Esther 7

Shan

← Chapter 6 Jump to: Chapter 8 →

1ၼင်ႇၼၼ်လႄႈ ၶုၼ်ႁေႃၶမ်းဢိၵ်ႇတင်း ႁႃႇမၢၼ်ႇ ဢွၼ်ၵၼ်မႃး ႁႂ်ႈလႆႈသူတ်ႉလႆႈၵိၼ်ၼမ်ႉၸပိတ်ႈလူၺ်ႈၵၼ်တင်း ၼၢင်းႁေႃၶမ်း ဢေးသတႃႇ ဢေႃႈ။-

2ၶုၼ်ႁေႃၶမ်းမီးဢမိင်ႉတီႈ ဢေးသတႃႇ ၵႃႈၼႂ်းပွႆးၼမ်ႉၸပိတ်ႈၼၼ်ႉၼႂ်းဝၼ်းတူႉတီႉယႃႉၼၼ်ႉလႄႈဝႃႈ၊ ၼၢင်းႁေႃၶမ်း ဢေးသတႃႇ ဢိူၺ်း၊ မႂ်းမီးဢလူဝ်ႇၶႂ်ႈလႆႈၵႃႈသင်။ ၵဝ်တၵ်းပၼ်ၵႃႈဢၼ်မႂ်းမီးဢလူဝ်ႇၶႂ်ႈလႆႈၼၼ်ႉဢေႃႈ။ မႂ်းၶႂ်ႈယွၼ်းဢဝ်သူးလၢပ်ႈၵႃႈသင်။ ၵဝ်တၵ်းပၼ်ၵႃႈဢၼ်မႂ်းယွၼ်းဢဝ်ၼၼ်ႉ တေႃႇထိုင်ႁွတ်ႈသိုင်ႇၸိုင်ႈဝၢၼ်ႈမိူင်းၸဝ်ႈၽၢၵ်ႇၼိုင်ႈဢေႃႈ၊ ဝႃႈၼင်ႇၼႆသေယဝ်ႉ၊-

3ၼၢင်းႁေႃၶမ်း ဢေးသတႃႇ ၶိုၼ်းလဝ်ႊလၢတ်ႈလႄႈဝႃႈ၊ ၸဝ်ႈၶုၼ်လူင်တီႈၶႃႈ၊ ပေႃးၶိင်းပဵၼ်ၶႃႈထုၵ်ႇၸႂ်မႅၼ်ႈၸႂ်ၸဝ်ႈႁဝ်း၊ ပေႃးၸဝ်ႈႁဝ်းမီးဢလူဝ်ႇၸိုင် ၶႅၼ်းတေႃႈပၼ်ဢသၢၵ်ႈၶိင်းပဵၼ်ၶႃႈ ၵတ်းယဵၼ်ၶျၢမ်းသႃႇၸွမ်းၵႃႈၼင်ႇဢၼ်ၶိင်းပဵၼ်ၶႃႈမီးဢလူဝ်ႇၶႂ်ႈလႆႈၼၼ်ႉ ဢိၵ်ႇတင်းဢသၢၵ်ႈမဵဝ်းၸိူဝ်ႉၶိူဝ်းၶိင်းပဵၼ်ၶႃႈၵတ်းယဵၼ်ၶျၢမ်းသႃႇ ၸွမ်းၵႃႈၼင်ႇဢၼ်ၶိင်းပဵၼ်ၶႃႈတွင်းပၢၼ်ႇၼၼ်ႉသေၵမ်းတီႈၶႃႈ။-

