်ႉ မီးတၢင်းၵျၢမ်ႇတၢင်းပွင်ယူႇၽၢႆႇၼိုင်ႈ တင်းၵူၼ်း ယူႉတႃႉ တင်းလၢႆ ႁႂ်ႈလႆႈယႃႉၶဝ်ပႅတ်ႈလႄႈ တူၵ်းၸႃႇၵွၵ်ႈ ပူႉရႃႉ ဢၼ်ဝႃႈ တၢင်းဢၼ်တူၵ်းၸႃႇၵွၵ်ႈ ႁႂ်ႈလႆႈယႃႉၶဝ်ပႅတ်ႈၼၼ်ႉသေၵေႃႈ၊-

25မိူဝ်ႈဢၼ် ဢေးသတႃႇ ၶဝ်ႈၸူးတီႈၶုၼ်ႁေႃၶမ်းၼၼ်ႉၸိုင်၊ ၶုၼ်ၼၼ်ႉပူင်ဢမိင်ႉ ႁႂ်ႈတၢင်းၵျၢမ်ႇတၢင်းပွင်ဢႃႉထမ်ႇမႃႉ ဢၼ် ႁႃႇမၢၼ်ႇ ၵျၢမ်ႇပွင်ယူႇၽၢႆႇၼိုင်ႈ တင်းၵူၼ်း ယူႉတႃႉ တင်းလၢႆၼၼ်ႉ ၶိုၼ်းႁွတ်ႈၶိုၼ်းထိုင် ၵႃႈၼိူဝ်ႁူဝ်မၼ်း ဢိၵ်ႇတင်းႁႂ်ႈဢဝ်မၼ်းတင်းလုၵ်ႈၸၢႆးမၼ်းၸိူဝ်းၼၼ်ႉ မတ်ႉႁွႆႈၵႅၼ်ၶေႃးတူၵ်းၵႃႈတီႈသဝ်ဢၼ်မတ်ႉႁွႆႈၵႅၼ်ၶေႃးတူၵ်းၼၼ်ႉဢေႃႈ။-

26ပိူဝ်ႈၼႆလႄႈ ၶဝ်ဢွၼ်ၵၼ်ႁွင်ႉႁဵၵ်ႈဝၼ်းၸိူဝ်းၼၼ်ႉ ၸိုဝ်ႈ ပူႉရိမ်း ၸွမ်းလူၺ်ႈၸိုဝ်ႈသဵင် ပူႉရႃႉ ၼၼ်ႉဢေႃႈ။ ထွၵ်ႈလူၺ်ႈၵႂၢမ်းဢမိင်ႉၸဝ်ႈၵႃႈမီးၼၼ်ႉ ဢိၵ်ႇတင်းလွင်ႈတၢင်းဢၼ်ၶဝ်ထူပ်းႁၼ်လူၺ်ႈလွင်ႈဢမူႉၼႆႉ တင်းလွင်ႈတၢင်းဢၼ်ႁွတ်ႈထိုင်ၵႃႈၼိူဝ်ၶဝ်ၼၼ်ႉသေလႄႈ၊-

27ၵူၼ်း ယူႉတႃႉ တင်းလၢႆ ဢွၼ်ၵၼ်ၸီႇယၢင်ႇလႄႈႁပ်ႉတုင်းဢဝ် လွင်ႈဢၼ်တူဝ်ၸဝ်ႈၵဝ်ႇ ဢိၵ်ႇတင်းၸူဝ်ႈလုၵ်ႈပၢၼ်လၢၼ်ၶဝ် တင်းၶဝ်ၸိူဝ်းဢၼ်ၶဝ်ႈၽႃႇသႃႇၶဝ်ၵႃႈမီးၼၼ်ႉ ယင်းဢမ်ႇႁႂ်ႈလုတ်ႈႁႂ်ႈႁၢမ်းလႄႈ တၵ်းဢွၼ်ၵၼ်ပႂ်ႉၵမ်ပႂ်ႉၸွမ်း ဝၼ်းသွင်ဝၼ်းၼၼ်ႉ ၵူႈပီႊၵူႈပီႊ ၸွမ်းၵႃႈၼင်ႇဢၼ်မၵ်းၶၢၼ်းၶိင်ႇမၼ်းဝႆႉၼၼ်ႉ ဢိၵ်ႇတင်းၵႃႈဢၼ်ၸီႇယၢင်ႇဝႆႉၵႃႈၼႂ်းလိၵ်ႈၼၼ်ႉ၊-