4ပိူၼ်ႈၶႃႉပိူၼ်ႈၶၢႆ ႁႂ်ႈၶိင်းပဵၼ်ၶႃႈ ဢိၵ်ႇတင်းမဵဝ်းၸိူဝ်ႉၶိူဝ်းၶိင်းပဵၼ်ၶႃႈ လႆႈၶၢမ်ႇတၢင်းဢၼ်ၶႃႈၽၼ်းဢဝ်တၢႆပႄႇၽဵဝ်ႈပႅတ်ႈတီႈၶႃႈယဝ်ႉ။ သင်ၶႃႈၶႂ်ႈႁႂ်ႈလႆႈပဵၼ်ၶႃႈမႄႈယိင်း၊ ၶႃႈၵူၼ်းၸၢႆးၵူၺ်းၸိုင်၊ ပိၵ်ႉသမ်ႉရၢၼ်ႇသူႇၼၼ်ႉ ဢမ်ႇပၼ်ၵႃႈၶၼ်ဢၼ်တၢၼ်ႇၵၼ်ပဵင်းၵၼ်တင်း တၢင်းဢၼ်ဢၵျူဝ်းၶုၼ်ႁေႃၶမ်းလူႉၼၼ်ႉလႆႈသေၵေႃႈ၊ ၶိင်းပဵၼ်ၶႃႈတၵ်းယူႇတဵတ်ႇတဵတ်ႇယဵၼ်ယဵၼ် ဢမ်ႇတၵ်းသဵင်လႄႈယူႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

5မိူဝ်ႈၼၼ်ႉၶုၼ်ႁေႃၶမ်း ဢႃႇသူၺ်ႇရူႉ ထၢမ်တီႈၼၢင်းႁေႃၶမ်း ဢေးသတႃႇ လႄႈဝႃႈ၊ ၵေႃႉဢၼ်ၵျၢမ်ႇပွင်တၵ်းႁဵတ်းၸိူဝ်ႉၼင်ႇၼၼ်ၼၼ်ႉၸမ်ႉ၊ ပဵၼ်ၽူႈလႂ်။ မီးၵႃႈတီႈလႂ်၊ ဝႃႈၼင်ႇၼႆသေယဝ်ႉ၊-

6ဢေးသတႃႇ လဝ်ႊလၢတ်ႈလႄႈဝႃႈ၊ ရၢၼ်ႇသူႇဢၼ်ႁဵတ်းရၢၼ်ႇတၢင်းၽိတ်းၼၼ်ႉ ပဵၼ် ႁႃႇမၢၼ်ႇ ဢၼ်ႁၢႆႉယုတ်ႈၼႆႉတီႈၶႃႈဢေႃႈ။ မိူဝ်ႈဢၼ်ဝႃႈၼင်ႇၼႆၸိုင်၊ ႁႃႇမၢၼ်ႇ ၼၼ်ႉ ငိၼ်းၵူဝ်ငိၼ်းႁႄၵႃႈတီႈၽၢႆႇၼႃႈၶုၼ်ႁေႃၶမ်း ဢိၵ်ႇတင်းၼၢင်းႁေႃၶမ်းၼၼ်ႉဢေႃႈ။

7မိူဝ်ႈၼၼ်ႉ ၶုၼ်ႁေႃၶမ်းမီးတၢင်းဢၼ်ၸႂ်မႆႈၶႆႈၸႃႉသေလႄႈ လုၵ်ႉသေၵႃႈတီႈပွႆးၼမ်ႉၸပိတ်ႈၼၼ်ႉလႄႈ ၶဝ်ႈၵႂႃႇၵႃႈၼႂ်းသူၼ်ဢူးယဵၼ်ႇႁေႃၸဝ်ႈဢေႃႈ။ ႁႃႇမၢၼ်ႇ ႁူႉသၢႆငၢႆႈ လွင်ႈဢၼ်ၶုၼ်ႁေႃၶမ်း တၵ်းပၼ်ဢပႅတ်ႈတီႈမၼ်းၼၼ်ႉလႄႈ လုၵ်ႉၸုၵ်းႁႂ်ႈလႆႈႁဵတ်းတၢင်းဢၼ်တွင်းပၢၼ်ႇယွၼ်းဢဝ်ဢၶႂၢင်ႉတီႈၼၢင်းႁေႃၶမ်း ဢေးသတႃႇ ႁႂ်ႈဢသၢၵ်ႈမၼ်းလႆႈၵတ်းယဵၼ်ၶျၢမ်းသႃႇဢေႃႈ။-