28ဢိၵ်ႇတင်း လွင်ႈဢၼ်တၵ်းၶုၵ်းၸႂ်လႆႈၶႆႈၸႂ်ထူပ်းဝၼ်းၸိူဝ်းၼၼ်ႉလႄႈ ပႂ်ႉၵမ်ပႂ်ႉၸွမ်းၵႃႈတီႈၸူဝ်ႈလုၵ်ႈပၢၼ်လၢၼ်၊ ၵူႈၸူဝ်ႈၵူႈပၢၼ်၊ ပီႈၼွင်ႉၸိူဝ်ႉၶိူဝ်းၵူႈၸိူဝ်ႉၵူႈၶိူဝ်း ၵႃႈၼႂ်းၵူႈသိုင်ႇၵူႈမိူင်း ၵူႈဢိူင်ႇၵူႈၵျၢၵ်ႈ၊ ၵႃႈၼႂ်းၵူႈဝၢၼ်ႈၵူႈဝဵင်း ဢိၵ်ႇတင်းလွင်ႈဢၼ်ဝၼ်း ပူႉရိမ်း ၸိူဝ်းၼၼ်ႉ တၵ်းဢမ်ႇလႆႈလုတ်ႈသေႁၢမ်းသေၵႃႈၼႂ်းၵူၼ်း ယူႉတႃႉ တင်းလၢႆလႄႈ တၢင်းဢၼ်တၵ်းၶုၵ်းၸႂ်လႆႈၶႆႈၸႂ်ထူပ်းဝၼ်းၸိူဝ်းၼၼ်ႉ ဢမ်ႇလႆႈလူႉၵႂႃႇႁၢႆၵႂႃႇသေ ၵႃႈတီႈၸူဝ်ႈလုၵ်ႈပၢၼ်လၢၼ်ၶဝ်ၼၼ်ႉဢေႃႈ။-

29မိူဝ်ႈၼၼ်ႉၼၢင်းႁေႃၶမ်း ဢေးသတႃႇ လုၵ်ႈယိင်း ဢၽီႉႁေးလႃႉ ဢိၵ်ႇတင်း မေႃႇတၵႄး မဵဝ်း ယူႉတႃႉ ၼၼ်ႉ ဢွၼ်ၵၼ်ဝႆႉဢႃႇၼႃႇဢၼ်ႁႅင်းယႂ်ႇၼႃႇလူင်လၢင်လႄႈ တႅမ်ႈပၼ်ၵႂႃႇႁႂ်ႈၸီႇယၢင်ႇလူၺ်ႈလွင်ႈဝၼ်း ပူႉရိမ်း ၸိူဝ်းၼၼ်ႉၼၼ်ႉ လႆႈတႄႇယူႇမၼ်ႈၶိူင်ႇၼၼ်ႉဢေႃႈ။-

30မၼ်းဢဝ်ၵႂၢမ်းတၢင်းၼိမ် ဢိၵ်ႇတင်းၵႂၢမ်းသဵတ်ႈၸႃႇသေလႄႈ ပၼ်လိၵ်ႈၵႂႃႇတီႈၵူၼ်း ယူႉတႃႉ တင်းသဵင်ႈတင်းလူင် ၵႃႈတီႈမိူင်း ပၢၵ်ႇသၢဝ်းပၢႆၸဵတ်းမိူင်း ၵႃႈၼႂ်းသိုင်ႇၸိုင်ႈဝၢၼ်ႈမိူင်း ဢႃႇသူၺ်ႇရူႉ ၼၼ်ႉ၊-

31ႁႂ်ႈဝၼ်း ပူႉရိမ်း ၸိူဝ်းၼၼ်ႉ လႆႈတႄႇယူႇမၼ်ႈၶိူင်ႇၼႂ်းၶိင်ႇမၼ်းဢၼ်မၵ်းၶၢၼ်းဝႆႉၼၼ်ႉ ၸွမ်းၵႃႈၼင်ႇဢၼ် မေႃႇတၵႄး ၵူၼ်းမဵဝ်း ယူႉတႃႉ ဢိၵ်ႇတင်းၼၢင်းႁေႃၶမ်း ဢေးသတႃႇ သင်ႇလၢတ်ႈလႄႈ ၸီႇယၢင်ႇဝႆႉတၢင်းဢၼ်ၵမ်တၢင်းၵိၼ်ဢၼ်သူးတွင်းၼၼ်ႉ ပုၼ်ႈတူဝ်ၸဝ်ႈၵဝ်ႇ ဢိၵ်ႇတင်းပုၼ်ႈၸူဝ်ႈလုၵ်ႈပၢၼ်လၢၼ်ၶဝ်ၸိူဝ်းၼၼ်ႉဢေႃႈ။-

32ဢမိင်ႉ ဢေးသတႃႇ ၼၼ်ႉ ႁႂ်ႈလွင်ႈတၢင်းဢၼ်ၸၢပ်ႈသႅင်ႇၵၼ်တင်းဝၼ်း ပူႉရိမ်း ၸိူဝ်းၼၼ်ႉတႄႇယူႇမၼ်ႈၶိူင်ႇလႄႈ မီးတၢင်းဢၼ်တႅမ်ႈဝႆႉလွင်ႈမၼ်းၵႃႈၼႂ်းလိၵ်ႈၼႆႉယူႇဢေႃႈ။