8ၶုၼ်ႁေႃၶမ်းသမ်ႉ လုၵ်ႉသေၵႃႈတီႈသူၼ်ဢူးယဵၼ်ႇႁေႃၸဝ်ႈ ၶိုၼ်းၶဝ်ႈၸူးၵႃႈတီႈပွႆးၼမ်ႉၸပိတ်ႈၼၼ်ႉထႅင်ႈလႄႈ ႁၼ် ႁႃႇမၢၼ်ႇ ၶုပ်ႉမူပ်ႇယူႇၵႃႈၼိူဝ်ၵူႇငိုၵ်း တီႈဢၼ် ဢေးသတႃႇ ၼင်ႈၼၼ်ႉလႄႈ မီးဢမိင်ႉလႄႈဝႃႈ၊ ၵေႃႉၼႆႉတၵ်းလႆႈႁဵတ်းဢႃႉထမ်ႇမႃႉတီႈ ၼၢင်းႁေႃၶမ်းၵႃႈတီႈၽၢႆႇၼႃႈၵဝ် ၵႃႈၼႂ်းႁေႃၸဝ်ႈၼႆႉႁိုဝ်။ ဝႃႈၼင်ႇၼႆလႄႈ ၼႂ်းမိူဝ်ႈဢၼ်ယင်းတိုၵ်ႉမီးဢမိင်ႉၸိူဝ်ႉၼင်ႇၼႆယူႇၼၼ်ႉၸိုင် ၶဝ်ဢွၼ်ၵၼ်ႁူမ်ႇသုမ်ႇၼႃႈ ႁႃႇမၢၼ်ႇ ဢေႃႈ။-

9မိူဝ်ႈၼၼ်ႉ ႁႃႇပေႃႇၼႃႉ ၵူၼ်းထိင်းၼၢင်းဢၼ်မီးၵႃႈတီႈၽၢႆႇၼႃႈၶုၼ်ႁေႃၶမ်းၼၼ်ႉၵေႃႉၼိုင်ႈ လဝ်ႊလၢတ်ႈလႄႈဝႃႈ၊ တူၺ်းတီႈၶႃႈလူး။ သဝ်ဢၼ်မတ်ႉႁွႆႈၵႅၼ်ၶေႃးတူၵ်း ဢၼ်သုင်ႁႃႈသိပ်းသွၵ်ႇ ဢၼ် ႁႃႇမၢၼ်ႇ ႁဵတ်းဝႆႉပုၼ်ႈ မေႃႇတၵႄး ၵေႃႉဢၼ်ပႂ်ႉဢၵျူဝ်းၸဝ်ႈၶုၼ်လူင်သေလႄႈလဝ်ႊလၢတ်ႈၼၼ်ႉၼၼ်ႉ ပၵ်းဝႆႉမီးယူႇၵႃႈတီႈႁိူၼ်း ႁႃႇမၢၼ်ႇ ၼၼ်ႉတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊ ၶုၼ်ႁေႃၶမ်းမီးဢမိင်ႉလႄႈဝႃႈ၊ ဢဝ်မၼ်းၵႂႃႇမတ်ႉႁွႆႈၵႅၼ်ၶေႃးတူၵ်းၵႃႈတီႈၼၼ်ႈသေ၊ ဝႃႈၼင်ႇၼႆဢေႃႈ။-

10ၼင်ႇၼၼ်လႄႈ ၶဝ်ဢွၼ်ၵၼ်ဢဝ် ႁႃႇမၢၼ်ႇ မတ်ႉႁွႆႈၵႅၼ်ၶေႃးတူၵ်းၵႃႈတီႈသဝ်ဢၼ်မတ်ႉႁွႆႈၵႅၼ်ၶေႃးတူၵ်း ဢၼ်မၼ်းႁဵတ်းဝႆႉႁႅၼ်းဝႆႉပုၼ်ႈ မေႃႇတၵႄး ၼၼ်ႉဢေႃႈ။ တၢင်းၸႂ်မႆႈၶႆႈၸႃႉၶုၼ်ႁေႃၶမ်းထၢတ်ႇၵႂႃႇယဵၼ်ၵႂႃႇသေဢေႃႈ။

← Chapter 6 Jump to: Chapter 8 →